...

დაბრუნება (2000-2009)

ახალი საუკუნის პირველი ათი წელიწადი მიუნხენური გრანდისთვის ძალიან წარმატებული და რევოლუციური გამოდგა. "ბაიერნმა" ექვსი ბუნდესლიგის ტიტული მოიგო, აქედან ხუთჯერ დუბლი გააკეთა და ახალ დონეზე ავიდა. ამას დაემატა 2001 წელს უაღრესად მნიშვნელოვანი და ემოციური მოვლენა - ჩემპიონთა ლიგის მოგება, რამაც "რეკორდმაისტერს" უდიდესი სიხარული მოუტანა. ამ დიდი წარმატებების ხარჯზე კი კლუბმა სერიოზული ფინანსური მოგება ნახა და მალევე ახალი, უნიკალური არენა ააშენა, მაგრამ მანამდე ოტმარ ჰიტცფელდმა დაიწყო აღმასვლა.
1999 წლის "კამპ ნოუს" ტრაგიკული ფინალის შემდეგ "ბაიერნის" ლიდერებმა: ოლივერ კანმა, შტეფან ეფენბერგმა და ჯოვანი ელბერიმ, თავი ხელში აიყვანეს და წარმატებისკენ ბრძოლა ორმაგი მოტივაციით გააგრძელეს. ევროპის ყველაზე პრესტიჟულ ტურნირზე "ბაიერნს" ამჯერად მადრიდის "რეალი" გადაეღობა. მიუნხენელებმა "ბლანკოსი" ჯგუფურ ეტაპზე გაანადგურეს (4:2 მადრიდში და 4:1 მიუნხენში), მაგრამ ვისენტე დელ ბოსკეს გუნდმა რევანში ნახევარფინალში აიღო, ორი მატჩის ჯამში 3:2 იმარჯვა და საბოლოოდ თასიც მოიპოვა. ბუნდესლიგაში კი ჰიტცფელდის გუნდი ნამდვილ დრამას დგამდა. 1999/00 წლების სეზონში "ბაიერნს" დახმარება სოფლის მეზობელმა გუნდმა, "უნტერჰახინგმა" გაუწია, რომელმაც ბუნდესლიგის ბოლო ტურში ლიდერი ლევერკუზენის "ბაიერი" 2:0 დაამარცხა და ეს საჩუქარი მიუნხენელებმა იდეალურად გამოიყენეს.

2000/01 წლების სეზონი კი "ბაიერნის" თანამედროვე ისტორიის უმნიშვნელოვანესი ნაწილია. სწორედ ამ სეზონის ბოლოს გამოიკვეთა ის არანორმალური ხასიათი, რომლის წყალობითაც "წითლებმა" 1999 წლის დიდი ფსიქოლოგიური დარტყმა გადაიტანეს და ბოლომდე ბრძოლით მიზანს მაინც მიაღწიეს. ვერცხლის სინის ბედი კვლავ ბოლო ტურში გადაწყდა. "შალკემ" თავისი თამაში მარტივად, 5:3 მოიგო, "ბაიერნი" კი "ჰამბურგს" სტუმრობდა. 88-ე წუთზე სერჟი ბარბარესმა თავური დარტყმით ოლივერ კანის კარი აიღო, რამაც სრულიად მიუნხენი შოკში ჩააგდო. მანამ, სანამ "რეკორდმაისტერის" სათადარიგო სკამი, სამწვრთნელო შტაბი და ძირითადი გუნდი სახეწაშლილი გონს მოდიოდა, კანმა ბურთი მოედნის ცენტრამდე წაიღო, ეფენბერგი კი პარტნიორებს ამხნევებდა. ამ ორი ადამიანის გარდა "ბაიერნის" გადარჩენის ალბათ აღარავის სჯეროდა, რადგან გელზნკირხენში ზეიმი დაწყებული იყო და "შალკეს" ქომაგები სტადიონზე შეცვივდნენ. თუმცა, "ჰამბურგის" უკანა ხაზელებმა უაზრო შეცდომა დაუშვეს და "ბაიერნმა" თავისუფალი დარტყმის უფლება მოიპოვა. ეფემ ბურთი პატრიკ ანდერსონს დაუგორა და შვედმა მცველმა ვერცხლის სინი მიუნხენში დააბრუნა. გელზენკირხენი ტრაგედიამ მოიცვა, "ბაიერნმა" კი ზედიზედ მესამე საჩემპიონო ტიტული მოიპოვა.

ჩემპიონთა ლიგაზე კი ოტმარ ჰიტცფელდის გუნდმა დიდებული გზა გაიარა და მილანის საგზური დამსახურებულად მოიპოვა. მეოთხედფინალში მიუნხენელებმა სერ ალექს ფერგიუსონის ბრწყინვალე "მანჩესტერ იუნაიტედი" დაამარცხეს (სტუმრად 1:0 და შინ 2:1), შემდეგ კი მოქმედი ჩემპიონი "რეალიც" გამოაგდეს. მადრიში ჯოვანი ელბერიმ გამოიჩინა თავი, ხოლო მიუნხენში "ბაიერნმა" 2:1 იმარჯვა და ფინალში გავიდა. "სან სიროზე" 23 მაისს ჰიტცფელდის გუნდს ექტორ რაულ კუპერის "ვალენსია" დაუპირისპირდა. ესპანელები ზედიზედ მეორედ გავიდნენ ფინალში და წაგება ძალიან არ უნდოდათ. ძირითადი და დამატებითი დრო ფრედ 1:1 დასრულდა. მენდიეტას პენალტს ეფენბერგმა ასევე პენალტით უპასუხა და გამარჯვებულის ვინაობაც თერთმეტმეტრიანების სერიას უნდა გაერკვია. აქ კი საქმეში ოლივერ კანი ჩაერთო, სამი პენალტი მოიგერია და "ბაიერნს" მეოთხე ჩემპიონთა თასი/ლიგა მოაგებინა.

მომდევნო სეზონი წარუმატებელი გამოდგა, რადგან გუნდმა ბუნდესლიგა მესამე ადგილზე დაასრულა და ტიტული დორტმუნდის "ბორუსიას" დაუთმო. ჩემპიონთა ლიგაზე კი მეოთხედფინალში "სამეფო კლუბთან" დამარცხდა. 2002 წლის ზაფხულში კი "ბაიერნმა" მიხაელ ბალაკი, ზე რობერტო და სებასტიან დაისლერი დაიმატა. ჰიტცფელდმა ბუნდესლიგა სრული უპირატესობით, 16 ქულიანი სხვაობით მოიგო, ხოლო გერმანიის თასის ფინალში "რეკორდმაისტერმა" "კაიზერსლაუტერნს" უშანსოდ, 3:1 მოუგო. სამაგიეროდ, ჩემპიონთა ლიგაზე "ბაიერნი" ჯგუფში ჩარჩა, რაც ნამდვილი სენსაცია იყო. ამაში დიდი წვილი "დეპორტივოს" ჰოლანდიელმა ფორვარდმა, როი მაკაიმ, შეიტანა, რომელიც ერთ წელიწადში უკვე "რეკორდმაისტერის" მოთამაშე იყო.

მაკაი "ბაიერნის" ისტორიაში ყველაზე ძვირადღირებული მოთამაშე გახდა, მაგრამ მისი სადებიუტო სეზონი წარუმატებელი გამოდგა. "ბაიერნი" ჩემპიონთა ლიგის მერვედფინალიდან ისევ "რეალმა" გამოაგდო, ხოლო ეროვნულ ჩემპიონატში ჰიტცფელდის გუნდს ტომას შააფის უნიკალურმა ბრემენის "ვერდერმა" აჯობა. მორიგი უტიტულო სეზონის შემდეგ, ჰიტცფელდის ექვსწლიანი, ბრწყინვალე ერაც დასრულდა. მან "ბაიერნს" ოთხი ბუნდესლიგა, ორი გერმანიის თასი, ჩემპიონთა ლიგა და საერთაშორისო თასი მოაგებინა. ამ მაჩვენებლით "გენერალი" კლუბის ისტორიაში დღემდე ყველაზე წარმატებული მწვრთნელია, ლეგენდარული უდო ლატეკის შემდეგ. 2004 წელს კი ჰერ ოტმას ოლიმპიურ სტადიონზე ბრწყინვალე გაცილება მოუწყევს, ზუსტად ისეთი, როგორც შეეფერობოდა. ქომაგებმა ის აპლოდისმენტებითა და ფეხზე წამომდგარი ოვაციებით გააცილეს, ჰიტცფელდმა კი ცრემლები ვერ შეიკავა.

2004 წლის ზაფხულში კი "ბაიერნი" ფელიქს მაგათმა შეცვალა. მაგათი ახალი ფილოსოფიით, თავისი მკაცრი სავარჯიშო რეჟიმითა და სამედიცინო ბურთებით მოვიდა. თუმცა, გერმანელმა სპეციალისტმა, რომელსაც "დესპოტი" შეარქვეს, ბუნდესლიგის ისტორია გადაწერია და ზედიზედ ორი დუბლი გააკეთა. 2004/05 და 2005/06 წლების სეზონში "რეკორდმაისტერმა" ბუნდესლიგის ტიტულთან ერთად გერმანიის თასიც მოიგო. 2005 წლის მაისში კი ოლიმპიური სტადიონის 33 წლიანი ისტორია შეწყდა და "ბაიერნი" ახალ, უფრო თანამედროვე და დიდ არენაზე გადავიდა. "ალიანს არენამ" გუნდში ახალ რევოლუციას ჩაუყარა საფუძველი.

მაგათის ორწელიწად-ნახევრიანი მოღვაწოება 2007 წლის 31 იანვარს დასრულდა, ბუნდესლიგის მეორე წრის ცუდი სტარტის გამო. "ბაიერნმა" საშველად ოტმარ ჰიტცფელდს უხმო, მაგრამ მან ვერაფერი გააწყო. კლუბმა ეროვნული ჩემპიონატი მეოთხე ადგილზე დაასრულა და ისტორიაში პირველად ჩემპიონთა ლიგის მიღმა დარჩა. სეზონის ბოლოს კი ლეგენდარულმა მეჰმეტ შოლმა კარიერა დაასრულა. მან "ბაიერნის" მაისურით 15 წელიწადი ითამაშა და 15 ტიტული მოიგო.

2007/08 წლების სეზონის წინ კი "ბაიერნმა" ძალიან დიდი ფული დახარჯა და უამრავი მოთამაშე დაიმატა, მათ შორის ლუკა ტონი და ფრენკ რიბერი. შედეგად კი - ჰიტცფელდმა თავის ბოლო სეზონში კვლავ დუბლი მოიგო. ეროვნულ ჩემპიონატში "ბაიერნმა" უახლოეს კონკურენტს ათი ქულით გაასწრო, ხოლო თასის ფინალში დორტმუნდის "ბორუსია" დაამარცხა - 2:1. უეფას თასზე გუნდი ნახევარფინალამდე მივიდა, სადაც "ზენიტთან" სამარცხვინოდ დამარცხდა. სეზონის ბოლოს ოლივერ კანმა ბუცები ლურსმანზე ჩამოჰკიდა, ფანებს ემოციურად დაემშვიდობა, ხოლო ჰიტცფელდმა შვეიცარიის ნაკრები ჩაიბარა.

2008 წელს კი "ბაიერნი" იურგენ კლინსმანმა ჩაიბარა და კლუბს საკმაოდ სერიოზული ამბიციები ჰქონდა. საბოლოოდ კი, იუგის დიდი გეგმები წყალში ჩაიყარა და გუნდმა ყველასთან ყველაფერი წააგო: 2:4 ლევერკუზენის "ბაიერთან" გერმანიის თასზე, 0:4 "ბარსელონასთან" ჩემპიონთა ლიგაზე და 1:5 ფელიქს მაგათის "ვოლფსბურგთან", რომელმაც საბოლოოდ ბუნდესლიგა მოიგო. ბოლო ხუთ ტურში კლინსმანი იუპ ჰაინკესმა შეცვალა, სხვაობა ლიდერთან ორ ქულამდე დაიყვანა და "რეკორდმაისტერი" ჩემპიონთა ლიგაზე გაიყვანა. ამან სეზონი იხსნა და დაიწყო ახალი, უფრო დიდი რევოლუცია.

მწვრთნელების მუდმივი როტაცია და ტიტულები (1990-99)
      ისტორიულ ტრებლამდე (2010-დღემდე)скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

მსგავსი სიახლეები
კომენტარები

მატჩები


სატურნირო მდგომარეობა