...

პრევიუ: ფრაიბურგი - ბაიერნი

29 დღიანი პაუზის შემდეგ მიუნხენის "ბაიერნი" თავის პირველ ოფიციალურ თამაშს ჩაატარებს და ბუნდესლიგის მე-17 ტურის ეგიდით სტუმრად "ფრაიბურგს" დაუპირისპირდება.

ფრაიბურგი - ბაიერნი
ჩემპიონატი: გერმანიის ბუნდესლიგა, XVII ტური
თარიღი: 20 იანვარი, 23:30 საათი
სტადიონი: "შვარცვოლდ-შტადიონი", ფრაიბურგი
მთავარი მსაჯი: მანუელ გრეფე
პირდაპირი ტრანსლიაცია: Silk უნივერსალი, Eurosport2

გუნდების წინასამატჩო მდგომარეობა
"ფრაიბურგი" გერმანიის ბუნდესლიგას ერთწლიანი პაუზის შემდეგ დაუბრუნდა და კვლავ საკმაოდ კონკურენტუნარიანი გუნდი ჰყავს, რომელმაც სეზონის პირველი ნახევარი ჩინებულად ჩაატარა. თავდაპირველად "არწივები" მხოლოდ საკუთარ მოედანზე იგებდნენ, მაგრამ შემდეგ გასვლაზეც მოუმატეს და 2016 წელი ოთხმატჩიანი წაუგებელი სერიით დაასრულეს. ბუნდესლიგის ახალწვეულმა 16 ტური მერვე პოზიციაზე დაასრულა და ეს "ფრაიბურგის" ბრწყინვალე მთავარი მწვრთნელის, კრისტიან შტრაიხის, დამსახურებაა. შტრაიხი უკვე ექვსი წელია ამ კლუბის სამსახურშია და გერმანული ფეხბურთის მოყვარული მას კარგად იცნობს. "ფრაიბურგი" საკმაოდ სიმპათიური გუნდია, რომელიც საინტერესო და გახსნილ ფეხბურთს თამაშობს. შემადგენლობა არც ისე სახელოვანია, მაგრამ გამოსარჩევია ტექნიკური ახალგაზრდა მაქსიმილიან ფილიპი, შესანიშნავ ფორმაში მყოფი ჰაბერერი და ორი ცენტრალური ფორვარდი, ნილს პეტერსენი და ფლორიან ნიდერლიხნერი. სტაბილურობით ვერც ერთი მათგანი დაიკვეხნის, სამაგიეროდ, სეზონის პირველ ნახევარში ორივემ ხუთ-ხუთი ბურთი გაიტანა, რითიც სარგებელს გუნდი ნახულობს. 2016 წლის ბოლო შეხვედრაში, სტუმრად "ინგოლშტადტის" წინააღმდეგ, ფლორიანმა დუბლი გაიფორმა და ალბათ, დღესაც ის იქნება ძირითადში. ზამთარში "ფრაიბურგმა" ხუთი ამხანაგური მატჩი ჩაატარა, საიდანაც მხოლოდ ერთი მოიგო, მაგრამ ეს ბევრს არაფერს ნიშნავს. დღეს "არწივებს" უნიჭიერესი თურქი მცველი, სოიონჯუ, ვერ დაეხმარება. გარდა ამისა, ლაზარეთში კემპფი და ნიდერმაიერი იმყოფებიან. კრისტიან შტრაიხს ძალიან მებრძოლი გუნდი ჰყავს, რომელიც "ბაიერნის" გამწარებასაც ეცდება და მინდორზე არაფერს დაიშურებს.

მიუნხენურმა კლუბმა 2016 წელი წარმატებით დაასრულა და მცირე ჩავარდნის შემდეგ ზედიზედ ექვსი თამაში მოიგო, აქედან ბოლო ოთხი კლუბის პრეზიდენტის პოსტზე ული ჰიონესის დაბრუნების შემდეგ. კარლო ანჩელოტის გუნდმა სეზონის პირველი ნახევარი ბრწყინვალე გამარჯვებით დაასრულა და შინ მთავარი კონკურენტი "ლაიფციგი" უშანსოდ დაამარცხა - 3:0, თანაც ამ მოგებით ზამთრის ჩემპიონის სტატუსი მოიპოვა. "ბაიერნის" თამაში იდეალური ნამდვილად არ ყოფილა, გუნდს ჰქონდა გარკვეული პრობლემები, მაგრამ იტალიელი სპეციალისტი ზამთრის შესვენებით ძალიან კმაყოფილი დარჩა. "რეკორდმაისტერმა" პირველი ერთი კვირა დოჰაში გაატარა და იქ გამართული ამხანაგური მატჩი "ეუპენთან" დიდი აგნარიშით მოიგო. ამას მოჰყვა ტელეკომის თასის ამხანაგური ტურნირი, რომელიც "ბაიერნმა" ასევე გამარჯვებით დაასრულა. დღეს კი მიუნხენელები წლის პირველ ოფიციალურ მატჩს ჩაატარებენ და ეცდებიან, რომ ეროვნული ჩემპიონატის პირველი წრე წარმატებით დაასრულონ. სამწუხაროდ, "ბაიერნს" ზამთარში ტიაგო ალკანტარა გამოაკლდა, რომელმაც კუნთის დაზიანება მიიღო და ჟერომ ბოატენგთან ერთად, ლაზარეთში იმყოფება. საეჭვო იყო არტურო ვიდალის თამაში, რომელმაც ტელეკომის თასის ფინალში ნეკნები დაიზიანა, მაგრამ ანჩელოტიმ განაცხადა, რომ ჩილელი მინდორზე გასვლას შესძლებს. ყველაზე სასიამოვნო კი 20 წლის ფრანგი ვინგერის, კინგსლი კომანის, დაბრუნებაა, რომელმაც იანვრამდე ორი თვე გამოტოვა და ახლა უკვე სრულ მზადყოფნაშია. სავარაუდოდ, მიუნხენური გრანდი 4-2-3-1 სქემით ითამაშებს, რადგა ტიაგო ტრავმირებულია და ანჩელოტის გამოკვეთილი გამთამაშებელი სჭირდება. ათიანის როლს კი ტომას მიულერი მოირგებს, რომელიც სუსტი პირველი წრის გამო ბევრმა გააკრიტიკა. ახლა "ბაიერნი" სეზონის მეორე ნახევარს იწყებს და ეცდება, რომ სტარტი ომახიანი გამოვიდეს.

მიუნხენური კლუბი, რა თქმა უნდა, ფავორიტია, მაგრამ "ფრაიბურგი" იოლი მეტოქე ნამდვილად არ არის, ამიტომ "ბაიერნს" ბევრი შრომა მოუწევს, რათა წარმატებას მიაღწიოს.

სავარაუდო შემადგენლობები
ფრაიბურგი: შვოლოვი - კიუბლერი, გულდე, ტორეხონი, გიუნტერი - ფილიპი, ჰიოფლერი, ფრანტცი, გრიფო - ჰაბერერი, ნიდერლიხნერი.

ბაიერნი: ნოიერი - ლამი, მარტინესი, ჰუმელსი, ალაბა - ალონსო, ვიდალი - რობენი, მიულერი, რიბერი - ლევანდოვსკი.

საინტერესო ფაქტები
  • ახალ კალენდარულ წელს მიუნხენის "ბაიერნი" ლიდერის რანგში ზედიზედ მეექვსედ იწყებს. ბოლო ოთხ შემთხვევაში ეს არც სეზონის ბოლოს შეცვლილა.

  • ული ჰიონესის პრეზიდენტობის პერიოდში "რეკორდმაისტერს" გერმანიის ეროვნული ჩემპიონატის ბოლო 54 მატჩი არ წაუგია (48 მოგება, ექვსი ფრე).

  • მიუნხენურ კლუბს ბუნდესლიგის ახალწვეულებთან ზედიზედ 26 თამაში აქვს მოგებული. ბოლო ახალწვეული, რომელმაც "ბაიერნი" დაამარცხა "კაიზერსლაუტერნი" იყო (0:2 2010 წელს).

  • ამ კლუბების ურთიერთშეხვედრების ისტორია სულ 32 თამაშს ითვლის, საიდანაც 22 "ბაიერნმა" მოიგო, "ფრაიბურგმა" კი - მხოლოდ ოთხი.

  • "ფრაიბურგი" ბუნდესლიგის ყველაზე მოძრავი გუნდია, რომელიც მატჩში საშუალოდ 117,7 კილომეტრს ფარავს.

  • ხავი მარტინესმა მიმდინარე სეზონში 17 ოფიციალური მატჩი დაიწყო ძირითად შემადგენლობაში და ამ თამაშებში გუნდმა მხოლოდ ექვსი ბურთი გაუშვა.

  • "არწივების" გერმანელი ფორვარდი, ნილს პეტერსენი, თავის ყოფილ გუნდს დაუპირისპირდება. 28 წლის პეტერსენი მიუნხენის "ბაიერნის" ღირსებას 2011/12 წლების სეზონში იცავდა და წითელი მაისურით ჩატარებულ 15 მატჩში ოთხი გოლი გაიტანა.
скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
ბუნდესლიგა პრევიუ
მსგავსი სიახლეები
კომენტარები
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა