...

პრესკონფერენცია, რომელიც ისტორიაში შევიდა

90-იანი წლები მიუნხენის "ბაიერნის" ისტორიაში ერთ-ერთი ყველაზე არასტაბილური და მძიმეა, როდესაც "რეკორდმაისტერი" მთავარ მწვრთნელებს ხშირად იცვლიდა, შედეგები კი არც ისე მომხიბვლელი იყო. სწორედ ამ პერიოდში გააქტიურდა მედიაც და ჟურნალისტების ინტერესი საფეხბურთო მოედანს გასცდა. წარმოიშვა ტერმინები: "საფეხბურთო კლუბი ჰოლივუდი", "ოცნების გუნდი", მაგრამ ფანებისთვის ყველაზე საყვარელ და დასამახსოვრებელ სიტყვებად, იტალიური აქცენტით წარმოთქმული "შტრუუნც" და "ცარიელი ბოთლი" რჩება. ალბათ მკითხველი უკვე მიხვდა, რომ დღეს ლეგენდარულ იტალიელ სპეციალისტზე, ჯოვანი ტრაპატონიზე და მის უნიკალურ, კულტად ქცეულ პრესკონფერენციაზე ვისაუბრებთ. თუმცა, მანამ, სანამ ამ უკვდავკ კადრებს გავშიფრავდეთ, ყველაფერი თავიდან დავიწყოთ, რადგან ჯოვანისა და "ბაიერნის" გზები რამდენიმე წლით ადრე გადაიკვეთა.

ისტორია 1994 წლის ზაფხულში დაიწყო, როდესაც კლუბის პრეზიდენტი ფრანც ბეკენბაუერი და ლეგენდად ქცეული გენერალური დირექტორი, ული ჰიონესი, ახალ მთავარ მწვრთნელს ეძებდნენ. ულიმ უკვე იცოდა თუ ვის უნდა დაეწყო "ბაიერნის" აღზევება - ახალგაზრდა, ამბიციურ და ჭკვიან ფრანგ სპეციალისტს, სახელად - არსენ ვენგერი. აპრილის ბოლოს "ბაიერნმა" "მონაკოს" ოფიციალური წინადადებით მიმართა, მაგრამ ფრანგებმა მიუნხენელები უარით გაისტუმრეს, რადგან ვენგერს კონტრაქტი ივნისის ბოლოს ეწურებოდა.

ულის კიდევ რამდენიმე თვე რომ მოეთმინა, შესაძლოა ევროპული ფეხბურთის ისტორია სხვანაირად განვითარებულიყო, რადგან ვენგერმა "მონაკო" სექტემბერში დატოვა და ლონდონის "არსენალში" წავიდა. თუმცა, დრო აღარ ითმენდა, ამიტომ საჭირო იყო მოქმედება. ამას დაემატა ლოთარ მათეუსის პრობლემაც, რომელიც კონტრაქტის გახანგრძლივებას ყოყმანობდა. თუმცა, ლეგენდარულ გერმანელს მილანის "ინტერიდან" ყოფილი დამრიგებელი მოუყვანეს - დონ ჯოვანი ტრაპატონი.  
ჯოვანიმ ტურინის "იუვენტუსში" ფანტასტიკური წლები გაატარა და ახალი გამოწვევის მიღება სურდა. იყო "რომას" ვარიანტიც, მაგრამ არ გამოვიდა და საბოლოოდ, მათეუსმაც ახალი ხელშეკრულება გააფორმა. "ჩემს ყოფილ მწვრთნელთან მუდმივი კავშირი მქონდა. მას ძალიან უნდოდა ჩემი გადაბირება. თუმცა, როდესაც მისი "რომაში" გადასვლა ჩაიშალა, ტრაპატონიმ მთხოვა, რომ "ბაიერნში" დავრჩენილიყავი", - იხსენებს მათეუსი "Bild-თან" საუბრისას. რა თქმა უნდა, იტალიელის საყვარელი მოთამაშე სწორედ ლოთარ მათეუსი იყო - ტაქტიკურად ყველაზე კარგად განსწავლული, მშრომელი გერმანელი მოთამაშე, ძლიერი ხასიათითა და იდეალური დისციპლინით.

თუმცა, პირველი კონტრაქტი ტრაპატონიმ ერთი კვირის დაგვიანებით გააფორმა, რადგან ის გარკვეული დაბრკოლებების წინაშე იდგა. პირველ რიგში, საქმე ოჯახს ეხებოდა. "Suddeutsche Zeitung-ზე" დაყრდნობით, მისი მეუღელე, პაოლა, მიუნხენში გადაბარგების მომხრე არ იყო, რადგან 17 წლის შვილს, ალბერტოს, სკოლა იმ წელს უნდა დაესრულებინა. საბოლოდ, ჯოვანიმ ერთწლიან ხელშეკრულებას მოაწერა ხელი, რათა სიტუაცია შეეფასებინა და შემდეგ უფრო სერიოზულადაც იფიქრებდა "ბაიერნზე".

სტარტი აშკარად შორს იყო იდეალურისგან, უფრო მეტიც - საკმაოდ ბევრი და სერიოზული პრობლემა შეიქმნა. უმთავრესი კი ჯოვანი ტრაპატონის ენობრივი შეზღუდვა იყო. მან პირველივე პრესკონფერენციაზე განაცხადა, რომ თარჯიმანი სჭირდებოდა, რადგან მისი გერმანული მხოლოდ ერთიდან-თერთმეტამდე დათვლით შემოიფარგლებოდა. მას უჭირდა მოთამაშეებთან ურთიერთობა, მაგალითად კლაუს აუგენტალერთან, რომელსაც საოცარი ბავარიული აქცენტი ჰქონდა და ხალხს მისი მაშინაც კი არ ესმოდა, როდესაც გერმანულად საუბრობდა.

თუმცა, იყო დადებითი ფაქტორებიც. შტეფან ეფენბერგი ტრაპატონიზე ამბობდა: "ტრაპატონი "ბაიერნის" ინსულტი იქნება, განსაკუთრებით ტაქტიკური თვალსაზრისით. მოთამაშეები გაოცებულები დარჩებიან იმ ინტენსიური ვარჯიშებით, რომელსაც ჯოვანი ტაქტიკის გასაუმჯობესებლად შემოიღებს. მას ფლორენციიდან ვიცნობ, მაგრამ ისიც უნდა აღინიშნოს, რომ გერმანელი მოთამაშეები ამას მიჩვეული არ არიან". ტრაპატონიმ მართლაც რევოლუცია მოახდინა, როგორც კლუბის ბაზაზე, ისე საფეხბურთო მოედანზე. მან სავარჯიშო სესიები სრულიად ღია გახადა მედიისათვის, რაც იტალიაში ჩვეულებრივი, ხოლო გერმანიაში სავსებით გაუგებარი ქმედებაა.

რაც შეეხება სათამაშო პრობლემებს, "ბაიერნმა" სექტემბრის შუიდან ნოემბრის შუარიცხვებამდე ვერც ერთი თამაში ვერ მოიგო და ბუნდესლიგის საჩემპიონო რბოლას გამოეთიშა. ერთ-ერთი მიზეზი იყო ტრავმები, მაგრამ უპირველესი - გაუგებრობა. ფეხბურთელებს გადამწყვეტ მომენტში ჯოვანის დარიგებები და მითითებები უბრალოდ არ ესმოდათ. ამას ერთი უცნაური შემთხვევაც დაემატა. აპრილში "ბაიერნმა" სტუმრად "აინტრახტი" 5:2 დაამარცხა და დიდებული ფეხბურთი აჩვენა. თუმცა, ტრაპატონიმ ყველაფერი 71-ე წუთზე გააფუჭა, როდესაც მოედანზე თინეიჯერი დიტმარ ჰამანი შეუშვა, რომელსაც პროფესიონალური კონტრაქტი გაფორმებული არ ჰქონდა. ბუნდესლიგის წესებით, ასეთი მხოლოდ სამი ფეხბურთელის გამოყენება შეიძლება მატჩში, ხოლო ჰამანი უკვე მეოთხე იყო.

"მხოლოდ მე ვარ დამნაშავე. გერმანული წესები უნდა მცოდნოდა. იტალიაში ოთხი არაპროფესიონალი ფეხბურთელით გასვლითი მატჩი რომ მომეგო, პრემიას მომცემდნენ", - აღნიშნა მატჩის შემდეგ ჯოვანიმ. საბოლოოდ, მიუნხენურ კლუბს სამი ქულა ჩამოართვეს. "ბაიერნმა" კი სეზონი მეექვსე ადგილზე დაასრულა და ტრაპატონიმ დასძინა: "ჩემი უდიდესი პრობლემა იყო ენა. კლუბს გასაგებად ვუთხარი: თუ ასი პროცენტით ტრაპატონი არ ვარ, ჯობია ურთიერთობა შევწყვიტოთ". ტრაპატონი წავიდა და მისი ადგილი ოტო რეჰაგელმა დაიკავა.

თუმცა, განშორება დიდ ხანს არ გაგრძელდა, ტრაპატონი 1996 წლის მაისში დაბრუნდა და პირობა დადო: "უახლოესი ორი თვის განმავლობაში ინტენსიურ ენის კურსებს დავიწყებ და ყოველდღე ოთხი საათი ვიმეცადინებ. შესაბამისად, მზად ვიქნები თარჯიმნის გარეშე სამუშაოდ". მორიგი მიუნხენური ეპოქა კვლავ წარუმატებლად დაიწყო. "ბაიერნი" უეფას თასიდან უკვე პირველ წრეში გამოეთიშა, ხოლო ბუნდესლიგაში წინ ლევერკუზენის "ბაიერი" და დორტმუნდის "ბორუსია" გაუშვა. თუცმა, გაზაფხულზე მიუნხენურმა კლუბმა მოუმატა და საბოლოოდ, ვერცხლის სინი ხელთ იგდო. ეს "რეკორდმაისტერისთვის" მხოლოდ მეორე საჩემპიონო ტიტული იყო ბოლო შვიდ წელიწადში.
ყველაფერი ბრწყინვალედ მიდიოდა და ამ გუნდს ჩემპიონთა ლიგის მოგების კანდიდატადაც განიხილავდნენ. ტრაპატონიმ დააწინაურა განელი მცველი, სამუელ კუფური, დაიმატა მიხაელ ტარნატი, ტორსტენ ფინკი, ბიქსენტ ლიზარაზუ, კარსტენ იანკერი და ჯოვანი ელბერი. თუმცა, კლუბს კვლავ "ჰოლივუდს" უწოდებდნენ ძველი პრინციპებისა და მენტალიტეტის გამო.

1998 წლის მაისში კი "ბაიერნი" იყო ნერვიული კლუბი, ნერვიული ხელმძღვანელით. რაოდენ უცნაურიც არ უნდა იყოს, "რეკორდმაისტერი" ბუნდესლიგაში აღზევებულმა, ოტო რეჰაგელის "კაიზერსლაუტერნმა" ჩამოიტოვა. გადამწყვეტ შეხვედრაში, სტუმრად გელზენკირხენის "შალკეს" წინააღმდეგ, რომლის შემდეგაც "ბაიერნი" კონკურენტს ათი ქულით ჩამორჩა, ტრაპატონიმ მარიო ბასლერი და მეჰმეტ შოლი სათადარიგო სკამზე გადასვა, ძირითადში კი ტომას შტრუნცი დააყენა. მიუნხენელები 0:1 დამარცხდნენ, ბასლერი და შოლი ძალიან იმედგაცრუებულნი დარჩნენ, ხოლო შტრუნცმა მოედანი უკმაყოფილომ დატოვა, რადგან შეცვალეს. ლიდერებთან კონფლიქტს დაემატა პრესა, რომელიც ტრაპატონის ზედმეტად დაცვითი ფეხბურთის გამო აკრიტიკებდა.

მატჩი კვირას გაიმართა, მომდევნო ვარჯიში კი სამშაბათს იყო, ამიტომ ტრაპატონი სახლში, მილანში, წავიდა, სადაც აიღო ფანქარი და რვა ფურცელი, სადაც გერმანული ტექსტი გაამზადა. სამშაბათ დილით მიუნხენში დაბრუნდა და სანამ მოთამაშეები გასახდელში იყვნენ, ვარჯიშისათვის ემზადებოდნენ, ტრაპატონი მედიის ოთახში შევიდა და დაიწყო ის ლეგენდარული პრესკონფერენცია.

"მზად ხართ?", - მიმართა ჯოვანიმ ჟურნალისტებს და დაიწყო ტექსტი, რომელიც გერმანული ფეხბურთის გულშემატკივარს არასოდეს დაავიწყდება: "ახლა, ამ მომენტში, ამ გუნდში, ზოგიერთ მოთამაშეს ავიწყდება, რომ პროფესიონალია. არც ერთი გერმანული კლუბი არ თამაშობს ისეთ შემტევ ფეხბურთს, როგორც "ბაიერნი". ბოლოს მინდორზე სამი თავდამსხმელი გვყავდა: ელბერი, იანკერი და ციკლერი. ციკლერი უფრო მეტად არის ფორვარდი, ვიდრე მეჰმეტი და ვიდრე ბასლერი", - ცოტათი აღელვებულმა ჯოვანიმ ჟურნალისტებს ჰკითხა სწორედ თუ გამოთქვამდა სიტყვებს და განაგრძო: "მწვრთნელი იდიოტი არ არის, ის ხედავს იმას, რაც მოედანზე ხდება. ამ თამაშში ორი, სამი თუ ოთხი ფეხბურთელი იყო, რომელიც ცარიელ ბოთლს ჰგავდა. ისინი უფრო მეტს ჩივიან, ვიდრე თამაშობენ. როგორ ბედავს შტრუნცი!", - აქ უკვე ტრაპატონი მოთმინებიდან გამოვიდა და გატეხილი გერმანული სიტყვები უფრო მეტი სიბრაზით წარმოთქვა: "შტრუნცი აქ უკვე ორი წელიწადია და თამაში არ ჩაუტარებია, მუდმივად ტრავმირებულია - მას რაღა აქვს სათქმელი?", - შტრუნცმა მართლაც ორ სეზონში მხოლოდ ათი თამაში ჩაატარა. ტრაპატონიმ კი მისი სახელი ისე სახალისოდ, აშკარა იტალიური აქცენტით გამოქვა, რომ "ბაიერნის" ქომაგებმა სამუდამოდ აიტაცეს. ბოლოს კი ჯოვანიმ მშვიდად განაცხადა: "მე დავასრულე" და დარბაზი დატოვა.
სეზონის ბოლოს "ბაიერნმა" გერმანიის თასის ფინალში "დუისბურგი" 2:1 დაამარცხა და ტიტული მოიგო. ბასლერიც და შოლიც ძირითადში იყვნენ, ფეხბურთელებმა კი გამარჯვება იტალიელთან ერთად დიდებულად აღნიშნეს, ერთმანეთს ეხვეოდნენ, ულოცავდნენ და საკმაოდ ბედნიერები ჩანდნენ.
საბოლოოდ, ჯოვანი ტრაპატონი ული ჰიონესთან მივიდა და კონტრაქტის გაწყვეტა თხოვა: "მწვრთნელმა უნდა იცოდეს როდის არის საჭირო მომენტი. თუ მიუნხენში დავრჩები, აუცილებლად მოვკვდები". აი ასე დასრულდა "ტრაპა ერა", რომელსაც ოტმარ ჰიტცფელდის დიდებული ეპოქა და დიდი წარმატებები მოჰყვა. მიუხედავად იმისა, რომ ჯოვანი ტრაპატონი ძალიან ნერვიული და ემოციური ადამიანი იყო, რომელმაც ეს ისტორია ამ საოცარი 210 წამიანი ვიდეოთი დააგვირგვინა, ის უდავოდ უძლიერესი სპეციალისტი იყო. გარდა ამისა, ჯოვანის "გერმანელსაც" კი ეძახდნენ, რადგან ძლიერი მენტალიტეტი ჰქონდა, იყო საკმაოდ მკაცრი და უყვარდა დისციპლინა. დიახ, მან მიუნხენური კარიერა სკანდალით დაასრულა და "ბაიერნში" მთავარი კვალი სწორედ ამ პრესკონფერენციით დატოვა, მაგრამ მან ქომაგების გული მაინც მოიგო და ეს ყველაზე მნიშვნელოვანია. ტრაპატონიმ "რეკორდმაისტერის" გულშემატკივრები თავისი პირდაპირობითა და სამართლიანობით მოხიბლა.

მოამზადა დავით მაღრაძემ, სპეციალურად Bayern.ge-სთვის
скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

მსგავსი სიახლეები
კომენტარები
Hansi
Hansi | 6 ოქტომბერი 2016 20:50
კარგი იყო :)
SCHWARZENEGGERA
SCHWARZENEGGERA | 6 ოქტომბერი 2016 23:15
კიდე დადეთ რა ესეთუ რაღაცეები
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა