...

არსენალი 1:5 ბაიერნი - მატჩის ანალიზი

"არსენალისა" და "ბაიერნის" გუშინდელი შეხვედრა საკმაოდ სანახაობრივი გამოდგა და "რეკორდმაისტერმა" არსენ ვენგერის გუნდს კვლავ საფეხბურთო გაკვეთილი ჩაუტარა - 5:1!

ახლა კი უკვე ემოციებისგან ასე თუ ისე დავიცალეთ, ამიტომ ცივო გონებით გთავაზობთ გუშინდელი მატჩის ანალიზს.

მატჩის მსვლელობა

ლონდონური საღამოს პირველი ათი წუთი აშკარად "ბაიერნის" იყო, რადგან მიუნხენელებმა ბურთი დაიჭირეს, ტერიტორიული უპირატესობა მოიპოვეს და "არსენალს" არაფრის საშუალებას არ აძლევდნენ. კარლო ანჩელოტიმ აქცენტი იმაზე გააკეთა, რომ გუნდს სწრაფი ბურთი არ გაეშვა, რაც ლოგიკურია. "ბაიერნმა" დამაჯერებლად დაიწყო და მარჯვენა ფრთიდან რაფინია-რობენის დუეტმა ორი ხიფათიც შექმნა. თუმცა ამის შემდეგ "არსენალი" გამოფხიზლდა, მეტოქის ნახევარზე პრესინგი გააძლიერა, ხოლო სტუმრებმა ცენტრში შეცდომებს უმატეს. ამის წყალობით უპირატესობა "მეთოფეების" ხელში გადავიდა და პირველი მომენტი მანუელ ნოიერმა უგულებელვყო, როდესაც კარი დატოვა და თეო უოლკოტს თავის ლიბერო სტილში ბურთზე თამაში დაასწრო. მალევე ძალიან კარგი შანსი ოლივიე ჟირუს ჰქონდა, რომელმაც რთული საჰაერო ორთაბრძოლა მატს ჰუმელსს მოუგო, მაგრამ "ბაიერნი" ძელმა იხსნა. 20-ე წუთზე კი თეო უოლკოტმა მინი-შედევრი შემოგვთავაზა. ბელერინმა აუტიდან ბურთი მარჯვენა ფრთაზე ტექნიკურ ინგლისელს დაუგდო, რომელიც რიბერის გასცდა, ოლივიე ჟირუს დახმარებით, ჰუმელსსა და ალონსოს შორის გაძვრა, საჯარიმოში შევიდა, ალაბას ჩაუარა და მანუელ ნოიერს ახლო კუთხეში უძლიერას დაურტყა - 1:0! აი თურმე როგორ ისვრიან "მეთოფეები".


ამ მომენტში მეკარის დადანაშაულება შეიძლება, რადგან მანუმ ახლო კუთხე ვერ დაიცვა, მაგრამ უოლკოტმა ისეთი სიძლიერით დაარტყა, რომ ნოიერს შანსები ნამდვილად ძალიან ცოტა ჰქონდა. ამ ბურთმა "არსენალს" რწმენა შემატა, ხოლო "ბაიერნს" რამდენიმე წუთში კარგი მომენტი ჰქონდა, როდესაც ტიაგოს ჩინებული პასის შემდეგ ლევანდოვსკი საჯარიმოში შეიჭრა, მაგრამ დავიდ ოსპინამ დაასწრო. ამას კი ძალიან სახიფათო ეპიზოდი მოჰყვა. მარვენა ფლანგზე ალექს-ოქსლეიდ ჩემბერლეინმა შესანიშნავად ითამაშა, ცენტრისკენ შეიჭრა და უოლკოტს საჯარიმოში ფარული პასი გაუკეთა. თეო მოტრიალდა და ის ალონსომ წააქცია. განმეორებაზე გამოჩნდა, რომ ვეტერანმა ესპანელმა მეტოქეს აშკარად ფეხში ჩაარტყა და პენალტი იყო, მაგრამ ეს მსაჯებმა ვერ შეამჩნიეს. პირველი ტაიმის ბოლოს სწორედ ისეთი თამაში წავიდა, როგორსაც გულშემატკივარი ელოდა - გახსნილი და ორმხრივ იერიშებში. საუკეთესო შანსი "ბაიერნს" ჰქონდა, როდესაც რობენის ფანტასტიკურ პასს ლევანდოვსკი გამოეხმაურა, მაგრამ ბურთს კარგად ვერ დაარტყა, ამიტომაც ააცილა. საბოლოოდ, პირველი ნახევარი 1:0 და "ბაიერნი" შესვენებაზე მშვიდად გავიდა.

მეორე ტაიმი "არსენალმა აქტიურად დაიწყო და აარონ რემზის რბილი ჩაწოდების შემდეგ ოლივიე ჟირუს თავით ჩინებული შანსი ჰქონდა, მაგრამ ბურთს კარგად ვერ მიუდგა. რამდენიმე წუთში კი გარდამტეხი მომენტი შედგა. "ბაიერნმა" ბურთ კვლავ მოიპოვა და უპირატესობას დაეუფლა. რიბერიმ ფლანგიდან ცენტრში შეიწია, საჯარიმოში ლევანდოვსკის დაუგორა, რომელმაც ერთი მეტოქე ჩამოიტოვა, ლორან კოსელნიმ კი უკნიდან წონასწორობა დააკარგვინა, რაც პოლონელის წასაქცევად და პენალტის დასანიშნად საკმარისი აღმოჩნდა. თავდაპირველად, მატჩის მთავარმა არბიტრმა ფრანგ მცველს გაფრთხილება მისცა, მაგრამ შემდეგ დამხმარე მსაჯთან კონსულტაციის ნიადაგე ლორანს წითელი ბარათი უჩვენა და მოედნიდან გააძევა. ეს ძალიან უცნაური და არასამართლიანი გადაწყვეტილება იყო, რომელზეც დეტალურად მოგვიანებით ვისაუბრებთ.


ბურთთან რობერტ ლევანდოვსკი მივიდა და 28 წლის პოლონელმა დავიდ ოსპინა მარტივად მოატყუა. ამის შემდეგ კი მინდორზე მხოლოდ ერთი გუნდი იყო, "არსენალმა" კი არც იცოდა რა გაეკეთებინა. "რეკორდმაისტერი" კარგად კომბინირებდა და ზეწოლას აძლიერებდა. მარცხენა ფრთაზე ტიაგომ ფანტასტიკურად იმოქმედა, ორი მეტოქე ჩამოიტოვა და საჯარიმოში ლამაზად ჩააწოდა. ხავი მარტინესის თავური კი კარს ცოტათი გადასცდა. მალევე ძალიან კარგი შანსი ლევანდოვსკის ჰქონდა, რომელმაც ვიდალთან კედელი გაითამაშა, საჯარიმოში შეიჭრა და მახვილი კუთხიდან ძლიერად დაარტყა, მაგრამ ოსპინამ მოიგერია. შეხვედრის 67-ე წუთზე კი ჯერ ოსპინა შეცდა, რომელმაც ბურთი საჯარიმოდან ცუდად ამოიტანა, შემდეგ კი ალექსის სანჩესი, რომელმაც ბურთი საჯარიმოში არიენ რობენს ჩააბარა და ჰოლანდიელს გოლის გატანა აღარ გასჭირვებია - 1:2.

"ბაიერნი" შეტევებს აგრძელებდა და ლევანდოვსკის კიდევ ერთხელ არ გაუმართლა, როდესაც დუგლას კოშტას ჩაწოდებას გამოეხმაურა და ბურთი ძელს მოხვდა. მოგვიანებით მარჯვენა ფრთაზე რაფინიამ მეტოქის პასი ჩაჭრა და წინ დუგლას კოშტას გაატანა. ბრაზილიელს მარცხნივ ორი თანაგუნდელი ეხსნებოდა, მაგრამ კოშტამ თავის თავზე აიღო და რობენის სტილში ულამაზესი ბურთი გაიტანა. დაახლოებით ერთ წუთში "მეთოფეებმა" მორიგი უპატიებელი შეცდომა დაუშვეს და ხაბი ალონსომ არტურო ვიდალი ერთ-ერთზე დატოვა, ჩილელმა კი ოსპინას ბურთი თავზე ტექნიკურად გადაუგდო - 1:4, ანგარიში გამანადგურებელი გახდა. ხუთ წუთში კი რენატუ სანჩეშის ბრწყინვალე პასით კოშტა და ვიდალი ოსპინასთან მარტონი დარჩნენ - ბრაზილიელმა ჩილელს დაუგორა და არტურომ "ბაიერნის" მაისურით პირველი დუბლი გაიფორმა.


ლონდონშიც 5:1 და ორი მატჩის ჯამში "ბაიერნმა" "არსენალი" უბრალოდ გააცამტვერა - 10:2, ეს ჩემპიონთა ლიგის ისტორიაში ფლეი-ოფის ეტაპზე მეორე ყველაზე დიდი გამარჯვებაა. კარლო ანჩელოტის გუნდი მართლაც ფენომენალურ ფორმაშია და გაზაფხულს შესანიშნავი განწყობით ხვდება. "რეკორდმაისტერი" ჩემპიონთა ლიგის მეოთხედფინალში ზედიზედ მეექვსედ ითამაშებს, რაც საკლუბო რეკორდია!

საფეხბურთო ფორტუნა სამართლიანია

პირველ რიგში მინდა, რომ თქვენი ყურადღება იმ ეპიზოდებზე გავამახვილო, რომელმაც არსენ ვენგერი მატჩის შემდეგ მსაჯებზე აალაპარაკა და თანაც სამართლიანად. შეხვედრის მთავარი მსაჯი 37 წლის ბერძენი ანასტასიუს სიდიროპულოსი გახლდათ, რომელმაც თავის ბრიგადასთან ერთად შეხვედრის მსვლელობაზე პირდაპირი გავლენა იქონია.

ლონდონში ორი ძალიან საკამათო ეპიზოდი შეიქმნა, ამიტომ მივყვეთ ქრონოლოგიურად და ჯერ "ბაიერნის" კარში არ დანიშნული პენალტი განვიხილოთ.


როგორც ხედავთ "ბაიერნის" ვეტერანმა საყრდენმა თეო უოლკოტს მარცხენა ფეხში ჩაარტყა და წააქცია. გარდა ამისა, ალონსო ბურთს საერთოდ არ შეხებია, შესაბამისად, ეს ასპროცენტიანი წესების დარღვევა და პენალტი იყო. დინამიკაში ეპიზოდის გარჩევა მართლაც რთულია, მაგრამ კარს უკან მყოფ მსაჯს ეს მომენტი წესით კარგად უნდა დაენახა, მაგრამ ეს ვერ მოახერხა. 1:0-ზე "არსენალს" აშკარა პენალტი არ დაუდეს, ეს ასეა!


ახლა კი ეპიზოდი, რომელმაც ალბათ ყველა გააოცა. შეხვედრის 55-ე წუთზე საჯარიმოში შეჭრილი რობერტ ლევანდოვსკი ლორან კოსელნიმ აშკარად წააქცია და პენალტი იყო, რომელიც მსაჯმა დანიშნა. "არსენალის" კაპიტანს კი ყვითელი ბარათი უჩვენა, მაგრამ რამდენიმე წამში, კარს უკან მყოფი მსაჯის მითითებების შემდეგ, ლორანს წითელი ბარათი მისცა. ჯერ კიდევ გაუგებარია კოსელნიმ ორი ყვითელი მიიღო თუ პირდაპირ წითელი, რადგან არსებითი სხვაობა დიდია - თუ მსაჯმა კოსელნი პირდაპირ გააძევა, მაშინ ის სერიოზულად შეცდა, ხოლო თუ ზედმეტი ლაპარაკის გამო მეორე გაფთხილება მისცა, მაშინ ზედმეტი სიმკაცრე გამოავლინა. თუმცა სიტუაცია გაურკვეველია, მაგრამ მოდი ჩვენ განვიხილოთ პირდაპირ წითელი ბარათის მიცემის შემთხვევა.

გასული წლის ზაფხულში ფიფამ რამდნეიმე წესი შეცვალა და მათ შორის საჯარიმოში ბოლო იმედის ჯარიმაზე წაქცევის სასჯელი. ახალი კანონებით, მოთამაშე, რომელიც საკუთარ საჯარიმოში თამაშის წესს მსუბუქად (სერიოზული უხეშობის გარეშე) არღვევს, მხოლოდ ყვითელი ბარათით ისჯება, რაც სავსებით ლოგიკურია. მოდი განვიხილოთ სიტუაცია - რას ნიშნავს ბოლო იმედის ჯარიმა? ამ შემთხვევაში წესების დამრღვევი მეტოქეს გოლის გატანის რეალურ შანსს ართმევს, პენალტი კი ამ შესაძლებლობას დაზარალებულ გუნდს უბრუნებს, მაშინ მოთამაშის გაძევება ორმაგი, სამმაგი სასჯელი გამოდის, რადგან პენალტი+ათი კაცით თამაში+გოლის გაშვების დიდი ალბათობა. როდესაც ბოლო იმედის დარღვევა საჯარიმოს გარეთ ხდება, მაშინ წითელი ბარათი სამართლიანია, მაგრამ პენალტის შემთხვევაში დამნაშავეს უკვე აღარ აძევებენ! სწორედ ამიტომ, თუ კოსელნის პირდაპირ წითელი ბარათი უჩვენეს, მაშინ მსაჯთა ბრიგადა სერიოზულად შეცდა.

ახლა კი მივედი მომენტთან, როდესაც მთავარი უნდა ვთქვა - საფეხბურთო ფორტუნა სამართლიანია, რატომ? გაიხსენეთ მიუნხენის თამაში, როდესაც "ბაიერნს" ორი ასპროცენტიანი პენალტი არ დაუდეს, ხოლო "არსენალს" მსაჯმა თერთმეტმეტრიანი აჩუქა. პირველ თამაშში "ბაიერნი" დაიჩაგრა, მეორე თამაშში კი "არსენალი" - ყველაფერი დაბალანსებულია. ხოლო თუკი ვინმეს ჰგონია, რომ "რეკორდმაისტერი" მეოთხედფინალში გუშინდელი შეცდომების წყალობით გავიდა, შეგიძლიათ ფეხბურთს თავი დაანებოთ, ჰოკეიც არაა ცუდი სპორტი...

საგანგაშო წუთები

პირველ ტაიმში, დომინანტური საწყისი ათი წუთის შემდეგ, დაახლოებით 20-25 წუთიანი ინტერვალი იყო, რომლის დროსაც მიუნხენის "ბაიერნი" ძალიან ცუდად გამოიყურებოდა. მოულოდნელად "რეკორდმაისტერმა" უამრავი შეცდომის დაშვება დაიწყო და ბურთს მოედნის ცენტრში იოლად კარგავდა. არტურო ვიდალმა და ხაბი ალონსომ ბევრი შეცდომა დაუშვეს, "არსენალი" კი აქტიურად უტევდა, გოლიც გაიტანა, მეორე ბურთის გატანაც შეეძლო. ეს მართლაც საგანგაშო წუთები იყო, რომლის დროსაც "ბაიერნის" ქომაგებმა სადღაც გულის სიღრმეში გაიელვეს, რომ მათმა გუნდმა შეიძლება წააგოს. საბედნიეროდ, ყველაფერი კარგად დასრულდა, მაგრამ ის, რაც მიუნხენურმა კლუბმა პირველი ტაიმის მეათე წუთიდან დაახლოებით 35-ე წუთამდე გააკეთა იყო ძალიან ცუდი და ასეთი რამ აღარ უნდა განმეორდეს!

იდეალური მეორე ტაიმი

სუსტი პირველი ტაიმის შემდეგ მეორე ნახევარში "ბაიერნი" მინდორზე კარგი განწყობით გავიდა და უპირატესობას დაეუფლა. ტიაგო ალკანტარა სიღრმეში უფრო ხშირად ჩადიოდა, რამაც ცენტრს ბალანსი შემატა და "რეკორდმაისტერმა" ბურთი დაიჭირა. გარდა ამისა, "არსენალი" უფრო გაიხსნა და სივრცეები დატოვა, რომლებიც გერმანელებმა ეფექტურად აითვისეს. უკვე დებიუტში რობერტ ლევანდოვსკიმ პენალტი მოიპოვა, რომელიც თავად პოლონელმა გამოიყენა. ამ ეპიზოდის შემდეგ "მეთოფეები" ათი კაცით დარჩნენ, რამაც "ბაიერნის" საქმე გაამარტივა და ყველაფერი იდეალურად აეწყო. "რეკორდმაისტერი" კი ის გუნდია, რომელიც თამაშიდან არასოდეს ერთვება და მიუხედავად დამაჯერებელი უპირატესობისა, მაინც ბოლომდე თამაშობს, უტევს, რაც შეიძლება მეტი გოლის გატანას ცდილობს. ფეირ-ფლეის თვალსაზრისით, "რეკორდმაისტერი" ალბათ მსოფლიოში ყველაზე პატივსაცემი გუნდია, მაგრამ ამავდროულად, ყველაზე "საზიზღარიც", რადგან დანდობა არ იცის.

საპასუხო ბურთის შემდეგ "ბაიერნმა" ოფიციალური ვარჯიში დაიწყო და ძალიან სოლიდურად გამოიყურებოდა. ტიაგო თავის სტილში ტექნიკურად და ლამაზად მოქმედებდა, ვიდალი შეტევებში ნაყოფიერად ერთვებოდა, რიბერი და რობენი ფლანგებს ამწავებდნენ, შემდეგ კი უკვე დუგლას კოშტამ წარმოაჩინა თავი, რომელიც მოედანზე კარგად შევიდა, რამდენიმე მომენტი შექმნა და თავად ლამაზი ბურთი გაიტანა. ბოლოს კი ვიდალმა დუბლი გაიფორმა და საბოლოო შედეგი დააფიქსირა. "ბაიერნმა" მეორე ნახევარში ხუთი ბურთის გატანა მოახერხა, "არსენალს" 1998 წლიდან მოყოლებული ყველაზე სამარცხვინო საშინაო მარცხი აგემა და მეოთხედფინალში გავიდა.

პირველი ნაბიჯი გადადგმულია

მიუნხენის "ბაიერნის" მთავარი მიზანი მიმდინარე სეზონში ჩემპიონთა ლიგის მოგებაა და ფლეი-ოფის პირველი ეტაპი უკვე გადალახულია. კარლო ანჩელოტიმ "რეკორდმაისტერი" მეოთხედფინალურ ეტაპზე ზედიზედ მეექვსედ გაიყვანა და ვნახოთ როგორ განვითარდება მოვლენები. ძალიან კარგია, რომ გუნდი ფორმის პიკში შევიდა და სეზონის ყველაზე მნიშვნელოვან ნაწილს ჩინებული განწყობით ატარებს. კარდიფისკენ პირველი ნაბიჯი უკვე გადადგმულია და იმედია, ბიჭები ასე გააგრძელებენ. скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
მატჩის ანალიზი ჩემპიონთა ლიგა
მსგავსი სიახლეები
კომენტარები
გიგა
გიგა | 8 მარტი 2017 20:42
ყველაზე დიდი შანსები ბავარიას აქვს ლიგაზე :)
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა