...

ბაიერნი 3:0 აინტრახტი - მატჩის ანალიზი

ბუნდესლიგის 24-ე ტურში მიუნხენურმა კლუბმა მორიგი დამაჯერებელი გამარჯვება მოიპოვა და საკუთარი ქომაგები კიდევ ერთხელ გაახარა.

"რეკორდმაისტერმა" შინ ფრანკფურტის "აინტრახტი" მიიღო და 3:0 დაამარცხა. გთავაზობთ გუშინდელი შეხვედრის ანალიზს.

მატჩის მსვლელობა

ყველასათვის მოულოდნელად, შესუსტებულმა ფრანკფურტის "აინტრახტმა" მატჩი საკმაოდ აგრესიულად, თამამად დაიწყო და თავიდანვე მჭიდრო პრესინგს ახორციელებდა. უკვე მატჩის მეორე წუთზე დავიდ ალაბა შეცდა და ბურთი ტიმოტი ჩენდლერს ჩააბარა, რომელმაც მარცხენა ფრთაზე ჭკვიანური პასი გააკეთა და ანტე რებიჩი დასარტყმელ პოზიციაზე გაიყვანა, მაგრამ ხორვატმა კარს გადააცილა. "არწივები" საკმაოდ დამაჯერებლად მოქმედებდნენ და "ბაიერნს" წნეხის ქვეშ ამყოფებდნენ. მანუელ ნოიერის კარს დენი ბლუმი შორიდანაც კი დაემუქრა, მაგრამ მანუმ ბურთი მარტივად მოიგერია. მატჩის მე-19 წუთზე კი რებიჩის პასით ბრანიმირ ჰრგოტა მეკარესთან პირისპირ დარჩა, ნოიერიც მოატყუა და როდესაც უკვე ბურთისთვის ფეხი უნდა მოექნია, მას მატს ჰუმელსი ჩაუხტა და "რეკორდმაისტერი" გადაარჩინა. "წითლების" მეხუთე ნომერმა ფენომენალური ვარდნა განახორციელა და დაამტკიცა, რომ მსოფლიოში ერთ-ერთი უძლიერესი დამცველია. მატსმა მართლაც მატჩის საუკეთესო მომენტი შემოგვთავაზა, რომელმაც ნოიერი ძალიან გაახარა.


საწყისი ზეწოლის შემდეგ "ბაიერნმა" ნელ-ნელა გამოიღვიძა და თამაშში ჩაერთო. კარლო ანჩელოტის გუნდმა პირველივე შანსი გამოიყენა. რობერტ ლევანდოვსკიმ საჰაერო ორთაბრძოლა მოიგო და ბურთი საჯარიმოში ჩააგდო, სადაც თომას მიულერი შეიჭრა, აბრაჰამს გასცდა და გონივრულად ჩააწოდა. მის პასს კი პოლონელი გამოეხმაურა და ცარიელ კარში გაიტანა - 1:0. ორ წუთში კი მიუნხენელებმა მორიგი კარგი კომბინაცია გაითამაშეს და მეორე ბურთიც გაიტანეს. ვიდალმა მარცხენა ფრთაზე გრძელი გადაცემა გააკეთა, იქ კი დავიდ ალაბა საოცარ სისწრაფეზე გაიჭრა, საჯარიმოში შევიდა და დუგლას კოშტას ჩაუწოდა, რომელმაც ბუნდესლიგაში თავისი მეოთხე ბურთი მარტივად გაიტანა და ეფექტური სალტოთი აღნიშნა.


პირველი ტაიმის ბოლოს კი თომას მიულერმა სახიფათო საჯარიმო მოიპოვა, მაგრამ ლევანდოვსკიმ ცუდად შეასრულა. შესვენების შემდეგ "ბაიერნი" მინდორზე თავდაჯერებული გავიდა, ბურთი დაიჭირა და კონტროლი დააწესა. "აინტრახტი" პრესინგის ახორციელებდა, მაგრამ მასპინძლებმა შეცდომებს უკლეს და ბურთს კარგად ათამაშებდნენ. მეორე ნახევარში პირველი საგოლე მომენტი მიულერს ჰქონდა, როდესაც მატს ჰუმელსის ჩინებული გრძელი გადაცემის შემდეგ თომასი მეკარესთან ერთი-ერთზე დარჩა. ტომაშ ჰრადეცკი წინ გამოვიდა, ამიტომ მიულერმა თავზე გადაუგდო, მაგრამ ბურთი კარის ხაზიდან გამოცდილმა იაპონელმა უკანა ხაზელმა, მაკოტო ჰასებემ, მუხლის ტრავმის ფასად გამოიტანა. საპასუხოდ ანტე რებიჩმა საჯარიმოში ჩინებულად იმოქმედა და ტექნიკური დარტყმის შემდეგ ბურთი ხარიხას მოხვდა - "ბაიერნი" რეალურად გადარჩა.

მალევე რებიჩის კარგი პასით საჯარიმოში ბლუმი შეიჭრა, მაგრამ ძალიან ცუდად დაარტყა და "აინტრახტმა" მორიგი ეპიზოდი გააფუჭა. ფრანკფურტელები საკმაოდ კარგად მოქმედებდნენ. რებიჩმა და ბლუმმა მშვენიერი სამუშაო შეასრულეს, ბევრს მოძრაობდნენ, "ბაიერნის" მცველებს პრობლემებს უქმნიდნენ და მომენტებსაც ქმნიდნენ. 55-ე წუთზე კი მიუნხენელებმა მორიგი საგოლე შეტევა განახორციელეს. ლამმა საჯარიმოში რობენს გაუყოლა, რომელიც შემოტრიალდა და ცენტრში ჩააწოდა, იქ კი ლევანდოვსკი გაჩნდა, ბურთი მიიღო და მომენტალურად კარში დაარტყა - 3:0, ლევიმ დუბლი გაიფორმა.


დარჩენილ დროში "ბაიერნი" უპირატესობას ფლობდა, მაგრამ თავი აღარ მოუკლავს. გუნდებს კი ორი რეალური მომენტი ჰქონდათ. ჯერ "აინტრახტს", როდესაც ბლუმმა მახვილი კუთხიდან დაბალი ტრაექტორიით ძალიან კარგად დაარტყა და ნოიერმა დიდებული სეივი განახორციელა. შემდეგ კი, კონტრშეტევის დროს, რობენმა ლევანდოვსკი პირისპირ დატოვა, მაგრამ პოლონელის დარტყმა მიზანს სულ ცოტათი ასცდა. საბოლოოდ 3:0 და "რეკორდმაისტერმა" მორიგი დამაჯერებელი გამარჯვება მოიპოვა.

მიმდინარე სეზონში პირველად!


დღევანდელი დღის შემდეგ მიუნხენის "ბაიერნმა" მიმდინარე სეზონში უახლოეს კონკურენტთან სოლიდური უპირატესობა პირველად მოიპოვა. "ალიანს არენაზე" გამართული მატჩის პარალელურად "ლაიფციგი" საკუთარ მოედანზე "ვოლფსბურგთან" 0:1 დამარცხდა და ახლა უკვე "ბაიერნს" ათი ქულით ჩამორჩება, რაც სერიოზული ჰანდიკაპია. ეს კი "რეკორდმაისტერის" ყოფილი თავდამსხმელის, მარიო გომესის, დამსახურებაა, რომელმაც "ხარებს" ის ერთადერთი ქულა მოუტანა და ახლა მიუნხენური გრანდი საკმაოდ კომფორტულ სიტუაციაში იმყოფება.

თუმცა როგორც კარლო ანჩელოტიმ აღნიშნა, გუნდმა კონცენტრაცია არ უნდა დაკარგოს და ბოლომდე იბრძოლოს. ბუნდესლიგის დასრულებამდე ჯერ კიდევ დიდი დროა, მაგრამ "ბაიერნის" უპირატესობა გამოიკვეთა და ახლა უკვე თამამად შეიძლება ითქვას, რომ საჩემპიონო რბოლა თითქმის დასრულებულია. გარდა ამისა, თავისი მატჩი დორტმუნდის "ბორუსიამაც" წააგო და "რეკორდმაისტერმა" ერთი გასროლით ორი კურდღელი დაიჭირა. მართლაც მშვენიერი დღე გამოდგა.

ბოატენგი დაბრუნდა

გუშინდელი თამაშის მთავარი მოვლენა კი უდავოდ 28 წლის გერმანელი მცველის, ჟერომ ბოატენგის, დაბრუნება იყო, რომელსაც დაახლოებით სამი თვე გაუცდა და კვლავ საქმეში ვიხილეთ. ჟერომმა მატჩის 65-ე წუთზე ხავი მარტინესი შეცვალა და მას მთელი "ალიანს არენა" ოვაციებით შეხვდა. შესაძლოა, ბოატენგმა პირველი წრე ძალიან სუსტად ჩაატარა, მაგრამ მან ამ სეზონში ორი ტრავმა გადაიტანა და ახლა კვლავ მწყობრშია, რაც ნებისმიერ შემთხვევაში, ძალიან კარგი ამბავია. ჟერომი გასული წლის საუკეთესო ფეხბურთელია გერმანიაში და "ბაიერნის" ქომაგები ძალიან დიდ პატივს სცემენ. ანჩელოტიმ პირობა შეასრულა და ბოატენგს ბოლოს 25 წუთი მისცა, რომლის დროსაც მან ერთი კარგი ვარდნა განახორციელა, როდესაც ჰრგოტას ბურთი აართვა. სხვა კი გამორჩეული არაფერი გაუკეთებია, თანაც თამაში უკვე დამშვიდებული იყო და "აინტრახტი" მარცხს შეეგუა.

ყველაზე საინტერესო კი ის არის თუ რა მოხდება მომავალში და რა ბედი ეწევა ხავი მარტინესს? ესპანელი უკანა ხაზელი მიმდინარე სეზონში ჩინებულად გამოიყურება და არანაირი მიზეზი არ არსებობს, რომ ანჩელოტიმ ის სათადარიგო სკამზე გადასვას. მატს ჰუმელსზე კი ლაპარაკიც ზედმეტია, ის ნამდვილი ბოსია, რომელსაც ხელს ვერავინ მოკიდებს. მაშასადამე, ბოატენგი სათადარიგო მცველი იქნება? თუ პაპა კარლოს რაიმე სხვა გამოსავალი აქვს? აი ეს მთავარი ინტრიგა და ძალიან საინტერესო თემაა. რა თქმა უნდა, ჟერომ ბოატენგი უფრო ძლიერი და თანამედროვე, სრულყოფილი მცველია, ვიდრე ხავი მარტინესი, მაგრამ ესპანელს მართლაც საოცარი ფორმა აქვს აკრეფილი, ამიტომ მისი ამოგდება ურთულესი იქნება. ასე, რომ ბოატენგის დაბრუნება კარგია, მაგრამ ანჩელოტის ზედმეტ თავსატეხსაც უჩენს.

უბრალოდ შეუდარებელი

უყურებ არიენ რობენის თამაშს და რწმუნდები, რომ ეს განსაკუთრებული ფეხბურთელია, რომელიც 33 წლის ასაკში უმაღლეს დონეზე ასპარეზობს. აი რას ნიშნავს, როდესაც "მფრინავ ჰოლანდიელს" ტრავმები არ აწუხებს და ის ყოველ შეხვედრაში ერთ-ერთი საუკეთესოა. გუშინ არიენმა საგოლე პასი გააკეთა და საკუთარი ფლანგიდან "აინტრახტს" უამრავი პრობლემა შეუქმნა. "რეკორდმაისტერის" მარჯვენა ფლანგი გაცილებით აქტიური იყო, რაც სწორედ რობენის დამსახურებაა, რომელმაც მინდორზე 90 წუთი დაჰყო და შესანიშნავად გამოიყურებოდა. არიენი მატჩის ბოლოსკენაც კი საოცარი მონდომებით მოქმედებდა, მაღალ სისწრაფეზე თამაშობდა და მართლაც გასაოცარია, როდესაც 33 წლის შემტევი ასეთ ფორმაში იმყოფება. ფაქტია, რომ რობენს კლასთან ერთად სიჩქარეც კი არ დაუკარგავს და მთელი მატჩის განმავლობაში ბევრს დარბის. ეს მართლაც აღსანიშნავია ფაქტია და უკვე მერამდენე მატჩია ჰოლანდიელი ბრწყინავს და ამტკიცებს, რომ მას ბოლო სიტყვა ჯერ კიდევ არ უთქვამს.

არიენ რობენი შეუდარებელი ფეხბურთელია, რომელიც ინდივიდუალურად მსოფლიოს ერთ-ერთი უძლიერესი მოთამაშეა და "ბაიერნს" მისი იმედი ყოველთვის ექნება. "მფრინავი ჰოლანდიელი" კარლო ანჩელოტის გუნდის უმნიშვნელოვანესი ჯოკერია, რომელიც ახლა უბრალოდ ფენომენალურ ფორმაშია და იმედია, ჰოლანდიელი სეზონის ბოლომდე არანაირ დაზიანებას არ მიიღებს. მის კლასში კი ეჭვი არავის ეპარება, თუ რობენი ჯანმრთელად იქნება, ის აუცილებლად ასე გააგრძელებს.

ლევის მეასე!

გუშინ საღამოს რობერტ ლევანდოვსკიმ "ბაიერნის" მაისურით მორიგი დუბლი გაიფორმა და "რეკორდმაისტერის" შემადგენლობაში ასი გოლი დაუგროვდა. 28 წლის პოლონელმა ასბურთიან ზღვარს 136 თამაშში მიაღწია, რაც შთამბეჭდავი შედეგია. ლევანდოვსკიმ ჯერ მიულერის პასით ბურთი ცარიელ კარში შეაგორა, შემდეგ კი საჯარიმოში ნამდვილი ცენტრფორვარდის სტილში იმოქმედა და "ალიანს არენაზე" ბოლო ოთხ თამაშში უკვე რვა ბურთი გაიტანა, რაც არანორმალური მაჩვენებელია! რობერტი კარიერაში საუკეთესო სეზონს ატარებს, რაც ანჩელოტის დამსახურებაა, რადგან მას უფრო მეტი თავისუფლება მისცა. ყველაზე გასაოცარი კი ის არის, რომ ლევანდოვსკი ფიზიკურად საოცარ კონდინციებშია და დასვენებაც კი არ სჭირდება.

ვულოცავთ ლევის მეასე გოლს "ბაიერნის" მაისურით, "რეკორდმაისტერს" კი წარმატებებს ვუსურვებთ. ახლა გუნდი ერთი კვირა დაისვენებს, შემდეგ კი სტუმრად მიუნხენგლადბახის "ბორუსიას" შეხვდება, რითიც მარტიც დასრულდება, რადგან თვის ბოლოს სანაკრებო პაუზა დაიწყება.скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
მატჩის ანალიზი ბუნდესლიგა
მსგავსი სიახლეები
კომენტარები
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა