...

ბაიერნი Vs რეალი: ურთიერთშეხვედრების ისტორია

მარტი იწურება და ჩემპიონთა ლიგის პირველ მეოთხედფინალურ შეხვედრამდე დაახლოებით ორი კვირაა დარჩენილი. მიუნხენის "ბაიერნის" ქომაგები მადრიდის "რეალთან" უმნიშვნელოვანეს პაექრობას სულმოუთმენლად ელიან, მაგრამ მანამდე გარკვეული დროა და ვეცდები, რომ ამ პერიოდის განმავლობაში არ მოგაწყინოთ.

BAYERN.GE "ევროპული კლასიკოს" წინ, პერიოდულად, ამ შეხვედრაზე საინტერესო და ვრცელ ბლოგს შემოგთავაზებთ, რომელიც თქვენს ყურადღებას აუცილებლად მიიქცევს, თანაც ამ დიდი მატჩების წინ შესაბამის განწყობას შეიქმნით.

პირველ რიგში კი ამ ორი ევროპული გრანდის ურთიერთშეხვედრების ისტორიით დავიწყოთ. "რეალისა" და "ბაიერნის" დაპირისპირებას "ევროპული კლასიკო" შემთხვევით არ ქვია, ეს მართლაც განსაკუთრებული თამაშია, რომელსაც უდიდესი ისტორია აქვს.

მაშ ასე, გთავაზობთ თუ საიდან იწყება ეს უნიკალური დაპირისპირება და როგორ მიმდინარეობდა ევროპული გიგანტების შეხვედრები ევროპის მთავარ საკლუბო ტურნირზე.

რაუნდი 1 - რეალი 1:3 ბაიერნი (1975/76)


"სამეფო კლუბისა" და "რეკორდმაისტერის" გზები ისტორიაში პირველად 1975/76 წლების სეზონში, ჩემპიონთა თასის ნახევარფინალურ ეტაპზე გადაიკვეთა. ტურნირის ბოლო ორგზის გამარჯვებულმა "ბაიერნმა" პირველი თამაში მადრიდში ჩაატარა და ფრეს (1:1) მიაღწია. მასპინძლები დებიუტშივე (7-ე წუთზე) დაწინაურდნენ, როდესაც მცველების შეცდომით რობერტო მარტინესმა ისარგებლა, მაგრამ პირველი ტაიმის ბოლოს სანიმუშო კონტრშეტევა დიდმა გერდ მიულერმა დააგვირგვინა და გერმანელებისთვის კომფორტული შედეგი მოიპოვა.

მიუნხენში კი "ბაიერნმა" ბრწყინვალე მატჩი ჩაატარა და დამაჯრებელი გამარჯვება მოიპოვა - 2:0. დეტმარ კრამერის გუნდმა აქტიურად დაიწყო და ანგარიში უკვე მეცხრე წუთზე გახსნა. ბერნდ დიურნბერგერმა ორი მეტოქე ჩამოიტოვა და საჯარიმოს მისადგომებთან მიულერს დაუგორა, რომელმაც მარცხენა ფეხით მისთვის უჩვეულო სტილში გაისროლა და პირდაპირ ცხრიანში გაარტყა - 1:0! "ბაიერნმა" შეტევები გააგრძელა, ფრანც ბეკენბაუერი, ფრანც როტი, კარლ-ჰაინც რუმენიგე, ული ჰიონესი, დიურნბერგერი და გერდ მიულერი ჩინებულ კომბინაციებს ათამაშებდნენ. პირველი ნახევრის შუაწელს ლეგენდარულმა გერდმა დუბლი გაიფორმა და საბოლოო ანგარიშიც დააფიქსირა.

პირველი "ევროპული კლასიკო" გერდ მიულერის ფურორით დასრულდა და "რეკორდმაისტერმა" ჩემპიონთა თასი ზედიზედ მესამედ მოიგო, რაც ისტორიული წარმატება იყო, რომელიც მას შემდეგ არავის გაუკეთებია.

რაუნდი 2 - ბაიერნი 4:2 რეალი (1986/87)


დაახლოებით 10 წელიწადში ამ გუნდების გზა ჩემპიონთა თასის ნახევარფინალში კვლავ გადაიკვეთა და ფინალის საგზური ისევ გერმანელებმა მოიპოვეს. პირველი თამაში ამჯერად მიუნხენში გაიმართა, სადაც "რეალმა" ნამდვილი ჯოჯოხეთი გამოიარა. "ბაიერნის" კაპიტანმა, კლაუს აუგენტალერმა, ლამაზი კომბინაციის შემდეგ, ანგარიში მე-11 წუთზე უზუსტესი შორეული დარტყმით გახსნა. იმავე აუგენტალერის ფენომენალური პასით ჰანს დოფნერი პაკო ბუიოსთან პირისპირ დარჩა, მაგრამ ამ უკანასკნელმა წესები დაარღვია და პენალტი აიკიდა. ბურთთან ლოთარ მათეუსი მივიდა, რომელმაც უზადოდ შეასრულა - 2:0. ამას მოჰყვა მათეუსის და ხუანიტოს ცნობილი დაპირისპირება, როდესაც "რეალის" ესპანელი შემტევი არასპორტულად მოიქცა, მაგრამ მსაჯმა დაინდო. ტაიმის მიწურულს კი მათეუსის პასით როლანდ ვოლფარტმა ანგარიში გამანადგურებელი გახადა, რასაც ემილიო ბუტრაგუენომ ერთი ბურთით უპასუხა. მეორე ნახევარში კი "რეალის" კარში კიდევ ერთი პენალტი დაიდო, რომელიც კვლავ მათეუსმა გამოიყენა და "სამეფო კლუბის" რბევა დაასრულა - 4:1!

ეს იყო პირველი ცეცხლოვანი "ევროპული კლასიკო", დაძაბული ორთაბრძოლითა და სახასიათო დაპირისპირებით. მადრიდში ესპანელებმა სანტილიანას გოლით იმარჯვეს, მაგრამ 1:0 მომდევნო ეტაპზე გასასვლელად საკმარისი არ იყო. სამწუხაროდ, ფინალში გასულმა დიდებულმა "ბაიერნმა" "პორტუსთან" გადამწყვეტი ბრძოლა 1:2 დათმო და ტიტული ვერ მოიგო.

რაუნდი 3 - ბაიერნი 3:4 რეალი (1987/88)


"ბაიერნის" საწყისი ორი გამარჯვების შემდეგ მადრიდის "რეალის" დროც მოვიდა. "ევროპული კლასიკო" ზედიზედ მეორედ გაიმართა, მაგრამ 1987/88 წლების კამპანიაში უკვე მეოთხედფინალურ სტადიაზე.

მიუნხენში გერმანელებმა ჩინებულად დაიწყეს. პირველი ტაიმის ბოლოს ანგარიში უძლიერესი დარტყმით ჰანს პლფიუგლერმა გახსნა, სამ წუთში კი კიოგლისა და ჰიუზის კომბინაცია ნორბერტ ედერმა დააგვირგვინა. მეორე ნახევრის დებიუტში, მათეუსის დარტყმისა და ბუიოს სეივის შემდეგ, დამატებაზე როლანდ ვოლფარტმა ივარგა და "რეკორდმაისტერი" წინ 3:0 გავიდა. მატჩის ბოლო 6 წუთში კი მიუნხენელებმა ორი უხეში შეცდომა დაუშვეს, რის გამოც მკაცრად დაისაჯნენ. ჯერ საკუთარ საჯარიმოში გოლის ავტორი ედერი შეცდა და ბუტრაგუენოს გაატანინა. ბოლოს კი უგო სანჩესის საჯარიმოდან სუსტად დარტყმული ბურთი ბელგიელმა გოლკიპერმა, ჟან-მარი პტაფმა, ხელებში ვერ შეიმაგრა. "ბაიერნმა" ორი სულელური გოლი გაუშვა, 3:2 იმარჯვა და მეტოქეს შანსები დაუტოვა.

მადრიდში კი "სამეფო კლუბმა" ეს შესაძლებლობა კარგად გამოიყენა და იანკოვიჩმა ულამაზესი ბურთით 26-ე წუთზე გახსნა ანგარიში. ტაიმის ბოლოს კი "რეალმა" კარგი კონტრშეტევა გააკეთა და მიჩელმა მეორე გოლი გაიტანა. "ბაიერნმა" სცადა, მიუნხენელები უტევდნენ, მაგრამ "სანტიაგო ბერნაბეუზე" არამცთუ ორი, არამედ ერთი ბურთიც ვერ გაიტანეს. საბოლოოდ 0:2 და საერთო ჯამში ესპანელებმა იმარჯვეს. მადრიდული გრანდი ტურნირს მომდევნო სტადიაზე, "პსვ-სთან" დაპირისპირებაში (1:1 შინ, 0:0 გასვლაზე) გამოეთიშა.

რაუნდი 4 - ბაიერნი 8:3 რეალი


1999/00 წლების სეზონში მიუნხენური გრანდი და მადრიდული კლუბი ერთმანეთს ორჯერ დაუპირისპირდნენ, პირველად - მეორე ჯგუფურ ეტაპზე. მატჩები მესამე და მეოთხე ტურში ანუ ერთმანეთს მიყოლებით გაიმართა, ამიტომაც ფორმალურად შეიძლება ითქვას, რომ "ბაიერნმა" ორმატჩიან დუელში მეტოქე გაანადგურა, მაგრამ რა თქმა უნდა, ეს არ იყო ფლეი-ოფი და გერმანელებმა უბრალოდ 6 ქულა მოიპოვეს.

პირველი თამაში "სანტიაგო ბერნაბეუზე" გაიმართა. "ბაიერნმა" ძალიან აქტიურად დაიწყო და მე-20 წუთზე ანგარიში დამსახურებულად გახსნა. ჯოვანი ელბერის კარგი პასის შემდეგ მეჰმეტ  შოლი ახალგაზრდა იკერ კასილასთან პირისპირ დარჩა და ესპანელს აჯობა. ოთხ წუთში შტეფან ეფენბერგმა მახვილი კუთხიდან საჯარიმო დარტყმა ჭკვიანურად და ზუსტად შეასრულა - 2:0! ფერნანდო მორიენტესმა ერთ წუთში ერთი ბურთი გაქვითა, მაგრამ ტაიმის ბოლოს მიუნხენელებმა ლამაზი კომბინაცია გაითამაშეს, რომელიც ელბერის ქუსლით პასითა და ტორსტენ ფინკის უძლიერესი შორეული დარტყმით დასრულდა - 3:1. მეორე ტაიმის დებიუტში რობერტო კარლოსის დიდებული ჩაწოდებით რაულმა ანგარიში კვლავ მინიმალური გახადა, მაგრამ პაულო სერჟიომ თავით მეოთხე ბურთი გაიტანა და საობლოო ანგარიშ დააფიქსირა - "ბაიერნმა" მადრიდში 4:2 იმარჯვა და მატჩი არანორმალურად სანახაობრივი გამოვიდა, რადგან გუნდებსაც კიდევ ბევრი მომენტი ჰქონდათ.

ერთ კვირაში "რეკორდმაისტერმა" "რეალს" მიუნხენში უმასპინძლა და პირველი ბურთ კვლავ შოლმა გაიტანა, მატჩის მე-4 წუთზე. დაახლოებით ნახევარ საათში ოლივერ კანის გრძელი გადაცემის შემდეგ ჯოვანი ელბერი "სამეფო კლუბის" მცველებს გაექცა, მუხლით ორჯერ აკენწლა და კასილასს თავზე გადაუგდო - 2:0. მეორე ტაიმის დასაწყისში ივან ელგერამ ერთი ბურთი გაქვითა, მაგრამ მატჩის მიწურულს ალექსანდრ ციკლერმა დუბლი გაიფორმა და ამჯერად "ბაიერნმა" ესპანური გრანდი შინ 4:1 გაანადგურა. აღსანიშნავია, რომ ეს ლოთარ მათეუსის ბოლო თამაში იყო "ბაიერნის" მაისურით და ლეგენდარულმა გერმანელმა ეს საღამო დიდებულად დაასრულა.

რაუნდი 5 - რეალი 3:2 ბაიერნი


"რეალმა" და "ბაიერნმა" მეოთხედფინალური სტადია გადალახეს და ერთმანეთს ნახევარფინალში კვლავ შეხვდნენ. ბევრი ფავორიტად სწორედ ოტმარ ჰიტცფელდის გუნდს მიიჩნევდა, მაგრამ მადრიდში ესპანელებმა კომფორტული გამარჯვება მოიპოვეს - 2:0. ანგარიში ნიკოლას ანელკამ გახსნა, რასაც იენს იერემისის ავტოგოლი მოჰყვა.

საპასუხო შეხვედრა გერმანელებმა კარგად დაიწყეს და კრისტიან იანკერმა გოლი უკვე მე-12 წუთზე გაიტანა, მაგრამ "ბაიერნს" რისხვად კვლავ ახალგაზრდა ფრანგი თავდამსხმელი მოევლინა, რომელმაც ამჯერად თავიტ გაიტანა და წონასწორობა აღადგინა. მეორე ტაიმის დასაწყისში ელბერმა "ბაიერნი" ისევ წინ გაიყვანა, მაგრამ მიუნხენელებს კიდევ ორი ბურთი ჰქონდათ გასატანი, რაც არ გამოუვიდათ და მხოლოდ 2:1-ს დასჯერდნენ.

აი ასე აიღო რევანში ვისენტე დელ ბოსკეს გუნდმა, რომელმაც ფინალში "ვალენსია" 3:0 გაანადგურა და ჩემპიონთა ლიგის ტიტული მოიპოვა. ყველაზე საინტერესო კი ის არის, რომ "რეალში" გატარებულ ერთ სეზონში ანელკამ მხოლოდ ორი ბურთი გაიტანა და ორივეჯერ "ბაიერნის" კარში.

რაუნდი 6 - რეალი 1:3 ბაიერნი


მომდევნო სეზონში "ბაიერნს" რევანშის შანსი მიეცა, რადგან "ევროპული კლასიკო" კვლავ ნახევარფინალში შედგა. პირველი მატჩი ისევ მადრიდში გაიმართა, მაგრამ ამჯერად ფავორიტი ტურნირის მოქმედი გამარჯვებული მადრიდის "რეალი" იყო, რომელსაც ფანტასტიკური შემადგენლობა ჰყავდა. თუმცა მებრძოლმა გერმანელებმა დიდებული თამაში ჩაატარეს. ოლივერ კანმა ყველაფერი აიღო, რისი აღებაც შეიძლებოდა და არ შეიძლებოდა, ჯოვანი ელბერმა კი შორეული დარტყმით, მარცენა ფეხით, ერთადერთი ბურთი გაიტანა და "ბაიერნის" ქომაგებს, მუხლზე კოცნის სახით, დაუვიწყარი მომენტი აჩუქა, რომელიც კლუბის "ენციკლოპედიაშია" შესული.

მადრიდში 1:0 გამარჯვების შემდეგ ოტმარ ჰიტცფელდის გუნდმა საკუთარ მოედანზე ცნობილ ტაქტიკას მიმართა და აქცენტი სწრაფ გოლზე გააკეთა. კუთხურიდან შექმნილი არეულობით ელბერმა ისარგებლა და ბრაზილიელმა ფორვარდმა "რეალს" მორიგი გოლი გაუტანა. 10 წუთში კი რაულის პასით ლუიშ ფიგუმ წონასწორობა აღადგინა და ესპანელებს, მომდევნო ეტაპზე გასასვლელად, ერთი გოლი სჭირდებოდათ. თუმცა "ბაიერნმა" უპირატესობა არ გაუშვა და იენს იერემისმა 34-ე წუთზე ზუსტი შორეული დარტყმით მეორე ბურთი გაიტანა. "რეკორდმაისტერმა" საქმე ბოლომდე დამაჯერებლად მიიყვანა და სრულასოვანი რევანში აიღო - ჰიტცფელდის უნიკალურმა გუნდმა 2001 წელს ჩემპიონთა ლიგის ტიტული მოიპოვა.

რაუნდი 7 - ბაიერნი 2:3 რეალი


"ევროპული კლასიკოების" სერია გაგრძელდა, მაგრამ ამჯერად "ბაიერნი" და "რეალი" ერთანეთს მეოთხედფინალურ სტადიაზე დაუპირისპირდნენ. მიუნხენში ანგარიში, ყველსათვის მოულოდნელად, კამერუნელმა მცველმა ჟერემიმ გახსნა. აფრიკელმა ფრთაზე გაიგდო და ოლი კანს ულამაზესი ბურთი გაუტანა, რომელიც მისთვის "რეალის" მაისურით პირველი და უკანასკნელი აღმოჩნდა. ამის შემდეგ გერმანელებმა მოუმატეს, პენალტიც მოიპოვეს, მაგრამ ეფენბერგმა ვერ გაიტანა. მატჩი მიწურულს უახლოვდებოდა, "ბაიერნი" კი გოლის გატანას ვერ ახერხებდა. 82-ე წუთზე კი ეფემ რეაბილიტაცია მოახდინა და ელბერის პასით წონასწორობა აღადგინა. ექვს წუთში კი შეცვლაზე შემოსულმა პერუელმა ფორვარდმა, კალუდიო პისარომ, "ბაიერნი" წინ გაიყვანა - 2:1! დარჩენილ დროში ჰიტცფელდის გუნდს მესამე ბურთის გატანაც შეეძლო, მაგრამ არ გამოუვიდა.

მადრიდში კი უკვე უპირატესობას ესპანელები ფლობდნენ, რომელთაც მიზანს 69-ე წუთზე მიაღწიეს, როდესაც რობერტო კარლოსის პასით ივან ელგერამ ანგარიში გახსნა. ძირითადი დროის დასრულებამდე 5 წუთით ადრე კი გუტი ერნანდესმა მეორე ბურთიც გაიტანა და "ბაიერნს" მცირე შანსები დაუტოვა. სამწუხაროდ, "რეკორდმაისტერმა" სტუმრად საჭირო ერთი გოლი ვერ გაიტანა და მომდევნო ეტაპზე "სამეფო კლუბი" გაუშვა, რომელმაც საბოლოოდ ტურნირი მოიგო.

რაუნდი 8 - ბაიერნი 1:2 რეალი


ერთწლიანი პაუზის შემდეგ ეს გუნდები ერთმანეთს მერვედფინალში შეხვდნენ. მიუნხენში "ბაიერნი" როი მაკაის ერთადერთი გოლით იგებდა, როდესაც ლეგენდარულმა "ტიტანმა" უხეში შეცდომა დაუშვა და რობერტო კარლოსის შორეული დარტყმა საჯარიმოდან ხელებში ვერ შეიმაგრა. "ბაიერნმა" შინ საკმაოდ კარგად ითამაშა, ამიტომ ამ შეცდომის გამო წაგება ძალიან დასანანი იყო.

კიდევ უფრო დიდი იმედგაცრუება კი მადრიდულმა მატჩმა მოიტანა, რომელიც ძალიან დაძაბული გამოდგა. ზინედინ ზიდანის გოლით "სამეფო კლუბი" 32-ე წუთიდან მოყოლებული იგებდა, მოთამაშეები კი მინდორზე არაფერს თმობდნენ. ერთ-ერთ ეპიზოდში ერთმანეთს ოლივერ კანი და რაული დაუპირისპირდნენ, კაპიტნების ჯახს კი სხვებიც შეუერთდნენ. "ბაიერნმა" მადრიდში გატანა კვლავ ვერ მოახერხა და ჩემპიონთა ლიგას ნაადრევად დაემშვიდობა. თუმცა ამჯერად "რეალმა" ტიტული ვეღარ მოიგო და მომდევნო ეტაპზე "მონაკოსთან" დამარცხდა.

რაუნდი 9 - რეალი 4:4 ბაიერნი


2006/07 წლების სეზონში "ევროპული კლასიკო" კვლავ მერვედფინალში შედგა, მაგრამ "ბაიერნის" თავკაცი უკვე ფელიქს მაგათი იყო. "სამეფო კლუბს" კი ფაბიო კაპელო წვრთნიდა. მადრიდელებმა აქტიურად დაიწყეს და რუდ ვან ნისტელროის პასით რაულმა ანგარიში მეათე წუთზე გახსნა. საპასუხოდ "ბაიერნმა" სტანდარტი გამოიყენა და ბრაზილიელმა ცენტრალურმა მცველმა, ლუსიომ, თავით ანგარიში გაათანაბრა. თუმცა 5 წუთში რაულმა დუბლი გაიფორმა და "რეალი" ისევ წინ გაიყვანა. კიდევ 6 წუთში კი დევიდ ბექჰემის ჩაწოდების შემდეგ რუდიმაც გაიტანა და ესპანელებმა პირველი ნახევარი 3:1 მოიგეს. მეორე ტაიმში კი "ბაიერნმა" სერიოზულად მოუმატა, რადგან გასატანი ჰქონდა. შანსები იყო და საბოლოოდ "რეკორდმაისტერმა" მიზანს მიაღწია. მარკ ვან ბომელმა შორიდან იდეალური სიზუსტითა და სიძლიერით დაარტყა, 3:2 დააფიქსირა და "ბაიერნი" მძიმე მდგომარეობიდან გამოიყვანა.

"ალიანს არენაზე" გამართული პირველი "ევროპული კლასიკო" კი იდეალურად დაიწყო - მატჩის მე-12 წუთზე, კარლოსის შეცდომის შემდეგ და ჰასან სალიჰამიჯიჩის პასით როი მაკაიმ ჩემპიონთა ლიგის ისტორიაში უსწრაფესი ბურთი გაიტანა და "ბაიერნი" წინ გაიყვანა. ეს ანგარიში მასპინძლების სასარგებლოდ იყო, ამიტომ "რეალი" გაიხსნა და საკმაოდ კარგი მატჩი გამოვიდა. მეორე ტაიმში ლუსიომ თავით იკერ კასილასის კარი კვლავ აიღო და "რეკორდმაისტერის" უპირატესობა კომფორტული გახადა. 82-ე წუთზე გუნდები ათ-ათი კაცით დარჩნენ, რადგან მოედანი ვან ბომელმა და მაჰამადუ დიარამ დატოვეს. რუდ ვან ნისტელროიმ ბოლოსკენ პენალტი გაიტანა, ინტრიგა დააბრუნა, მაგრამ "ბაიერნმა" 2:1 იმარჯვა და მომდევნო ეტაპზე სტუმრად გატანილი მეტი გოლის წყალობით გავიდა. "ბაიერნმა" ეს მნიშვნელოვანი პაექრობა მოიგო, მაგრამ მეოთხედფინალში "მილანთან" უშანსოდ წააგო.

რაუნდი 10 - ბაიერნი 3:3 რეალი (3-1 პენ.)


მერვედფინალური ბატალიების შემდეგ 2011/12 წლების სეზონში "ევროპული კლასიკო" ნახევარფინალს დაუბრუნდა და ისტორიაში ყველაზე დრამატული ორთაბრძოლა გაიმართა. მიუნხენში იუპ ჰაინკესის "ბაიერნმა" კარგი მატჩი ჩაატარა და მარიო გომესის მიერ ბოლო წუთზე გატანილი გოლით 2:1 იმარჯვა. "რეკორდმაისტერი" ფრანკ რიბერიმ კუთხურიდან შექმნილი არეულობის შედეგად დააწინაურა, "რეალმა" კი საპასუხო ბურთი მეორე ტაიმის დასაწყისში გაიტანა. ბოლო ნახევარი საათი "რეკორდმაისტერი" უპირატესობას ფლობდა, მომენტებსაც ქმნიდა და საბოლოოდ, სრულიად დამსახურებული გამარჯვება მოიპოვა.

საპასუხო თამაში კი სტუმრებისთვის ძალიან ცუდად დაიწყო, რადგან "რეალმა" პენალტი უკვე მე-4 წუთზე მოიპოვა და კრიშტიანუ რონალდუმ ანგარიში გახსნა. მალევე 19 წლის დავიდ ალაბა მარცხენა ფრთაზე გაიჭრა და არენ რობენი ცარიელი კარის წინ დატოვა, მაგრამ ჰოლანდიელმა ააცილა. მე-14 წუთზე კი რონალდუმ იოზილის პასით დუბლი გაიფორმა და "ბაიერნი" თითქოს გატეხა, მაგრა მიუნხენელები მარტივად არასოდეს ნებდებიან. ჟოზე მოურინიოს გუნდმა შედეგზე თამაში დაიწყო, გერმანულმა გრანდმა კი საგრძნობლად მოუმატა. დაახლოებით 10 წუთში გომესის წაქცევის გამო დანიშნული პენალტი არიენ რობენმა გოლად აქცია. პირველი ტაიმის დარჩენილი დრო და მთელი მეორე ტაიმი უკეთ "ბაიერნი" გამოიყურებოდა, მომენტებს ქმნიდა და მეორე ბურთთან ძალიან ახლოს იყო. მარიო გომესმა არაერთი შანსი გაუშვა ხელიდან, მაგრამ გოლი ვერაფრით გაიტანა. აქაც 2:1, დაინიშნა დამატებითი დრო, სადაც ორივე გუნდი გადაღლილი იყო და აღარაფერი შეცვლილა.

პენალტების სერია კი ნოიერის ორი სეივით დაიწყო, რომელმაც ჯერ რონალდუს, შემდეგ კი კაკას აუღო. თუმცა "ბაიერნმა" ეს უპირატესობა დაკარგა, რადგან კროოსმა და ლამმა ერთმანეთის მიყოლებით გააფუჭეს. 2:1-ზე ბურთთან სერხიო რამოსი მივიდა, რომელმაც ბურთი "სანტიაგო ბერნაბეუს" უმაღლეს იარუსზე გაუშვა. ბასტიან შვაინშტაიგერმა კი გადამწყვეტი თერთმეტმეტრიანი შეაგდო და "რეკორდმაისტერი" მიუნხენის ფინალში გაიყვანა. "ასტალავისტა, ბაიერნ ფინალისტა!", - ეს გერმანელი კომენტატორის დაუვიწყარი, ლეგენდარული ფრაზაა. თუ რა მოხდა ფინალში ამაზე საუბარის სურვილიც კი არ მაქვს, რადგან ეს "ბაიერნის" ისტორიაში წარუშლელი შავი ლაქაა.

რაუნდი 11 - რეალი 5:0 ბაიერნი


ორ წელიწადში "სამეფო კლუბმა" თავისი რევანში აიღო, მაგრამ ამჯერად გუნდს პაპა კარლო წვრთნიდა, რომლის მთავარი მიზანი "რეალისთვის" ისტორიული მეათე ჩემპიონთა თასის/ლიგის მოპოვება იყო.

"რეალი" და "ბაიერნი" ერთმანეთს კვლავ ნახევარფინალში დაუპირისპირდნენ და პირველი მატჩი მადრიდში გაიმართა. პეპ გვარდიოლას გუნდი, ჩვეულებისამებრ, დიდ ტერიტორიულ უპირატესობას ფლობდა, მაგრამ ესპანელები თავს იდეალურად იცავდნენ და მეტოქეს თითქმის არანაირი შანსი არ დაუტოვეს. "სამეფო კლუბმა" მატჩის დასაწყისში ერთი სანიმუშო კონტრშეტევა გააკეთა, რომელიც კარიმ ბენზემას გოლით დაგვირგვინდა და "რეალმა" შინ 1:0 მოიგო.

"ბაიერნს" მიუნხენში სიტუაციის გამოსწორება შეეძლო, მაგრამ პეპ გვარდიოლას შემტევი და თამამი ტაქტიკა ანჩელოტიმ იდეალურად გაარჩია. გარდამტეხი საწყისი 15 წუთი გამოდგა, როდესაც "რეალის" კაპიტანმა, სერხიო რამოსმა, ოთხწუთიან ინტერვალში, თავით ორი ბურთი გაგვიტანა და მიუნხენური გრანდი ფსიქოლოგიურად გატეხა, რაც თითქმის შეუძლებელია. ბურთს ისევ "ბაიერნი" ფლობდა, მაგრამ მეტოქის კონტრიერიშებს ვერაფრით აჩერებდა და საბოლოოდ, ერთ-ერთი ასეთი შეტევა ბეილის კარგი პასით და რონალდუს მარტივი შესრულებით დასრულდა. პირველი ტაიმი "რეკორდმაისტერმა" გამანადგურებელი ანგარიშით წააგო - 0:3. მეორე ნახევარში ესპანელებმაც დაისვენეს და მხოლოდ რონალდუს ჭკვიანური საჯარიმო გოლით დაკმაყოფილდნენ. "ალიანს არენას" ტაბლოზე, ჩემპიონთა ლიგის ისტორიაში, პირველად დაფიქსირდა სამარცხვინო ციფრები - 0:4! ამაზე საუბარიც კი რთულია, მაგრამ ეს ფეხბურთია - ყველაზე დიდი სპორტი, სადაც ღირსეულმა გუნდებმა მარცხის მიღებაც უნდა იცოდნენ. საბოლოოდ, ლისაბონში, რამოსმა კვლავ მთავარი როლი შეასრულა და "რეალმა" ნანატრი მეათე თასი ხელში ჩაიგდო.


ყველაფერი, რაც ზევით დაიწერა, არის ისტორია, რომელსაც კონკრეტულად მოახლოვებულ დაპირისპირებასთან არანაირი კავშირი არ აქვს. ეს იქნება ახალი დუელი, რომელშიც აუცილებლად უძლიერესი გაიმარჯვებს.

"ბაიერნი" და "რეალი" ჩემპიონთა თასის/ლიგის ფლეი-ოფის ეტაპზე ერთმანეთს ათჯერ დაუპირისპირდნენ და ამ ეტაპზე სტატისტიკა თანაბარია: ხუთი მოგება გერმანელებს, ხუთი - ესპანელებს. ახლა კი ერთ-ერთი გუნდი წინ გაიჭრება და ამ ისტორიულ პაექრობაში უპირატესობას მოიპოვებს.

"ევროპული კლასიკო" ევროპულ ფეხბურთში უდიდესი დაპირისპირებაა, რასაც ისტორია მოწმობს. ამ გუნდების ათი საფლეი-ოფო დუელიდან ხუთჯერ მომდევნო ეტაპზე გასულმა გუნდმა საბოლოო ტრიუმფი იზეიმა. მართალია, ამ 5 შემთხვევიდან მიუნხენში თასი მხოლოდ ერთხელ წავიდა, მაგრამ "ბაიერნს" ახლა უდიდესი მოტივაცია აქვს - გუნდს რევანში სწყურია.

წინ მორიგი საზეიმო "ევროპული კლასიკოა", რომელსაც მთელი მსოფლიო სულმოუთმენლად ელოდება. აქ არ არსებობს ფავორიტი, მინდორზე გადიხარ და მხოლოდ საუკეთესო ფეხბურთის ჩვენებას ცდილობ, წინააღმდეგ შემთხვევაში, ქუდს იხურებ და შინ მიდიხარ - ასეთია ჩემპიონთა ლიგის დიდი თამაშების მკაცრი წესები.

დავით მაღრაძე, სპეციალურად BAYERN.GE-სთვის
скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
ბლოგი ჩემპიონთა ლიგა
მსგავსი სიახლეები
კომენტარები
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა