...

ბაიერნი 4:1 დ.ბორუსია - მატჩის ანალიზი

გუშინ საღამოს მიუნხენის "ბაიერნმა" "ალიანს არენაზე" საკუთარ გულშემატკივარს მორიგი სპექტაკლი მოუწყო და დორტმუნდის "ბორუსია" უშანსოდ დაამარცხა.

"რეკორდმაისტერმა" დიდებული მატჩი ჩაატარა, ბევრი გოლი გაიტანა, ლამაზი კომბინაციები გაითამაშა და რაც მთავარია, პრინციპული მეტოქე გაანადგურა. რევანში აღებულია!

ახლა კი, როდესაც მატჩის დასრულებიდან საკმარისი დრო გავიდა, შეგვიძლია ცივ გონებაზე "დერ კლასიკო" გავაანალიზოთ და მატჩის ანალიზი შემოგთავაზოთ.

მატჩის მსვლელობა

მატჩი არანორმალურ სისწრაფეებზე დაიწყო და საწყისი ორი წუთი ბურთ მხოლოდ "ბაიერნის" ნახევარზე იყო. დორტმუნდის "ბორუსიამ" ეგრევე აგრესიულად და აქტიურად დაიწყო, თანაც პირველი ხიფათიც შექმნა. მარჯვენა ფლანგიდან საჯარიმოში უსმან დემბელე შეიჭრა, მაგრამ კარგი პოზიციიდან მარცხენა ფეხით ძალიან არაზუსტად დაარტყა. საპასუხოდ კი "ბაიერნმა" პირველი გააზრებული და ლამაზი კომბინაცია გაითამაშა. რობენმა ცენტრისკენ წამოიღო და საჯარიმოში ტიაგოს დაუგორა, რომელმაც ტექნიკურად მარჯვენა ფრთაზე ფილიპ ლამს გადააწოდა. კაპიტანმა ერთი შეხებით საჯარიმოს ცენტში ჩააწოდა, სადაც ფრანკ რიბერი თავისუფალი იყო და 34 წლის ფრანგმა ერთი შეხებით ანგარიში გახსნა - 1:0! გუშინდელმა იუბილარმა "რეკორდმაისტერს" სრაფი გოლი გაატანინა.


რამდენიმე წუთში იმავე რიბერიმ საკმაოდ სახიფათო ჯარიმა მოიპოვა და ბურთთან რობერტ ლევანდოვსკი გაჩნდა. პოლონელმა დაბალი ტრაექტორიით გაუშვა და ჩასვა - 2:0! რობერტს ძალიან დაეხმარა უსმან დემბელე, რომელიც ცოცხალ კედელში იდგა და დარტყმის მომენტში თავი დასწია, რაც დაუშვებელია. თუმცა ამას "ბაიერნისთვის" არანაირი მნიშვნელობა არ ჰქონია. "დერ კლასიკო" 10 წუთის დაწყებული იყო, "რეკორდმაისტერს" კი უკვე ორი ბურთით მიყავდა.

"ბაიერნმა" თავისი თამაში დაიჭირა და შეტევები გააგრძელა. მთავარი მოქმედი პირი კი 33 წლის ფანტასტიკური ჰოლანდიელი, არიენ რობენი, იყო, რომელმაც მარსელ შმელცერი გააწამა და რომან ბიურკის გამოცდა მოუწყო. ორი გატანილი ბურთის შემდეგ რობენი მეტოქის კარს თავის სტილში, მარცხენა ფეხით შორეული კუთხისკენ დარტყმით ორჯერ დაემუქრა, მაგრამ ორივეჯერ სანტიმეტრები დააკლდა. "ბორუსიამ" კი მე-20 წუთზე საკუთარი შანსი გამოიყენა. პასლაკის ჩაწოდების შემდეგ არტურო ვიდალმა ბურთი ძალიან ცუდად გამოიტანა, რომელიც რაფაელ გერეიროს მარცხენა ფეხზე კარგად დააჯდა და პორტუგალიელმა პირდაპირ ცხრიანში გაუშვა - სვენ ულრაიხი უშანსოდ იყო.


შემტევი ფეხბურთის ზეიმი გაგრძელდა და მომენტები ორივე გუნდს ჰქონდა. არიენ რობენი კი მარჯვენა ფრთაზე საოცრებების კეთებას აგრძელებდა და ამჯერად ბიურკის ორჯერ ახლო კუთხეში დაურტყა, რისთვისაც შვეიცარიელი ორივეჯერ მზად აღმოჩნდა. პირველი ტაიმის ბოლოს რობენმა პასის გაკეთება ამჯობინა და ლევანდოვსკი საჯარიმოში ხელსაყრელ პოზიციაზე დატოვა, მაგრამ პოლონელის დარტყმა მიზანს ასცდა. საბოლოოდ, 2:1 და გუნდები შესვენებაზე გავიდნენ.

მეორე ტაიმის დასაწყისში პირველი მომენტი კვლავ დორტმუნდელებმა შექმნეს. რაფაელ გერეირომ მოედნის ცენტრში ბურთი მოიპოვა, წამოიღო და საჯარიმოში ობამეიანგს შეუყოლა, რომელმაც დაარტყა, მაგრამ ბურთი ბადეს მხოლოდ გარედან მოხვდა. დაახლოებით ერთ წუთში მოედნის ცენტრში ორთაბრძოლა უკვე ფრანკ რიბერიმ მოიგო და ფრთაზე ეგრევე რობენს გააყოლა. არიენმა ჯერ სოკრატისი დააწვინა, შემდეგ შმელცერსაც გასცდა და შორეულ დაბალ კუთხეში ლამაზად ჩაატრიალა - მას მეხუთე ცდიდან უკვე გამოუვიდა, 3:1!


მესამე გაშვებული ბურთის შემდეგ თომას ტუხელის გუნდი უკვე გატყდა და სერიოზული ბრძოლა შეწყვიტა. "ბაიერნმა" ბურთი მარტივად დაიჭირა და ე.წ. "ეკონომ რეჟიმში" გადავიდა. რობენი რომან ბიურკის კარს თავის სტილში კიდევ ერთხელ დაემუქრა, მაგრამ ამჯერად შედევრის შესაქმნელად ძალიან ცოტა დააკლდა. "ბორუსიას" კი ერთი ძალიან მაგარი მომენტი ჰქონდა, როდესაც როდეს პასის შემდეგ მეკარესთან პირისპირ ობამეიანგი დარჩა, მან ულრაიხს ააცილა, მაგრამ კარის ხაზიდან ბურთი ჟერომ ბოატენგმა გამოიტანა. ძალიან მალე "რეკორდმაისტერი" კონტრშეტევაზე წამოვიდა - რიბერიმ ჩინებული სოლორეიდი განახორციელა და რობერტ ლევანდოვსკი ერთი-ერთზე დატოვა. პოლონელმა ბიურკი მოატყუა და ამ უკანასკნელმა მეტოქე საჯარიმოში წააქცია. მარკო ფრიტცმა პენალტი დანიშნა, ბიურკი გააფრთხილა, ხოლო ლევიმ საკუთარი შანსი გამოიყენა და თერთმეტმეტრიანი გოლად აქცია. ეს მას მხრის დაზიანებად დაუჯდა, მაგრამ არაუშავს, რობერტი ნამდვილი მებრძოლია.

დარჩენილ დროში კი განსაკუთრებული აღარაფერი მომხდარა, რადგან "ბაიერნი" მატჩს დამაჯერებლად აკონტროლებდა. ბოლოსკენ საკუთარი შანსი შეცვლაზე შემოსულ იოზუა კიმიხს ჰქონდა, რომელიც კარგ პოზიციაზე რობენმა დატოვა, მაგრამ ახალგაზრდა გერმანელის ტექნიკური დარტყმა მიზანს ასცდა. მოგვიანებით თავისი შანსი კრისტიან პულიშიჩმა მიიღო, მაგრამ სვენ ულრაიხმა დაამტკიცა, რომ მზად არის და საკმაოდ რთული ბურთი აიღო. "ბაიერნმა" აპრილის პირველი დიდი მატჩი, "დერ კლასიკო", საკუთარ მოედანზე დიდი ანგარიშით მოიგო - 4:1.

მშვენიერი ორგანიზაცია


დორტმუნდის "ბორუსიას", რომელსაც ძალიან ძლიერი და მრავალფეროვანი შეტევითი ხაზი ჰყავს, მთელი 90 წუთის განმავლობაში მხოლოდ ერთი ასპროცენტიანი მომენტი ჰქონდა. მიუხედავად იმისა, რომ გუშინდელი თამაში მარკო როისმა, ანდრე შურლემ და შინჯი კაგავამ გამოტოვეს, "ყვითლების" ორი ყველაზე სახიფათო მოთამაშე: უსმან დემბელე და პიერ-ემერიკ ობამეიანგი მინდორზე იყვნენ, მაგრამ ვერაფერი გააკეთეს. ახალგაზრდა ფრანგი რაღაცას ცდილობდა, მაგრამ აფრიკელი სრულიად ჩრდილში იყო, რაც ცენტრალური მცველების, ჟერომ ბოატენგისა და ხავი მარტინესის დამსახურებაა. მათ საკუთარ საჯარიმოში თითქმის ყველა საჰაერო ორთაბრძოლა მოიგეს, გაბონელი თავდამსხმელი სრულიად გაანეიტრალეს და ძალიან დამაჯერებლად გამოიყურებოდნენ. "ბაიერნმა" დაცვაში საკმაოდ ორგანიზებულად იმოქმედა და "ბორუსიას" სწრაფი შეტევები უპრობლემოდ შეაჩერა. ერთადერთი საგოლე მომენტი კი სებასტიან როდეს ჩინებული პასის შედეგად შეიქმნა, მაგრამ ობამეიანგის დარტყმის შემდეგ ბურთი ცარიელი აკრიდან ბოატენგმა გამოიტანა. სასიამოვნოა, რომ "რეკორდმაისტერის" უკანა ხაზი მატს ჰუმელსის გარეშეც ორგანიზებულად გამოიყურება.

უბრალოდ ცხოველი


"დერ კლასიკოში" მიუნხენური გრანდის ცენტრმა პირველი ტაიმი ცოტათი ჩააგდო, მაგრამ უკვე მეორე ნახევრიდან ყველაფერი მოაწესრიგა. ტიაგო უფრო ხშირად საყრდენ ზონას ეხმარებოდა, ხაბი ალონსო ტრადიციულად თავის საქმეს აკეთებდა, ხოლო არტურო ვიდალი არანორმალურად იბრძოდა. 29 წლის ჩილელმა მატჩის ერთ-ერთი ყველაზე დასამახსოვრებელი მომენტი შემოგვთავაზა, როდესაც დემბელე საჯარიმოში მაღალ სისწრაფეზე შედიოდა და არტურო მას უკნიდან განწირულად ჩაუხტა, ბურთი აართვა და შემდეგ მის შესანარჩუნებლად თავით ასეთი ილეთი განახორციელა. ამას მხოლოდ ცხოველური მენტალიტეტის მქონე ადამიანი თუ იზამს, ოღონდ რა თქმა უნდა, კარგი გაგებით. გარდა ამისა, მეორე ნახევარში ვიდალი ნამდვილი კედელი იყო, რომელსაც ცენტრში გვერს ვერავინ უვლიდა და სამხრეთ ამერიკელმა კიდევ ერთხელ დაამტკიცა, რომ მისი ბრძოლისუნარიანობა გუნდისათვის ძალიან მნიშვნელოვანია. გუშინდელ შეხვედრაში მოედნის ცენტრში მაესტრო ალკანტარზე უფრო შესამჩნევი ვიდალის დიდებული თამაში იყო, რომელმაც ამ ეპიზოდით საკუთარი გამოსვლა დააგვირგვინა. მადრიდის "რეალის" წინააღმდეგ" სწორედ ასეთი მებრძოლი ხასიათია საჭირო, ჩვენ შენით ვამაყობთ არტურო!

ერთი კაცის შოუ


გუშინდელ შეხვედრაში რამდენიმე მოთამაშის გამორჩევა შეიძლება, მაგრამ ვერცერთი მათგანი ახლოსაც ვერ მივა "მფრინავ ჰოლანდიელთან", რომელმაც ეს "დერ კლასიკო" გაალამაზა და სულ სხვა დონეზე აიყვანა. 33 წლის არიენ რობენი მინდორზე უდავოდ საუკეთესო იყო და უბრალოდ არაამქვეყნიური მატჩი ჩაატარა. რობენმა დორტმუნდის "ბორუსიას" მარცხენა ფლანგი ააწიოკა და იქიდან უამრავი მომენტი შექმნა. არიენმა თავისი საყვარელი სოლორეიდი და დარტყმა ზუსტად ექვსჯერ განახორციელა, სამჯერ ძალიან ცოტა დააკლდა, ორჯერ ბიურკიმ აუღო, ერთხელაც კი პირდაპირ კუთხეში ჩასვა. ეს მართლაც ერთი კაცის შოუ იყო, თანაც როგორი? უმაღლესი კლასის. გასაგებია, რომ "ბორუსიას" დაცვის ხაზი ევროპაში და თუნდაც გერმანიაში ყველაზე ძლიერი არ არის, მაგრამ რობენის თამაში მართლაც ძალიან შთამბეჭდავი იყო.

ყველაზე სასიამოვნო კი იცით რა არის? ამ ყველაფერს არიენ რობენი უდიდესი სიამოვნებითა და სიხარულით აკეთებს. ჰოლანდიელს ეტყობა, რომ თამაშისგან უბრალოდ კაიფობს და მისი თითოეული მოძრაობა გულშემატკივარს უდიდეს სიამოვნებას ანიჭებს. ყველამ ძალიან კარგად იცის თუ რას მოიმოქმედებს არიენი როდესაც ფლანგიდან ცენტრისკენ იწყებს სიარულს, მაგრამ უკვე წლებია მისი შემჩერებელი იშვიათად თუ მოიძებნება. ახლა კი ჰოლანდიელი საუკეთესო ფორმაშია, ასეთ დროს კი რობენის გაჩერება თითქმის შეუძლებელია. ასე, რომ მადრიდელებო გეშინოდეთ!

მატჩის მომენტი


ამ ფოტოს ბევრი კომენტარი არ სჭირდება და მაყურებელმა ყველაფერი პირდაპირი ტრანსლიაციის დროსაც ნახა - ფრანკ რიბერი, რომელმაც შესანიშნავი მატჩი ჩაატარა და გოლიც გაიტანა, შეცვლის გამო იმედგაცრუებული დარჩა და კარლო ანჩელოტის რაღაც ჰკითხა ( დავუშვათ, რატომ შემცვალეო?) პაპა კარლომ კი იმის მაგივრად, რომ რაიმე ეთქვა, ფრანგს ჯერ აკოცა, შემდეგ კი მაგრად ჩაეხუტა. რიბერიმაც გაიღიმა და სათადარიგო სკამზე დამშვიდებული დაჯდა. რიბერის ამბიციურობასა და სიბრაზეს ანჩელოტის სითბო და სიყვარული დაუპირისპირდა და საბოლოოდ, სწორედ იტალიელმა გაიმარჯვა. "მას გუშინ დაბადების დღე ჰქონდა და ფანტასტიკური მატჩი ჩაატარა, ამიტომ პატარა კოცნა სჭირდებოდა", - აი ასე შეაფასა კარლომ რიბერის ინციდენტი.

ეს მომენტი კიდევ ერთხელ ადასტურებს, რომ ანჩელოტი უბრალოდ დიდებული ადამიანია, რომელიც წამებში მიხვდა, რომ ახსნა-განმარტებას მოქმედება სჯობდა და ამან შედეგი გამოიღო. წინ მადრიდის "რეალთან" უმნიშვნელოვანესი მატჩია, ამიტომ რა დროს კონფლიქტებია...ეს ყველაფერი იტალიელმა გაცილებით უკეთ იცის, ამიტომ არ დაუშვებს, რომ გუნდში არსებული ფანტასტიკური ატმოსფერო სულ ცოტათი მაინც გაფუჭდეს. ამ კოცნამ და ჩახუტებამ კიდევ ერთხელ დაგვანახა, რომ ამ საოცარი ადამიანის იმედი აუცილებლად უნდა გვქონდეს.


საჭირო გამარჯვება - ჩვენ მზად ვართ!


ეს აპრილის პირველი დიდი გამარჯვებაა, მაგრამ მთავარი თამაშები ჯერ კიდევ წინ არის. სულ რაღაც სამი დღე და მიუნხენის დიდებულ არენაზე ჩემპიონთა ლიგის ჰიმნი აჟღერდება, ამიტომაც გუშინდელი გამარჯვება კიდევ უფრო მნიშვნელოვანია. "ბაიერნმა" გერმანიაში უშუალო კონკურენტი ძალიან დამაჯერებელი თამაშის ფონზე დაამარცხა და მადრიდის "რეალთან" შეხვედრას იდეალური განწყობით ხვდება. დიახ, "ბორუსიას" ძალიან სერიოზული საკადრო პრობლემები ჰქონდა, მაგრამ ეს "ბაიერნის" პრობლემა არ არის. მიუნხენურმა კლუბმა თავისი საქმე გააკეთა - მოსაგები თამაში მოიგო და ამ ეტაპზე სეზონის ყველაზე მნიშვნელოვანი მატჩის წინ იდეალური განწყობა შეიქმნა. ასე, რომ ახლა უკვე "რეალის" დროა, ჩვენ მზად ვართ!скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
მატჩის ანალიზი ბუნდესლიგა
მსგავსი სიახლეები
კომენტარები
giorgi 2219
giorgi 2219 | 9 აპრილი 2017 16:29
ხალხო ბაიერნის მაიკის დათრევა მინდა და ადიდასის გარდა კიდევ რომელ მაღაზიას მირჩევთ
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა