...

პრევიუ: ევროპული კლასიკო

ბაიერნი Vs რეალი

ჩემპიონატი: ჩემპიონთა ლიგის 1/4 ფინალი, პირველი მატჩი
თარიღი: 12 აპრილი, 22:45 საათი
სტადიონი: "მიუნხენ არენა", მიუნხენი
მთავარი მსაჯი: ნიკოლა რიცოლი (იტალია)
პირდაპირი ტრანსლიაცია: საზოგადოებრივი მაუწყებელი, Silk სპორტ HD1
იხილეთ მატჩის პროგნოზი
აჭარაბეთის კოეფიციენტები: 1 - 1.93; X - 3.60; 2 - 4.30

გუნდების წინასამატჩო მდგომარეობა


მიუნხენურმა გრანდმა ამ ეტაპზე სეზონის ყველაზე მნიშვნელოვანი თამაშის წინ იდეალური განწყობა შეიქმნა და საკუთარ მოედანზე პრინციპული მეტოქე დორტმუნდის "ბორუსია" ფანტასტიკური თამაშის ფონზე გაანადგურა - 4:1. "რეკორდმაისტერმა" მართლაც საოცარი ფეხბურთი აჩვენა, ლამაზი გოლები გაიტანა და ზინჰაიმში მარცხის შემდეგ განწყობა გაიუმჯობესა. მატჩის შემდეგ თითქმის ყველამ აღნიშნა, რომ ეს გამარჯვება გუნდს თავდაჯერებულობას შემატებდა, რაც ჩემპიონთა ლიგის დიდი მატჩის წინ ძალიან მნიშვნელოვანია. კარლო ანჩელოტიმ თავისი სიტყვები 100%-თ გაამართლა. მან აღნიშნა, რომ გუნდი სეზონს მძიმედ დაიწყებდა, მაგრამ ყველაზე მნიშვნელოვან ნაწილში საუკეთესო ფორმას აკრეფდა - "ბაიერნი" ახლა მართლაც დაფრინავს, მაგრამ "რეალთან" თამაშს გარკვეული სირთულეებით ხვდება. პირველ რიგში, გუნდს დაცვის ლიდერი მატს ჰუმელსი არ ეყოლება, რომელმაც ორშაბათის ვარჯიშზე ტერფის ტრავმა მიიღო და გუნდს ერთი კვირით გამოაკლდა. თუმცა მას ასევე გამოცდილი და უმაღლესი კლასის მცველი ჟერომ ბოატენგი შეცვლის, რომელმაც ბოლო ორი თამაში უშეცდომოდ ჩაატარა და ტრავმის მოშუშების შემდეგ კარგ ფორმაშია. მარტინესი-ჰუმელსის დუეტი იდეალურად იყო შეთამაშებული, მაგრამ ბოატენგს კონკრეტულ შეხვედრაში ჰუმელსის სრულფასოვნად შეცვლა შეუძლია. მთავარი პრობლემა კი რობერტ ლევანდოვსკის დაზიანებაა. 28 წლის პოლონელმა შაბათს, რომან ბიურკისთან შეჯახების შემდეგ, მხარის ტრავმა მიიღო და დღევანდელი ვარჯიში 15 წუთში დაასრულა. მისი ბედი საბოლოოდ ხვალ გადაწყდება და თუ ლევი ვერ ითამაშებს, მის პოზიციას თომას მიულერი დაიკავებს, რომელიც მანუელ ნოიერთან ერთად გამოჯანმრთელდა და ორივე მათგანი 100%-თ არის მზად. "ბაიერნი" ნებისმიერ შემთხვევაში მინდორზე მხოლოდ გამარჯვების მოსაპოვებლად გავა და "რეალს" საკუთარ თამაშს მოახვევს თავს.


"ბაიერნის" მსგავსად გასულ უქმეებზე მადრიდის "რეალმაც" პრინციპული მატჩი ჩაატარა და შინ მადრიდის "ატლეტიკო" მიიღო. ზინედინ ზიდანის გუნდმა პირველი ტაიმი იდეალურად ჩაატარა და პეპეს გოლით იგებდა კიდეც, მაგრამ მეორე ნახევარში მოდუნდა და ამის გამო დაისაჯა - 1:1. "სამეფო კლუბმა" იდეალური განწყობა ვერ შეიქმნა, სამაგიეროდ, "ბარსელონამ" თავისი მატჩი წააგო და "რეალმა" ეროვნულ ჩემპიონატში უპირატესობა სამ ქულამდე გაზარდა. ახლა კი "სამეფო კლუბი" მიუნხენში ჩავა და უმძიმეს ბრძოლას გამართავს. "რეკორდმაისტერის" მსგვასად, ერთი სერიოზული საკადრო პრობლემა "ბლანკოსსაც" აქვს. მადრიდულ დერბიში ტონი კროოსთან შეჯახების შემდეგ პეპე დაშავდა, ორი ნეკნი გაიტეხა და ხვალ ვერ ითამაშებს. მისი შემცვლელი რაფაელ ვარანი კი უკვე დიდი ხანია ლაზარეთშია, ამიტომ დაცვის ცენტრში ნაჩო ფერნანდესს მოუწევს თამაში. ესპანელი ასეთ დონეზე ძალიან გამოუცდელია, ამიტომ "რეალს" დიდი თავსატეხი აქვს. ზოგადად, მადრიდული გრანდი დამაჯერებლად გამოიყურება და საჰაერო ორთაბრძოლებში არანორმალურად სახიფათოა. კრიშტიანუ რონალდუსა და კარიმ ბენზემას შემდეგ "რეალის" რიგებში ყველაზე მეტი ბურთი კაპიტანმა, სერხიო რამოსმა, გაიტანა, ამიტომ გერმანელები სტანდარტების დროს ყურადღებით უნდა იყვნენ. "სამეფო კლუბის" მთავარი ძალა კი მოედნის ცენტრია, სადაც მოდრიჩი-კაზემირო-კროოსის ტრიო ჩინებულად გამოიყურება. აი შეტევაში კი გარეთ ბეილი და რონალდუ საუკეთესო ფორმაში ნამდვილად არ არიან, განსაკუთრებით უელსელი, რომელიც "ატლეტიკოს" წინააღმდეგ თითქმის საერთოდ არ ჩანდა. თუმცა ორივე მათგანი ძალიან სახიფათოა, შუაში კი ბენზემა საკმაოდ მაღალ დონეზე ასპარეზობს. სათადარიგო სკამზე კი ისკო, ხამესი და მორატა არიან - ეს ხომ მადრიდის "რეალია"! ასე, რომ მიუნხენში უძლიერესი გუნდი ჩამოდის, რომელიც მინიმუმ ერთი ბურთის გატანასა და შინ კარგი შედეგით დაბრუნებას ეცდება.

ეს "ბაიერნისა" და "რეალის" მე-11 საფლეი-ოფოფ დაპირისპირებაა. "ევროპული კლასიკო" საყოველთაოდ ცნობილი შეხვედრაა, რომელშიც არასოდეს ყოფილა ფავორიტი. ერთმანეთს ორი უმაღლესი კლასის გუნდი უპირისპირდება, შანსები თანაბარია, მაყურებელს კი მხოლოდ სიამოვნება ელის.

სავარაუდო შემადგენლობები

ბაიერნი: ნოიერი - ლამი, მარტინესი, ბოატენგი, ალაბა - ვიდალი, ალონსო - რობენი, ტიაგო, რიბერი - ლევანდოვსკი/მიულერი.

რეალი: ნავასი - კარვახალი, რამოსი, ნაჩო, მარსელო - მოდრიჩი, კაზემირო, კროოსი - ბეილი, ბენზემა, რონალდუ.

საინტერესო ფაქტები

  • მიუნხენის "ბაიერნი" და მადრიდის "რეალი" ჩემპიონთა თასის/ლიგის ისტორიაში ერთმანეთს სულ 22-ჯერ შეხვდნენ, საიდანაც 11 თამაში "ბაიერნმა" მოიგო, 9 - მადრიდის "რეალმა" და ორი "ევროპული კლასიკო" ფრედ დასრულდა (ბურთების შეფარდება 33:31-ზე "ბაიერნის" სასარგებლოდ).

  • ჩემპიონთა თასის/ლიგის ფლეი-ოფში არცერთი მატჩი არ გამართულა უფრო ხშირად, ვიდრე "ევროპული კლასიკო" - ეს ამ გუნდების მე-11 დაპირისპირება იქნება.

  • წინა 10 ორმატჩიანი დუელიდან კი ხუთჯერ გამარჯვებული გერმანული გრანდი გამოვიდა, ხუთჯერ - ესპანური. ვნახოთ ვინ გავა წინ.

  • უკანასკნელი "ევროპული კლასიკო" კი 2013/14 წლების სეზონში, ნახევარფინალურ ეტაპე, გაიმართა. კარლო ანჩელოტის "რეალმა" პეპ გვარდიოლას "ბაიერნი" ორი მატჩის ჯამში 5:0 (შინ 1:0, სტურმად 4:0) გაანადგურა და უდიდესი სირცხვილი აგემა. "რეკორდმაისტერს" ასე სამარცხვინოდ ევროთასებზე შინ არასოდეს წაუგია.

  • ორი წლით ადრე, 2011/12 წლების სეზონში, ასევე ჩემპიონთა ლიგის ნახევარფინალში, გამარჯვება უკვე გერმანელებმა მოიპოვეს. იუპ ჰაინკესის გუნდმა შინ პირველი მატჩი 2:1 მოიგო, სტუმრად ასეთივე ანგარიშით წააგო და საბოლოო გამარჯვება პენალტების სერიაში (3:1) მოიპოვა. 

  • "რეალისა" და "ბაიერნის" გზები პირველად 1975/76 წლების კამპანიაში გადაიკვეთა. მაშინ ჩემპიონთა თასის ნახევარფინალში "ბაიერნმა" სტუმრად 1:1 ითამაშა, შინ კი 2:0 მოიგო.

  • შემდეგ, 1986/87 წლების კამპანიაში, ასევე ჩემპიონთა თასის ნახევარფინალში, "ბაიერნმა" შინ 4:1 იმარჯვა, სტუმრად 0:1 წააგო და ფინალში გავიდა.

  • "სამეფო კლუბმა" რევანში უკვე მომდევნო სეზონში, მაგრამ მეოთხედფინალურ სტადიაზე აიღო. პირველი მატჩი მიუნხენში "ბაიერნმა" 3:2 მოიგო, მაგრამ "რეალმა" შინ 2:0 იმარჯვა.

  • 1999/00 წლების სეზონში კი ეს გუნდები ერთმანეთს ოთხჯერ შეხვდნენ. ჯერ ჯგუფურ ეტაპზე, სადაც გერმანელებმა მეტოქე გაანადგურეს: 4:2 მადრიდში, 4:1 მიუნხენში. ნახევარფინალში კი ვისენტე დელ ბოსკეს გუნდმა რევანში აიღო - შინ 2:0 მოიგო, სტურმად 1:2 დამარცხდა და ფინალში გავიდა, რომელიც მოიგო კიდეც.

  • ოტმარ ჰიტცფელდის გუნდმა რევანში მომდევნო კამპანიაში იმავე სტადიაზე აიღო. მადრიდში "ბაიერნმა" ჯოვანი ელბერის გოლით იმარჯვა, მიუნხენში კი 2:1 მოიგო და საბოლოოდ ჩემპიონთა ლიგის ტიტულიც მოიპოვა.

  • 2001/02 წლების სეზონში კი "ევროპული კლასიკო" ზედიზედ მესამედ გაიმართა. მეოთხედფინალში "რეალმა" გასვლაზე პირველი თამაში 1:2 წააგო, მაგრამ მადრიდში 2:0 იმარჯვა და ტიტული დაიბრუნა.

  • ერთწლიანი პაუზის შემდეგ ეს გუნდები ერთმანეთს უკვე მერვედფინალში შეხვდნენ. მიუნხენში მატჩი ფრედ 1:1 დასრულდა, ესპანეთში კი ერთადერთი გოლი "რეალის" ამჟამინდელმა თავკაცმა, ზინედინ ზიდანმა, გაიტანა.

  • "ბაიერნმა" კი რევანში მერვედფინალურ ეტაპზე 2006/07 წლების სეზონში აიღო. პირველი თამაში მიუნხენელებმა გასვლაზე 2:3 წააგეს, მაგრამ შინ 2:1 იმარჯვეს და სტურმად გატანილი მეტი ბურთის წყალობით მეოთხედფინალში გავიდნენ.

  • საერთო ჯამში, "ბაიერნმა" "რეალს" 11-ჯერ უმასპინძლა და მხოლოდ ერთხელ წააგო (9 მოგება, 1 ფრე).

  • მიუნხენური გრანდი ჩემპიონთა ლიგის მეოთხედფინალურ ეტაპზე 28-დ ასპარეზობს და ბოლო წლებში ზედიზედ მეექვსედ. "რეკორდმაისტერმა" ეს ეტაპი ბოლო ხუთ სეზონში გადალახა, ზოგადად კი 18 მოგება და 9 მარცხი აქვს.

  • "სამეფო კლუბი" კი მეოთხედფინალში ყველაზე მეტჯერ (34) არის გასული და მხოლოდ 6 დუელი აქვს წაგებული. "რეალი" აქამდე ზედიზედ მეშვიდედ მოვიდა და ეცდება, რომ ნახევარფინალში ზედიზედ მეექვსედ გავიდეს.

  • კონკრეტულად ჩემპიონთა ლიგის ერაში კი (1992 წლიდან), მეოთხედფინალში ყველაზე ხშირად "ბაიერნი" არის გასული - 16. შემდეგ "ბარსელონა" და მადრიდის "რეალი" მოდიან - 15.

  • "ბაიერნს" ჩემპიონთა ლიგაზე ზედიზედ 16 საშინაო თამაში აქვს მოგებული და ეს საოცარი სერია "რეალთან" სამარცხვინო მარცხის შემდეგ დაიწყო.

  • "რეკორდმაისტერს" ესპანური კლუბების წინააღმდეგ ფლეი-ოფის ეტაპზე თანაბარი სტატისტიკა აქვს: 9 მოგება, 9 მარცხი. თუმცა ბოლო სამ სეზონში "ბაიერნმა" ტურნირი სწორედ ლა ლიგის გუნდებთან დაასრულა ("რეალი", "ბარსელონა" და "ატლეტიკო").

  • საკუთარ მოედანზე კი მიუნხენურ გრანდს ესპანურ კლუბებთან შესანიშნავი სტატისტიკა აქვს: 18მ, 5ფ, 2წ.

  • ზინედინ ზიდანის გუნდს ჩემპიონთა ლიგის ბოლო 10 გასვლითი თამაშიდან მხოლოდ ერთი აქვს წაგებული (5მ, 4ფ) და ეგეც გერმანიაში, "ვოლფსბურგის" წინააღმდეგ გასულ სეზონში (0:2), ჩემპიონთა ლიგის პირველ მეოთხედფინალურ მატჩში.

  • "სამეფო კლუბმა" ბოლო წლებში გერმანიაში თამაში გამოასწორა და ბოლო 6 ვიზიტიდან 3-ჯერ შინ გამარჯვებული დაბრუნდა, მაგრამ სტატისტიკა მაინც კატასტროფულია: 4მ, 7ფ, 19წ.

  • "რეალს" კი ბუნდესლიგის გუნდებთან ორმატჩიან დუელში უპირატესობა აქვს: 13 მოგება, 8 წაგება. "ბლანკოსმა" გერმანელებს ბოლო ხუთი ფლეი-ოფის ორთაბრძოლა მოუგო და თანაც სულ 25 გოლი გაიტანა.

  • კარლო ანჩელოტი 2013-15 წლებში მადრიდის "რეალის" მთავარი მწვრთნელი იყო და 2014 წელს "სამეფო კლუბს" ჩემპიონთა თასის ისტორიული მეათე ტიტული მოაგებინა.

  • კარლოს, "მილანის" თავკაცობის დროს, "რეალის" წინააღმდეგ უკვე აქვს ნამუშევარი. 2002/03 წლების ჩემპიონთა ლიგის მეორე ჯგუფურ ეტაპზე "როსონერიმ" შინ 1:0 მოიგო, მადრიდში კი 1:3 დამარცხდა. საბოლოოდ, ტიტული სწორედ ანჩელოტის გუნდმა მოიპოვა.

  • 2013/14 წლების სეზონში ზინედინ ზიდანი "სამეფო კლუბში" ანჩელოტის ასისტენტი იყო, 1999-2001 წლებში კი ტურინის "იუვენტუსში" პაპა კარლოს შეგირდი გახდლათ.

  • "ბაიერნის" რიგებში "სამეფო კლუბის" ორი ყოფილი მოთამაშეა: ხაბი ალონსო, რომელმაც მადრიდში ხუთი წელი (2009-2014) დაჰწო და ლა ლიგაში 158 მატჩი ჩაატარა. აგრეთვე, არიენ რობენი, რომელიც "რეალის" ღირსებას 2007-09 წლებში იცავდა და ეროვნული ჩემპიონატის 50 შეხვედრაში 11 გოლი გაიტანა.

  • ტონი კროოსი კი მშობლიურ არენაზე ბრუნდება. ის "ბაიერნის" ღირსებას 2007-2014 წლებში იცავდა, ბუნდესლიგაში 130 შეხვედრა ჩაატარა და 13 ბურთი გაიტანა.

  • "ბაიერნის" შემადგენლობაში დისკვალიფიკაციის ზღვარზე ჟერომ ბოატენგია, "რეალის" რიგებში კი სერხიო რამოსი და ლუკა მოდრიჩი.

მწვრთნელების წინასამატჩო კომენტარები


კარლო ანჩელოტი: ​"​​​ეს ჩემთვის განსაკუთრებული შემთხვევა იქნება, რადგან "რეალთან" და მის მოთამაშეებთან განსაკუთრებული ურთიერთობა მაკავშირებს. ზიზუსა და მე კი ძალიან კარგი, მეგობრული ურთიერთობა გვაქვს. მოხარული ვარ, რომ ის "რეალში" ძალიან კარგად მუშაობს და ჩემპიონთა ლიგის მოგებაც მოახერხა. ის ფაქტი, რომ მე ფეხბურთელებსა და ზიზუს ვიცნობ სულაც არ არის უპირატესობა.

კარგად ვიცით თუ რა შეუძლია მადრიდის "რეალს" და მეტოქეს უდიდეს პატივს ვცემთ, მაგრამ უფრო მეტად საკუთარ შესაძლებლობებზე ვართ კონცენტრირებულნი. ეს რთული მატჩი იქნება, მაგრამ კარგ ფორმაში ვართ და თანაც საკმაოდ თავდაჯერებულები."


ზინედინ ზიდანი: "მე კარლოს ვიცნობ და ისიც მიცნობს, მაგრამ ეს არაფერს ნიშნავს. ხვალ ერთმანეთს ორი დიდებული გუნდი დაუპირისპირდება და არ ამე და კარლო. აქამდე ჩემპიონთა ლიგაზე საკმაოდ კარგად მოვედით და ამ გზის გაგრძელება გვინდა. მიუნხენში მოსაგებად ჩავდივართ.

ვფიქრობ, რომ ჩვენი გუნდი უკეთესია, ვიდრე 2014 წელს იყო, მაგრამ ახლა ეს უნდა დავამტკიცოთ. ის, რაც სამი წლის წინ მოხდა ეს უკვე წარსულია, მაგრამ მაინც მშვენიერი. თუმცა ხვალ სულ სხვა ფეხბურთი იქნება, რადიკალურად განსხვავებული გუნდების მონაწილეობით."

პრომო


აქვე შეგიძლით იხილოთ:
ბაიერნი Vs რეალი: საინტერესო გადაკვეთები
ბაიერნი Vs რეალი: მოსწავლე მასწავლებლის წინააღმდეგ
ბაიერნი Vs რეალი: ერთმანეთის პირისპირ
ბაიერნი Vs რეალი: ურთიერთშეხვედრების ისტორიაскачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
პრევიუ ჩემპიონთა ლიგა
მსგავსი სიახლეები
კომენტარები
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა