...

ბაიერნი 1:2 რეალი - მატჩის ანალიზი

ძალიან კარგად მესმის, რომ გუშინდელი საღამო მიუნხენის "ბაიერნის" თითოეული გულშემატკივარისათვის ძალიან მტკივნეული იყო, მაგრამ ფეხბურთში მარტივი არასოდეს არაფერი არ არის.

ჩემპიონთა ლიგის პირველი მეოთხედფინალური მატჩი "რეკორდმაისტერმა" შინ მადრიდის "რეალთან" 1:2 წააგო და მომდევნო კვირას სიტუაციის გამოსწორებას ეცდება, რაც ურთულესი იქნება.

გასაგებია, რომ ემოციებისგან მთლიანად დასაცლელად რამდენიმე საათი და კარგი ძილიც კი არ არის საკმარისი, მაგრამ ახლა ცივ გონებაზე ტრადიციულად მატჩის ანალიზს შემოგთავაზებთ.

მატჩის მსვლელობა

პირველ რიგში, აღსანიშნავია, რომ მიუნხენურ კლუბს რობერტ ლევანდოვსკი ვერ დაეხმარა, რომლის პოზიცია თომას მიულერმა დაიკავა. სხვა მხრივ ორივე გუნდის ძირითადი შემადგენლობა მოსალოდნელი იყო. საწყისი 5 წუთი "ბაიერნმა" მხოლოდ მეტოქის ნახევარზე გაატარა, უტევდა და ამ პერიოდში სამი კუთხურის მოპოვება მოახერხა. ამ საწყისი შეტევითი ტალღის შემდეგ "რეალი" გონს მოვიდა, ბურთი უფრო კარგად დაიჭირა და თამაში გაათანაბრა. პირველი ხიფათიც მადრიდელებმა შექმნეს. ჯერ კრიშტიანუ რონალდუს სახიფათო ჯარიმა იყო, რომელიც პორტუგალიელმა კარგად ვერ შეასრულა, შემდეგ კი უკვე რეალური საგოლე მომენტი. ტონი კროოსის შესანიშნავი ჩაწოდების შემდეგ კარიმ ბენზემამ დავიდ ალაბას საჰაერო ორთაბრძოლა მოუგო და თავით ჭკვიანურად დაარტყა - გაზონიდან, მაგრამ მანუელ ნოიერმა ცხრიანში მიმავალ ბურთს თითები წაჰკრა, შემდეგ კი მას უკვე ხარიხა დაეხმარა. დაახლოებით 10-15 წუთი "სამეფო კლუბი" უფრო დამაჯერებელი იყო, მაგრამ შემდეგ "ბაიერნმა" უპირატესობა დაიბრუნა და მატჩის 25-ე წუთზე ანგარიშიც გახსნა. ტიაგო ალკანტარამ მარჯვენა ფლანგიდან კუთხური კარგად მოაწოდა, ცენტრში არტურო ვიდალმა ნაჩო ფერნანდესი დაჯაბნა და თავური დარტყმით "მიუნხენ არენა" აღტაცებაში მოიყვანა - 1:0!


გატანილი გოლის შემდეგ "რეკორდმაისტერი" ცოტათი დაწყნარდა, მაგრამ მატჩს მაინც აკონტროლებდა. ტიაგო და ვიდალი ცენტრში შესანიშნავად მოქმედებდნენ. მატჩის ბოლოს მორიგი სახიფათო მომენტი სწორედ არტუროს ართმევით დაიწყო, რომელმაც ცენტრში ბურთი კაზემიროს მოპარა. შემდეგ მარჯვენა ფლანგზე არიენ რობენი შესანიშნავად წავიდა, ტონი კროოსი მარტივად მოატყუა, საჯარიმოში შევიდა და მარჯვენა ფეხით ვიდალს ჩაუწოდა, რომელმაც ვარდნაში თავით ძალიან კარგი პოზიციიდან დაარტყა, მაგრამ არაზუსტად. ჩილელს დუბლის გაფორმება შეეძლო, მაგრამ ვერ მოახერხა. ტაიმის ბოლო წუთზე კი მატჩის მთავარმა არბიტრმა, ნიკოლა რიცოლიმ, "რეალის" კარში პენალტი დანიშნა. ფრანკ რიბერიმ "სამეფო კლუბის" მცველები აქეთ-იქით ატრიალა, შემდეგ კი კარისკენ დააარტყა. ბურთი დანი კარვახალს მოხვდა, მსაჯებმა კი ჩათვალეს, რომ ესპანელმა ხელით ითამაშა. ამ ეპიზოდს აუცილებლად დავუბრუნდებით, მაგრამ ახლა არა...

ბურთთან არტურო ვიდალი მივიდა, რომელმაც კარს გადააცილა და "რეალი" საკმაოდ სერიოზული დარტყმისგან იხსნა. პირველი ტაიმი "ბაიერნმა" ძალიან ჭკვიანურად, ორგანიზებულად ჩაატარა, ცენტრში მეტოქე დაჯაბნა და ყველაფერი კარგად შეასრულა. შესვენების შემდეგ კი მიუნხენელებმა უკვე 47-ე წუთზე ძალიან უხეში შეცდომა დაუშვეს და ამის გამო დაისაჯნენ. მარჯვენა ფრთაზე დანი კარვახალმა კაზემიროსგან მშვენიერი პასი მიიღო, საჯარიმოში ჩააწოდა, იქ კი კრიშტიანუ რონალდუ აბსოლუტურად მარტო იმყოფებოდა და პორტუგალიელმა ერთი შეხებით მანუელ ნოიერის კარი აიღო - 1:1. ჩავარდა სრულიად "ბაიერნის" დაცვის ხაზი. ჟერომ ბოატენგსა და ხავი მარტინესს ჩაეძინათ, ხაბი ალონსომ კი ჩამოსვლა და ცენტრალური მცველების დაზღვევა დააგვიანა.


რამდენიმე წუთში "სამეფო კლუბმა" მორიგი კარგი მომენტი შექმნა. მარჯვენა ფრთაზე კარვახალმა ქუსლით მოდრიჩს შესანიშნავად დაუტოვა, ხორვატმა კარგად ჩააწოდა და გარეთ ბეილის თავური საოცარი რეაქციით მანუ ნოიერმა მოიგერია. მადრიდელები მეორე ნახევარში მოედანზე სულ სხვა განწყობითა და სიწრაფით გავიდნენ. მოედნის ცენტრში მოდრიჩი, კაზემირო და კროოსი გამოცოცხლდნენ, უფრო აქტიურად დაიწყეს თამაში, რამაც თავისი შედეგი გამოიღო. 58-ე წუთიდან კი ხავი მარტინესის შოუ დაიწყო, რომელმაც სამ წუთში მეტოქის ორი სახიფათო შეტევის ჩაშლის გამო ორი ყვითელი ბარათი მიიღო და მოედნიდან გააძევეს.

ეს უკვე სრული კოშმარი იყო, რადგან "ბაიერნს" ათი კაცით, 1:1-ზე, "რეალის" წინააღმდეგ 30 წუთი კიდევ უნდა ეთამაშა. თუმცა ჩვენი გუნდის სასახელოდ უნდა ითქვას, რომ "რეკორდმაისტერმა" გაძევებიდან ათი წუთი ძალიან ღირსეულად ჩაატარა, ბურთს ფლობდა და მეორე გოლის გატანაც ცდილობდა, მაგრამ ეს ურთულესი იყო. საბოლოოდ, დაღლილობამ და კაცნაკლულობამ თავისი ქნა - ესპანელებმა უდიდესი უპირატესობა მოიპოვეს და "რეკორდმაისტერის" მიწასთან გასწორება დაიწყეს. 70-ე წუთიდან მინდორზე ერთადერთი გუნდი იყო, რომელსაც მხოლოდ მწვანემაისურიანი "გიჟი" ეთამაშებოდა. ორივე განაპირა მცველი, დანი კარვახალი და მარსელო, ძალიან აქტიურები იყვნენ, შეცვლაზე შემოსული მარკო ასენსიო შესანიშნავად მოქმედებდა. კარვახალის ერთ-ერთი ჩინებული სოლორეიდის შემდეგ, კარიმ ბენზემა საჯარიმოში იდეალურ პოზიციაზე დარჩა, მაგრამ მას ნოიერმა ფეხით აუღო. მომდევნო შეტევაში ასენსიომ უკვე თავად დაარტყა, მაგრამ ნოიერმა მისი შორეული გასროლა მარტივად აიღო. დაახლოებით რო წუთში მანუმ მორიგი სასწაული ჩაიდინა და კრიშტიანუ რონალდუს ახლოდან დარტყმული მარჯვენა ხელის მტევნით მოიგერია. თუმცა ნოიერი ყოვლისშემძლე არ არის. 77-ე წუთზე მარკო ასენსიომ საჯარიმოში ჩინებულად ჩააწოდა, იქ კი ბერნატს რონალდუმ დაასწრო და ნოიერს ფეხებს შუა გაუძვრინა - მან ჩემპიონთა ლიგის თავისი მე-100 ბურთი გაიტანა და "ალიანს არენაზე" ზედიზედ მეორედ გაიფორმა დუბლი.


გერმანული გრანდი სრულიად დემორალიზებული იყო, "ბაიერნს" არც ძალები ჰქონდა და არც სურვილი. "რეალი" მეტოქეს უბრალოდ დასცინოდა, მაგრამ საბედნიეროდ, მეტი გოლის გატანა ვეღარ მოახერხა. კარლო ანჩელოტის გუნდმა შინ 1:2 წააგო და ახლა ურთულესი ამოცანის წინაშე დადგა - "ბაიერნს" ესპანეთის დედაქალაქში მინიმუმ ორი ბურთის გატანა და გამარჯვების მოპოვება სჭირდება.

გარდამტეხი მომენტები

გუშინდელ შეხვედრაში რამდენიმე გარდამტეხი მომენტი იყო, რომელმაც მიუნხენის "ბაიერნის" ფსიქოლოგიურ მდგომარეობაზე სერიოზული გავლენა იქონია და მიუნხენური კლუბის გატეხვაში უდიდესი როლი შეასრულა. ახლა კი თანმიმდევრულად მივყვეთ და სამივე გარდამტეხი ეპიზოდი განვიხილოთ.

#1 - პენალტი

პირველი ტაიმის ბოლოს არტურო ვიდალს მადრიდის "რეალის" კარში მეორე ბურთის გატანა შეეძლო და მეორე ნახევარში 2:0-ზე ნამდვილად სულ სხვა თამაში წავიდოდა. ჩილელის გაფუჭებულმა თერთმეტმეტრიანმა "სამეფო კლუბს" უდიდესი ფსიქოლოგიური პლიუსი მისცა, საკუთარ გუნდზე კი უარყოფითად იმოქმედა. თუმცა ფსიქოლოგიური ფაქტორი გასაგებია, მაგრამ საქმე არც ისე იოლად იყო...


"ბაიერნის" ყველაზე სუბიექტური გულშემატკივარიც არ იტყვის, რომ ეს ხელია. ნიკოლა რიცოლი სერიოზულად შეცდა, რადგან დანი კარვახალს ბურთი მხარზე მოხვდა და ამ ეპიზოდში პენალტი არ უნდა დანიშნულიყო. სწორედ ამიტომ ვიდალის გაფუჭებით სამართლიანობა აღსდგა, რასაც ვერ გავექცევით.

შესაძლოა ახლა ჩვენ ვამბობთ, რომ ეს გარდამტეხი ეპიზოდი იყო, რომელმაც გუნდზე ცუდად იმოქმედა, მაგრამ მოდი სიტუაციას მეორე მხრიდან შევხედოთ - ვიდალს გაეტანა, "ბაიერნს" ეს თამაში მშვიდად 2:0 ან უფრო დიდი ანგარიშით მოეგო, მატჩის შემდეგ უკვე "რეალის" ქომაგები იტყოდნენ, რომ ამ ეპიზოდმა მათ გუნდზე იქონია ცუდი გავლენა. ამიტომ მოდი ვიყოთ სამართლიანები და ნუ მივსტირით იმ პენალტს, რომელიც საერთოდ არ უნდა დადებულიყო.

#2 რონალდუს გოლი


არანაკლებ მნიშვნელოვანი მომენტი იყო კრიშტიანუ რონალდუს პირველი გოლი, თანაც როდის? მეორე ტაიმის მეორე წუთზე, როდესაც გუნდები გასახდელიდან ახალი გამოსულები იყვნენ. რა თქმა უნდა, რონალდუ რონალდუა, მსოფლიოში ერთ-ერთი საუკეთესო მოთამაშე, მაგრამ ეს მხოლოდ მაშინ არის გასასამართლებელი საბუთი, როდესაც თავად მაქსიმუმს გააკეთებ მის შესაჩერებლად, ხოლო "ბაიერნმა" ამ ეპიზოდში არაფერიც არ გააკეთა.

ძალიან საინტერესოა რა მოხდა მატჩის 47-ე წუთზე ისეთი, რომ მარტინესი და ბოატენგი სიტუაციიდან გამოეთიშნენ, ხაბი ალონსომ კი მათი დაზღვევა საერთოდ დაივიწყა. როგორ შეიძლება ასე უყურადღებოდ თამაში მეორე ნახევრის დებიუტში, თანაც კრიშტიანუ რონალდუს წინააღმდეგ. ამ მომენტში ბოატენგის, მარტინესისა და ალონსოს მოქმედება ვერანაირ კრიტიკას ვერ უძლებს. მათ რონალდუს არანაირი ყურადღება არ მიაქციეს და ამის გამო გუნდი მწარედ დაისაჯა.

#3 მარტინესის გაძევება


როგორც გუნდის კაპიტანმა, ფილიპ ლამმა, აღნიშნა, ამ მომენტის შემდეგ "ბაიერნი" გატყდა და რეალურად ასეც იყო. ხავი მარტინესმა 3 წუთიან ინტერვალში (58-61) ორი გაფრთხილება მიიღო და საკუთარი გუნდი ბედის ამარა დატოვა. ერთი შეხედვით, ესპანელმა ორივე შემთხვევაში მეტოქის ძალიან სახიფათო კონტრშეტევა ჩაშალა, ტაქტიკურად სწორი ჯარიმები აიღო, რაც ანჩელოტიმაც აღნიშნა, მაგრამ მარტინესმა გუნდი დააღალატა, დააღალატა, მაშინ როდესაც გააკეთა ის, რასაც ცენტრალურ მცველებს სკოლაში ფეხბურთის თამაშის დროსაც კი უკრძალავენ.

გახსოვთ პირველი გაფრთხილება რას მოჰყვა? მარტინესის თამამ სოლორეიდს, რომლის დროსაც მან წონასწორობა დაკარგა, შემდეგ ბურთიც და უკან დაბრუნებული იძულები გახდა, რომ რონალდუ წაექცია. ასე ჩემპიონთა ლიგის მეოთხედფინალში არ თამაშობენ ხავიერ! მიუხედავად ამისა, მარტინესისადმი ხელის გაშვერა და მისი გაკრიტიკება არასწორია, რადგან ესპანელმა მთელი პირველი ტაიმი იდეალურად ჩაატარა და სწორედ რონალდუს ეთამაშებოდა მგელივით, მაგრამ ამ სამ წუთში მან უბრალოდ საკუთარი თავი დაკარგა.

დარწმუნებული ვარ, ახლა ვინმემ რომ ჰკითხოს მარტინესს, ის ბოდიშს მოიხდის და იტყვის, რომ შეცდა, მაგრამ ჩემპიონთა ლიგა ხომ ყველაზე დაუნდობელი ტურნირია - აქ პატარა შეცდომებს, ემოციის აყოლასა და უბრალოდ მცირედ უყურადღებობასაც კი არავინ გაპატიებს. 10 კაცით გაშმაგებული "რეალის" წინააღმდეგ თამაში კი სრული კოშმარი იყო, ამის გახსენებაც კი არ მინდა...

სამწუხაროდ, ეს ყველაფერი ძალიან მალე მოხდა, სირთულეს სირთულე დაემატა და საბოლოოდ "ბაიერნიც" გატყდა. როდესაც ანჩელოტიმ აღნიშნა, რომ მის გუნდს საერთოდ არ გაუმართლა, სწორედ ის იგულისხმა, რომ ყველაფერი მიუნხენური გრანდის წინააღმდეგ იყო, თანაც მოვლენები არანორმალური სისწრაფით განვითარდა. თუმცა არსებობს ერთი უნიკალური გამოთქმა - "რას იზამ, ეს ფეხბურთია."

სრული ჩავარდნა


მთელი სეზონია ხაბი ალონსოს ვაქებთ, მაგრამ გუშინ საღამოს მან ამისათვის არანაირი მიზეზი არ დაგვიტოვა. ვეტერანი ესპანელი ბურთს მხოლოდ 55-ჯერ შეეხო, რაც მისთვის ძალიან დაბალი მაჩვენებელია, არცერთი ჩაჭრა! არცერთი ართმევა! არცერთი დარტყმა! არცერთი გამჭოლი პასი! ალონსო პირველ ტაიმშიც ვერ მოქმედებდა იდეალურად, მეორე ნახევრის დასაწყისი კი საერთოდ ჩააგდო, რის შემდეგაც კარლო ანჩელოტიმ შეცვალა. 35 წლის ალონსო, რომელიც კარიერაში ბოლო სეზონს ატარებს და საოცრად მოდნომებული უნდა ყოფილიყო, გუნდის უსუსტესი წერტილი იყო. პირველ ტაიმშიც ცენტრში მთავარ სამუშაოს ტიაგო ალკანტარა და არტურო ვიდალი ასრულებდნენ. ესპანელი ძალიან პროდუექტიული იყო, ჩილელი კი ტრადიციულად საოცარ ართმევებს ახორციელებდა და გოლიც კი გაიტანა. მეორე ტაიმში ცენტრი სრულიად ჩავარდა, მაგრამ ალონსო მანამდეც სუსტად გამოიყურებოდა.

თამამად შეიძლება ითქვას, რომ ეს ალონსოს ყველაზე ცუდი მატჩი იყო სეზონში და სამწუხაროა, ეს მატჩი ყველაზე მნიშვნელოვანიც იყო. ალონსოს კლასი და გრძელი პასები მისმა უყურადღებო, ნელმა და სუსტმა თამაშმა სრულიად დაჩრდილა.

უბრალოდ საცოდაობა


ძალიან არ მინდა ამის თქმა, მაგრამ რეალობას ვერ გავექცევით - ალონსო მატჩის ჩავარდნა იყო, ხოლო ის, რასაც თომას მიულერი აკეთებდა უბრალოდ საცოდაობა...თავიდანვე ნათელი იყო, რომ რობერტ ლევანდოვსკის არყოფნა "ბაიერნისთვის" საკმაოდ დიდი დანაკლისი იყო, მაგრამ ვფიქრობ, მატჩის მსვლელობისას "რეკორდმაისტერის" ქომაგები დარწმუნდნენ, რომ საქმე გაცილებით უარესადაა, ვიდრე თავიდან ეგონათ. მიულერმა თითქმის ყველა ორთაბრძოლა წააგო, საჯარიმოში არასწორად მოქმედებდა, ვერცერთ ბურთზე ხეირიდან ვერ იბრძოლა და მეტოქის კარის სიახლოვეს ბურთიც კი არ მიუღია. იყო ერთი ეპიზოდი, როდესაც ლამის ჩინებული პასის შემდეგ თომასი ძალიან კარგ პოზიციაზე დარჩა, მაგრამ ყველაფერი გააფუჭა. იყო რამდენიმე ეპიზოდი, სადაც "ბაიერნის" ქომაგებმა ლევანდოვსკის ყოფნა ინატრეს, მაგრამ მინდორზე მიულერი იმყოფებოდა.

მატჩის წინ გერმანელი ექსპერტები ვარაუდობდნენ, რომ მიულერის მინდორზე გამოსვლა სასარგებლო იქნებოდა, რადგან ის უფრო მეტს იმოძრავებდა და "ბაიერნს" მეტი თავისუფალი სივრცე ექნებოდა. სივრცეები მართლაც იყო, მაგრამ იმ სივრცეში ვინ იყო? არიენ რობენს რამდენჯერმე შეეძლო თავის საფირმო სტილში დარტყმა, მაგრამ ზევით აიხედა, პარტნიორს ეძება, საჯარიმოში კი არავინ იყო. ან საინტერესოა ლევანდოვსკი ვისზე ნაკლებად მოძრაობს? მიულერმა "ბაიერნის" გულშემატკივრების იმედები გააცრუა და კატასტროფული მატჩი ჩაატარა. ასეთი უნაყოფო და უხასიათო თომას მიულერი ცხოვრებაში არ მინახავს.

მხოლოდ ფორმალობისთვის


ძალიან დიდი ხანი ვფიქრობდი და ვერაფრით გავიგე თუ რისთვის შემოვიდა მინდორზე დუგლას კოშტა? მახსოვს ორჯერ მიიღო ბურთი ფრთაზე, ოთხი მეტოქის წინააღმდეგ წავიდა და იქვე ყველაფერი დასრულდა. შეტევის გაძლიერების ერთადერთი საშუალება სწორედ ბრაზილიელი ვინგერი იყო, მაგრამ კოშტას საერთოდ არაფერი გაუკეთებია, მემგონი მეტოქის ნახევარზე ბურთით არც კი გადასულა. მაშინ, როდესაც ფრანკ რიბერიმ პირველი ტაიმი ძალიან კარგად ჩაატარა, ხიფათი შექმნა, ბევრს ცდილობდა, მოძრაობდა, არიენ რობენი კი მთელი მატჩის განმავლობაში წვალობდა, ქაჯივით დარბოდა, როდესაც თანაგუნდელები არ ეხმარებოდნენ, ენერგიით სავსე და ახალგაზრდა, კრეატიული ვინგერი "ბაიერნს" არაფერში გამოადგა. აი რას ნიშნავს კლასი. რიბერისა და რობენის როლი "რეკორდმაისტერში" კვლავ უდიდესია, მათი შეცვლა კვლავ ვერ ხერხდება, რაც ახლა არა, უფრო მომავლისთვის არის საგანგაშო. შესაძლოა ამ სეზონში რობერის დუეტს ბოლო სიტყვა ჯერ კიდევ სათქმელი აქვს, მაგრამ რა გვეშველება შემდეგ? ნუთუ დუგლას კოშტას იმედზე უნდა ვიყოთ, რომელიც "რეალის" წინააღმდეგ, როდესაც გუნდს ყველაზე მეტად დასჭირდა, სრულიად გამოუსადეგარი იყო? არ ვიცი, იმედია რაიმე შეიცვლება, კოშტა კი გუშინ მხოლოდ ფორმალობისთვის გავიდა მოედანზე.

ზიზუმ მასწავლებელს აჯობა


"ბაიერნისა" და "რეალის" პირველი მატჩი უარღესად საინტერესო იყო ტაქტიკური თვალსაზრისით. ორივე მთავარმა მწვრთნელმა კარგად იმუშავა, მაგრამ საბოლოოდ, გამარჯვებული მოსწავლე - მისიე ზინედინ ზიდანი გამოდგა, რომელმაც პაპა კარლოს მეორე ტაიმი მოუგო და ამბობენ, რომ მეორე ტაიმს მთავარი მწვრთნელი იგებსო.

თუმცა აღსანიშნავია, რომ პირველი ნახევარი სრულიად "ბაიერნის" იყო და იტალიელმა "სამეფო კლუბს" ერთი საინტერესო ოინი მოუმზადა - არტურო ვიდალის თავურები. პირველი ორი კუთხური სწორედ ჩილელის მიმართულებით წავიდა, საბოლოოდ კი ამ დამუშავებულმა კომბინაციამ შედეგი 25-ე წუთზე გამოიღო. გარდა ამისა, საწყის 45 წუთში მიუნხენელებმა რონალდუ წარმატებით ამოკეტეს, ცენტრში კი საოცარი მოქმედებებისა და პრესინგის წყალობით კროოსი-კაზემირო-მოდრიჩის ტრიო გააქრეს. ეს ყველაფერი დამუშავებული და ორგანიზებული იყო, მაგრამ ანჩელოტიმ მეორე ტაიმში ყველაფერი გააფუჭა.

რა თქმა უნდა, ჩვენ არ ვიცით რა ხდებოდა გუნდის გასახდელში, მაგრამ დასკვნას იმის მიხედვით ვაკეთებთ, რაც მინდორზე ხდებოდა. ფაქტია, რომ "ბაიერნი" მეორე ნახევარში მინდორზე არასწორი მიდგომით გავიდა და უკვე დებიუტშივე ძალიან უხეში შეცდომა დაუშვა, რასაც რონალდუს გოლი მოჰყვა. "რეალი" კი საპირისპიროდ, სულ სხვა განწყობითა და საოცარი შემართებით გავიდა მოედანზე. ფაქტია, რომ ზიდანის საუბარმა სერიოზული შედეგი გამოიღო და თამაშის სურათი შეცვალა. 10 კაცით დარჩენილმა "ბაიერნმა" კი უკვე ვეღარაფერი გააწყო. პაპა კარლომ ზიდანთან დაპირისპირება, რომელიც თავიდან მიყავდა, გასახდელში წააგო.

სუპერ მანუელ ნოიერი


დამიჯერეთ უბრალოდ სიტყვები არ მყოფნის იმისათვის, რომ მანუელ ნოიერის გუშინდელი თამაში აღვწერო, ეს შეუძლებელია, ეს არაამქვეყნიურია, ეს სხვა პლანეტიდანაა...როდესაც მანუ ნოიერის თამაშს უყურებ, რწმუნდები მეცნიერების სისწორეში, რომ ადამიანები მართლაც ცხოველების შთამომავლები არიან.

"რეკორდმაისტერის" პირველმა ნომერმა გუშინ, 1:1-ზე სამი მკვდარი ბურთი გამაოძრო - ჯერ ბეილს, შემდეგ ბეზემას და ბოლოს რონალდუს სასწაული ბურთები აუღო, მანამდე კი პირველ ტაიმში ბენზემას თავურს თითებით მიმართულება შეუცვალა, თორემ "რეალი" გახსნიდა ანგარიშს. ამ სეივების წყალობით კი "ბაიერნი" ჯერ კიდევ ცოცხალია! ის, რომ გიჟი (რა თქმა უნდა კარგი გაგებით) არტურო ვიდალი ჯერ კიდევ ფინალზე ფიქრობს, ანჩელოტი ფარ-ხმალს არ ყრის, ხოლო მადრიდელები მოვლენებს წინ არ უსწრებენ მხოლოდ ერთი ადამიანის დამსახურებაა და ეს მანუელ ნოიერი გახლავთ!

თუ "ბაიერნი" მადრიდში სიტუაციას შემოატრიალებს და ჩემპიონთა ლიგის ნახევარფინალში გავა, მანუ ნოიერის სეივებს ფასი დაედება, რადგან ზინედინ ზიდანი აუცილებლად იტყვის: "მიუნხენში გამოუყენებელი მომენტების გამო დავისაჯეთ", რატომ ვერ გამოიყენეს მომენტები? იმიტომ, რომ "ბაიერნის" კარს არანორმალური მანუ ნოიერი იცავს, რომელსაც დააახლოებით ორი კვირა არ ჰქონდა ნათამაშები, მხოლოდ ორი დღე ივარჯიშა ნორმალურად, მაგრამ "რეალის" საოცარ მოთამაშეებს მკვდარი ბურთები აუღო. ნუთუ კიდევ ეპარება ვინმეს ეჭვი რომ ის მსოფლიოში უძლიერესი მეკარეა? თუ კი მაშინ უყურეთ ამ ვიდეოს, არა ერთხელ, ათჯერ, ოცჯერ და შემდეგ თქვენს სინდისს ჰკითხეთ რამდენად ხართ ობიექტურები. ეს ის მომენტებია, რომელიც "ბაიერნის" შანსია და რომელმაც ქომაგებს იმედი დაგვიტოვა - მადლობა მანუ, შენ საუკეთესო ხარ!


ის, რაც აუცილებლად უნდა ვთქვა

ბოლოს კი მინდა, რომ მივცე თავს უფლება და ვიყო სუბიექტური, რადგან "ბაიერნის" გულშემატკივრებს მოგმართავთ. შეუძლებელია რამდენიმე სიტყვით იმ ტკივილის მოხსნა, რაც გუშინდელმა მარცხმა მოგვანიჭა, მაგრამ არასოდეს დაგავიწყდეთ თუ ვის ქომაგოთ, არასოდეს დაგავიწყდეთ, რომ "ბაიერნი" ყველაზე მებრძოლი გუნდია მებრძოლთა შორის და რაც არ უნდა მოხდეს ზურგის შექცევას არ იმსახურებს. დიახ, შეცდა მარტინესი, მაგრამ ტაში დავუკრათ, გავამხნევოთ. დამიჯერეთ, რომ მასზე დიდი დარტყმა ჩვენ არ მიგვიღია, მასზე ცუდად თავს ნამდვილად არ ვგრძნობთ, ის მორალურად განადგურებელია, რადგან საკუთარი გუნდი განსაცდელში ჩააგდო, იგივე ითქმის ალონსოსა და მიულერზეც. ნახეთ ხაბის რეაქცია, როდესაც სათადარიგო სკამზე დაჯდა? მან იცოდა, რომ საშინელი მატჩი ჩაატარა და საკუთარ თავზე გაბრაზდა. თითოეული მოთამაშე თავს ძალიან ცუდად გრძნობს, როდესაც მნიშვნელოვან თამაშს სათანადო დონეზე არ ატარებს, ამიტომ ჩვენ მათ კი არ უნდა ვაგინოთ, არამედ ისინი უნდა გავამხნევოთ. გულშემატკივრის მოვალებოა სწორედ ეს არის! ამიტომ იყო, რომ მატჩის ბოლო წუთებზე მთელი "ალიანს არენა" ფეხზე წამოდგა და ბიჭებს აპლოდისმენტებით აჯილდოვება, აი ეს არის ქომაგობა! ნამდვილი, ღირსეული გულშემატკივრის საქციელი.

ერთსაც ვიტყვი და ბევრს აღარ მოგაწყენთ თავს. ალბათ ყველას გიფიქრიათ რას უპასუხებდით ვინმეს ასეთი შეკითხვა, რომ დაესვა: "რატომ ქომაგობ ამ გუნდს?". ზოგადად, ეს არც ისე სწორი შეკითხვაა, რადგან ზუსტად არავინ იცის თუ რატომ გულშემატკივრობს ამა თუ იმ გუნდს და საიდან მოდის ეს უდიდესი სიყვარული. იცით, პირველი, რაც თავში მომდის, მიუნხენური გრანდის არანორმალური ისტორიაა, რომელიც სავსეა სირთულეებით, ძალიან მტკივნეული მომენტებით და ვფიქრობ, "ბაიერნი" ყველაზე კარგად ერგება ცხოვრების ერთ-ერთ ყველაზე მნიშვნელოვან დევიზს - "Never give up" ანუ "არასოდეს დანებდე". ეს არ ის გუნდი, რომელიც ხშირად დაეცა, მიიღო ძალიან მძიმე დარტყმები, მაგრამ ყოველ ჯერზე გააგრძელა ბრძოლა, ფეხზე წამოდგა, ხმრებში გაიმართა და მიზანს მაინც მიაღწია. 1999 წლის ფინალის შემდეგ 2001 წელს მოგებული ჩემპიონთა ლიგა და იგივე ისტორია 2012-13 წლებში ჩემი სიტყვების ნათელი დასტურია. ასე, რომ მოდი კიდევ ერთხელ ვიქონიოთ იმედი, კიდევ ერთხელ გვჯეროდეს, გვჯეროდეს არანორმალური მანუელ ნოიერის, არანორმალური არტურო ვიდალის, რომელიც დღეს ჩემპიონთა ლიგის ფინალზე ფიქრობს და რა თქმა უნდა, გვჯეროდეს "ბაიერნის!" "ჩვენ ვართ ჩვენ!" ეს გუნდი ასე მარტივად არ დანებდება. ჩემი რჩევა იქნება, რომ უბრალოდ ელოდეთ და იმედი იქონიეთ.

დავით მაღრაძე, სპეციალურად BAYERN.GE-სთვის
скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
მატჩის ანალიზი ჩემპიონთა ლიგა
მსგავსი სიახლეები
კომენტარები
Hansi
Hansi | 13 აპრილი 2017 15:56
პენალტის, კარვახალის ხელით თამაშის უფრო კარგი კადრები არავის არ აქვს, აქედან დასკვნა გამომაქვს რომ პენალტი იყო და ეს აჟიოტაჟი არ იყო და არ ეკუთვნოდაო სრულიად შეუსაბამოდ მეჩვენება.
ალონსოს რაც შეეხება, ალონსოს გასვლის შემდეგ ჩავარდა ნახევარდაცვა. ბერნატმა კი ვერ უზრუნველყო შესაბამისად იმ ფრთის ამოკეტვა.
intel
intel | 13 აპრილი 2017 21:01
ლევანდოვსკი იქნება მადრიდში და დაენძრევათ მაგრად
მოთამაშე გაგვიგდეს მოედნიდან,თორემ დედას ვუტირებდით რეალს
ეს ბაიერნია და ყველაფერი ახლა იწყება
დასრულება მადრიდში იქნება და ბაიერნი მოიგებს ეჭვიც არ მეპარება!!
მიდი ბაერნ,შენი იმედი მაქვს,ჩვენ გავიმარჯვებთ!!!!

აუცილებლად მოვიგებთ!
Tengo bokuchava
Tengo bokuchava | 14 აპრილი 2017 16:10
Gushin mteli dge chkuaze ar viyavi...zalian metyoboda rom bayernis cagebam zaan imoqmeda....magram aq es analizi rom vnaxe jer cali tvalit gadavikitxe...mere bolosken isetebi ecera rom ...zalian mesiamovna da kidev ramodenimejer cavikitxe da magit cota rom itqvas shveba vigrzeni....didi madloba Davit Magrazes aseti imedis momcemi sityvebistvis????
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა