ჩემპიონთა ლიგის საპასუხო 1/8 ფინალურ შეხვედრაში მიუნხენის "ბაიერნმა" ლონდონის "ჩელსი" კვლავ დიდი სხვაობით დაამარცხა.
ინგლისში 3:0 გამარჯვებისა და პანდემიის გამო აღებული პაუზის შემდეგ ჰანსი ფლიკის გუნდმა მშვენიერი სტარტი აიღო - რობერტ ლევანდოვსკიმ მატჩის დებიუტშივე მოიპოვა პენალტი სერჟ გნაბრის შესანიშნავი გადაცემით და თავად მოახდინა რეალიზიბა - 1:0!
რამდენიმე წუთში პოლონელმა თავდამსხმელმა ივან პერიშიჩი დატოვა იდეალურ პოზიცია და ხორვატმა თავისი გაიტანა. "ჩელსიმ" ტაიმის ბოლოს მანუელ ნოიერის შეცდომის წყალობით ერთი ბურთი გაქვითა და პირველი ტაიმი 2:1 დასრულდა.
მეორე ნახევარში გერმანელებმა უპირატესობა შეინარჩუნეს და კიდევ ორი ბურთი გაიტანეს. ჯერ კოკო ტოლისომ გამოიჩინა თავი, ხოლო მოგვიანებით ალვარო ოდრიოცოლას ჩაწოდებას რობერტ ლევანდოვსკი ბრწყინვალე თავურით გამოეხმაურა, დუბლი გაიფორმა და წერტილიც დასვა - 4:1!
ორი მატჩის ჯამში, "ბაიერნმა" 7:1 იმარჯვა და ჩემპიონთა ლიგის 1/4 ფინალურ სტადიაზე კატალონიის "ბარსელონას" დაუპირისპირდება.
"ბაიერნისა" და "ბარსელონას" შეხვედრა 14 აგვისტოს ლისაბონში გაიმართება და შეგახსენებთ, რომ ეს ერთმატჩიანი დუელი იქნება.