ლონდონის "ჩელსის" ბარიერის დამაჯერებლად გადალახვის შემდეგ მიუნხენურ გრანდს ჩემპიონთა ლიგის 1/4 ფინალურ ეტაპზე დიდი ბრძოლა ელოდება.
ჰანსი ფლიკის გუნდი, რომელმაც "არისტოკრატები" ორი მატჩის ჯამში 7:1 გააცამტვერა, მომდევნო სტადიაზე კატალონიის "ბარსელონას" დაუპირისპირდება.
საინტერესოა, რომ ბოლო 10 წლის განმავლობაში ეს "ბაიერნისა" და "ბარსელონას" მეოთხე საფლეი-ოფო შეხვედრა იქნება, აქამდე გამართული სამი დაპირისპირებიდან კი გამარჯვებული საბოლოოდ ჩემპიონთა ლიგის თასს დაეუფლა.
2009 წელს "ბლაუგრანამ" მიუნხენური გრანდი 1/4 ფინალში გამოაგდო და ჩემპიონი გახდა. მიუნხენელებმა რევანში 2013 წელს 1/2 ფინალში აიღეს (7:0) და ტურნირიც მოიგეს.
ამ გუნდების გზები ბოლოს 2015 წელს 1/2 ფინალში გადაიკვეთა. მაშინ "ბარსელონამ" ორი მატჩის ჯამში 5:3 მოიგო და საბოლოოდ ჩემპიონიც გახდა.
ასე, რომ სტატისტიკის მიხედვით, 14 აგვისტოს პორტუგალიის დედაქალაქ ლისაბონში ტურნირის "ნაადრევ ფინალს" უნდა ველოდეთ.