...

ლაიფციგი 4:5 ბაიერნი - მატჩის ანალიზი

მატჩის მსვლელობა

"ლაიფციგმა" დღევანდელი თამაში საოცარი მონდომებით, ტემპითა და აგრესით დაიწყო. "ხარები" მეტოქეს პირველივე წუთიდან ეკვეთნენ და ანგარიში მეორე წუთზე გახსნეს. მარჯვენა ფლანგზე ფილიპ ლამი ჩავარდა, რომელმაც პოზიცია დაკარგა და ტიმო ვერნერის ერთი პასით მარცხენა ფრთაზე ემილ ფორსბერგი მარტო დარჩა. შვედმა ბურთი საჯარიმომდე ატარა და იდეალური პასით მარსელ ზაბიტცერს დაასვა, რომელმაც თავით ორი-სამი მეტრიდან ტომ შტარკეს არანაირი შანსი არ დაუტოვა. ორ წუთში ვერნერი მარცხენა ფლანგზე ფილიპ ლამს გაექცა და ჩააწოდა. ბურთი საპირისპირო ფრთაზე ჩამორბენილ ილზანკერამდე მივიდა, რომელმაც დაბალი პასით საჯარიმოში ზაბიტცერს დაუგორა, მაგრამ ავსტრიელმა ამჯერად კარს გადააცილა, მაგრამ ძალიან კარგი შესაძლებლობა ჰქონდა. კიდევ 6 წუთში კი "ლაიფციგმა" ძალიან კარგი კონტრშეტევა განახორციელა. იუსუფ პოულსენის გრძელი პასის შემდეგ ტიმო ვერნერი მარცხენა ფრთაზე კვლავ თავისუფალი აღმოჩნდა, საჯარიმოში შევიდა, ცენტრისკენ შეიწია და შორეულ კუთხეში დაბალი ტრაექტორიით გაუშვა, მაგრამ "ბაიერნი" კარის ძელმა იხსნა. საწყის 10 წუთში "ხარებმა" გააკეთეს ის, რაც გუნდის თავკაცმა, რალფ ჰაზენჰიუტლმა, განაცხადა: "ჩვენ "ბაიერნს" ბურთი უნდა წავართვათ და მაქსიმალურად დავუმალოთ", - აღნიშნა ჰაზენჰიუტლმა, რომლის გუნდმაც საწყის წუთებში "ბაიერნი" მართლაც შეჭამა.

ამის შემდეგ "ბაიერნი" გონს მოვიდა და ნელ-ნელა უპირატესობა გადაიბირა. ძალიან აქტიური იყო "რეკორდმაისტერის" მარჯვენა ფლანგი: არიენ რობენი და ფილიპ ლამი მუდმივად ამწვავებდნენ და ერთ-ერთ ასეთ გამწვავებას ლამის ჩაწოდება მოჰყვა, რომლის შემდეგაც "ლაიფციგის" მარცხენა მცველს ბერნარდოს ბურთი მოხვდა და მთავარმა მსაჯმა, ლაინსმენის მითითების შემდეგ, პენალტის ნიშნულისაკენ მიუთითა. ეპიზოდი ძალიან საკამათო იყო, მაგრამ რობერტ ლევანდოვსკი ბურთთან თამამად მივიდა და ანგარიში დამაჯერებლად გაათანაბრა - 1:1.


"ბაიერნის" საპასუხო ბურთის შემდეგ კი საოცარი თამაში წავიდა, ორივე გუნდი უტევდა და უამრავი მომენტი შეიქმნა. ფორსბერგის ჩინებული პასის შემდეგ მეკარესთან პირისპირ ზაბიტცერი დარჩა, მაგრამ ტომ შტარკემ ფეხით შესანიშნავი სეივი განახორციელა. მალევე კუთხურის შემდეგ ბერნარდომ მარკატელა დაარტყა, მაგრამ ბრაზილიელსაც შტარკემ აუღო. ამას "ბაიერნის" მომენტი მოჰყვა, როდესაც რიბერი მარცხენა ფრთაზე გაიქცა და საჯარიმოში ხუან ბერნატი ძალაინ კარგად იპოვნა, ესპანელის დარტყმული კი გულაჩიმ ფეხებს შუა არ გაატარა. მომდევნო შეტევაში ვერნერმა მარცხენა ფლანგზე ათრია ბურთი, შემდეგ კი ცენტრში ფორსბერგს დაუტოვა, რომელიც წინ დაიძრა, ალონსოსა და ბოატენგს შორის ელეგანტურად გაძვრა, საბოლოოდ კი მას ფეხი ხაბი ალონსომ გამოსდო და მსაჯმა პენალტი სამართლიანად დანიშნა. ახალგაზრდა ტიმო ვერნერმა შტარკეს მარტივად აჯობა და "ლაიფციგი" კვლავ დააწინაურა - 2:1!

პირველი ტაიმის ბოლო 15 წუთი კი მშვიდი გამოდგა, მასპინძლები ცოტათი უკან დადგნენ და იდეალური საწყისი 45 წუთი გამარჯვებით ჩაამთავრეს. "ბაიერნი" კვლავ მარჯვენა ფრთიდან უტევდა, სადაც ლამი და რობენი აქტიურობდნენ, მაგრამ რეალური საგოლე მომენტი მიუნხენურ გრანდს აღარ შეუქმნია. ტაიმის ბოლოს ფრანკ რიბერიმ დაზიანება მიიღო და მის მაგივრად მოედანზე დუგლას კოშტა გავიდა. შესვენების შემდეგ კი "ხარებმა" კვლავ ძალიან აქტიურად დაიწყეს და ისევ სწრაფი გოლი გაიტანეს. "ლაიფციგის" შეტევა მარჯვენა ფრთიდან განვითარდა, მაგრამ ბურუსის გამო სიტუაცია ცუდად ჩანდა. ბურთი საჯარიმოსთან იუსუფ პოულსენს მიუვიდა, რომელმაც შორიდან გაისროლა და ბურთი კარში აღმოჩნდა. თავიდან ჩანდა, რომ შტარკემ დაუშვა შეცდომა, მაგრამ განმეორებაზე გამოჩნდა, რომ ბურთი ხაბი ალონსოს მოხვდა და რიკოშეტის შედეგად აღმოჩნდა ბადეში. შტარკეს შეცდომა არ დაუშვია, მაგრამ "ლაიფციგმა" უპირატესობა ორბურთიანი გახადა.


"ბაიერნმა" უპირატესობა მალევე გადაიბირა და რობენის სოლორეიდისა და ჩინებული პასის შემდეგ ლევანდოვსკის შეეძლო გატანა. პოლონელმა ბურთი ტექნიკურად გაისწორა, მაგრამ მიზანს ცოტათი ასცდა. "რეკორდმაისტერი" ზეწოლას აძლიერებდა და მიზანსაც მიაღწია. კუთხურის გათამაშების შემდეგ ფილიპ ლამმა საჯარიმოში ჩააწოდა, იქ საჰაერო ორთაბრძოლა ხაბი ალონსომ მოიგო და თავისუფალ ტიაგოს გადაუგდო, რომელმაც თავით ცარიელ კარში შეაგდო. თუმცა 5 წუთში "ხარებმა" კვლავ გამოაჩინეს თავიანთი რქები. პოულსენმა საჰაერო ორთაბრძოლა მოიგო და ბურთი ფლანგზე საჯარიმოსკენ გაუშვა, როდესაც ლამი მოულოდნელად პასის დროს შეცდა და ბურთი ტიმო ვერნერს ჩააბარა. ახალგაზრდა გერმანელმა საჩუქარი მიიღო, ბოატენგს მარტივად გასცდა და შტარკეს ფეხებს შუა ჭვკაინურად გაუძვრინა - დუბლი და კვლავ ორბურთიანი სხვაობა!

მიუხედავად მორიგი ფსიქოლოგიური დარტყმისა, "ბაიერნი" არ დანებდა და შეტევები გააგრძელა. რობენმა და ლამმა ხიფათების შექმნა განაგრძეს და მათი ერთ-ერთი კომბინაცია ფილიპის ჩაწოდებითა და ლევანდოვსკის დარტყმით დასრულდა, როდესაც "ლაიფციგი" ძელმა გადაარჩინა. ამას დავიდ ალაბას სახიფათო საჯარიმო მოჰყვა, მაგრამ ამჯერად მასპინძლები პიტერ გულაჩიმ იხსნა. 84-ე წუთზე კი რობენის უძლიერესი დარტყმის შემდეგ ახლო ზედა კუთხეში "ლაიფციგი" ხარიხამ გადაარჩინა, მაგრამ დამატებაზე ლევანდოვსკიმ თავით ყველას დაასწრო და დუბლი გაიფორმა. მიუნხენელებმა იგრძნეს, რომ ჯერ ყველაფერი არ იყო დასრულებული და 91-ე წუთზე ალაბამ ფანტასტიკური ჯარიმა შეასრულა - 4:4!

4:2-ზე თამაში ძალიან დაიძაბა, მოთამაშეების ტემპერატურამ პიკს მიაღწია და მატჩის მთავარ არბიტრს, ტობიას შტილერს, პატარ-პატარა კონფლიქტების, შელაპარაკებების გამო თამაშის შეჩერება ხშირად უწევდა, ამიტომ მან ძირითად დროს კიდევ 5 წუთი დაამატა. მაშინ, როდესაც ყველაფერი ლოგიკური ფრისკენ მიდიოდა, "ბაიერნი" ბოლო კონტრშეტევაზე წამოვიდა, მიულერი ცენტრში მოჩეხეს, მაგრამ მან ბურთის მოშორება და მისი რობენისთვის ჩაბარება უკვე მოასწრო. არიენმა კი ჯერ კომპერს აუარა გვერდით ელეგანტურა, შემდეგ ილზანკერს საჯარიმოში გაექცა, ცენტრისკენ შეიწია და ტექნიკური დარტყმით შედევრი შექმნა - 4:5, 10 წუთში 3 ბურთი, რობენის სუპერ-გოლი და უბრალოდ სუპერ-მატჩის სუპერ-დასასრული!


უბრალოდ სეზონის მატჩი!


"ლაიფციგისა" და "ბაიერნის' დღევანდელი თამაში უბრალოდ გერმანული ფეხბურთის მშვენება იყო, ნამდვილი დღესასწაული, რომლითაც თითოეული გულშემატკივარი უდიდეს სიამოვნებას მიიღებდა. სატურნირო მიზანი უკვე ორივე გუნდს მოკლული ჰქონდა, სამაგიეროდ ეს პრინციპული მნიშვნელობის პაექრობა იყო. მატჩის წინ კარლო ანჩელოტიმაც და რალფ ჰაზენჰიუტლმაც აღნიშნეს, რომ სანახაობრივ, გახსნილ თამაშს ელოდნენ, მაგრამ იმან, რაც მოედანზე ვიხილეთ, ყველანაირ მოლოდინს გადააჭარბა. ეს იყო ორი შესანიშნავი გუნდის, ამ შემთხვევაში ნამდვილი ფლაგმანის, გრანდისა და ახალგაზრდა, პერსპექტიული ტალანტებით დაკომპლექტებული მომავლის გუნდის ღირსეული დაპირისპირება. ამ თამაშში აბსოლუტურად ყველაფერი იყო: დაძაბულობა, დრამა, გოლები, ლამაზი კომბინაციები, კარგი გაგებით "სისხლი" და მსაჯობაც კი იდეალური იყო. ტობიას შტილერმა თავის მოვალეობა მართლაც საუცხოოდ შეასრულა და ყოველ რთულ ეპიზოდს სამაგალითოდ არჩევდა. ვფიქრობ, ორი აზრი არ არსებობს, რომ ეს ბუნდესლიგის მიმდინარე სეზონის საუკეთესო მატჩია. თუკი ვინმეს აინტერესებს რატომ ჰყავს ბუნდესლიგას ამდენი ერთგული და კარგი გულშემატკივარი, უბრალოდ უყურეთ ამ სუპერ-მატჩს.

აქვე მინდა, რომ მადლობა გადავუხადო ღირსეულ მოწინააღმდეგეს, "ლაიფციგს" და არა "რედ ბულ ლაიფციგს." რაც არ უნდა ბევრი ვისაუბროთ, რომ ეს გუნდი ავსტრიული ერენგეტიკული სასმელის პოპულარიზაციის ყველაზე მსხვილი "პროდუქტია", დაარსებიდან 7 წელიწადში ასეთი შედეგის მიღწევას უდიდესი შრომა სჭირდება. ხოლო ის, რაც მოედანზე ვიხილეთ, არა რეკლამა, არამედ დიდებული ფეხბურთი იყო. "ლაიფციგის" რიგებში გერმანული ფეხბურთის ამომავალი ვარსკვლავი ტიმო ვერნერი, უნიკალური ნაბი კეიტა, რომელსაც გაუმჯობესებულ ნ'გოლო კანტესაც კი უწოდებენ, უნივერსალური მარსელ ზაბიტცერი, უნიჭიერესი უპამეკანო და უელეგანტურესი ემილ ფორსბერგი თამაშობენ. გუნდის სათავეში კი ძალიან ჭკვიანი, შრომისმოყვარე, ქარიზმატული და შემტევი ფეხბურთის ქმადაგებელი რალფ ჰაზენჰიუტლია. ამ ბიჭების მონდომება და თამაში დაფასების ღირსია. ბრავო "ლაიფციგ"! დარწმუნებული ვარ, გერმანული ფეხბურთის თითოეული გულშემატკივარი ბედნიერი იქნება თუ ამ გუნდის სახით ბუნდესლიგაში სერიოზული ძალა შეიქმნება, რომელიც "ბაიერნსაც" გაუწევს ღირსეულ კონკურენციას და ევროპაშიც წარმატებით იასპარეზებს.

უჩვეულო ლამი 


რაოდენ უცნაურადაც არ უნდა ჟღერდეს "ლაიფციგთან" შეხვედრაში ერთ-ერთი ყველაზე ცუდი შთაბეჭდილება ფილიპ ლამმა დატოვა, რომლისგანაც ასეთ სუსტ თამაშს დაცვაში არ ვართ მიჩვეულნი. პირველ ტაიმში "ბაიერნის" დაცვის მარჯვენა ფრთა მოშლილი იყო. გოლი სწორედ ლამის ფრთიდან გავიდა, ვერნერმა სამი მომენტი ამ პოზიციიდან შექმნა, თანაც ისე, რომ ფილიპი ზოგჯერ საერთოდ არ ჩანდა კადრში. მეორე ტაიმში კი კაპიტანმა ტიმოს გოლიც აჩუქა და შედეგიანი შეცდომა დაუშვა. 33 წლის გერმანელი შეტევაში ბრწყინვალედ მიდიოდა და რობენთან ერთად მუდმივად ამწვავებდა, მაგრამ დღეს პირველად გამოჩნდა, რომ ლამი მართლაც დაბერდა და დაცვაში ვეღარ ასწრებდა ჩამოსვლას.

რა თქმა უნდა, ეს ერთი მატჩი ფილიპ ლამის გენიალურ კარიერას მილიმეტრიანი რადიუსის მქონე ჩრდილსაც კი ვერ მიაყენებს, მაგრამ უბრალოდ ვერ გავექცეოდით იმ ფაქტს, რომ ლამმა სეზონის ერთ-ერთი ყველაზე სუსტი მატჩი ჩაატარა. თუმცა ამავადროულად ისიც უნდა აღინიშნოს, რომ ამ ყველაზე ცუდ თამაშში კაპიტანმა შეტევაში უდიდესი სამუშაო შეასრულა და რეალურად "ბაიერნის" მარჯვენა ფრთაზე ორი ვინგერი მოქმედებდა.

პენალტის ეპიზოდები

ამ თამაშში ორი თერთმეტმეტრიანი დაინიშნა, საიდანაც ორივე რეალურად დასადები იყო, მაგრამ მოდი ეს ეპიზოდები მაინც დეტალურად გავარჩიოთ, რადგან "ბაიერნის" პენალტის შემთხვევაში სიტუაცია თავიდან არც თუ ისე ნათელი იყო.


თავდაპირველად გამოჩნდა, რომ "ლაიფციგის" მარცხენა მცველს, ბენარდოს, ბურთი მხოლოდ მხარზე მოხვდა, მაგრამ ამის შემდეგ მას ბურთი მარჯვენა ხელზეც მოხვდა, რომელიც გაშლილი ჰქონდა.

კონტაქტი იყო, ბურთი მიდიოდა თავისუფალ მოთამაშეზე, ხოლო ხელი გაშლილი იყო, ამიტომ მსაჯს ყველანაირი არგუმენტი ჰქონდა იმისათვის, რომ პენალტი დაენიშნა და საბოლოოდ, ეს გვერდითი არბიტრის დახმარებით გააკეთა.

ახლა კი მეორე პენალტის ეპიზოდში გადავიდეთ, რომელიც "ბაიერნის" კარში დაიდო და საერთოდ არანაირ ეჭვს არ ბადებს. საჯარიმოში შეჭრილ ემილ ფორსბერგს ხაბი ალონსომ ფეხი დაუდო, რაშიც ახლავე დარწმუნდებით და მეტი კომენტარი ამას უბრალოდ არ სჭირდება.


თავისი კოცნა რობენმაც მიიღო


თითქმის ყველამ აღიარა, რომ მიუნხენის "ბაიერნის" ამჟამინდელი შემადგენლობა "გადაბერებული" და ზედმეტად ასაკოვანია, ამიტომ გუნდს ახალი სისხლი სჭირდება. თუმცა მიუხედავად თავისი ასაკისა, ეს არანაირად არ ეხება არანორმალურ არიენ რობენს და ეს კიდევ ერთხელ დადასტურდა. მაშინ, როდესაც ფეხბურთელი 33 წლის ასაკში, მატჩის 95-ე წუთზე, მეტოქის მოედნის ნახევარს გარბის, გზად ორ მოთამაშეს იტოვებს და ნამდვილ შედევრს ქმნის, მას "გადაბირებულს" ნამდვილად ვერ უწოდებ, უბრალოდ სინდისი არ მოგცემს ამის უფლებას..."მფრინავი ჰოლანდიელი" მიმდინარე სეზონს უმაღლეს დონეზე ატარებს და მადრიდის "რეალთან" 120 წუთიან ბრძოლაშიც ძალიან კარგად გამოჩნდა, რომ რობენს ჯერ სისწრაფეც არ დაუკარგავს. რიბერის ფიზიკური გადაღლილობა აშკარად დაეტყო, აი არიენი კი კვლავ შეუჩერებელია. ლეგენადრული ჰოლანდიელი მთელი 90 წუთი ძალიან ბევრს ცდილობდა, ქმინდა ხიფათს, ლევანდოსკის მეორე გოლში მისი წვლილი ძალიან დიდი იყო, მაგრამ საბოლოოდ თავის მიზანს მსაჯის მიერ დამატებულ ბოლო წუთზე მიაღწია და თამაშის შემდეგ კარლო ანჩელოტის საფირმო კოცნაც დაიმსახურა.

მაშინ, როდესაც შეცვლის გამო იმედგაცრუებულ ფრანკ რიბერის პაპა კარლომ დამშვიდების მიზნით აკოცა, რობენი "განაწყენდა", მაგრამ ახლა მან თავისი კოცნაც მიიღო.

ლევიმ ახალი 50-ეული გახსნა


რობერტ ლევანდოვსკიმ "რედ ბულ არენაზე" დუბლი გაიფორმა და ბუნდესლიგის მიმდინარე სეზონში 30 ბურთი დააგროვა. 28 წლის პოლონელი ბომბარდირთა დავაში პიერ-ემერიკ ობამეიანგს 1 გოლით უსწრებს, მაგრამ ამ უპირატესობის გარდა, ლევიმ ერთ მნიშვნელოვან შედეგსაც მიაღწია. ლაიფციგში გატანილი პირველი ბურთი რობერტისთვის გერმანიის ეროვნულ ჩემპიონატში 150-ე გამოდგა, მეორე ტაიმში კი მან ახალი 50-იანების სერია დაიწყო. ამ 151 გოლიდან ლევანდოვსკიმ 74 დორტმუნდის "ბორუსიას" მაისურით გაიტანა, ხოლო უკვე 77 მიუნხენური გრანდის რიგებში. პოლონელი მანქანა საუცხოო ფორმაშია და იმედია ქვემეხს ზედიზედ მეორედ მოიპოვებს.  скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
ბუნდესლიგა მატჩის ანალიზი
მსგავსი სიახლეები
კომენტარები
bayernfan
bayernfan | 14 მაი 2017 16:28
მეგობარო პირველ გოლზე ლამი კი არა ბოატენგი ჩავარდა თამაშს არ უყურე? პირველი გოლი 100 პროცენტი ჟერომ ბოატენგის შეცდომის გამო გავიდა, ხოლო ბოლო გოლიც ლამზე მეტად ბოატენგი შეცდა რომ დროზე არ გადავიდა დაზღვევაზე, უჩვეულო ლამი კი არა ჟერომ ბოატენგია მანდ დამნაშავე და ასე იქნება სანამ ის იდგება ბავარიის დაცვის ცენტრში, ყოველთვის სხვას გადაბრალდება და დამნაშავე ერთია
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა