...

დამშვიდობების დროა კაპიტანო...

ფრანჩესკო სარტორისა და ლუჩიო კვარანტოტოს მიერ შექმნილი გენიალური კომპოზიცია "Time To Say Goodbye" "ალიანს არენაზე" ერთხელ უკვე აჟღერდა, როდესაც საფეხბურთო კარიერა ლეგენდარულმა ოლივერ კანმა 2008 წელს დაასრულა. ხვალ მიუნხენში დიდებული ბრიტანელი ტენორი პოლ პოტსი (ოლივერ კანის გაცილების მატჩში სწორედ მან შეასრულა ეს შედევრი) არ არის მიწვეული, მაგრამ "ბაიერნის" გულშემატკივრებს დაახლოებით 10 წლის შემდეგ კიდევ ერთი გენიალური მოთამაშის, ბრწყინვალე პიროვნებისა და დიდი კაპიტნის გაცილება მოუწევთ.

თანამედროვეობის ერთ-ერთი საუკეთესო განაპირა მცველი და გერმანული ფეხბურთის თანამედროვე ისტორიაში ერთ-ერთი ყველაზე ინტელექტუალური მოთამაშე, მიუნხენის "ბაიერნის" ისტორიაში ერთ-ერთი უდიდესი და ერთ-ერთი ყველაზე წარმატებული ფეხბურთელი, უბრალოდ მისტერ სტაბილურობა და მისტერ საიმედოობა - ფილიპ ლამი 33 წლის ასაკში კარიერას ასრულებს. ლამი მიდის, მაგრამ მისი კვალი, რომელსაც იგი უკანასკნელი 12 წლის განმავლობაში ტოვებდა, "ბაიერნის" ისტორიაში არასოდეს გაქრება.

ყველაფერი 11 წლის ასაკში დაიწყო, როდესაც ლამმა "გერნი" დატოვა და მიუნხენის "ბაიერნის" აკადემიაში ჩაირიცხა. სულ რამდენიმე წელიწადი და ფილიპმა 2001 და 2002 წლებში "ბაიერნის" 19 წლამდელებთან ერთად, ჰერმან გერლანდის ხელმძღვანელობით, გერმანიის ეროვნული ჩემპიონატი ზედიზედ ორჯერ მოიგო. "ფილიპი 17 წლის ასაკში უკვე ძალიან დაღვინებული იყო. ჩემი აზრით, მას დღემდე არცერთი მნიშვნელოვანი შეცდომა არ დაუშვია და არანაირი ნეგატიური შთაბეჭდილება არ დაუტოვებია", - ასე აფასებს ჯერ კიდევ თინეიჯერ ლამს გენიალური ჰერმან გერლანდი იგივე "ვეფხვი."


ფილიპის დებიუტი "ბაიერნის" შემადგენლობაში 2002 წლის ნოემბერში, ჩემპიონთა ლიგის ჯგუფურ ეტაპზე, "ლანსთან" საშინაო შეხვედრაში (3:3) შედგა, რომელსაც არანაირი მნიშვნელოვა არ ჰქონდა. ლამი მოედანზე ერთი წუთით გამოჩნდა და მეტი არაფერი. კლუბში სერიოზული პრობლემები იყო, ამიტომ "რეკორდმაისტერის" ხელმძღვანელობამ მისი განათხოვრება გადაწყვიტა. 2003/04 და 2004/05 წლების სეზონები მან "შტუტგარტში" დაჰყო და 71 შეხვედრა ჩაატარა. ფელიქს მაგათმა ლამს სრული ნდობა გამოუცხადა, მარცხენა მცველის პოზიციაზე გაამწესა და მისგან შესანიშნავი ფეხბურთელი დადგა. 2004 წლის ზაფხულში ლამმა უკვე პირველ დიდ საერთაშორისო ტურნირზეც იასპარეზა, მაგრამ გერმანიის ნაკრები ევროპის ჩემპიონატზე ჯგუფში ჩარჩა. მიუხედავად ამისა, ლამმა სამივე თამაში უცვლელად ჩაატარა და "ბუნდესნაკრების" ნათელი წერტილი იყო, თანაც ერთ-ერთ ყველაზე ახალგაზრდა.

2005 წელს კი ფილიპი "ბაიერნმა" ტრავმირებული დაიბრუნა. თუმცა მან დაზიანება მოირჩინა და ბიქსენტ ლიზარაზუ ღირსეულად შეცვალა. მაგათმა ლამის რეგულალურად გამოყენება მიუნხენურ გრანდშიც გააგრძელა და "რეკორდმაისტერში" პირველი სეზონის შემდეგ ფილიპმა უკვე მშობლიური მუნდიალი გახსნა ულამაზესი გატანილი გოლით. 2006 წელს მოგებული ბუნდესლიგა და მოგვიანებით მოპოვებული ბრინჯაოს მედალი ფილიპ ლამის პირველი წარმატება იყო და ამის შემდეგ იგი აღარ გაჩერებულა.


ფილიპმა მიუნხენურ გრანდთან ერთად 21 ტიტული მოიგო, მათ შორის 2013 წელს ჩემპიონთა ლიგის ნანატრი თასი, რომელიც "უემბლის" ლეგენდარულ არენაზე აღმართა თავს ზემოთ. ის კლუბის ისტორიაში ტიტულების რაოდენობით მხოლოდ ლეგენდარულ ოლივერ კანს (23) ჩამოუვარდება.

ფილიპ ლამი მთელი 12 წლის განმავლობაში "ბაიერნის" მაისურით უმაღლეს დონეზე ასპარეზობდა. თავიდან იგი მარცხენა მცველი იყო, მაგრამ ვილი სანიოლის ფეხბურთიდან წასვლის შემდეგ საპირისპირო ფრთაზე თამაშს ნელ-ნელა მიეჩვია, ხოლო ლუი ვან გაალმა მარჯვენა ფლანგზე, რომელსაც თავად ლამიც ანიჭებდა უპირატესობას, საბოლოოდ გადაიყვანა. ის ორივე ფრთაზე თანაბდრად ძლიერი მცველი იყო, ხოლო 2014 წელს, გუნდში პეპ გვარდიოლას მოსვლის შემდეგ, ფილიპის ახალი სახეც დავინახეთ - ნამდვილი ინტელექტუალური მოთამაშის, რომელმაც საყრდენი ნახევარმცველის როლი შესანიშნავად მოირგო და დაამტკიცა, რომ მართლაც გენიალური ფეხბურთელია.

"ფილიპ ლამი ყველაზე ინტელექტუალური მოთამაშეა, რომელთან ერთადაც ოდესმე მიმუშავია", - ასე დაახასიათა ფილიპი თანამედროვეობის ერთ-ერთმა უძლიერესმა სპეციალისტმა, გენიალურმა პეპ გვარდიოლამ, რომელიც 4 წელი (2008-2012) ეპოქალურ კატალონიის "ბარსელონას" წვრთნიდა, ხოლო მოედანზე ხავი ერნანდესს, ანდრეს ინიესტასა და ლიონელ მესის ავარჯიშებდა.


ფილიპს კარიერის განმავლობაში რამდენიმე მთავარ მწვრთნელთან მოუწია მუშაობა და ყველასთან შესანიშნავი ურთიერთობა ჰქონდა. ის "ბაიერნის" თითქმის ყველა დამრიგებლის ერთ-ერთი ყველაზე საყვარელი მოთამაშე იყო, რადგან მას ფეხბურთი ესმოდა და მასთან მუშაობა სასიამოვნო, მარტივი იყო. ფილიპმა დესპოტი ფელიქს მაგათი მოხიბლა, შემდეგ ოტმარ ჰიტცფელდთან, იურგენ კლინსმანთან იმუშავა, ამას მოჰყვა საოცრად ქარიზმატული და ექსპერიმენტების მოყვარული გადარეული ლუი ვან გაალი, ნამდვილი მისტერი - იუპ ჰაინკესი, ინოვატორი პეპი და ახლა პაპა კარლო ანჩელოტი. თითოეული მათგანი განსხვავებული ტიპაჟია, მაგრამ ფილიპი ყველას მოერგო და არასოდეს არავისთან არ ჰქონია კონფლიქტი.

"ბიერნი" მსოფლიოში ერთ-ერთ საუკეთესო მცველს დაკარგავს. ლამი მიუნხენურ კლუბს ნამდვილად დააკლდება. ძალიამ მაინტერესებს მას ოდესმე არაზუსტი პასი თუ გაუკეთებია? მე ნამდვილად ვერ ვიხსენებ", - აცხადებს მსოფლიოს ორგზის ჩემპიონი და უბრალოდ ლეგენდარული მარჯვენა მცველი კაფუ. თანამედროვე ფეხბურთის ისტორიაში ლამისნაირი ძლიერი, სტაბილური, ინტელექტუალური, რაც ყველაზე მნიშვნელოვანია და ამავდროულად გუნდისათვის ასეთი მნიშვნელობის მქონე განაპირა მცველის დასახელება არც თუ ისე მარტივია. ორი აზრი არ არსებობს, რომ ის ერთ-ერთი საუკეთესოა და ამავდროულად, გამორჩეული, რადგან მთელი თავისი კარიერის განმავლობაში არცერთი წითელი ბარათი არ მიუღია, არცერთი წითელი ბარათი! ეს უნიკალური მაჩვენებელია და მის დისციპლინაზე მეტყველებს, რაც სპორტსმენისთვის ძალიან ღირსეული თვისებაა.


"ბაიერნი" არამხოლოდ დიდებულ და უძლიერესი განაპირა მცველს, მოაზროვნეს, არამედ დიდ კაპიტანსაც კარგავს. შესაძლოა ბევრისთვის ფილიპი ნაკლებად ქარიზმატული და აგრესიული პერსონა იყო, მაგრამ ის სულიერად იყო გამარჯვებული! სულიერად იყო დიადი! მაშინ, როდესაც საშინაო ფინალში ლონდონის "ჩელსიმ" ზეიმი პირველად გააფუჭა და ბოლო წუთებზე საპასუხო ბურთი გაიტანა, ის კარის ბადიდან სწორედ კაპიტანმა წამოიღო და ცენტრისკენ მიმავალ გზაზე გახარებულ მეტოქეებს შორის ისე გაძვრა, რომ მუხლიც არ აკანკალებია. ხოლო მაშინ, როდესაც ყველაფერი დასრულდა და "ალიანს არენა" გაუსაძლისმა სიცარიელემ მოიცვა, მხოლოდ ერთი ადამიანი იდგა და ეს ფილი ლამი იყო! ამბობენ, ფეხბურთი მეტია, ვიდრე სპორტი, ეს ცხოვრებაოო და ისე, როგორც ცხოვრებაში, მოედანზეც ბევრჯერ დაეცემი, უდიდესი დარტყმების მიღება მოგიწევს, მაგრამ მთავარია თავი არ დახარო და ყოველი დაცემის შემდეგ ფეხზე წამოდგე, წელში გაიმართო, მიზანი თავიდან დაისახო და მისკენ გაეშურო. სწორედ ასე მოიქცა ლამი, რომელსაც მოგვიანებით მთელი გუნდი, კლუბი აჰყვა და ერთ წელიწადში "ბაიერნმა" ისტორიული ტრებლი მოიგო.

"ფილიპ ლამი გერმანიის ბუნდესლიგის ისტორიაში ერთ-ერთი უდიდესი ფეხბურთელია", - ასე გამოეხმაურა ლეგენდარული იუპ ჰაინკესი ფილიპის კარიერის დასრულების ინფორმაციას. ლამმა 2012/13 წლების სეზონი ძალიან მაღალ დონეზე ჩაატარა, ბუნდესლიგაში 11 საგოლე პასის გაკეთება მოახერხა, რაც მისი პერსონალური რეკორდია და თავის პოზიციაზე იმ პერიოდში უდავოდ საუკეთესო იყო. კიდევ ერთი წელიწადიც და ფილიპმა რიო დე ჟანეიროში უკვე მსოფლიო თასის ტიტულიც მოიგო.


ეს მისი ყველაზე დიდი საერთაშორისო მიღწევა იყო, რომლის შემდეგაც სანაკრებო კარიერა დაასრულა. 2017 წლის თებერვალში კი განაცხადა, რომ ის საკლუბო კარიერასაც ასრულებს და "ბაიერნის", გერმანული ფეხბურთის, ზოგადად ფეხბურთის გულშემატკივარს ძალიან დაწყვიტა გული.

ბევრს ეცინება, როდესაც "რეკორდმაისტერის" ქომაგები ფილიპ ლამის სტაბილურობით ვამაყობთ, მაგრამ ეს სულაც არ არის სასაცილო. დიახ მეგობრებო, ფილიპ ლამი სწორედ იმიტომ არის გამორჩეული, რომ მთელი 10-12 წელიწადი სტაბილურად უმაღლეს დონეზე ჩაატარა, მთელი ამ პერიოდის განმავლობაში ერთ-ერთი საუკეთესო იყო და არცერთი თამაში არ ჩაუგდია! შეცდომები იყო, ეს არც არის დასამალი ან სათაკილო, რადგან უშეცდომო არავინაა! ევრო 2008-ს ფინალში ფერნანდო ტორესის გოლი ყველას კარგად გვახსოვს, მაგრამ ეს ერთი შეცდომა ბევრს არაფერს ნიშნავს.

ლამი 33 წლის ასაკშიც კი უნაკლოდ გამოიყურებოდა და მადრიდის "რეალთან" ორივე შეხვედრაში ფლანგზე შესანიშნავად მოქმედებდა. ის უეფას წლის სიმბოლურ გუნდში 5-ჯერ (2006, 2008, 2012, 2013, 2014) მოხვდა, რაც განაპირა მცველებს შორის საუკეთესო შედეგია. გარდა ამისა, ლამი ყველა იმ დიდი საერთაშორისო ტურნირის (ევრო 2004, მსოფლიო ჩემპიონატი 2006, ევრო 2008, მსოფლიო ჩემპიონატი 2010, ევრო 2012, მსოფლიო ჩემპიონატი 2014) სიმბოლურში მოხვდა, რომელზეც მონაწილეობა მიიღო, რაც ასევე უნიკალური შედეგია. ის მართლაც მისტერ სტაბილურობაა, შესანიშნავი ინტელექტით, პასით, სამაგალითო ვარდნებითა და თავისი საფირმო ბრუნით (ლამს მარჯვენა ფლანგზე გადასვლის შემდეგ მეტოქეების ერთ სტილში მოტყუება უყვარდა და ეს ხშირად გამოსდიოდა ხოლმე).


"ის ყველაზე პროფესიონალი ფეხბურთელია, რომელთან ერთადაც მიმუშავია", - ეს კი თვით კარლო ანჩელოტის სიტყვებია, რომელიც წლების განმავლობაში პაოლო მალდინის ავარჯიშებდა. რა თქმა უნდა, მალდინის საფეხბურთო სამყაროში საკუთარი თამასა აქვს დამყარებული, რომელსაც გენიალური ლამიც ვერ შესწვდება, მაგრამ მისი პროფესიონალიზმი, შრომისმოყვარეობა მართლაც უდიდეს პატივისცემას იმსახურებს. სწორედ ამიტომ ფილიპი იმ იშვიათ კატეგორია მოთამაშეებს მიეკუთვნება, რომელიც ყველას უყვარს. ალბათ რთულია მოძებნო ფეხბურთის გულშემატკივარი, რომელიც ლამზე რაიმე ცუდს იტყვის. ეს კი პირველ რიგში მისი საოცარი პროფესიონალიზმისა და დისციპლინის დამსახურებაა, რადგან ვერავინ გაიხსენებს მის უხეშ ან უღირს ქმედებას მოედანზე.

ფილიპ ლამის სრულფასოვნად შესაფასებლად სიტყვები უბრალოდ არ კმარა, რადგან ის მიუნხენის "ბაიერნისთვის" უფრო მეტია, ვიდრე დიდი მცველი, ვიდრე დიდი კაპიტანი, ის უბრალოდ ფენომენია. მიუნხენურ კლუბს ასეთი სრულყოფილი მოთამაშე თანამედროვე ისტორიაში მართლაც არ ჰყოლია. ლამის მთავარი ღირსება საფეხბურთო ინტელექტი და თავისუფალი აზროვნებაა. მას არ ეშინია თვით ული ჰიონესის გაკრიტიკებაც კი და სწორედ ამიტომ არის გამორჩეული.

სიმართლე გითხრათ, ბოლო წლებში ძალიან მეშინოდა მომენტის, რომელიც ხვალ დადგება და როდესაც ფილიპ ლამი თავისი მშობლიური კლუბის წითელ მაისურს უკანასკნელად მოირგებს. ვფიქრობ, სტადიონზე შეკრებილ ბევრს გულშემატკივარს თვალზე აუცილებლად მოადგება ცრემლი, რადგან "ბაიერნის" ისტორიაში ერთი დიდი ეპოქა დასრულდება. ლამი "რეკორდმაისტერისათვის" მართლაც ეპოქალური მოთამაშეა და სწორედ ამიტომაც შევა კლუბის Hall of Fame-ში.


"ლამი ყველაზე თანმიმდევრული მოთამაშეა მსოფლიო ფეხბურთში." დაიმსახურო ასეთი სიტყვები ლიონელ მესისგან, ეს იმას ნიშნავს, რომ შენი კარიერა შედგა. ახლა კი ფილიპ ლამი მიდის, მაგრამ მისი სახელი კლუბის ისტორიაში ოქროს ასოებით დარჩება, ხოლო "ბაიერნის" თითოეული ქომაგის გულში დაიკავებს სამუდამო ადგილს. მადლობა თითოეული იმ წუთისათვის, რომელიც მთელი ამ 12 წლის განმავლობაში გვაჩუქე ფილიპ! იმედია, მომავალში დაბრუნდები, თუმცა ახლა დამშვიდობების დროა კაპიტანო...


დავით მაღრაძე, სპეციალურად BAYERN.GE-სთვის
скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
ფილიპ ლამი ბლოგი
მსგავსი სიახლეები
კომენტარები
Guest mia san mia
Guest mia san mia | 20 მაი 2017 07:33
Admin yvela infoze vdeb am komentars,momwere tu apirebt chatebis gaketebas damijeret magari iqneba,aba ise male debt axal-axal infoebs azri ara aqvs komentaris dadebas,chatebshi ki ufro mivitant da gavuziarebt ertmanets azrebs gundis awmyosa tu momavalze,tanac saitic gamococxldeba es me momandet da txovna maqvs tqveni vip wevri minda gavxde ra da rogor aris sachiro?gmadlobt 88bb5d07 fcbflagge2 germanyy fcbayern
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა