...

პრევიუ: ბაიერნი - პსვ

გუშინ საკმაოდ ხანგრძლივი პაუზის შემდეგ ევროპის ყველაზე პრესტიჟული ტურნირი განახლდა და დღეს ჩემპიონთა ლიგის მიუნხენის "ბაიერნიც" დაუბრუნდება. კარლო ანჩელოტის გუნდი შინ "პსვ ეინდჰოვენს" მიიღებს და ეცდება, რომ წარუმატებელი სერია შეწყვიტოს.

ბაიერნი - პსვ

ჩემპიონატი: ჩემპიონთა ლიგის ჯგუფური ეტაპი, III ტური
თარიღი: 22:45 საათი, 19 ოქტომბერი
სტადიონი: "მიუნხენ არენა", მიუნხენი
მთავარი მსაჯი: უილიამ კოლუმი (შოტლანდია)
პირდაპირი ტრანსლიაცია: Silk სპორტ HD3

გუნდების წინასამატჩო მდგომარეობა
მიუნხენის "ბაიერნი" სანაკრებო პაუზიდანაც არეული დაბრუნდა და ზედიზედ მესამე თამაში ვერ მოიგო. მიუნხენელებმა ქულები ამჯერად ფრანკფურტში, "აინტრახტის" წინააღმდეგ დაკარგეს, თანაც ორჯერ იგებდნენ. თუმცა, სიტუაციის გაბუქება არ ღირს, რადგან ეს მხოლოდ მცირე მონაკვეთია, რომელიც შესაძლოა წარუმატებელი იყოს, მაგრამ არა კატასტროფული. დღეს კი კარლო ანჩელოტის გუნდს უკვე საკმაოდ მნიშვნელოვანი თამაში ელის, რადგან "რეკორდმაისტერი" ჯგუფში პირველ ადგილს "ატლეტიკოს" ეცილება, რომელსაც უკვე სამი ქულით ჩამორჩება. შესაბამისად, როგორც იტალიელმა სპეციალისტმა აღნიშნა, ეს განსაკუთრებული მატჩია და მიუნხენელებს სამი ქულის დაკარგვის უფლება უბრალოდ არ აქვთ. აგრძელებს ბრწყინვალე თამაშის ჩვენებას ჯოშუა კიმიხი, გასულ უქმეებზე კი რენატო სანჩეშმა და კინგსლი კომანმაც კარგად იასპარეზეს. გარდა ამისა, ანჩელოტიმ როგორც იქნა გამოიყენა ბოატენგისა და ჰუმელსის თანდემი, რომელიც წესით არ შეიცვლება. ყველაზე კარგი ამბები კი ლაზარეთიდანაა. ამ ეტაპზე "ბაიერნს" მხოლოდ ერთი რეალური დანაკლისი აქვს - ფრენკ რიბერი. ფრანგს კუნთის პრობლემები აქვს და კიდევ რამდენიმე კვირას გამოტოვებს. დუგლას კოშტა და ხავი მარტინესი, რომელთაც ბოლო კვირეები გაუცდათ, გუნდს ამ კვირას დაუბრუნდნენ, ხოლო წინა შეხვედრაში გადაღლილობისგან დასვენებული ხუან ბერნატი, არტურო ვიდალი და რობერტ ლევანდოვსკი უკვე მზად არიან. ასე, რომ ანჩელოტის საკმაოდ დიდი არჩევანი აქვს და ვნახოთ რა გადაწყვეტილებას მიიღებს. წესით მოვიდა დრო, რომ კიმიხიმა "ბაიერნის" ძირითად შემადგენლობაში დაიმკვიდროს ადგილი და ასაკოვანი ხაბი ალონსო სათადარიგო სკამზე გადასვას.

"პსვ ეინდჰოვენი" მიმდინარე სეზონში ვეღარ არის ისეთივე შთამბეჭდავი და სტაბილური, როგორც გასულ კამპანიაში და "ბაიერნის" მსგავსად, ახლა მცირე ჩავარდნა აქვს. ჩემპიონთა ლიგის მეორე ტურში ჰოლანდიელებმა ურთულესი ბრძოლა გადაიტანეს რუსეთში, ორჯერ აგებდნენ, მაგრამ "როსტოვს" ქულა მაინც წაართვეს. შემდეგ კი ჰოლანდიის ეროვნულ ჩემპიონატში ზედიზედ ორჯერ ითამაშეს ფრედ და ლიდერ "ფეინოორდს" უკვე ცხრა ქულით ჩამორჩებიან. ფილიპ კოკუს გუნდი ერედივიზიონში მეოთხე პოზიციაზე, ამიტომ მათ შიდა ჩემპიონატის საქმეები აქვთ მოსაგვარებელი, მაგრამ დღეს აუცილებლად გაიბრძოლებენ. გასულ უქმეებზე, "ჰერაკლესის" წინააღმდეგ, კოკუმ ორი წამყვანი მოთამაშე: ანდრეას გაურდადო და ნარსინი მაინც დაასვენა. დღეს კი ეინდჰოვენელები, სავარაუდოდ, ხუთმცველიანი ტაქტიკით ითამაშებენ ისევე, როგორც პირველ ტურში მადრიდის "ატლეტიკოს" წინააღმდეგ. ჰოლანდიური კლუბის შემადგენლობაში რამდენიმე ძალიან ტექნიკური და სახიფათო მოთამაშეა: ნარსინი, სიმ დე იონგი, მარცხენა მცველი ჟეტრო ვილემსი. გარდა ამისა, გუნდს ძლიერი თავდამსხმელი, ლუკ დე იონგი და ჭკვიანი ცენტრის ლიდერი - ანდრეას გაურდადო ჰყავს. ფილიპ კოკუს მართლაც მებრძოლი და კარგი კოლექტივი ჰყავს, რომელსაც მხოლოდ ლოკადია და ჰენდრიქსი ვერ ეხმარებიან. ეს კი სერიოზული დანაკლისი არ არის.

მიუნხენში ფავორიტი "ბაიერნია" და კარლო ანჩელოტის გუნდს მხოლოდ მოგება აწყობს. წინააღმდეგ შემთხვევაში, პირველი ადგილისთვის ბრძოლა წარმოუდგენელი იქნება.

სავარაუდო შემადგენლობები
ბაიერნი: ნოიერი - ლამი, ბოატენგი, ჰუმელსი, ალაბა - ტიაგო, კიმიხი, ვიდალი - რობენი, ლევანდოვსკი, მიულერი.

პსვ: ზოი - ბრენეტი, შვააბი, ისიმატ-მირინი, ექტორ მორენო, ვილემსი; გუარდადო, პრიოპერი, სიმ დე იონგი; ნარსინი, ლუკ დე იონგი.

საინტერესო ფაქტები
  • მიუნხენის "ბაიერნი" და "პსვ" ერთმანეთს პირველად არ უპირისპირდებიან. უპირატესობა, რა თქმა უნდა, "რეკორდმაისტერს" აქვს: ოთხი მოგება, ერთი ფრე და ერთი მარცხი.

  • ამ გუნდების ბოლო დაპირისპირება 1999/00 წლების სეზონში, ჩემპიონთა ლიგის პირველ ჯგუფურ ეტაპზე გაიმართა. ეინდჰოვენში "პსვ-მ" ლუკ ნილსისა და რუდ ვან ნილსტელროის გოლებით 2:1 მოიგო. ის შეხვედრა მიუნხენელებმა ათი კაცით დაასრულეს, მოედნიდან იენს იერემისი გააძევეს.

  • მიუნხენში კი ოტმარ ჰიტცფელდის გუნდმა პაულო სერჟიოს დუბლით იგივე ანგარიშით იმარჯვა და აღსანიშნავია, რომ ის შეხვედრა ათი კაცით უკვე ჰოლანდიელებმა დაასრულეს. წითელი ბარათი მარკ ვან ბომელმა მიიღო. საბოლოოდ, "ბაიერნმა" ჯგუფი მოიგო, "პსვ" კი ბოლოზე გავიდა.

  • 1989/90 წლების ჩემპიონთა თასის მეოთხედფინალში კი "ბაიერნმა" ორივე თამაში მოიგო: შინ 2:1 და სტუმრად 1:0.

  • "პსვ-სა" და "ბაიერნის" გზები პირველად 1986/87 წლების კამპანიაში, ჩემპიონთა თასის პირველ წრეში გადაიკვეთა. მიუნხენში მატჩი უგოლოდ დასრულდა, ეინდჰოვენში კი გერმანელებმა 2:0 იმარჯვეს.

  • პირველ ტურში კარლო ანჩელოტის გუნდმა "როსტოვი" შინ 5:0 გაანადგურა და "ბაიერნმა" ჩემპიონთა ლიგის ახალი რეკორდი დაამყარა - ზედიზედ ცამეტი საშინაო გამარჯვება.

  • მიუნხენურ გრანდს ჰოლანდიური კლუბების მასპინძლობა იდეალურად გამოსდის და არასოდეს წაუგია (7მ, 2ფ).

  • "პსვ-ს" კი გერმანული კლუბების წინააღმდეგ ჩატარებული 18 თამაშიდან ერთადერთი აქვს მოგებული (4ფ, 13წ). ეს 1977 წელს, უეფას თასის მესამე წრეში, ბრაუნშვაიგის "აინტრახტის" წინააღმდეგ მოხდა - 2:1.

  • ჩემპიონთა ლიგის გასულ სეზონში ფილიპ კოკუს გუნდმა ვერცერთი გასვლითი მატჩი ვერ მოიგო (2ფ, 2წ), მათ შორის "ვოლფსბურგის" წინააღმდეგ ჯგუფურ ეტაპზე - 0:2.

  • ეინდჰოვენელებმა ბოლო გასვლითი გამარჯვება ჩემპიონთა ლიგაზე 2007/08 წლების სეზონსი, მოსკოვის "ცსკა-ს" წინააღმდეგ მოიპოვეს - 1:0.

  • ფილიპ კოკუ "ბაიერნსა" და კარლო ანჩელოტის პირველად არ უპირისპირდება. ჰოლანდიელი კატალონიის "ბარსელონაში" თამაშის დროს, ჯგუფურ ეტაპზე, მიუნხენურ გრანდს ორჯერ შეხვდა და ზედიზედ ორი მარცხი განიცადა (0:1 სტუმრად და 1:2 შინ).

  • "პსვ ეინდჰოვენის" კაპიტნის რანგში კი კოკუმ კარლო ანჩელოტის "მილანთან" საოცარი ბრძოლები გამართა. ეს 2004/05 წლების ჩემპიონთა ლიგის ნახევარფინალში მოხდა. "მილანმა" შინ 2:0 იმარჯვა, "პსვ-მ" კი საპასუხო მატჩი კოკუს დუბლით 3:1 მოიგო, მაგრამ ფინალში იტალიელები გაუშვა.

  • მომდევნო სეზონში კი ეს გუნდები ერთმანეთს ჯგუფურ ეტაპზე გადაეყარნენ. "სან სიროზე" ანჩელოტის გუნდი უგოლო ფრეს დასჯერდა, ჰოლანდიაში კი 0:1 დამარცხდა.

  • არიენ რობენი "პსვ ეინდჰოვენის" აღზრდილია და ამ კლუბში სამი შესანიშნავი წელიწადი (2001-04) ჩაატარა. 56 თამაშში 17 გოლის გატანა მოახერხა.

  • არიენი ფილიპ კოკუსთან ერთადაც თამაშობდა და 2010 წელს, როდესაც ჰოლანდიის ნაკრებმა მსოფლიო ჩემპიონატზე ვერცხლის მედლები მოიპოვა, კოკუ "ნარინჯისფრების" სამწვრთნელო შტაბში შედიოდა.

  • ჯოშუა კიმიხი შეუჩერებელია - მან "ბაიერნის" მაისურით ჩატარებულ ბოლო შვიდ შეხვედრაში ექვსი გოლი გაიტანა.

მწვრთნელების წინასამატჩო კომენტარები
კარლო ანჩელოტი: ​​​​"უკვე აღვნიშნე, რომ ამ სეზონში რამდენიმე განსაკუთრებული თამაში იქნება, რომლებისთვისაც საუკეთესოდ უნდა მოვემზადოთ და განვეწყოთ. ხვალ სწორედ ასეთი შემთხვევა იქნება.

ვფიქრობ, რომ მოთამაშეებს ყველაფერი კარგად ესმით. ფრანკფურტში გამართული მატჩის შემდეგ ერთმანეთს ვესაუბრეთ და პრობლემების გადაჭრის გზებიც განვიხილეთ.

ფეხბურთელები ძალიან ინტელექტუალურები და პროფესიონალები არიან. ვფიქრობ, მათ კარგად ესმით, რომ წინა თამაშში კარგი განწყობა არ გვქონდა. მნიშვნელოვანია სიმშვიდის შენარჩუნება და განსხვავებული თამაშის ჩვენება"

ფილიპ კოკუ: ​"სულმოუთმენლად ველით ასეთ ძლიერ მეტოქესთან შეხვედრას. ჩვენ სრულიად კონცენტრირებულნი ვართ და მინდორზე თავდაჯერებულები გავალთ.

რა თქმა უნდა, სახლში კარგი შედეგის წაღების შანსი გვაქვს.

ჩვენი მცველებისთვის არიენ რობენის შეჩერება მარტივი არ იქნება. თუმცა, ჩვენ ამჟამინდელი "ბაიერნის" წინააღმდეგ სათამაშოდ ვემზადებოდით და არა მხოლოდ რობენის წინააღმდეგ.

"ბაიერნი" ყველაფერს გააკეთებს იმისათვის, რომ თავისი მოუგებელი სერია შეწყვიტოს. თუმცა, არავინ იცის რით დასრულდება თამაში, თუ სერიოზულ ბრძოლას გავაჩაღებთ"​​​

მოამზადა დავით მაღრაძემ, სპეციალურად Bayern.ge-სთვის
скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
პრევიუ
მსგავსი სიახლეები
კომენტარები
heineken
heineken | 19 ოქტომბერი 2016 15:22
დღეს პსვ დიდი ანგარიშით დამარცხებას ველოდები უბრალოთ ვალდებულია ბავარია მასე გააკეთოს
Hansi
Hansi | 19 ოქტომბერი 2016 15:40
დღეს დიდი ანგარიშით მოგება გაუჭირდებათ. პსვ არ არის მარტივი მეტოქე.
Jano_Bayern
Jano_Bayern | 19 ოქტომბერი 2016 18:43
ვიდალი უნდა იყოს ძირითადში და ხაბი ალონსო არაა ! ვინ აძლევს ხმას ამ გამოკითხვას საკითხავია !!!
namtvralevi
namtvralevi | 19 ოქტომბერი 2016 21:25
ვიგებთ.0:2იანი ჰანდიკაპით მოგება მიწერია.მიულა ლევანა გაიტანენ. ლევანდოვსკი უეჭველი მგონია შეილება დუბლიც გააკეთოს. ხაბი ალონსოს ტრამვა მინდა კიდე :დ
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა