...

ნანატრი დაბრუნება, რომელსაც დიდხანს ველოდით

ცხოვრებაში არის მომენტები, როდესაც სათანადოდ ვერ აფასებ იმას, რაც გაგაჩნია და მხოლოდ მას შემდეგ ხვდები "მის" ფასს, რაც "მას" დაკარგავ. თუმცა შეცდომებისგან დაზღვეული არავინაა, მთავარი შეცდომის დანახვა, მისი აღიარება და სიტუაციის გამოსწორების მცდელობაა. მეორე შანსი კი აუცილებლად მოგეცემა...

...2008 წლის ზაფხულში მიუნხენურმა გრანდმა სწორედ ასეთი შეცდომა დაუშვა, როდესაც საკუთარი აკადემიის ბრილიანტი მატს ჰუმელსი დორტმუნდის "ბორუსიაში" იჯარის წესით გაანათხოვრა და მიუხედავად წარმატებული სეზონისა, ერთ წელიწადში იგი "ბორუსიას" საერთოდ სრულფასოვნად ჩააბარა. გავიდა წლები და იურგენ კლოპმა შექმნა გუნდი, რომელმაც "ბაიერნი" გააწამა და ბუნდესლიგის ტიტული ზედიზედ ორჯერ წაართვა. ამ გუნდის დაცვის ბურჯი კი სწორედ ის ძვირფასი ადამიანი იყო, რომელიც "რეკორდმაისტერმა" უბრალოდ სათანადოდ ვერ დააფასა.

ჰუმელსი 2-3 წელიწადში უმაღლესი კლასის მცველად ჩამოყალიბდა, გერმანიის ეროვნული ნაკრების წევრიც გახდა და დარწმუნებული ვარ, "ბაიერნის" ნებისმიერი გულშემატკივარი ოცნებობდა იმ დღეზე, როდესაც მატსი თავის ფესვებს დაუბრუნდებოდა. თუმცა ამის შესახებ სერიოზულად არასოდეს არავის უსაუბრია, ჰუმელსი "ბორუსიაში" ბედნიერი იყო, შემდეგ კაპიტნის სამკლაურიც მოირგო და დორტმუნდელი ქომაგებისთვის ერთგულების სიმბოლოდ იქცა, მაგრამ ადამიანს წლების მერეც არ ავიწყდება თუ საიდან მოდის.


თუმცა მიუნხენურმა გენებმა თავისი მაინც ქნა და 2016 წლის ზაფხულში, ყველასათვის მოულოდნელად, ოფიციალურად გავრცელდა, რომ მატს ჰუმელსი "ბაიერნში" დაბრუნდა. ეს კლუბის ისტორიაში ერთ-ერთი ყველაზე გამორჩეული ტრანსფერი იყო, რადგან არავინ ელოდა. გარდა საკუთარი მოთამაშის დაბრუნებისა, მიუნხენურმა კლუბმა მსოფლიოში ერთ-ერთი ყველაზე სრულყოფილი და თანამედროვე ცენტრალური მცველი დაიმატა, რაც "ბაიერნის" ქომაგებისათვის უდავოდ უდიდესი ბედნიერება იყო.

მატსმა თავისი ბოლო მატჩი დორტმუნდის "ბორუსიას" მაისურით გერმანიის თასის ფინალში "ბაიერნის" წინააღმდეგ ჩაატარა და მისი გუნდი პენალტების სერიაში დამარცხდა. ხოლო "რეკორდმაისტერში" დაბრუნების შემდეგ პირველი შეხვედრა უკვე "ყვითლების" წინააღმდეგ დორტმუნდში, გერმანიის სუპერთასისთვის მატჩში, ჩაატარა და 2:0 იმარჯვა. იმ შეხვედრაში მატსმა საგოლე პასიც კი გააკეთა და ძალიან დამაჯერებლად იმოქმედა.



გავიდა რამდენიმე დღე და გერმანიის თასის პირველ წრეში, "კარლ-ცეისთან" გასვლით შეხვედრაში, ჰუმელსმა "ბაიერნის" მაისურით თავისი პირველი გოლიც გაიტანა. ის შეხვედრა მიუნხენელებმა 5:0 მოიგეს, მატსმა კი თავით ბრწყინვალე ბურთი შეაგდო და კიდევ ერთხელ დაამტკიცა, რომ მისი დაბრუნება უდავოდ წარმატებული უნდა ყოფილიყო.

დასაწყისი


ახლა კი კიდევ ერთხელ დავუბრუნდეთ პერიოდს, როდესაც "ბაიერნმა" მატსის ტალანტი უბრალოდ ვერ შეამჩნია. ჰუმელსი მიუნხენური გრანდის აკადემიაში 1995 წელს, 7 წლის ასაკში, ჩაირიცხა და მას შემდეგ "რეკორდმაისტერის" სკოლაში იზრდებოდა. 2006/07 წლების სეზონში კი "ბაიერნის" მეორე გუნდის რიგებში მან ბრწყინვალე სეზონი ჩაატარა, 42 შეხვედრაში 5 ბურთი გაიტანა და 2007 წლის მაისში, ბუნდესლიგის ბოლო ტურის შეხვედრაში, შინ "მაინცის" წინააღმდეგ (5:2) პირველ გუნდში სადებიუტო თამაში ჩაატარა. მან მინდორზე დაახლოებით 30 წუთი დაჰყო და ყველაზე საინტერესო კი ის არის, რომ მაშინ "მაინცის" თავკაცი იურგენ კლოპი იყო, რომელმაც მატსი მსოფლიო დონის ვარსკვლავად აქცია.

ეს იყო მისი მიუნხენური კარიერის დასაწყისი, მაგრამ სამწუხაროდ, ჰუმელსის ტალანტი ვერც ოტმარ ჰიტცფელდმა და ვერც იურგენ კლინსმანმა ვერ დაინახეს, ამიტომ მას "ბაიერნთან" განშორება ხანგრძლივი დროით მოუწია.

8 წელი დორტმუნდში



მატს ჰუმელსმა საკუთარი თავი დორტმუნდში იპოვნა, სადაც იურგენ კლოპის წყალობით გუნდის უცვლელი ფიგურა და დაცვის ლიდერი გახდა. 2010/11 და 2011/12 წლებში "ბორუსიამ" ბუნდესლიგის ტიტული ზედიზედ ორჯერ მოიგო, 2012 წელს კი გერმანიის თასიც მოიპოვა და ფინალში "ბაიერნი" 5:2 გაანადგურა. უკვე მომდევნო კამპანიაში ეს არანორმალური გუნდი ჩემპიონთა ლიგის ფინალამდე მივიდა, იქ კი უკვე იუპ ჰაინკესის "სუპერ-ბაიერნმა" მათი სვლა შეაჩერა. გაბრწყინების პერიოდის შემდეგ "ყვითლები" ცოტათი მიწაზე დაეშვნენ, კლოპი კი ლიდერებს წლიდან წლამდე კარგავდა. ერთმანეთს მიყოლებით "ბორუსია" ნური შაჰინმა, შინჯი კაგავამ, მარიო გიოტცემ, რობერტ ლევანდოვსკიმ დატოვეს, მაგრამ მატსი არსად მიდიოდა. იგი საკუთარი გუნდის ერთგული რჩებოდა მიუხედავად იმისა, რომ მისით კატალონიის "ბარსელონა" ინტერესდებოდა.

მაშინაც კი, როდესაც იურგენ კლოპის "ბორუსიას" კრიზისული დროება დაუდგა და გუნდმა ჩემპიონთა ლიგის საგზურიც კი ვერ მოიპოვა, ჰუმელსი მაინც არსად წასულა, რაც კაპიტნის სამკლაურის მორგებით დაუფასდა. სებასტიან კელის ფეხბურთიდან წასვლის შემდეგ "ბორუსიას" კაპიტანი სწორედ მატსი გახდა, რომელიც ევროპაში ერთ-ერთი უძლიერესი ცენტრალური მცველი იყო, მაგრამ "ბაიერნის" ქომაგებს მისი დაბრუნებას იმედი ნამდვილად არ ჰქონდათ. ჰუმელსმა 8 წლის განმავლობაში დორტმუნდელებს სრული ერთგულება გამოუცხადა და ყვითელი მაისურით ყოველთვის მაქსიმუმს აკეთებდა, მაგრამ როგორც ჩანს, საკუთარი თავი "სიგნალ იდუნა პარკზე" მაინც ამოწურა.

"ბორუსიაში" ჩატარებული 225 თამაშისა და 4 მოგებული ტიტულის შემდეგ მან წასვლა გადაწყვიტა.

დაბრუნება


ალბათ ძალიან ცოტა ვინმე თუ წარმოიდგენდა, რომ მატს ჰუმელსს წითელი მაისურით კვლავ ვიხილავდით, მაგრამ 8 წლიანი პაუზის შემდეგ, იგი დაბრუნდა! ჰუმელსის "ბაიერნში" დაბრუნება ნამდვილი სიურპრიზი იყო და ამის "რეკორდმაისტერის" ქომაგებს უკვე აღარც სჯეროდათ, მაგრამ შანსი ყოველთვის არსებობს!

ჰუმელსი "ბაიერნის" ძირითადში თავიდანვე მოხვდა და კარლო ანჩელოტის სრული ნდობა დაიმსახურა. ჟერომ ბოატენგის არყოფნაში დაცვის ცენტრში ხავი მარტინესი და მატსი მოქმედებდნენ, ხოლო დაცვის ლიდერი უდავოდ 28 წლის გერმანელი იყო, რომელსაც წითელი მაისური ძალიან მოუხდა, ხოლო მიუნხენელი გულშემატკივრი დიდებულად დახვდა.

2016/17 წლების სეზონში მატსმა საერთო ჯამში 42 თამაში ჩაატარა, 3 გოლის გატანა მოახერხა და 3 საგოლე გადაცემა გააკეთა. მადრიდის "რეალთან" პირველი თამაშის წინა დღეებში მიღებულ დაზიანებამდე ის გუნდის უცვლელი ფიგურა და ერთ-ერთი ლიდერი იყო. სეზონის დაწყებიდან გაზაფხულამდე მატსი "ბაიერნის" შემადგენლობაში ერთ-ერთი საუკეთესო იყო ტიაგო ალკანტარასთან, არიენ რობენთან და რობერტ ლევანდოვსკისთან ერთად, რომლებიც ასევე დიდებულად თამაშობდნენ. მისი დაბრუნება საკმაოდ ხანგრძლივი პაუზის შემდეგ ნამდვილად შედგა!

ნამდვილი ბოსი


მატს ჰუმელსი "ბაიერნის" დაცვის ლიდერად იქცა, რასაც არამხოლოდ მისი სათამაშო შესაძლებლობები და ხასიათი, არამედ მისი სათამაშო სტილი განაპირობებს. მატსი მსოფლიოში ყველაზე სწრაფი მცველი ნამდვილად არ არის, მაგრამ საოცრად დახვეწილია და ძალიან ელეგანტურად მოქმედებს. ჰუმელსი ბურთს იდეალურად გრძნობს, რასაც თამაშის წაკითხვის ბრწყინვალე უნარი ემატება და ძალიან ხშირად ჰუმელსი მეტოქეს რთულ სიტუაციებში ბურთს ისე მარტივად ართმევს, რომ ნამდვილი ბოსი ხდება, რომელიც ყველაფერს ჩინებულად ხედავს, აფასებს, ხოლო შედეგს მარტივი, დამაჯერებელი მოძრაობით იღებს. ერთი შეხედვით ჰუმელსი რისკზე მიდის, მაგრამ რეალურად ის მთავარ აქცენტს ბურთზე აკეთებს, ამიტომ ყოველთვის ზუსტად იცის თუ როდის არის საჭირო აჩქარება და როდის უბრალოდ ფეხის მოხდენილი მოძრაობა. აქედან გამომდინარე, მისი მოტყუება უაღრესად რთულია, რასაც ის გარემოებაც ართულებს, რომ ჰუმელსი ძალიან სრულყოფილი მცველია. ის საჰაერო ორთაბრძოლებშიც ძალიან ძლიერია, ამიტომ საჯარიმოში მატსის დაჯაბვნა ასევე ურთულესი საქმეა.

"ბაიერნის" მე-5 ნომრის მთავარი პლიუსი სწორედ თავდაჯერებულობაა. ზოგჯერ მისი მოქმედებები ისეთი ელეგანტურია, რომ უბრალოდ აღფრთოვანებას იწვევს. ასე მხოლოდ ბოსები მოქმედებენ - მშვიდად, დინჯად, ყოველგვარი აღელვების გარეშე და რაც მთავარია - ზუსტად!

თავდადება


მომენტი, როდესაც ჰუმელსი ფრანკფურტის "აინტრახტის" შემტევ ჰრგოტას დაეწია და მას ბურთი ცარიელ კართან ააცალა არაფერია იმასთან შედარებით, რაც მატსმა მადრიდში, ჩემპიონთა ლიგის საპასუხო მეოთხედფინალურ მატჩში გააკეთა. თამაშამდე რამდენიმე დღით ადრე იგი უბრალოდ ვერ დადიოდა! გადასაადგილებლად მატსი ყავარჯნებს იყენებდა და არავის ჰქონდა იმის ილუზია, რომ იგი "სანტიაგო ბერნაბეუზე" ითამაშებდა. თუმცა შეხვედრის დაწყებამდე 1 საათით ადრე ცნობილი გახდა, რომ "რეკორდმაისტერის" დაცვის ცენტრში ბოატენგისა და ჰუმელსის თანდემი იმოქმედებდა, რაც სრული შოკი იყო, მაგრამ სასიამოვნო.

მიუხედავად მძიმე დაზიანებისა, მატსმა ფენომენალური მატჩი ჩაატარა და "ბაიერნისათვის" გმირულად იბრძოდა. რა თქმა უნდა, იყო ხარვეზები, მაგრამ ეს საერთოდ არ აყენებს ჩრდილს მის დიდებულ თამაშს. ჰუმელსმა "სამეფო კლუბის" წინააღმდეგ სამი-ოთხი ფანტასტიკური ვარდნა განახორციელა, როდესაც გუნდი რეალური საფრთხისგან დაიცვა. ერთ-ერთი ასეთი ეპიზოდი კი პირველ ტაიმში შეიქმნა, როდესაც მარსელოს პასით ტონი კროოსი საჯარიმოში იდეალურ პოზიციაზე აღმოჩნდა, მაგრამ მატსმა ყველაფერი წამებში გაიაზრა, კარიმ ბენზემა მიატოვა და ტონის ჩაუხტა, რითიც "ბაიერნი" საგოლე დარტყმისგან გადაარჩინა. მეორე ნახევარში მან იგივე რამ დანი კარვახალისა და კრიშტიანუ რონალდუს წინააღმდეგაც გააკეთა. ჰუმელსი მადრიდში ნამდვილი გმირივით მოქმედებდა.


პირველი დამატებით დროის შემდეგ კი გამოჩნდა კადრი, რომელიც დარწმუნებული ვარ, "ბაიერნის" არცერთ ქომაგს არ დაავიწყდება. ჰუმელსი მოედანზე წაშლილი სახით იწვა, მას სახეზე ეწერა, რომ საშინლად დაღლილი იყო, არანორმალურ ტკივილს გრძნობდა, მაგრამ მთელი 90 წუთი გმირულად იბრძოდა, არანაირი პრობლემები არ ახსოვდა და წითელი მაისურით "რეალის" წინააღმდეგ დიდებული თამაში ჩაატარა. მოგვიანებით კი თავადაც აღიარა, რომ მადრიდული გრანდის წინააღმდეგ არ უნდა ეთამაშა. "რა თქმა უნდა, მადრიდის "რეალთან" მატჩში მონაწილეობა არ უნდა მიმეღო, რადგან შესაფერის კონდინციებში ნამდვილად არ ვიმყოფებოდი. თუმცა მწვრთნელმა მკითხა შევძლებდი თუ არა გუნდის გვერდით ყოფნას. ეს შეკითხვა რთულმა მდგომარეობამ განაპირობა. თავს კარგად არ ვგრძნობდი, მაგრამ ნეგატიური პასუხის გაცემა უბრალოდ არ შემეძლო."... მემგონი მხოლოდ ამ სიტყვების გამო ღირდა 8 წელი ლოდინი...

მატს ჰუმელსმა ამ ერთ წელიწადში ყველას დაუმტკიცა, რომ ევროპაში ერთ-ერთი უძლიერესი ცენტრალური მცველია, "ბაიერნის" დაცვის ლიდერი გახდა, ქომაგებს კი საკუთარი ღირსეული საქციელითა და გმირული თამაშით თავი ორმაგად შეაყვარა. ეს მან მხოლოდ სადებიუტო სეზონში მოახერხა, მაგრამ ეს მხოლოდ დასაწყისია. ჰუმელსი და "ბაიერნი" ერთად კიდევ ბევრს გამოივლიან.

სიამაყით უნდა აღვნიშნო, რომ მიუნხენურ გრანდს თანამედროვე ისტორიაში ასეთი სრულყოფილი და ამავდროულად საიმედო ცენტრალური მცველი უბრალოდ არ ჰყოლია. ასე, რომ არასოდეს არაფერია დაკარგული - "ბაიერნმა" შესაძლოა 8 წელი ითმინა, მაგრამ თავისი შეცდომა მაინც გამოასწორა და საკუთარი ხელით გაშვებული ძვირფასეულობა, თავადვე უკან დაიბრუნა. გენიალური ალექსანდრ დიუმას ხედვითაც ხომ საკაცობრიო სიბრძნე ორი სიტყვით გამოიხატება: "ელოდე და მოთმინება იქონიე!"скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
მატს ჰუმელსი ბლოგი
მსგავსი სიახლეები
კომენტარები
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა