...

როგორი იქნება ბაიერნი მომდევნო სეზონში?

ზაფხულის პირველი თვე უკვე მიიწურა, მაგრამ უნდა ვაღიაროთ, რომ ივნისი შედარებით გრილი გამოდგა. თუმცა წინ ივლისი და აგვისტოა, შესაბამისად ზაფხულის ცხელი დღეები მხოლოდ ახლა იწყება. ზუსტად ასეთი მდგომარეობაა საფეხბურთო სამყაროშიც, რადგან აქტიური საკლუბო ფეხბურთი ისვენებს, სამაგიეროდ გაჩაღებულია სატრანსფერო ციებ-ცხელება, რომლის დროსაც კლუბები შემადგენლობის გაძლიერებისათვის ბევრს მუშაობენ და მაქსიმალურად იხარჯებიან.

ბუნებრივია, მსოფლიოში ერთ-ერთი უძლიერესი კლუბი მიუნხენის "ბაიერნი", რომელმაც უკანასკნელ 7 წელიწადში უმაღლეს მწვერვალებს მიაღწია, მუდამ სატრანსფერო ფანჯრის ყურადღების ცენტრშია, უბრალოდ ეს ზაფხული განსაკუთრებულად მნიშვნელოვანია. საქმე იმაშია, რომ ორმა ლეგენდარულმა მოთამაშემ: ხაბი ალონსომ და უბრალოდ გენიალურმა ფილიპ ლამმა კარიერა დაასრულეს, ფრანკ რიბერი უკვე 34 წლის არის და ფიზიკურად ვეღარ არის ისეთი მძლავრი, როგორიც წლების წინ, რაც იმას ნიშნავს, რომ მიუნხენურ კლუბში რევოლუციის დრო დადგა, რომელსაც საფეხბურთო ენაზე - თაობათა ცვლა ჰქვია.

სწორედ ამიტომ "ბაიერნმა" ამ ზაფხულს უკვე 4 მოთამაშის დამატება მოასწრო, საიდანაც 3 ძალიან ახალგაზრდაა და მათი ტრანსფერი შორეულ პერსპექტივებზეა გათვლილი. ახალი სეზონიდან "რეკორდმაისტერის" წითელ-თეთრ მაისურს 21 წლის ცენტრალური მცველი ნიკოლას ზიულე, 22 წლის საყრდენი ნახევარმცველი კორენტინ ტოლისო, 21 წლის შემტევი ნახევარმცველი სერჟ გნაბრი და 27 წლის ცენტრალური ნახევარმცველი სებასტიან რუდი დაიცავენ.


მიუხედავად აქტიური დასაწყისისა ეს დასასრული ნამდვილად არ არის და "ბაიერნი" მუშაობას აგრძელებს. მთავარი მიზანი კი ერთი სუპერ-ტრანსფერის განხორციელებაა. ალექსის სანჩესი "რეკორდმაისტერის" მთავარი სამიზნე იყო, მაგრამ ჩილელი რატომღაც უარზეა, ამიტომ ახალი ალტერნატივები გამოჩნდა: იანიკ ფერეირა-კარასკო და უსმან დემბელე. ყველაზე უფრო ხშირად 23 წლის ბელგიელი შემტევის შესახებ ვრცელდება, რომელიც მადრიდის "ატლეტიკოში" ბოლომდე ბედნიერი ვერ არის და მისი სათამაშო სტილი გაცილებით ახლოსაა უფრო ტექნიკურ, ბურთის ფლობაზე ორიენტირებულ და შემტევ ფილოსოფიასთან, ვიდრე "როხიბლანკოს" მებრძოლ ფეხბურთთან. ასე, რომ კარასკოს ტრანსფერი გერმანულ გრანდში საკმაოდ რეალურია და ეს მართლაც სერიოზული დანამატი იქნება, რადგან იანიკი საოცრად ტექნიკური, დახვეწილი და მრავალფეროვანი მოთამაშეა, რომელსაც არც სითამამე აკლია და არც თავდაჯერებულობა.

რაც შეეხება რობერტ ლევანდოვსკის შემცვლელის საკითხს, ჯერჯერობით გერმანულ პრესაში მხოლოდ ერთმა ვარიანტმა გაიჟღერა სერიოზულად - "ჰოფენჰიამის" შემტევი ანდრეი კრამარიჩის. ხორვატი სათადარიგო სკამისათვის მართლაც შესანიშნავი შევსება იქნებოდა, მაგრამ "ბაიერნი" ჯერ ამ მიმართულებით არ მუშაობს და არ არის გამორიცხული, რომ კარლო ანჩელოტი მომდევნო სეზონშიც მხოლოდ 28 წლის პოლონელის იმედზე იყოს.

ამ ყველაფრის გათვალისწინებით გთავაზობთ ბლოგს მომავლის "ბაიერნის" შესახებ, რომელიც ახალი სეზონიდან კიდევ ერთხელ შეეცდება სანუკვარი ოცნების ახდენას - ჩემპიონთა ლიგის თასის კიდევ ერთხელ მოპოვებას. მომდევნო კამპანიაში "რეკორდმაისტერის" შემადგენლობა უკვე განახლებული იქნება და საინტერესოა ანჩელოტი რა ვარიანტს შეარჩევს, მანამდე კი ჩვენ რამდენიმე საინტერესო ალტერნატივას განვიხილავთ.

ვარიანტი 1: 4-2-3-1 ტაქტიკა


ასეთი ფორმაციის "ბაიერნის" ხილვა ყველაზე მეტად არის მოსალოდნელი და მომდევნო სეზონისათვის სწორედ ეს თერმეტეული შეიძლება მოვიხსენიოთ, როგორც ყველაზე ოპტიმალური.

თადვაპირველად უნდა აღვნიშნოთ, რომ "ბაიერნის" ლეგენდარულ კაპიტანსა და მარჯვენა მცველს, ფილიპ ლამს, რომელიც 12 წლის განმავლობაში "რეკორდმაისტერის" ღირსებას დიდებულად იცავდა, 22 წლის იოზუა კიმიხი შეცვლის. კიმიხს კარლო ანჩელოტი მხოლოდ საყრდენის პოზიციაზე იყენებდა, მაგრამ ახალი სეზონიდან გერმანული ფეხბურთის ამომავალი ვარსკვლავი დაცვაში დადგება და ეცდება, რომ ლამი საკლუბო დონეზეც წარმატებით ჩაანაცვლოს. გერმანიის ნაკრებში მარჯვენა მცველის პრობლემა სწორედ იომ მოაგვარა და იმედია, იგივეს გააკეთებს "ბაიერნშიც."

დაცვის ცენტრში მატს ჰუმელსის ადგილი რა თქმა უნდა ხელუხლებელია. მატსი "ბაიერნში" 8 წლიანი პაუზის შემდეგ დაბრუნდა და ყველას დაანახა, რომ ის ნამდვილი ბოსია - დაცცვის ახალი ლიდერი. რაც შეეხება მის მეწყვილეს, აქ უფრო საინტერესო და რთული სიტუაციაა. 2016 წლის საუკეთესო გერმანელმა ფეხბურთელმა, ჟერომ ბოატენგმა, სერიოზული ტრავმების გამო გასული კამპანია ჩააგდო და მის არყოფნაში ხავი მარტინესმა ფანტასტიკურად იასპარეზა. ესპანელი ძალიან დამაჯერებელი იყო, მაგრამ საუკეთსო ფორმაში მყოფი ბოატენგი, რომელიც პეპ გვარდიოლამ სრულიად ახალ დონეზე აიყვანა, მსოფლიოში ერთ-ერთი უძლიერესი ცენტრალური მცველია, ამიტომ მოსალოდნელია, რომ ანჩელოტი ახალ სეზონში ეცდება იმის გაკეთებას, რაც სადებიუტო კამპანიაში ჟერომის ტრავმის გამო არ გამოუვიდა: "ბაიერნში" ჰუმელსი-ბოატენგის თანდემის სტაბილურად ჩამოყალიბებას. რაც შეეხება ახალწვეულ ნიკოლას ზიულეს, 21 წლის გერმანელი ძალიან ნიჭიერია, მაგრამ ის თავის პრაქტიკას დროთა განმავლობაში მიიღებს, აგრეთვე ბევრს ისწავლის და თავის სადებიუტო სეზონში მხოლოდ მეორეხარისხოვანი როლით მოუწევს დაკმაყოფილება.

მარცხენა ფრთაზე კი ყველაფერი გარკვეულია - დავიდ ალაბას კონკურენტი არ ჰყავს. ავსტრიელი ჯერ მხოლოდ 25 წლის არის და საბედნიეროდ, მის მომავალს "ბაიერნში" არაფერი ემუქრება. გარდა ამისა, ჯერჯერობით ხუან ბერნატიც არსად წასულა, რაც იმას ნიშნავს, რომ "რეკორდმაისტერს" სათადარიგო სკამზეც მშვენიერი ალტერნატივა ეყოლება.


ფილიპ ლამთან ერთად თავისი დიდებული საფეხბურთო კარიერა ხაბი ალონსომაც დაასრულა და "ბაიერნმა" მის პოზიციაზე ორი ახალი მოთამაშე დაიმატა. ჯერ 27 წლის გერმანელი სებასტიან რუდი, შემდეგ კი 22 წლის უნიჭიერესი ფრანგი საყრდენი კორენტინ ტოლისო, რომელმაც ძირითადში ალონსოს ადგილი უნდა დაიკავოს. ტოლისო ძალიან მრავალფეროვანი ნახევარმცველია, კარგი ფიზიკური მონაცამებით, თამაშის წაკითხვის უნარითა და ამავდროულად კრეატიული აზროვნებით. კორენტინს შავი სამუშაოს შესრულებასთან ერთად შეტევაში ნაყოფიერად თამაშიც შეუძლია. ტოლისოს მშვენიერი პასი, დაყენებული დარტყმა აქვს და აგრეთვე ძალიან კარგად თამაშობს თავით. გასულ სეზონში ფრანგმა სულ 14 ბურთი გაიტანა, რაც ჩინებული მაჩვენებელია და იმის დასტურია, რომ კორენტინი ძალიან მრავალფუნქციური ცენტრალური ნახევარმცველია. ალონსოსგან განსხვავებით ტოლისო უფრო მეტად შემოქმედებითი ტიპის ექვსი ნომერია, მაგრამ შეუძლია უფრო მეტად დაცვაზე იყოს აქცენტირებული.

"რეკორდმაისტერის" ცენტრის ხერხემალი კვლავ "ბულდოგი" იგივე "მებრძოლი" იგივე უბრალოდ არტურო ვიდალი იქნება - მენტალურად გუნდის ერთ-ერთ ყველაზე ძლიერი მოთამაშე. გამოცდილი ჩილელი "ბაიერნის" ქომაგებისათვის კარგად ნაცნობი სახეა, ამიტომ მასზე ბევრი საუბრით თავს არ შეგაწყენთ, უბრალოდ შეგახსენებთ, რომ ვიდალი მოედნის ცენტრში კვლავ ბალანსს დაიცავს და მოედნის ყველა მონაკვეთზე ბრძოლის გარდა შეტევაშიც აქტიურად ჩაერთვება ხოლმე. ტოლისოს მსგავსაც მასაც დიდებული დარტყმა აქვს და თავითაც მშევნივრად თამაშობს.

ცენტრალური ნაწილის მთავარი ფიგურა კი კვლავ მაესტრო ალკანტარა უნდა იყოს, რომელიც 4-2-3-1 ტაქტიკაში გამთამაშებლის პოზიციაზე იმოქმედებს, მაგრამ უკანაც დაიხევს და შეტევებს ცოტა სიღრმიდან დაიწყებს. სიამაყით შემიძლია ვთქვა, რომ ტიაგოსნაირი სრულყოფილი ცენტრი დღესდღეობით არავის ჰყავს, თუმცა საქმე იმაშია, რომ ანჩელოტი ესპანელს იდეალურად ვერ იყენებდა. გასული კამპანია ტიაგოსთვის კარიერაში საუკეთესო იყო, მაგრამ მან დაცვაშიც ძალიან დიდი სამუშაო შეასრულა, რის გამოც მნიშვნელოვან მატჩებში შეტევაში არც ისე ნაყოფიერი იყო. ტიაგო საოცრად ტექნიკური, დახვეწილი მოთამაშეა, დიდებული მოედნის ხედვით, ფანტასტიკური პასით, კარგი დარტყმითა და რაც ყველაზე მთავარია - მაღალი საფეხბურთო ინტელექტით. ალკანტარას აქვს ყველაფერი იმისათვის, რომ მსოფლიოში საუკეთესო გამთამაშებელი იყოს, ამიტომ უმჯობესი იქნება, რომ მან მხოლოდ შეტევების ორგანიზებაზე იზრუნოს და ცენტრში მხოლოდ ბურთის ამოსატანად დაბრუნდეს და არა მეტოქის შეტევების ჩასაშლელად. თანაც ტოლისო მოედნის ცენტრს გააჯანსაღებს, რადგან ის ალონსოზე 13 წლის უმცროსია და თავისუფლად შეძლებს 90 წუთის განმავლობაში სირბილს.


ყველაზე საინტერესო კი შემტევი შეტევითი ხაზის კომპლექტაციაა. ტიაგო ალკანტარა ათიანზე იმოქმედებს, მარჯვენა ფლანგი კვლა არიენ რობენის განკარგულებაში იქნება, რომელმაც გასული სეზონი დიდებულად ჩაატარა და დაამტკიცა, რომ მას კვლავ შეუძლია უმაღლეს დონეზე თამაში. ცენტრში "ბაიერნს" მსოფლიოში ერთ-ერთი უძლიერესი თავდამსხმელი ჰყავს - უნაკლო რობერტ ლევანდოვსკი, ხოლო მთავარი ინტრიგა მარცხენა ფრთაზეა, სადაც ფრანკ რიბერი უკვე დაგვიბერდა.

34 წლის ფრანგმა გასული კამპანია საკმაოდ ღირსეულად ჩაატარა, მაგრამ მას მატჩების ბოლოს ფიზიკური დაღლილობა უკვე ეტყობოდა. თუ რობენი მთელი 90 წუთი გიჟივით დარბოდა, რიბერის დაღლილობა და ფიზიკური სისუსტე ეტყობოდა. ასე, რომ უმჯობესი იქნება თუ "რეკორდმაისტერი" მოდმევნო სეზონიდან ნელ-ნელა ჩაანაცვლებს ლეგენდარულ ფრანგს. სანჩესის თემა უკვე დახურულია, ახლა კი "ბაიერნის" მთავარი ალტერნატივა 23 წლის ტექნიკური ბელგიელი იანიკ-ფერეირა კარასკოა, რომელიც უკვე შემდგარი ვარსკვლავია, ფანტასტიკური შესაძლებლობებით.

კარასკო ტექნიკური, სწრაფი, თამამი ვინგერია, რომელსაც არ ეშინია რამდენიმე მეტოქეზე წასვლა და მათი მოტყუება. სათამაშო სტილით იანიკ-ფერეირა რიბერისთან ახლოსაც არის, რადგან უყვარს თავდახრილი წინ წასვლა, მცველებს შორის ძრომიალი და სოლორეიდების ოსტატურად დაგვირგვინება. ასე, რომ საინტერესოა შეტევითი ტრიოა RRR (რობენი, რობერტი, რიბერი) თუ RRC (რობენი, რობერტი, კარასკო) იქნება? ბელგიელის ტრანსფერი უდავოდ წინ გადადგმული ნაბიჯი იქნება, რადგან კინგსლი კომანი და სერჟ გნაბრი არ არიან ისეთივე შემდგარი, ჩამოყალიბებული ვარსკვლავები, როგორიც კარასკოა.

სათადარიგო ვარიანტი


გუნდში, რომელსაც აქვს პრეტენზია, რომ იყოს მსოფლიოში უძლიერესი, აუცილებელია მაღალი კონკურენცია და ეს "ბაიერნის" ხელმძღვანელებს კარგად ესმით. სწორედ ამიტომ "რეკორდმაისტერს" ახლა მართლაც ორი ჩინებული გუნდი ჰყავს და რაოდენ სამწუხაროც არ უნდა იყოს ნეიტრალური ქომაგებისათვის, ალბათ მეორე გუნდსაც თავისუფლად შეუძლია ბუნდესლიგის მოგება.

მანუელ ნოიერის ფონზე "ბაიერნში" ნებისმიერი გოლკიპერი სუსტი გამოჩნდება, მაგრამ სვენ ულრაიხი დარჩა და მის სასახელოდ უნდა ითქვას, რომ კარლო ანჩელოტი სრულიად ენდობა. სვენმა მანუს არყოფნაში რამდენიმე მატჩი ჩაატარა, მაგრამ თავის წარმოჩენად დიდ ვერ მოახერხა. თუმცა ულრაიხი კვალიფიციური გოლკიპერია და რიგ შეხვედრებში ნოიერის დასვენება შეუძლია. მესამე მეკარე კი ახალგაზრდა კრტისიან ფრიუხტლი იქნება ახალგაზრდული გუნდიდან.

დაცვაში სათადარიგო ოთხეულიც სოლიდურად გამოიყურება. 31 წლის რაფინიამ ბოლო სეზონებში დაამტკიცა, რომ სერიოზულად მოუმატა და ბუნდესლიგაში თავისუფლად შეუძლია იოზუა კიმიხის ღირსეულად შეცვლა. ხავი მარტინესი საერთოდ ძირითადის მცველი იყო გასულ სეზონში და რა თქმა უნდა, ეცდება, რომ ბოატენგს ამჯერადაც სერიოზული კონკურენცია გაუწიოს. ასე, რომ ამ ორ მცველს შორის ჯერ კიდევ საკითხავია რომელი იქნება ძირითადის და რომელი სათადარიგო. აი ნიკოლას ზიულე კი მხოლოდ ახლა იწყებს, ამიტომ მეორეხარისხოვანი როლით უნდა დაკმაყოფილდეს. 21 წლის უნიჭიერესმა გერმანელმა კარგად იცის, რომ ჯერ ბევრი უნდა ისწავლოს, რადგან ასეთ მაღალ დონეზე პირველად იასპარეზებს. ზიულე ფიზიკურად ძლიერი, ტანმაღალი, საკმაოდ ჭვკიანი უკანა ხაზელია. მისი აღნაგობის მიუხედავად ნიკოლასს მშვენიერი პირველი პასი აქვს და ბურთთანაც კარგად ურთიერთობს. ზიულე სათამაშო სტილით ძალიან წააგავს ბოატენგს, რადგან ისიც აღნაგობით ხარია, მაგრამ ინტელექტს ნამდვილად არ უჩივის.

მარცხენა ფრთაზე კი ხუან ბერნატი იდეალური სათადარიგო ვარიანტია. ახალგაზრდა ესპანელი გასული სეზონი ბრწყინვალედ ჩაატარა, რამდენიმე ბურთი გაიტანა და შემდეგ ისიც კი დაიწერა, რომ ხუანი "ბაიერნს" სათამაშო პრაქტიკის სიმცირის გამო დატოვებდა. თუმცა ტექნიკური, სწრაფი და ძალიან დახვეწილი განაპირა მცველი მიუნხენშია და იმედია, დავიდ ალაბას ასეთი ღირსეული შემცვლელი მომდევნო სეზონშიც ეყოლება.

გასული სეზონის ერთ-ერთი ყველაზე განხილვადი თემა რენატუ სანჩეშის სუსტი თამაში იყო - რატომ ვერ მოერგო ევროპის საუკეთესო ახალგაზრდა მოთამაშე მიუნხენურ კლუბს? უბრალოდ იმიტომ, რომ 18 წლის ასაკში უმაღლეს დონეზე ეგრევე იდეალურად მოქმედება მარტივი სულაც არ არის. რენატუს ძალიან ცოტა შანსი ეძლეოდა, ამიტომ მას აუცილებლად სჭირდება მომდევნო კამპანია. სანჩეში ძალიან პერსპექტიული მოთამაშეა, უნიკალური შესაძლებლობებითა და ნათელი მომავლით. ახლა მას უფრო მტკიცე ხასიათი და მოთმინება სჭირდება. სავარაუდოდ ანჩელოტი ახალგაზრდა პორტუგალიელს უფრო მეტ შანსს მისცემს და ვინ იცის, იქნებ რენატუ სწორედ ამ სეზონში გაიხსნას და ტოლისოს "ბაიერნში" დამკვიდრების შესაძლებლობა საერთოდ არ მისცეს.

აი სებასტიან რუდი კი სავარაუდოდ მეორე გუნდის წევრობას უნდა დასჯერდეს, მაგრამ თუ მის ამბიციურ განცხადებებს გავითვალისწინებთ, 27 წლის გერმანელი აპირებს უფრო სერიოზული პოზიცია მოიპოვოს. გამოუვა თუ არა რუდის ძირითადში ადგილის დამკვიდრება ეს ძალიან რთული საკითხია, მაგრამ თუ სებასტიანი მოინდომებს შესაძლოა ანჩელოტისათვის საკმაოდ ფასეული ფეხბურთელი გახდეს. რუდი ბოლო წლებში საკმაოდ ჭკვიან ტაქტიკურ მოთამაშედ ჩამოყალიბდა და ასეთი სტრატეგოსები კარლოს ძალიან უყვარს. ნებისმიერ შემთხვევაში, სანჩეში და რუდი სათადარიგო სკამისთვის მართლაც მშვენიერი ალტერნატივები არიან.

შეტევაში კი ყველაფერი ნათელია - დუგლას კოშტა დიდი ალბათობით წავა თუ "ბაიერნმა" მისი შემცვლელი ნახა, კინგსლი კომანი და სერჟ გნაბრი კი თავიანთ შანსებს უნდა დაელოდონ. 21 წლის ფრანგს "რეკორდმაისტერმა" შანსი მისცა, რადგან კომანმა სადებიუტო სეზონი ჩინებულად ჩაატარა და მას მართლაც საკმაოდ დიდი რესურსი აქვს. თუ სანჩეშმა მიიღო შანსი, მაშინ კომანსაც აუცილებლად უნდა მიეღო. გნაბრი კი "ბაიერნს" ევროპის 21 წლამდელთა ჩემპიონის რანგში შეუერთდება და ძალიან საინტერესოა როგორ იასპარეზებს წითელი მაისურით. გნაბრი უნიჭიერესი შემტევია, კარგი ტექნიკითა და დრიბლინგის შესანიშნავი უნარით. იმედია გნაბრისა და კომანს მიეცემათ შანსი, მთავარი კი უკვე ამ შესაძლებლობების გამოყენება იქნება. ამ ბიჭებს მართლაც ბევრის გაკეთება შეუძლიათ.

თომას მიულერი...რა ბედი ელის თომას მიულერს? ეს "ბაიერნის" ქომაგებისთვის საკმაოდ მტკივნეული თემაა, მაგრამ უნდა ვაღიაროთ, რომ ტიაგო ალკანტარას ფონზე "რეკორდმაისტერის" სიმბოლოს ადგილი ძირითადში აღარ რჩება. მიულერი წლების განმავლობაში "ბაიერნის" უცვლელი ფიგურა იყო, თანაც ძალიან კარგად მოქმედებდა, მაგრამ ახლა ანჩელოტი ცოტათი განსხვავებულ, პრაგმატულ ფეხბურთს თამაშობს, რომელშიც ვინგერი უშუალოდ ვინგერის მოვალეობებს ასრულებს, ათიანი ათიანის და ა.შ. ფლანგზე მიულერი რობენსა და რიბერის ნამდვილად ვერ შეედრება, ხოლო ცენტრში - ტიაგოს. ასე, რომ თომასს ორმაგი შრომა მოუწევს და თუ კვლავ საუკეთესო ფორმას აკრეფს, მაშინ ყველა ბედნიერი იქნება, თუ არადა "ბაიერნს" საკუთარი ერთგულება კიდევ ერთხელ უნდა დაუმტკიცოს და მეორეხარისხოვანი როლით დაკმაყოფილდეს. თუმცა თუ მიულერი სკამზე იჯდება, ის აუცილებლად პაპა კარლოს ნომერ პირველი ჯოკერი იქნება, როგორც მსოფლიოში ყველაზე არაპროგნოზირებადი ფეხბურთელი. მიულერს არც განსაკუთრებული ტექნიკა, არც დრიბლინგი, არც დარტყმა, არც პასი არ აქვს, მაგრამ გუნდის გამო შეუძლია ზემოთჩამოთვლილი ყველა ასპექტის უნაკლოდ შესრულება. თუ "ბაიერნი" ფორმაშია, მაშინ თომასს შეუძლია იყოს არანორმალურად პროდუქტიული და თუნდაც ჩაგდებულ შეხვედრაში გაიტანოს გადამწყვეტი გოლი. ჩვენც, "ბაიერნის" ქომაგებს, სწორედ ამიტომ გვიყვარს იგი - თომასი ხომ ერთ-ერთი საუკეთესო გუნდური მოთამაშეა მსოფლიოში. არსებობს გამოთქმა - გუნდი ფეხბურთელზე თამაშობსო, აი მიულერის შემთხვევაში კი პირიქითაა - თომასი თამაშობს გუნდზე.

რა ხდება თავდასხმაში? ჯერჯერობით არც არაფერი ახალი, რადგან რობერტ ლევანდოვსკი კვლავ "ბაიერნის" ერთადერთი ნომინალური ფორვარდია. რატომ არ ფიქრობს "რეკორდმაისტერი" მისი შემცვლელის პოვნაზე? ალბათ იმიტომ, რომ მიულერის იმედი აქვთ. მადრიდის "რეალთან" პირველ მატჩში მიულერი შეუმჩნეველი იყო, მაგრამ ისიც გასათვალისწინებელია, რომ თომასი ოპტიმალურ ფორმაში სულაც არ ყოფილა, ამიტომ თუ 28 წლის გერმანელი ჩვეულ სტილში ათამაშდება, შესაძლოა ცხრუ ცხრიანის როლი გადამწყვეტ მატჩებშიც წარმატებით შეასრულოს. დამაინც, რატომ რისკავს ასე მიუნხენური კლუბი? რა თქმა უნდა შეუძლებელი იქნება ანტუან გრიზმანის მოყვანა ლევანდოვსკის დუბლიორის როლში, მაგრამ არიან შედარებით დაბალი კლასის, მაგრამ კარგი და კვალიფიციური ფორვარდები, რომლებიც "ბაიერნში" სიამოვნებით გადავიდოდნენ. პრესაში მხოლოდ ანდრეი კრამარიჩის ვარიანტმა გაიჟღერა და სხვათშორის ეს ცუდი ალტერნატივა სულაც არ არის. კრამარიჩი მრავალფეროვანი, ახალგაზრდა და კარგი თავდამსხმელია, რომელიც ლევის მართლაც ღირსეულად შეცვლიდა ხოლმე. თუმცა ჯერ მიუნხენური გრანდი ახალი თავდამსხმელის დამატებაზე არ ფიქრობს.

ვარიანტი 2: 4-3-3


ახლა კი მივადექით ყველაზე საინტერესო და განსხვავებულ ტაქტიკურ განლაგებას, რომელსაც არსებობის უფლება ნამდვილად აქვს. დაცვისა და შეტევის ხაზი უცვლელია, მთავარი ყურადღება ცენტრს უნდა მივაპყროთ. უკვე გამოცდილებამ დაგვარწმუნა იმაში, რომ დიდ თამაშებს მართლაც ნახევარდაცვა იგებს, პირველ რიგში კი - ცენტრი.

მოდი თავდაპირველად გავიხსენოთ როგორ მოაგებინა კარლო ანჩელოტიმ მადრიდის "რეალს" ისტორიული მეათე თასი? უსწრაფესი შეტევებითა და 4-3-3 სუპერ-შემტევი ტაქტიკით. იტალიელმა სპეციალისტმა ტიპიური ვინგერი ანხელ დი მარია ცენტრალურ ნახევარმცველად აქცია და არგენტინელი თავის ბრწყინვალე შესაძლებლობებს შეტევაში მაინც უნიკალურად ავლენდა. რა შუაშია დი მარია? უბრალოდ პარალელია ტიაგო ალკანტარასთან, რომელიც ასევე წინა ხაზის შემტევია, მაგრამ მისგან კიდევ უფრო მაგარი ექვსიანისა და რვიანის მიქსი შეიძლება მივიღოთ. ალკანტარა შავ სამუშაოს იშვიათად შეასრულებს, მაგრამ შეტევებს სიღრმიდან დაიწყებს. დი მარის ამის გაკეთება ბრწყინვაე ტექნიკისა და დრიბლინგის წყალობით შეეძლო, თუმცა ტიაგოს არავისზე ნაკლები ტექნიკა არ აქვს, თანაც შეუძლია რომ ერთი დიდებული პასით მეტოქის მთელი დაცვა მოჭრას. ტიაგო ასეთ სქემაში იქნება ერთვარი "დისპეტჩერი", რომელიც ნახევარდაცვისა და შეტევის ხაზს ერთმანეთს დააკავშირებს. გასულ სეზონში ესპანელი სწორედ ამას აკეთებდა, მაგრამ ამჯერად უფრო მეტად უნდა იყოს ორიენტირებული შეტევაზე და საკუთარ ნახევარზე მხოლოდ საჭიროების შემთხვევაში დაბრუნდეს.

აი ამ ტაქტიკაში კი კორენტინ ტოლისოსთვის ზედგამოჭრილი იქნება ალონსოს შემცვლელის სტატუსი. მისი მთავარი მოვალეობა ბურთის დაჭერა, მისი ჭკვიანურად კონტროლი და გრძელი-მოკლე პასების გაკეთება იქნება. ამავდროულად, კორენტინმა კონტრშეტევის დროს ერთი ზუსტი გადაცემით გუნდი დაცვიდან ეგრევე შეტევაში უნდა გაუშვას, რაც 22 წლის ფრანგს ნამდვილად შეუძლია. ტოლისო ამ შემთხვევაში იქნება ცენტრში ბალანსის გარანტი, რომელსაც შეტევაში ჩართვის უფლებაც ექნება.

შესაძლოა ბევრს თვალში მოაკლდა არტურო ვიდალი, მაგრამ ამას თავისი ობიექტური მიზეზები აქვს. იცით ვინ არის "ბაიერნის" ისტორიაში ყველაზე ძვირადღირებული მოთამაშე? ესპანელი ხავი მარტინესი, თუმცა არა ის, რომელსაც ბოლო წლებში ცენტრალური მცველის პოზიციაზე ვხედავთ. "რეკორდმაისტერმა" თავის დროზე 40 მილიონი იმ მარტინესში გადაიხადა, რომელმაც 2012/13 წლების სეზონში ფენომენალური თამაში აჩვენა და მოედნის ცენტრში ნამდვილი კედელი იყო. დიახ, ვიდალი და ტოლისო ასევე ძლიერი საყრდენები არიან, მაგრამ არცერთი არაა ტიპიური ჩამშლელი, ხოლო მარტინესი - არის. ხავის შეუძლია მთელი 90 წუთი შავი სამუშაო ასრულოს, მუდმივად ბურთისათვის იბრძოლოს, მეტოქეთა შეტევები ჩაშალოს და წინ ერთი ნაბიჯიც არ გადადგას. იუპ ჰაინკესის "სუპერ-ბაიერნში" იგი ამას უნაკლოდ აკეთებდა და შესაძლოა ანჩელოტიმაც გამოიყენოს ასეთი მარტინესი. თანაც დაცვაში უკვე კონკურენცია მოიმატებს და შესაძლოა "რეკორდმაისტერს" აქვს კიდევაც გეგმაში ფიზიკურად ძლიერი ესპანელის ცენტრში დაბრუნება.

ფაქტია, რომ ასეთი ცენტრი ყველაზე სრულფასოვანი იქნება, რადგან თითოეულ მოთამაშეს კონკრეტული დავალება ექნება და ისინი ერთმანეთს შეავსებენ. ვიდალი და ტოლისო წინ ნებისმიერ შემთხვევაში წავლენ, მაგრამ მარტინესს შეუძლია მხოლოდ დაცვაში იმუშავოს, რითიც ტოლისოსა და ტიაგოს უფრო გაუხსნას გზას წინა ხაზზე, ისინი თამამად ჩაერთვებიან შეტევებში, რადგან ზურგს ხავიერი გაუმაგრებთ. თუ კარლოს განზრახული აქვს რაიმე ორიგინალურის გაკეთება, მაშინ ეს საკმაოდ საინტერესო ვარიანტი ჩანს.

როგორც ხედავთ, კარლო ანჩელოტის ფუფუნება ნამდვილად აქვს, რადგან გუნდში კონკურენცია საკმაოდ მაღალია. "ბაიერნს" თითოეულ პოზიციაზე ორი საკმაოდ კარგი მოთამაშე ჰყავს, ახლა კი მთავარი ამ რესურსის სწორად გამოყენება. სატრანსფერო ბაზარზე კი წინ კიდევ დიდი დროა, ამიტომ იმედი ვიქონიოთ, რომ "რეკორდმაისტერი" სულ პატარა დეტალებსაც ამოავსებს და ერთ ვინგერსა და თავდამსხმელს კიდევ დაიმატებს.

მოამზადა დავით მაღრაძემ, სპეციალურად BAYERN.GE-სთვის
скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
ბლოგი
მსგავსი სიახლეები
კომენტარები
G. Chaduneli
G. Chaduneli | 5 ივლისი 2017 12:28
უმჯობესია გერმანელები ათამაშოს ძირითადად, მაგალითად, ნოიერი, ჰუმელსი, ბოატენგი, ზიულე(კიმიხი) ალაბა, რუდი-ვიდალი, ტოლისო, რობენი(გნაბრი) რიბერი(მიულერი) ლევანდოვსკი.... ესპანელი არ გააკარონ რაც ეგენი მორეკა გვარდიოლამ ესპანურ გუნდს ვერცერტხელ ვერ გაცდენ))
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა