...

ფრანგი ჯადოქარი - ფრანკ რიბერი

ეს კვირა მიუნხენის "ბაიერნის" ფრანგი ვინგერის, ფრანკ რიბერის 10 წლეულს, მიეძღვნა და ჩვენც გვინდა, რომ ამ მცირე დღესასწაულს შევუერთდეთ და კიდევ ერთხელ გავიხსენოთ თუ რას წარმოადგენს გერმანული გრანდისათვის ეს "ფრანგი ჯადოქარი."

ზოგადად ნებისმიერ ფეხბურთის გულშემატკივარს რომ თხოვოთ "ბაიერნის" თანამედროვე ისტორიაში საუკეთესო მოთამაშის დასახელება, უმრავლესობას გონებაში ორი ფეხბურთელის გვარი ამოუტივტივდება: რიბერი და რობენი. ეს შემთხვევითი სულაც არ არის, რადგან ჩვენი კლუბის უკანასკნელი 10 წლეულის განუყოფელი ნაწილი და მიუნხენური გუნდის დიდი წარმატების ერთ-ერთი მთავარი შემოქმედი სწორედ ეს ორი გენიალური ლეგიონერი გახლავთ.

ფრანკი თუ არიენი? ამ კითხვაზე პასუხის გაცემა ურთულესია, რადგან ორივე ექსტრაკლასის მოთამაშეა, ორივემ "ბაიერნის" ისტორიაში უმნიშვნელოვანესი კვალი დატოვა და ორივე განსხვავებული ტიპის შემტევია. ორივეს აქვს ერთი განმასხვავებელი თვისება, რომლითაც გამოირჩევიან არამხოლოდ ერთმანეთისგან, არამედ სხვებისგან. რობენი ცნობილია თავისი არანორმალური სისწრაფით, თავდაჯერებულობითა და მანევრით, რომელსაც მასზე უკეთ ვერავინ ვერასოდეს გააკეთებს. აი რიბერი კი ტექნიკურად უფრო მრავალფეროვანი, დახვეწილი დრიობლიორია და მეტოქე გუნდის მოთამაშეებს შორის ბურთით უფრო ჰაეროვნად დაძვრება. ახლა სწორედ იმ "ფრანგ ჯადოქარზე" ვისაუბრეთ, რომელმაც "ბაიერნის" თანამედროვე ისტორია გაალამაზა და ქომაგების გული სამუდამოდ მოიგო.


მანამ, სანამ უშუალოდ ფრანკის ბრწყინვალე კარიერაზე გადავალთ, მინდა ცოტა დრო იმ ძალიან რთულ შემთხვევას დავუთმო, რომელიც რიბერის ცხოვრებაში მისთვის შეუჩმნევლად შემოვიდა, მაგრამ მუდმივად მასთან ერთად არის, უბრალოდ ფრანგმა მოახერხა და ის საკუთარ ძლიერ მხარედ აქცია.

დარწმუნებული ვარ არავის დარჩებოდა შეუმჩნეველი რიბერის სახეზე საკმაოდ დიდი შრამი და შესაძლოა "ბაიერნის" ქომაგებმა მისი ისტორიაც იცოდნენ, მაგრამ ვინც არ იცის, მათთვის უდავოდ საინტერესოა საიდან გაჩნდა ფრანკის სახეზე ამხელა შრამი. ეს ჯერ კიდევ მაშინ მოხდა, როდესაც ფრანკი სულ რამდენიმე თვის ჩვილი იყო. მისი ოჯახი ბულონის ავტობანზე ავარიაში მოჰყვა და ტრაილერს შეეჯახა. პატარა ფრანკი უკან ღვედის გარეშე იჯდა და პირდაპირ მანქანის საქარე მინას შეასკდა, რის შედეგადაც სახის მარჯვენა მხარეს მას 100-მდე ნაკერი დაადეს.


რიბერი ამ თემაზე საჯაროდ იშვიათად საუბრობს, მაგრამ 2011 წელს იტალიური "La Gazzetta dello Sport-თან" ძალიან საინტერესო კომენტარი გააკეთა. ამ მძიმე ავარიიდან ძალიან დიდი დრო გავიდა, ფრანკი პროფესიონალი ფეხბურთელი გახდა, ევროპის ერთ-ერთ უძლიერეს კლუბში დაიწყო თამაში, საკმაოდ დიდი თანხაც მოიპოვა, მაგრამ მას შრამის მოცილებაზე და პლასტიკური ოპერაციის გაკეთებაზე არც კი უფიქრია. ალბათ ბევრს გვინახავს დამცინავი კომენტარები ფრანკის გარეგნობაზე და ნასროლი ფრაზები: "ამდენი ფული აქვს და ერთი პლასტიკური ოპერაცია რა გახდაო..." ამ ადამიანებისთვის კი პასუხად რიბერის სიტყვების ციტირებაც იკმარებს, რომელიც ზემოთხსენებულ იტალიურ გაზეთთან წარმოთქვა.

"პრობლემა ის იყო, რომ უკანა სავარძელზე ღვედის გარეშე ვიჯექი. თუმცა გარკვეულწილად ეს შემთხვევა ძალიან დამეხმარა. როგორც ბავშვს, ამან მოტივაცია მომცა. უფალმა განსხვავებული ნიშანი მომანიჭა, რომელიც საჩუქრის სახით მივიღე. ეს შრამები ჩემი ნაწილია და ხალხმა სწორედ ისეთი უნდა მიმიღოს, როგორიც ვარ. ჩემი შრამით ვამაყობ. ამან ძალა მომცა და ჩემი ხასიათი გაამყარა. მენტალურად ძლიერი უნდა იყო იმისათვის, რომ ბავშვების უაზრო ხუმრობები და მოზარდების მოშტერებული მზერა აიტანო. ასე, რომ აი აქ ვარ! ეს არის ჩემი სახე და ხალხი ძალიან კარგად მიცნობს. ჩემი სახით ბედნიერი ვარ. რომ არა ეს გამოცდილება ასეთი ვერ ვიქნებოდი", - ესეც პასუხი რომელსაც ვფიქრობ არანაირი განმარტება არ სჭირდება.

დასაწყისი


ფრანკ რიბერი "ბულონის" აკადემიაში გაიზარდა და პირველი პროფესიონალური კონტრაქტიც ამ კლუბთან გააფორმა. მოგვიანებით, 2002-05 წლებში რამდენიმე ფრანგულ კლუბში იასპარეზა, შემდეგ კი ცოტა თურქეთშიც, "გალათასარაის" მაისურით, წაითამაშა. 2005 წელს კი მარსელის "ოლიმპიკს" შეუერთდა, სადაც საკუთარი პოტენციალი გამოავლინა და იქცა საფრანგეთის ერთ-ერთ საუკეთესო ტალანტად. საფრანგეთის ლიგა 1-ს ორ სეზონში მან 60 მატჩი ჩაატარა, 11 გოლი გაიტანა და 2006 წლის მსოფლიო ჩემპიონატზე საფრანგეთის ეროვნული ნაკრების ძირითადი მოთამაშე იყო.

2007 წლის ზაფხულში კი ფრანკიმ მიუნხენის "ბაიერნთან" 4 წლიანი კონტრაქტი გააფორმა და მაშინ კლუბის ისტორიაში ყველაზე ძვირადღირებული მოთამაშე გახდა. "რეკორდმაისტერმა" 24 წლის ფრანგი ვინგერის სანაცვლოდ 25 მილიონი ევრო გადაიხადა და ის მიუნხენურ კლუბში ძალიან თბილად მიიღეს, როგორც საოცარი შესაძლებლობების მქონე ამომავალი ვარსკვლავი, რომელმაც გერმანიაში ზინედინ ზიდანთან ერთად საფრანგეთი მუნდიალის ფინალამდე მიიყვანა. რიბერიმ სადებიუტო სეზონშივე ფანტასტიკური შთაბეჭდილება მოახდინა და ბუნდესლიგა თავისი ბრწყინვალე ტექნიკით, დრიბლინგებით, ლამაზი გარღვევებით, გოლებით გაალამაზა.

2007/08 წლების კამპანია რიბერიმ მართლაც დიდებულად ჩაატარა. ბუნდესლიგაში 28 შეხვედრა ჩაატარა, 11 გოლი გაიტანა და 8 საგოლე გადაცემა გააკეთა. გერმანიის თასზე 5 მატჩში 2 ბურთი შეაგდო, 4 ასისტი გააკეთა. პლიუს ამას უეფას თასზე 11 შეხვედრაში 3-ჯერ გამოიჩინა თავი და პარტნიორებს 7 ბურთ გაატანინა. სტატისტიკაც შთამბეჭდავი იყო და რიბერის თამაშიც. ახალგაზრდა ფრანგმა "ბაიერნთან" ერთად პირველივე სეზონში დუბლი გაიფორმა: ვერცხლის სინი და გერმანიის თასის ტიტული მოიპოვა. თავად კი გერმანიაში წლის საუკეთესო ფეხბურთელად დასახელდა და მოლოდინი ორმაგად გაამართლა. დორტმუნდის "ბორუსიასთან" თასის დაძაბულ ფინალში, რომელიც "ბაიერნმა" დამატებით დროში 2:1 მოიგო, ფრანკიმ საგოლე პასი გააკეთა და მეორე, გადამწყვეტი გოლის, დროს შეტევა წამოიწყო. ასე, რომ რიბერიმ "რეკორდმაისტერში" თავიდანვე საოცრად დაიწყო და გახდა გუნდის გამორჩეული ფიგურა თავისი ბრწყინვალე თამაშის სტილის გამო.


2008 წლის ზაფხულში რიბერიმ ევროპის ჩემპიონატზე იასპარეზა და მისი ეროვნული გუნდი ჯგუფში ჩარჩა. წარუმატებელი ევრო პირველობის შემდეგ კი ფრანკიმ "ბაიერნში" კიდევ უფრო მაგარი სეზონი ჩაატარა. ჩემპიონთა ლიგაზე პირველი კამპანია მშვენიერი შედეგით დაასრულა: 4 გოლი და 7 საგოლე გადაცემა, ბუნდესლიგაში კი 9 ბურთი შეაგდო და 12 ასისტი გააკეთა. სამწუხაროდ იურგენ კლინსმანის გუნდმა სეზონი ჩააგდო, ბუნდესლიგაში პირველობა "ვოლფსბურგს" დაუთმო, გერმანიის თასსა და ჩემპიონთა ლიგას კი მეოთხედფინალში გამოეთიშა. ევროპის მთავარ საკლუბო ტურნირზე "ბაიერნი" პეპ გვარდიოლას საოცარმა "ბარსელონამ" გაანადგურა. "კამპ ნოუზე" 0:4 წაგების შემდეგ "რეკორდმაისტერმა" შინ ფრედ 1:1 ითამაშა და იმ შეხვედრაში ფრანგმა ვინგერმა ბრწყინვალედ ითამაშა. რიბერიმ დანი ალვეში და კარლეს პუიოლი გააწამა და ის ერთადერთი გოლიც თავად შეაგდო, თანაც საკმაოდ ტექნიკურად. იმ დღეს რიბერი კატალონიური გრანდის წარმომადგენლებსაც მოეწონათ.

მთავარი გადაწყვეტილება

"ბაიერნში" ორი ბრწყინვალე სეზონის შემდეგ რიბერი ნამდვილი ვარსკვლავი გახდა, რომელიც ევროპაში ერთ-ერთ საუკეთესო შემტევ ნახევარმცველად ჩამოყალიბდა. 2009 წლის ზაფხულში მისით თითქმის ყველა ძლიერი კლუბი ინტერესდებოდა: "ბარსელონა", "ინტერი", "ჩელსი", "მანჩესტერ იუნაიტედი" და თავად ფრანკიც სერიოზულად ფიქრობდა გუნდის დატოვებას, რადგან მაშინ "ბაიერნი" ზემოთხსენებულ კლუბებს ნამდვილად ჩამოუვარდებოდა. თუმცა ული ჰიონესისა და ახალი მთავარი მწვრთნელი ლუი ვან გაალის ძალისხმევით, აგრეთვე გუნდში არიენ რობენის მოყვანით, რიბერიმ გადაწყვიტა, რომ მიუნხენში დარჩენილიყო, სადაც შეიძლებოდა სუპერ-გუნდის შექმნა, რომლის ერთ-ერთი ლიდერიც თავად უნდა ყოფილიყო. მისი კონტრაქტი 2011 წელს იწურებოდა და გახანგრძლივებას საჭიროებდა, მაგრამ ამისთვის დრო ჯერ კიდევ იყო. საბედნიეროდ, რიბერიმ "ბაიერნი" აირჩია და საკუთარი გადაწყვეტილება ფორმალურად უკვე მომდევნო წლის ზაფხულში დაადასტურა, როდესაც "რეკორდმაისტერთან" ხელშეკრულება 1 წლით გადაავადა.


თუმცა მანამდე რიბერიმ "ბაიერნში" მორიგი კარგი სეზონი ჩაატარა, რომელიც ცოტათი მისმა ტრავმამ გააფუჭა. ფრანგს შემოდგომის ბოლოს რამდენიმე თვის გამოტოვება მოუწია და გუნდს სეზონის მთავარი ნაწილისათვის შეუერთდა. ლუი ვან გაალის გუნდმა მოიგო ბუნდესლიგა, რომელშიც ფრანკიმ 17 მატჩი ჩაატარა, 4 ბურთი შეაგდო, 6 ასისტი გააკეთა და აგრეთვე გერმანიის თასი. ბრემენის "ვერდერთან" ფინალურ მატჩში (4:0) რიბერიმ ერთი გოლი თავადაც გაიტანა. ეს მისი მეორე დუბლი იყო გერმანიაში, მაგრამ მთავარი მოვლენები ჩემპიონთა ლიგაზე განვითარდა. მიუნხენელებმა არიენ რობენის ფენომენალური თამაშის წყალობით ფინალამდე გააღწიეს. თუმცა ჰოლანდიელს "მანჩესტერ იუნაიტედთან" პაექრობაში ძალიან დაეხმარნენ ივიცა ოლიჩი და ფრანკ რიბერი. სწორედ ფრანგის საოცარი სიზუსტის პასით შეაგდო არიენმა ჩემპიონთა ლიგის ისტორიაში ერთ-ერთი საუკეთესო გოლი. ფინალში კი, "სანტიაგო ბერნაბეუზე", გერმანულმა კლუბმა მილანის "ინტერთან" 0:2 წააგო და ბევრი შანსი არც ჰქონია. არიენ რობენი მარტო ებრძოდა მოურინიოს საოცრად ორგანიზებულ გუნდს, რადგან მას რიბერი აკლდა, რიბერი, რომელიც დისკვალიფიკაცირებული იყო.


ეს ეპიზოდი ჩემპიონთა ლიგის პირველ ნახევარფინალურ თამაშში მოხდა, რომელიც "ბაიერნმა" შინ ლიონის "ოლიმპიკთან" 1:0 მოიგო. რიბერიმ წითელი ბარათი უკვე მატჩის 37-ე წუთზე მიიღო და უნდა ვაღიაროთ, რომ ამ შემთხვევაში ფრანკმა ძალიან იუხეშა და დამსახურებულად დატოვა მინდორი. თუმცა "რეკორდმაისტერმა" ფრანგები ორი მატჩის ჯამში მარტივად (4:0) დაამარცხა და რიბერის გარეშეც გავიდა ფონს. უბრალოდ პრობლემა იმაში იყო, რომ ამ ჯარიმის გამო რიბერი არა სტანდარტული ერთმატჩიანი, არამედ ორმატჩიანი დისკვალიფიკაციით დასაჯეს და ჩემპიონთა ლიგის ფინალში თამაშის უფლება წაართვეს.

მიუხედავად ფინალური მარცხისა 2009/10 წლების სეზონი "ბაიერნისთვის" უმნიშვნელოვანესი და ძალიან წარმატებული გამოდგა. ლუი ვან გაალმა გუნი უფრო თანამედროვე სტილში აათამაშა, "ბაიერნი" 9 წლიანი პაუზის შემდეგ პირველად გავიდა ჩემპიონთა ლიგის ფინალში და ამავდროულად, ეს იყო პირველი სეზონი, რომელიც რობენმა და რიბერიმ ერთად ჩაატარეს. უკვე მომდევნო კამპანია წარუმატებელი, უტიტულო გამოდგა და ჰოლანდიელი სპეციალისტი სეზონის ბოლოს გაათავისუფლეს. ფრანკიმ კი კვლავ ჩინებულად იასპარეზა და 11 გოლთან ერთად 21 საგოლე პასიც გააკეთა!

ევროპის საუკეთესო ფეხბურთელი!


ვან გაალის წასვლის შემდეგ მიუნხენურმა კლუბმა გამოცდილ გერმანელ სპეციალისტ იუპ ჰაინკესს უხმო, რომელიც "ბაიერნში" დაბრუნდა და ფანტასტიკური გუნდი შექმნა. 2011/12 წლების სეზონში "რეკორდმაისტერი" სამივე ტიტულთან ძალიან ახლოს იყო, მაგრამ საბოლოოდ, ვერაფერი მოიგო. მიუნხენელებმა ვერცხლის სინი ზედიზედ მეორედ დაუთმეს დორტმუნდის "ბორუსიას" და გერმანიის თასის ფინალშიც იურგენ კლოპის გუნდთან დამარცხდნენ. ბერლინში "ყვითლებმა" 5:2 იმარჯვეს და "ბაიერნის" რიგებში ერთადერთი გამონათება რიბერის ჩინებული სოლორეიდი და გოლი იყო, რომელმაც დიდი ვერაფერი შეცვალა. მთავარი დარტყმა კი "რეკორდმაისტერმა" ჩემპიონთა ლიგაზე მიიღო. მიუნხენურ ფინალამდე "ბაიერნი" ჩინებულად მივიდა: ნახევარფინალში მადრიდის "რეალი" პენალტების სერიით დაამარცხა, ხოლო "ალიანს არენაზე" რობერტო დი მატეოს ლონდონის "ჩელსის" დაუპირისპირდა. მიუხედავად კოლოსალური უპირატესობისა და უამრავი შანსისა, მიუნხენურმა გრანდმა გამარჯვება ვერ მოიპოვა და საბოლოოდ თასი პენალტების სერიაში დათმო.

ამ კატასტროფული საღამოს დეტალები ყველას კარგად ახსოვს, მაგრამ ეს უკვე წარსულს ჩაბარდა. რიბერისთვის სეზონი საოცრად წარმატებული გამოდგა (17 გოლი და 26 საგოლე პასი), მაგრამ ყველაფერი წინ იყო...


ერთ წელიწადში მიუნხენურმა გრანდმა ისტორია გადაწერა და მოიგო ყველაფერი, რაც ერთი წლის წინ წააგო. იუპ ჰაინკესის "სუპერ-ბაიერნმა" გერმანული ფეხბურთის ისტორიაში პირველი ტრებლი დადო, რომლის ერთ-ერთი მთავარი შემოქმედი სწორედ ფრანკ რიბერი იყო. ფრანგმა კარიერაში საუკეთესო სეზონი ჩაატარა, ყველა ტურნირზე ერთად 11 ბურთი გაიტანა, 22 საგოლე გადაცემა გააკეთა და "რეკორდმაისტერის" ერთ-ერთი ლიდერი იყო. "ბაიერნმა" ბუნდესლიგა საკმაოდ დიდი უპირატესობით მოიგო, შემდეგ კი "უემბლიზე" ჩემპიონთა ლიგის ტიტულიც მოიპოვა. მიუნხენელებმა ფლეი-ოფში "არსენალი", "იუვენტუსი" და "ბარსელონა" ჩამოიტოვეს, ნამდვილი საჩემპიონო გზა გამოიარეს, რომლის დროსაც ფრანკი სტაბილურად უმაღლეს დონეზე მოქმედებდა. ფინალში კი "ბაიერნმა" დორტმუნდის "ბორუსია" 2:1 დაამარცხა. 1:1-ზე, როდესაც ყველა დამატებით დროს ელოდა, ბოატენგის გრძელი პასი საჯარიმოს წინ ფრანკიმ დაამუშავა და ყველასათვის მოულოდნელად ქუსლით საჯარიმოში არიენ რობენს შეუგორა. მართალია პასი არ იყო იდეალური, მაგრამ იმდენად მოულოდნელი გამოდგა, რომ სანამ მცველები გონს მოვიდოდნენ, რობენმა ბურთი უკვე კარის ბადეში მოაქცია და ტრიბუნებისკენ გაფრინდა! რამდენიმე დღეში "ბაიერნმა" გერმანიის თასიც მოიგო.

მართალია იუპ ჰაინკესს "სუპერ-ბაიერნი" ჰყავდა, რომელშიც თითოეულ მოთამაშეს ძალიან მნიშვნელოვანი როლი ჰქონდა და თომას მიულერსაც გიჟური სეზონი ჰქონდა, მაგრამ რიბერი მაინც გამორჩეული იყო. დიახ მთავარი გოლები არიენ რობენმა გაიტანა, მაგრამ საერთო ჯამში იმ სეზონში უფრო ძლიერად სწორედ ფრანკ რიბერი გამოიყურებოდა და სწორედ ამიტომ 2013 წელს იგი უეფამ ევროპის უძლიერეს ფეხბურთელად აღიარა. მან ჯილდო პირადად მიშელ პლატინისგან მიიღო.


ოქროს ბურთი? სამწუხაროდ, ფიფას მთავარი ჯილდო კვლავ რონალდუსა და მესის შორის გათამაშდა, ხოლო ფრანგს მესამე ადგილი ხვდა წილად, მაგრამ რეალური გამარჯვებული სწორედ რიბერი იყო, რომელმაც "ბაიერნთან" ერთად უმაღლესი მწვერვალები დაიპყრო.


ახალი ეტაპი


2013 წლის ზაფხულში, როდესაც "ბაიერნი" ესპანელმა სპეციალისტმა, პეპ გვარდიოლამ, ჩაიბარა, ახალი ეტაპი არამხოლოდ "ბაიერნისთვის", არამედ ფრანკ რიბერისთვისაც დაიწყო. 30 წლის ფრანგი უკვე ევროპის უძლიერესი ფეხბურთელი იყო და პეპთან მშვენიერი ურთიერთობა ჩამოუყალიბდა. "რეკორდმაისტერმა" თავისი პირველი ტიტული ზაფხულში უეფას სუპერთასზე მოიპოვა, როდესაც საოცრად დრამატულ ორთაბრძოლაში ლონდონის "ჩელსის" პენალტების სერიით მოუგო. იმ შეხვედრაში რიბერიმ ბრწყინვალედ ითამაშა და მეორე ტაიმში პეტერ ჩეხის შესანიშნავი გოლიც გაუტანა, რომელიც პეპთან გიჟური ჩახუტებით აღნიშნა. გვარდიოლასთან პირველი სეზონი ფრაგნმა ჩვეულ სტილში, ძალიან ძლიერად ჩაატარა, კვლავ ბრწყინვალე დრიბლინგებს ახორციელებდა, ლამაზი გოლები გაჰქონდა და რობენთან ერთად ფლანების მამოძრავებელი ძალა იყო. "ბაიერნმა" ბუნდესლიგა და გერმანიის თასი მოიგო, თუმცა ჩემპიონთა ლიგაზე ნახევარფინალში მადრიდის "რეალთან" განადგურა.

2014/15 წლების კამპანია ჩინებულად მიდიოდა მანამ, სანამ ჩემპიონთა ლიგის საპასუხო მერვედფინალურ მატჩში, დონეცკის "შახტარის" წინააღმდეგ, რიბერი და რობენი არ დაიმტვრნენ. ფრანკმა მუხლის ჯვარედინა იოგები გაიწყვიტა, რაც იმას ნიშნავდა, რომ მისთვის არამხოლოდ სეზონი, არამედ მთელი 2015 წელია დასრულებული. ერთი წლით ადრე დაზიანების გამო მან მსოფლიო ჩემპიონატი გამოტოვა და გაბრაზებულმა სანაკრებო კარიერა დაასრულა, ხოლო იმის ფონზე, რომ რიბერი უკვე 32 წლის იყო, ბევრმა გაიფიქრა, რომ მას შესაძლოა საერთოდ კარიერა დაესრულებინა, რადგან ეს ფეხბურთში ყველაზე მძიმე დაზიანებაა, რომლის შემდეგაც დაბრუნება არ არის მარტივი. ახალი ეტაპი ჩინებულად მიდიოდა, მაგრამ ამ ტრავმამ სიტუაცია შეცვალა.

დაბრუნება


მაშინ, როდესაც ფრანკი ყველამ ჩამოწერა, მენტალურად ძლიერი რიბერი არ დანებდა და დროზე ადრე დაბრუნდა. 2015 წლის ბოლოს, გერმანიის ბუნდესლიგის პირველი წრის დასასრულს, "მ.ბორუსიასთან" გასვლით თამაშში, ვეტერანი ფრანგი მინდორზე დაბრუნდა და თანაც გოლის გატანა მოახერხა. რიბერიმ "ბაიერნი" განადგურებისგან იხსნა (1:3). თუმცა რამდენიმე დღეში ჩემპიონთა ლიგის ჯგუფური ეტაპის დასკვნით შეხვედრაში ზაგრების "დინამოსთანაც" ითამაშა და ახალი ტრავმა მიიღო. ამჯერად ორი თვე გამოტოვა და მაინც დაბრუნდა! ეს უკვე "დარმშტადტთან" საშინაო შეხვედრაში მოხდა და რიბერიმ ამჯერად საგოლე პასი გააკეთა. მომდევნო მატჩი "ვოლფსბურგთან", მორიგი ასისტი და რიბერი, რომლისთვისაც მუხლის ტრავმა ბოლო უნდა მოეღო, კვლავ მშვენივრად თამაშობდა. დაახლოებით 1 წლიანი პაუზის შემდეგ ფრანკი ისე დაბრუნდა, თითქოს არც არასოდეს მიეღო დაზიანება. მსგავსი რამ მხოლოდ ძლიერი პიროვნებებისა და გენიალური ფეხბურთელების ხვედრია.

გვარდიოლას ბოლო სეზონი ფრანგმა წარმატებით ჩაამთავრა, კვლავ გუნდის ძირითადი შემტევი გახდა, 33 წლის ასაკში "იუვენტუსისა" და "ატლეტიკოს" წინააღმდეგ ძალიან კარგად ითამაშა. თუმცა "ბაიერნს" ამჯერად ძალიან არ გაუმართლა და ჩემპიონთა ლიგის გათამაშებას კვლავ ნახევარფინალში გამოეთიშა. საბოლოოდ, მორიგი დუბლი და გვარდიოლა წავიდა. რიბერიმ კი სამ წელიწადში კიდევ ბევრი ტიტული მოიგო, მაგრამ რაც მთავარია ყველას დაუმტკიცა საკუთარი სიძლიერე.

წინ ალბათ ბოლო სეზონია


5 გოლი და 17 საგოლე გადაცემა - 34 წლის ვეტერანისთვის მშვენიერი სტატისტიკაა არა? თანაც გადახედავ რიბერის გასული სეზონის ჰაილაითებს და ის აშკარად ისეთივე ეფექტურია, როგორც უწინ, "რეალის" წინააღმდეგ საკმაოდ ღირსეულად იასპარეზა, მაგრამ არსებობს რაღაცეები, რაც არ ჩანს მხოლოდ ვიდეოებში. კარლო ანჩელოტისთან ერთად რიბერიმ მინდორზე თავისუფლება მიიღო, კვლავ უამრავი ასისტი გააკეთა, მაგრამ მას უკვე ფიზიკური დაღლილობა ეტყობა. მნიშვნელოვანი თამაშების ბოლოს პაპა კარლო მას მუდმივად ცვლიდა, რადგან ფრანკს უბრალოდ აღარ შეეძლო 90 წუთი გაეძლო უმაღლესი ტემპისათვის. სწორედ ამიტომ, ძალიან დიდი ალბათობით, 2017/18 წლების, რიგით მეათე სეზონი, მისთვის უკანასკნელი იქნება "ბაიერნში" ანუ მთლიანად ფეხბურთშიც, რადგან ის ხომ კარიერას სხვაგან არ დაასრულებს.

შესაძლოა სატრანსფერო ფანჯრის ბოლომდე "ბაიერნმა" კარასკო მოიყვანოს ან დუგლას კოშტას მისცეს უფრო მეტი სათამაშო პრაქტიკა მომდევნო სეზონიდან, მაგრამ ეჭვი არავის შეგეპაროთ, რომ როდესაც ფრანკი მოედანზე გავა, ის ასი პროცენტით დაიხარჯება და საკუთარი კლასის მეშვეობით "ბაიერნს" კვლავ ძალიან დაეხმარება.


10 წელი მართლაც ძალიან დიდი პერიოდია, რომლის განმავლობაში ფრანკ რიბერი "ბაიერნის" მაისურს ღირსეულად ატარებდა და დიდებული კლუბის დიდებული ისტორიის უმნიშვნელოვანესი ნაწილი გახდა. ახალგაზრდა ფრანგი ბიჭუნა "რეკორდმაისტერში" სრულიად უცხოდ მოვიდა, მაგრამ მალევე მოშინაურდა და "რეკორმდაისტერის" ნამდვილი ლეგენდა გახდა. ფრანკი მიუნხენში მხოლოდ იმიტომ არ უყვართ, რომ ამ დიდი წარმატებების ერთ-ერთი მთავარი სულისჩამდგმელია, არც იმიტომ, რომ ძალიან ბევრი ლამაზი გოლი აქვს გატანილი და საოცრად ტექნიკური, დახვეწილი მოთამაშეა, რომლის მსგავსიც ძალიან ცოტაა, არამედ იმიტომ, რომ ის ჭეშმარიტი ბავარიელია! დიახ ფრანკ, ჩვენ აქ ისეთი გვიყვარხარ, როგორიც ხარ! ეს ის შემთხვევაა, როდესაც შრამი ადამიანს კი არ ამახინჯებს, არამედ ალამაზებს.

ახლა კი წინ ძალიან მნიშვნელოვანი სეზონია, რომლის ბოლოსაც "ბაიერნის" ქომაგებს ძალიან მძიმე სურათი ელით. დიდი ალბათობით არიენ რობენი და ფრანკ რიბერი ფეხბურთიდან გაისად წავლენ. ამ ორ ლეგენდასთან დამშვიდობება კი მართლაც უმძიმესი იქნება. თუმცა რიბერი და რობენი ხომ "ბაიერნისთვის" ერთი ორგანიზმია და ალბათ სიმბოლურიც იქნება თუ ისინი ამ დიდ ოჯახს ერთად დატოვებენ.

მოამზადა დავით მაღრაძემ, სპეციალურად BAYERN.GE-სთვის
скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
ფრანკ რიბერი ბლოგი
მსგავსი სიახლეები
კომენტარები
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა