...

ბაიერნი 2:0 მ.ბორუსია - მატჩის ანალიზი

გერმანიის ბუნდესლიგის მერვე ტურის შეხვედრაში "ბაიერნმა" მიუნხენგლადბახის "ბორუსია" მიიღო და ორწლიანი პაუზის შემდეგ პირველად დაამარცხა.

კარლო ანჩელოტის გუნდმა შინ 2:0 იმარჯვა და პირველი ადგილი შეინარჩუნა. "რეკორდმაისტერმა" საკმაოდ კარგი და ლამაზი ფეხბურთი აჩვენა. ახლა კი მატჩის დეტალურ ანალიზს გთავაზობთ.

მატჩის მსვლელობა
ისე, როგორც "პსვ ეინდჰოვენის" წინააღმდეგ, მიუნხენელებმა საკმაოდ აქტიურად დაიწყეს და საწყის 15 წუთში სამი-ოთხი კარგი მომენტი შექმნეს. "ბაიერნი" ფლანგებს შესანიშნავად იყენებდა, ყველაზე მეტს კი არიენ რობენი აქტიურობდა. ის იან ზომერის კარს შორიდან ორჯერ დაემუქრა, მაგრამ ორივეჯერ არაზუსტად. გარდა ამისა, იდეალური მომენტი ჰქონდა რაფინიას, რომელმაც რობენისგან ჩინებული პასი მიიღო, იანიკ ვესტერგორს ბურთი თავზე ტექნიკურად გადაუგდო, მაგრამ მიზანს ცოტათი ასცდა. მოგვიანებით რობენის ჩაწოდებს რობერტ ლევანდოვსკი ვერ მისწვდა, რასაც "ბაიერნის" მორიგი ულამაზესი კომბინაცია მოჰყვა. დუგლას კოშტამ საჯარიმოში დავიდ ალაბას შეუგორა, რომელმაც ბრწყინვალე მოძრაობით მეტოქე ჩამოიცილა და ლევანდოვსკის დაუგორა. პოლონელმა ბურთი შეიგდო, ტექნიკურად დაარტყა, მაგრამ მიუნხენგლადბახის "ბორუსია" ძელმა იხსნა.

კარლო ანჩელოტის გუნდმა ნელ-ნელა ზეწოლა გააძლიერა და მიზანსაც მიაღწია. მე-16 წუთზე რობენმა მორიგი იერიში წამოიწყო, რაფინიამ საჯარიმოში ჩააწოდა და არტურო ვიდალმა ჩინებული თავურით ანგარიში გახსნა. ჩილელ საყრდენს ხელს არავინ უშლიდა, რითიც არტურომ კარგად ისარგებლა. "ბაიერნმა" ცოტა დაისვენა და მორიგი საგოლე შეტევა აწარმოა. რობენი კვლავ საქმეში იყო, ჰოლანდიელი ამჯერად მარცხენა ფრთაზე გადავიდა და ალაბას დაუგორა, რომელის ჩაწოდებას საპირისპირო ფრთიდან დუგლას კოშტა გამოეხმაურა, ბურთი ჩამოიღო და მარჯვენა ფეხით თავისი პირველი გოლი გაიტანა ახალ სეზონში. პირველი ტაიმი იდეალური იყო. "ბაიერნს" ბურთი ეჭირა, ძალიან დამაჯერებლად დომინირებდა, პასების დროს მაქსიმალურ სიფრთხილეს იჩენდა და შედეგიც მშვენიერი იყო.
მეორე ტაიმი შედარებით მშვიდი გამოდგა, რადგან "ბაიერნმა" ძალები დაზოგა და ძირითადად ბურთს აკონტროლებდა. თუმცა, მიუნხენელებმა რამდენიმე მშვენიერი კომბინაცია გაითამაშეს. ერთ-ერთი ასეთი ეპიზოდი შეტევის მარცხენა ფრთაზე მოხდა, როდესაც კოშტამ და ალაბამ "ბორუსიას" მცველები გააბრუეს და ავსტრიელის ჩაწოდების შემდეგ არიენ რობენმა კარს გადააცილა. სტუმრების საუკეთესო მომენტი კი იულიან კორბის გარღვევისა და ჩაწოდების შემდეგ შეიქმნა, რომელსაც ანდრე ჰანი გამოეხმაურა, მაგრამ მისი თავური ხარიხამ მოიგერია. "ბაიერნმა" კარგი ეპიზოდები ბოლოსკენაც შექმნა, მაგრამ ანგარიში აღარ შეცვლილა. შეცვლაზე რენატო სანჩეში, ჯოშუა კიმიხი და ტომას მიულერი შევიდნენ, მაგრამ განსაკუთრებული არაფერი გაუკეთებიათ. კარლო ანჩელოტის გუნდმა პირველ ტაიმში მოპოვებული უპირატესობა უპრობლემოდ შეინარჩუნა - 2:0.

ერთადერთი ჩავარდნა დაცვაში
ყველაზე სასიამოვნო ის არის, რომ დღევანდელ შეხვედრაში ანდრე შუბერტის საკმაოდ შემტევმა და ენერგიულმა გუნდმა, რომელსაც უყვარს სწრაფი შეტევების ორგანიზება და მომენტების შექმნა, ზუსტად კარში ვერცერთხელ დაარტყა. კარლო ანჩელოტიმ დაცვაზე სერიოზულად იმუშავა, მაგრამ "პსვ ეინდჰოვენთან" შეხვედრაში მაინც იყო საგანგაშო ეპიზოდები, მაგრამ დღეს "რეკორდმაისტერის" უკანა ხაზი მხოლოდ ერთხელ ჩავარდა, რაც მისაღებია. თანაც ეს მატჩის დასაწყისში მოხდა, როდესაც "ბორუსიამ" კარგი კონტრშეტევა განახორციელა და ანდრე ჰანის პასის შემდეგ ფაბიან ჯონსონი იდეალურ პოზიციაზე აღმოჩნდა, მაგრამ დარტყმა არ გამოუვიდა. ამ ეპიზოდში დაკარგა პოზიცია რაფინიამ, ხავი მარტინესმა კი უყურადღებოდ იმოქმედა და ზონა ვერ შეავსო. ჰანის ეპიზოდში კი თამაშგარე მდგომარეობა იყო, რომელიც უბრალოდ გვერდითმა მსაჯმა ვერ შეამჩნია.
ასე, რომ "ბაიერნის" დაცვის ხაზი დღეს იდეალურად გამოიყურებოდა, რაც ძალიან სასიამოვნოა. ეს კი იმის ფონზე, რომ გუნდს ფილიპ ლამი და ჟერომ ბოატენგი არ ჰყავდა. ფენომენალური მატჩი ჩაატარა მატს ჰუმელსმა, დავიდ ალაბა კი მარცხენა ფრთაზე ძალიან აქტიური და დამაჯერებელი იყო. თუმცა, ამ სეზონში ყველაზე გამორჩეული ხავი მარტინესია, რომელმაც მორიგი ძლიერი შეხვედრა ჩაატარა. ესპანელმა თითქმის ყოველი ორთაბრძოლა მოიგო და პასების 97% ზუსტად გააკეთა. ეს საოცარი მაჩვენებელია და ხავი მხოლოდ მოკლე პასებს არ აკეთებდა. ძალიან სასიამოვნოა, რომ "რეკორდმაისტერმა" მეტოქეს თითქმის არაფრის გაკეთების უფლება არ მისცა, მით უმეტეს, "მ.ბორუსიას" წინააღმდეგ და მით უმეტეს, დაცვის ორი ლიდერის გარეშე.

შეკრული ცენტრი
თამამად შეიძლება ითქვას, რომ "ბაიერნის" ცენტრმა ამ სეზონში საუკეთესო თამაში აჩვენა. ტიაგო-ალონსო-ვიდალის ტრიო ძალიან ორგანიზებულად, ზუსტად და რაც მთავარია, გუნდურად მოქმედებდა. შეცდომა პასების დროს მინიმუმამდე იყო დაყვანილი, რასაც ემატებოდა ტიაგოსა და ვიდალის აქტიური მოძრაობა. ხაბი ალონსო კი ვინგერებს გრძელი პასებით ამარაგებდა. ალკანტარა კრეატივზე ზრუნავდა, ალონსო ბურთს გონივრულად ანაწილებდა, ვიდალი კი ძალიან ბევრს იბრძოდა, ცენტრში, ფაქტობრივად, ყველა დუელი მოიგო და გუნდს შეტევაშიც დაეხმარა. შეიძლება ითქვას, რო მიუნხენურ კლუბს წინა შეხვედრებში ჩილელი საყრდენი ნახევარმცველი აკლდა. ალონსო ნელია, ტიაგო კი შემოქმედებითი უნარის მქონე ცენტრი, შავ სამუშაოს კი ვიდალი იდეალურად ასრულებს. ეს დღეს ძალიან კარგად გამოჩნდა. არტურომ გუნდს ბალანსი შემატა და გოლიც გაიტანა. ანჩელოტიმ ნახევარდაცვის ხაზი შეკრა, რაც მისთვის ძალიან მნიშვნელოვანია.

კეთილი იყოს შენი დაბრუნება დუგლას
დუგლას კოშტამ ერთი თვე გამოტოვა და ძირითად შემადგენლობაში დღეს დაბრუნდა. ბრაზილიელმა ბრწყინვალე მატჩი ჩაატარა და ყველას დაანახა, რომ "ბაიერნისთვის" საკმაოდ სერიოზული ძალაა. დუგლასს საოცარი ტექნიკა, დრიბლინგი, დარტყმა, სხარტი აზროვნება და ენერგია აქვს, რომლის წყალობითაც ხდება შეუჩერებელი. პირველი ტაიმი კოშტამ ძალიან მაღალ დონეზე ჩაატარა და გოლის გატანაც მოახერხა. იმედია, 26 წლის ბრაზილიელი ფორმას ნელ-ნელა აკრეფს და ანჩელოტის გუნდის უცვლელი ფიგურა გახდება. მას სწორედ ის შესაძლებლობები აქვს, რომელიც იდეალურ ფლანგის მოთამაშეს სჭირდება. "ბაიერნი" კი ახლა ისეთი ტაქტიკით მოქმედებს, რომ დუგლასი ნამდვილად ანჩელოტის უმთავრესი იარაღი იქნება. დღეს ის ღირსეულად დაბრუნდა და ქომაგებს თავი გაახსენა.

საბოლოო ჯამში, მივიღეთ საკმაოდ სოლიდური, მაღალი დონის თამაში, რომელიც "ბაიერნს" ბერლინის "ჰერტასთან" საშინაო გამარჯვების შემდეგ არ უჩვენებია. "პსვ-მ" მანუელ ნოიერს კართან სერიოზული სიმწვავე შექმნა, მაგრამ ამჯერად ყველაფერი წესრიგში იყო. აშკარაა, რომ კარლო ანჩელოტიმ შეცდომებზე იმუშავა და "რეკორდმაისტერი" შეტევაშიც უფრო ლაღად გამოიყურება. შეცდომები მოედნის ცენტრში შემცირდა, კრეატივის დონე კი ამაღლდა. ამას ემატება ისიც, რომ გუნდი ფლანგებსაც უფრო აქტიურად იყენებს და როგორც იქნა, მიუნხენელებმა სისწრაფეებს მოუმატეს. წარუმატებელი სერიის შემდეგ "ბაიერნმა" ორი მშვენიერი, დამაჯერებელი გამარჯვება მოიპოვა და გულშემატკივრები გაახარა.

მოამზადა დავით მაღრაძემ, სპეციალურად Bayern.ge-სთვის
скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
მატჩის ანალიზი
მსგავსი სიახლეები
კომენტარები
zviad
zviad | 23 ოქტომბერი 2016 00:06
ავტორს ბევრ რამეში ვეთანხმები, მაგრამ მინდა შენიშვნებიც გავაკეთო, პირველი - ბავარიამ ორი შესანიშნავი მატჩი კი არ ჩაატარა, არამედ ერთი , შესანიშნავი დღევანდელი შეხვედრა იყო, პსვ სთან თამაშში კი უამრავი შეცდომა დაუშვა დაცვამ და თავისუფლად შეიძლეობდა 3-4 გოლი გაგვეშვა იმ შეხვედრაში, მეორე - ანჩელოტიმ კი არ იმუშავა დაცვის დაჭერაზე, არამედ ჟერომ ბოატენგი დაჯდა სათადარიგოთა სკამზე და ჰუმელსმა და მარტინესმა დაალაგეს ყველაფერი, მესამე - ფენომენალური მატჩი ხავი მარტინესმა ჩაატარა და არა მატს ჰუმელსმა, თუმცა ჰუმელსიც ბრწყინვალე იყო, ნუ მარტინესი ერთხელ შეცდა თამაშის საწყის წუთებში მაგრამ შემდეგ გენიალური იყო
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა