...

ბაიერნი 3:1 ბაიერი - მატჩის ანალიზი

გუშინ საღამოს გერმანიის ეროვნული ჩემპიონატის 55-ე სეზონი დაიწყო და ახალი კამპანია, უკვე ზედიზედ მეხუთედ, მიუნხენის "ბაიერნმა" საკუთარ მოედანზე გახსნა.

კარლო ანჩელოტის გუნდმა ლევერკუზენის "ბაიერს" უმასპინძლა და საკმაოდ სანახაობრივი შოუ დაიდგა, რომელიც მასპინძლების დამაჯერებელი გამარჯვებით დასრულდა - 3:1.

ახლა კი გთავაზობთ გუშინდელი შეხვედრის დეტალურ გარჩევას და 2017/18 წლების სეზონში პირველ ანალიტიკურ სიახლეს, რომელშიც გუშინდელ შეხვედრას გავაანალიზებთ.

მატჩის მსვლელობა

თავდაპირველად უნდა ითქვას, რომ იტალიელმა სპეციალისტმა 4-3-3 განლაგება შეარჩია და მიუხედავად იმისა, რომ თომას მიულერი შეაქო და აღნიშნა, რომ იგი ფლანგის მოთამაშე არ არის, გერმანელი შემტევი მაინც ფრთაზე გაამწესა. მოედნის ცენტრში კი სებასტიან რუდიმ, კორენტინ ტოლისომ და არტურო ვიდალმა დაიწყეს. რუდისა და ტოლისოს გარდა ძირითადში კიდევ ერთი ახალწვეული მოხვდა - ნიკოლას ზიულე, რომელმაც ტრავმირებული ბოატენგი და მარტინესი ჩაანაცვლა.

"რეკორდმაისტერმა" შეხვედრა ჩვეულ სტილში, მაღალ ტემპსა და სისწრაფეებზე დაიწყო. პირველი ზუსტი დარტყმა "ბაიერნის" ახალწვეულმა, ფრანგმა საყრდენმა ნახევარმცველმა, კორენტინ ტოლისომ, განახორციელა. ფრანკ რიბერიმ საჯარიმოში გამჭოლი პასი გააკეთა, ბურთი ლევანდოვსკის მიუვიდა, რომელმაც ტოლისოს დაუგდო და ამ უკანასკნელის დარტყმული ახლო კუთხეში ბერნდ ლენომ მოიგერია. რამდენიმე წუთში რიბერიმ სახიფათო სტანდარტი მოიპოვა, რომელსაც ბუნდესლიგის ახალი სეზონის პირველი გოლი მოჰყვა. სებასტიან რუდიმ კარგად ჩააწოდა და ნიკოლას ზიულემ თავით ბრწყინვალე დარტყმა განახორციელა - 1:0! "ჰოფენჰაიმის" ყოფილმა ლიდერებმა თავი წითელი მაისურით სადებიუტო შეხვედრაშივე წარმოაჩინეს.


ამას ლევერკუზენელების მომენტალური გააქტიურება და საპასუხო შეტევა მოჰყვა. მატს ჰუმელსმა ცენტრში არაზუსტი პასი გააკეთა, რის შემდეგაც კარიმ ბელარაბიმ ბურთი წაიღო, ორი საყრდენი ჩამოიტოვა და საჯარიმოში ადმირ მეჰმედის შეუგორა, მაგრამ შვეიცარიელის დარტყმული სვენ ულრაიხმა ფეხით, ბრწყინვალე სტილში, მოიგერია. ამას არტურო ვიდალის შორეული დარტყმა მოჰყვა, რომელიც კარს ზემოდან გადასცდა. შეხვედრის მე-19 წუთზე კი "ალიანს არენაზე" კიდევ ერთმა დებიუტანტმა გაიტანა გოლი. კუთხურიდან ჩამოწოდებული ბურთი "ბაიერის" გოლკიპერმა, ბერნდ ლენომ, ცუდად გამოიტანა და პირდაპირ არტურო ვიდალს დაასვა. ჩილელმა ბურთი მიიღო და ტერფით ზევით ასწია, ადრესატი კი კორენტინ ტოლისო გამოდგა, რომელმაც თავით მეორე ბურთი გაიტანა.


"ბაიერნის" მეორე გოლს "ბაიერის" მეორე საგოლე მომენტი მოჰყვა. ამჯერად არაზუსტი პასი ვიდალმა გააკეთა, რომელმაც ბურთი საჯარიმოს წინ მყოფ მეჰმედის ჩააბარა. ადმირმა საჯარიმოში ფოლანდს შეუგდო და კევინის დარტყმაც ულრაიხმა ფეხით უგულებელვყო. საპასუხოდ მიუნხენელებმა ბრწყინვალე კომბინაცია გაითამაშეს და ტოლისოს დუბლის გაფორმებაც შეეძლო. რიბერიმ თავისუფალ ზონაში ვიდალს დაუგორა, რომელმაც მარჯვენა ფრთიდან ჩამოსული ტოლისო მოძებნა. კორენტინმა საჯარიმოში მიულერთან კედელი გაითამაშა და დაბალ შორეულ კუთხეში გაუშვა, მაგრამ ლევერკუზენული კლუბი ძელმა გადაარჩინა. საწყისი ნახევარი საათი ძალიან სანახაობრივი, მხიარული და საინტერესო გამოდგა. გუნდებს ბევრი მომენტი ჰქონდათ და ორი გოლიც გავიდა. დარჩენილი 15 წუთი კი "ბაიერნის" დომინირებითა და ბურთის მშვიდად ფლობით მიილია.

შესვენების შემდეგ ბევრი არაფერი შეცვლილა, უბრალოდ "რეკორდმაისტერი" უფრო მოდუნებული ჩანდა. თუმცა ერთი კარგი შეტევის განხორციელება მაინც მოასწრო. ფლანგზე რიბერიმ დავიდ ალაბას ქუსლით ლამაზად გაუყოლა, რომელმაც ჩააწოდა და უეცრად საჯარიმოში რობერტ ლევანდოვსკი წაიქცა. რამდენიმე წამში შეხვედრის მთავარმა არბიტრმა, ტობიას შტილერმა, შეხვედრა შეაჩერა და ვიდეო ასისტენტის დახმარების შედეგად თერთმეტმეტრიანი დანიშნა. ბურთთან თავად 28 წლის პოლონელი ფორვარდი მივიდა და ანგარიში გამანადგურებელი გახადა - 3:0! რობერტმა ბუნდესლიგის ახალ სეზონში საკუთარი ანგარიში გახსნა.

ამის შემდეგ კი უკვე "რეკორდმაისტერის" თამაში გაფუჭდა. მიუნხენელები უბრალოდ დადგნენ და კონტრშეტევებზე დაიწყეს მოქმედება. "ბაიერი" კი შეტევაში ლაღად გამოიყურებოდა, თანაც "ბაიერნი" დაცვაში ბევრ უნებლიე შეცდომას უშვებდა. ლევერკუზენელებმა რამდენიმე ძალიან კარგი ეპიზოდი შექმნეს და დამსახურებული გოლიც გაიტანეს. ბრანდტის დატოვებული ბურთი მეჰმედიმ უძლიერესი და უზუსტესი დარტყმით ულრაიხის კარის ცხრიანში მოათავსა. შეხვედრის მიწურულს "რეკორდმაისტერსაც" ჰქონდა შანსები, მაგრამ ჯერ კინგსლი კომანმა, შემდეგ კი არიენ რობენმა კარგი შესაძლებლობები გაუშვეს ხელიდან.

დებიუტანტების საღამო


გუშინ საღამოს ბუნდესლიგაში მიუნხენური კლუბის მაისურით სამი მოთამაშის დებიუტი შედგა: ნიკოლას ზიულეს, სებასტიან რუდისა და კორენტინ ტოლისოს. სამივე მათგანმა თავის წარმოჩენა უკვე მატჩის საწყის 20 წუთში მოახერხა. რუდიმ თავის კარგ მეგობარ ზიულეს გაატანინა, ხოლო ტოლისომ თავად გამოიჩინა თავი. თუმცა შედეგიანი მოქმედებების გარდა, ეს საღამო დებიუტანტებისათვის მართლაც ძალიან წარმატებული გამოდგა, განსაკუთრებით ზიულესა და ტოლისოსთვის.

21 წლის უნიჭიერესმა გერმანელმა მცველმა შესანიშნავი მატჩი ჩაატარა და მინდორზე ერთ-ერთი საუკეთესო იყო. გატანილი გოლის გარდა ზიულემ დაცვაში ჩინებულად ითამაშა და რამდენიმე სახიფათო იერიში შეაჩერა. ნიკოლასი საკმაოდ დამაჯერებლად და ზუსტად მოქმედებდა. ზიულე ფიზიკურად ძლიერი, ტანმაღალი დამცველია, მაგრამ მიუხედავად დიდი გაბარიტებისა, ბურთს საკმაოდ კარგად აკონტროლებს და მშვენიერი პირველი პასი აქვს. მარტინესისა და ბოატენგის არყოფნაში, გერმანული ფეხბურთის ამომავალი ვარსკვლავი მშვენივრად გამოიყურებოდა.

"ჰოფენჰაიმიდან" მოყვანილი მეორე გერმანელი მოთამაშე, სებასტიან რუდი, "ბაიერის" წინააღმდეგ ცოტათი ჩაკარგული იყო და რამდენიმე შეცდომაც დაუშვა, მაგრამ ცუდად არ უთამაშია. რუდი გერმანიის სუპერთასზე საუკეთესო იყო, ახლა კი ცოტათი სუსტი თამაში ჩაატარა, მაგრამ მაინც ნორმალური. აი მთავარი აღმოჩენა კი 23 წლის ფრანგი საყრდენი გახლდათ, რომელმაც უბრალოდ იდეალური თამაში ჩაატარა. გატანილი გოლის გარდა ტოლისომ "ბაიერნის" შემადგენლობაში მეტოქის კარისკენ ყველაზე მეტჯერ (4) დაარტყა, ყველაზე მეტჯერ (76) შეეხო ბურთს, კიმიხის (11.79 კმ) შემდეგ ყველაზე მეტი (11.16 კმ) ირბინა, ყველაზე მეტი (26) სპრინტი განახორციელა და 7 ორთაბრძოლა მოიგო. თამამად შეიძლება ითქვას, რომ ტოლისო მასპინძლების შემადგენლობაში საუკეთესო მოთამაშე იყო. კორენტინი ძალიან მებრძოლი ფეხბურთელია, კარგი დარტყმითა და მოედნის ხედვით. ის ძალიან წააგავს არტურო ვიდალს და მასთან შედარებით ერთი პლიუსი აქვს - შედარებით დინჯია და უფრო სწრაფი.

ბარემ აქვე აღვნიშნოთ ისიც, რომ 30 წლის ჩილელმა მორიგი შესანიშნავი თამაში ჩაატარა და დაამტკიცა, რომ მისი როლი "ბაიერნში" უბრალოდ უმნიშვნელოვანესია. ვიდალი მოედნის თითოეულ მონაკვეთზე იბრძოდა, რამდენიმე არანორმალური ართმევა განახორციელა და აგრეთვე შესანიშნავ დიაგონალურ პასებს არიგებდა. რაოდენ უხეშიც არ უნდა იყოს არტურო, მისი ბრძოლისუნარიანობა და თამაშის ჩაშლის უნარი "რეკორდმაისტერისათვის" ფუნდამენტალურია.

სუსტი თამაში დაცვაში


მიუხედავად ორბურთიანი სხვაობისა, "ბაიერნის" თამაში არც ისე დამაჯერებელი იყო. "რეკორდმაისტერმა" რეალურად ნორმალური მატჩი ჩაატარა, მაგრამ მეტოქეს უჩვეულოდ ძალიან ბევრის გაკეთების საშუალება მისცა. ლევერკუზენის "ბაიერს" მინიმუმ 4-5 რეალური საგოლე მომენტი ჰქონდა და სამჯერ სვენ ულრაიხმა ფანტასტიკური სეივი განახორციელა, ერთხელ კი ბურთი ცარიელ კარში მდგომ იოზუა კიმიხს მოხვდა. მეორე ტაიმის შუაწელს ლევერკუზენელებმა "რეკორდმაისტერზე" სერიოზული ზეწოლა განახორციელეს და გამოჩნდა, რომ კარლო ანჩელოტის გუნდს დაცვაში სერიოზული ხარვეზები აქვს.

რა შეცდომებზეა საუბარი? ბევრ არაზუსტ გადაცემაზე, თანაც უწყინარ სიტუაციაში, პოზიციის დაკარგვასა და სისხარტის ნაკლებობაში. "ბაიერის" შემტევები სისწრაფეზე მიუნხენელების დაცვას მარტივად არღვევდნენ და მომენტების თითქმის მთელი ნაკადი ჰუმელსი-ალაბას ზონიდან ანუ მარცხენა ფრთიდან შეიქმნა. მატს ჰუმელსმა ძალიან სუსტი მატჩი ჩაატარა. "ბაიერნის" მე-5 ნომერმა უჩვეულდ ბევრი შეცდომა დაუშვა და მოედანი იძულებით დატოვა. მატსი ხელს მუცელზე იკიდებდა და თავს შეუძლოდ გრძნობდა. შესაძლოა მისი სუსტი თამაში სწორედ ამის ბრალიც იყო, მაგრამ ფაქტია - ჰუმელსმა "ბაიერნის" მაისურით ერთ-ერთი ყველაზე ცუდი მატჩი ჩაატარა, მაგრამ ეს იმას სულაც არ ნიშნავს, რომ მის ადგილს ძირითადში რაიმე ემუქრება.

დავიდ ალაბაც დაცვაში არადამაჯერებლად მოქმედებდა, მაგრამ აქ მხოლოდ ორი მოთამაშის დადანაშაულება არასწორია. როგორც კარლო ანჩელოტიმ აღნიშნა, "ბაიერნი" ზონებს შორის დიდ სივრცეებს ტოვებდა. ზიულე-ჰუმელსის თანდემი ახალია, რუდი და ტოლისო ახალწვეულები არიან, ამიტომაც არ არის გასაკვირი რომ მათ მოქმედებებში კომპაქტურობა და სინქრონულობა არ იგრძნობოდა. "რეკორდმაისტერის" დაცვის სუსტი თამაში არამხოლოდ ჰუმელსისა და ალაბას, არამედ მთლიანად უკანა ხაზის ბრალია, რომელიც მოშლილი იყო. თუმცა ამ გაუგებრობის მიუხედავად, ზიულემ და იოზუა კიმიხმა ჩინებულად ითამაშეს. ფილიპ ლამი ალბათ მოგვენატრება, მაგრამ კიმიხმა ძალიან დამაჯერებელი თამაში ჩაატარა და მეორე ტაიმში ტექნიკურ იულიან ბრანდტსაც უმკლავდებოდა. იომ პირველი ტესტი წარმატებით ჩააბარა.

სტანდარტების ფაქტორი

მიუნხენის "ბაიერნმა" სამივე გოლი სტანდარტული სიტუაციიდან გაიტანა, ხოლო ამის გარდა ბევრი არაფერი შეუქმნია. რაშია პრობლემა? კრეატიული და შემოქმედი მოთამაშეების ნაკლებობაში. მიუხედავად იმისა, რომ ვიდალი და ტოლისო ძალიან კარგად მოქმედებდნენ მეტოქის საჯარიმოსთან, ისინი ვერაფრით შეცვლიან ტიაგო ალკანტარასა და ხამეს როდრიგესს. ამ ორი ტექნიკური და მრავალფეროვანი ნახევარმცველის არყოფნა გუნდს დაეტყო, უფრო მეტად მაინც ტიაგოსი, რადგან ხამესი ახალწვეულია და მისი თამაში ოფიციალურ დონეზე ჯარ არ გვინახავს. ფრანკ რიბერი იბრძოდა, მაგრამ უნდა ვაღიაროთ, რომ ვეტერან ფრანგს ახალგაზრდა ბენჟამინ ჰენრიხსი კარგად უმკლავდებოდა. მატჩის მიწურულს კომანი თამაშში კარგად ჩაერთო და უფრო მეტად გაამწვავა. იგივე ითქმის რობენზე, რომელმაც უნაყოფო მიულერი შეცვალა. თომასმა "ბაიერის" წინააღმდეგ ბევრი იმუშავა, მაგრამ მოედანზე თითქმის არ ჩანდა. რობერტ ლევანდოვსკი? თუ პენალტს არ ჩავთვლით, პოლონელს ძალიან სუსტი თამაში ჰქონდა.

ასე, რომ მიუხედავად გამარჯვებისა, "ბაიერნის" თამაშში ბევრი ხარვეზია, რომელიც დროთა განმავლობაში უნდა გამოსწორდეს. ანჩელოტიმ რაც შეიძლება სწრაფად უნდა მოძებნოს ოპტიმალური შემადგენლობა. ამ თერთმეტეულით "რეკორდმაისტერს" დიდი წარმატებების მიღწევა ძალიან გაუჭირდება, რადგან უფრო მეტი კრეატივი და აზროვნებაა საჭირო. სტანდარტებზე აქცენტის გაკეთება მიუნხენელების სტილი არასოდეს ყოფილა.

ისტორიული მოვლენა


ბოლოს კი აუცილებლად უნდა აღვნიშნოთ ის ისტორიული მოვლენა, რომელიც გუშინ დაფიქსირდა - გერმანული ფეხბურთის ისტორიაში პირველად ამოქმედდა ვიდეო ასისტენტი და "ვიდეორეფერის" გადაწყვეტილებით "ბაიერნმა" პენალტი მოიპოვა. შეხვედრის 51-ე წუთზე დავიდ ალაბას ჩაწოდების შემდეგ, ჩარლზ არანგისთან ორთაბრძოლისას, რობერტ ლევანდოვსკი წაიქცა და ტობიას შტილერმა რეაგირება არ მოახდინა. თუმცა მას სპეციალურ ოთახში მყოფი ასისტენტები დაეხმარნენ და ანიშნეს, რომ პოლონელზე თამაშის წესები დაირღვა, ამიტომაც პენალტი უნდა დანიშნულიყო.


როგორც ხედავთ, კონტაქტი ნამდვილად არის, მაგრამ უნდა ვაღიაროთ, რომ 100%-იანი პენალტი ამ ეპიზოდში ნამდვილად არ ყოფილა. თუმცა ლევანდოვსკი საჯარიმოში შერბოდა და სისწრაფეზე ასეთი კონტაქტიც საკმარისია, რათა მოთამაშემ წონასწორობა დაკარგოს. მსაჯებმა ეს მომენტი რამდენიმე ეკრანზე ნახეს და ეჭვი არ უნდა შევიტანოთ მათი გადაწყვეტილების სისწორეში, მაგრამ თამაშის შემდეგ "ბაიერნის" ყოფილმა სპორტულმა დირექტორმა და ახლა "Eurosport-ს" ექსპერტმა, მატიას ზამერმა, საინტერესო კომენტარი გააკეთა: "ვიდეო ასისტენტი ნამდვილად კარგია, მაგრამ დარწმუნებული ვარ, ჩვენ მაინც მოგვიწევს რამდენიმე ეპიზოდის კამათის ქვეშ გარჩევა." 

აი ასე დაიწყო გერმანიის ბუნდესლიგის ახალი სეზონი მიუნხენის "ბაიერნმა". პირველი სამი ქულა აქტივშია, ახლა კი კარლო ანჩელოტიმ მუშაობა უნდა გააგრძელოს, მას საკმაოდ ბევრი რამ აქვს გასაუმჯობესებელი.скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
მატჩის ანალიზი ბუნდესლიგა
მსგავსი სიახლეები
კომენტარები
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა