...

ჰოფენჰაიმი 2:0 ბაიერნი - მატჩის ანალიზი

გუშინ საღამოს მიუნხენის "ბაიერნს" ბუნდესლიგის მიმდინარე სეზონში პირველი სერიოზული გამოცდა ჰქონდა, რომელიც წარუმატებლად დასრულდა და კარლო ანჩელოტის გუნდმა პირველი მარცხი იგემა.

"რეკორდმაისტერი" ზინჰაიმში "ჰოფენჰაიმის" წინააღმდეგ ზედიზედ მეორედ დამარცხდა, თანაც ისე, რომ გოლიც ვერ გაიტანა - 0:2. ახლა კი ტრადიციულად გთავაზობთ მატჩის დეტალურ განხილვასა და ანალიზს.

მატჩის მსვლელობა

სანამ მატჩის პერიპეტიებს მიმოვიხილავდეთ, სასტარტო შემადგენლობაზეც უნდა ვისაუბროთ. "ბაიერნს" ესპანელი ცენტრალური მცველი, ხავი მარტინესი დაუბრუნდა და ნიკოლას ზიულეს ადგილი დაიკავა. ტრავმირებული დავიდ ალაბასა და ხუან ბერნატის არყოფნაში კი მარცხენა ფრთაზე რაფინიამ იმოქმედა. მოედნის ცენტრში ანჩელოტიმ არტურო ვიდალი დაასვენა და ტოლისო-რუდი-ტიაგოს ტრიო დააყენა. შეტევაში კი ფლანგებზე მიულერი და კომანი თამაშობდნენ, ფრანკ რიბერი და არიენ რობენი კი თადარიგში დარჩნენ.

შეხვედრის სტარტი კარგი გამოვიდა. "ბაიერნმა" ბურთი დაიჭირა, კონრტოლი დააწესა და ერთი კარგი მომენტიც შექმნა. მარცხენა ფრთიდან მიულერის ჩაწოდების შემდეგ ლევანდოვსკიმ ბურთი ხარიხას გაარტყა. პოლონელმა ბურთს ფეხი ცუდად მოარტყა, მაგრამ ხიფათი მაინც შეიქმნა. "რეკორდმაისტერი" დომინირებდა და შეტევებს ნელ-ნელა აძლიერებდა, მაგრამ ცენტრში ცოტათი სუსტად მოქმედებდა. შეხვედრის 27-ე წუთზე კი მატს ჰუმელსის უყურადღებობას პირველი გოლი მოჰყვა. მიუნხენური გუნდის საჯარიმოსკენ გრძელი პასი გაკეთდა, რომლის დროსაც უკან მხოლოდ ჰუმელსი და რაფინია იყვნენ დარჩენილი. მატსმა ბურთი თავით ზედმეტად ძლიერად მიიღო და მოედნის ფარგლებს მიღმა გადასულმა წინ ძლიერად დაარტყა, რათა მასპინძლებს აუტი სწრაფად არ მოეწოდებინათ. თუმცა კრამარიჩმა სხვა ბურთი აიღო და სანამ მატსი საჯარიმოსკენ მისეირნობდა თავისუფალ მარკ უტს გადაუგდო, რომელმაც მიიღო და ახლო კუთხეში ძლიერდა დაარტყა - მანუმ ბურთს ხელი მიარტყა, მაგრამ ვეღარ მოიგერია, 1:0!


პირველი ტაიმის ბოლო 15 წუთი "ბაიერნი" უპირატესობას ფლობდა, მაგრამ შეტევაში არაფერი გამოსდიოდა. კომანი და მიულერი ფლანგებს ხშირად ცვლიდნენ, თუმცა "ჰოფენჰაიმი" თავს კარგად იცავდა. ტიაგოც ცოტათი შებოჭილი ჩანდა და აშკარაა, რომ ესპანელი ჯერ ოპტიმალურ ფორმაში არ იმყოფება. ტაიმის ბოლოს ერთი მომენტი მასპინძლებსაც ჰქონდათ, მაგრამ ცუბერის დარტყმა შორეულ კუთხეში ნოიერმა ლამაზ სტილში მოიგერია. საბოლოოდ 0:1 და შესვენებაზე "რეკორდმაისტერი" იმედგაცრუებული გავიდა.

მეორე ტაიმის დასაწყისში "ბაიერნს" ორი ძალიან კარგი მომენტი ჰქონდა და ორივე მარცხენა ფრთიდან შეიქმნა. რაფინიამ საჯარიმოში მიულერის შეუგორა და თომასმა ქუსლით ლევანდოვსკის ბრწყინვალე პასი გაუკეთა. პოლონელი თამაშგარეში იმყოფებოდა, მაგრამ ეს მსაჯებმა ვერ დაინახეს, ხოლო რობერტმა კარს ააცილა. მალევე რაფინიას პასით კომანი დარჩა საჯარიმოში, ცენტრისკენ შეიწია და დაარტყა, მაგრამ არაზუსტად. საპასუხოდ კი მიუნხენელებმა მორიგი უაზრო გოლი გაუშვეს. ბიჩაკჩიჩმა ბურთი მეტოქის საჯარიმოსკენ ჩააგდო და რაფინიამ თავით ამოიტანა. თუმცა მიულერს საჯარიმოს სიახლოვეს დემირბაიმ ბურთი მოპარა, მარცხნივ ცუბერს დაუგორა, ხოლო ამ უკანასკნელმა საჯარიმოში ჩამოსულ უტს დაუგორა და მარკმა ჭკვიანური დარტყმით ახლო კუთხეში, ნოიერის მოძრაობის საწინააღმდეგოდ, დუბლი გაიფორმა.


მოგვიანებით ანჩელოტიმ თამაშში არიენ რობენი, ფრანკ რიბერი და ხამეს როდრიგესი ჩართო. "ბაიერნი" უდიდეს უპირატესობას ფლობდა, მაგრამ შეტევაში ძალიან უჭირდა. მარცხენა ფლანგიდან კომანი ბევრს აქტიურობდა და ლევანდოვსკის ერთი კარგი მომენტიც შეუქმნა, მაგრამ პოლონელს მარტო რამდენიმე მცველის გარემოცვაში უჭირდა. ყველაზე რეალური შანსი კი ხავი მარტინესს ჰქონდა. ხამესის ჩაწოდების შემდეგ ესპანელმა თავით დაარტყა და ოლივერ ბაუმანმა ფენომენალური სეივი განახორციელა. კომანის შემდეგ ყველაზე მეტს არიენ რობენი ცდილობდა, მაგრამ ჰოლანდიელიც აშკარად ვერ არის ოპტიმალურ ფორმაში. საბოლოოდ, 0:2 და "ჰოფენჰაიმმა" "ბაიერნის" უაზრო შეცდომების წყალობით დამაჯერებლად იმარჯვა.

მთავარი პრობლემა წაგება არ არის


მიუნხენურმა კლუბმა ზინჰაიმში პირველი მარცხი განიცადა და ახლა სატურნირო ცხრილში უჩვეულოდ დაბალ პოზიციას იკავებს, მაგრამ მთავარი პრობლემა ამაში როდია. "ჰოფენჰაიმმა" მიუნხენური გუნდის ორი უაზრო შეცდომის გამო იმარჯვა და "სოფლელების" თავკაცმა, იულიან ნაგელსმანმაც, აღიარა, რომ მისი გუნდის გამარჯვება ბოლომდე დამსახურებული არ არის. თუმცა პრობლემა იმაშია, რომ ეს სუფთა 0:0-ს თამაში იყო და "ბაიერნს" შეტევაში ძალიან, ძალიან უჭირს. შეიძლება ითქვას, რომ ერთადერთი შედარებით ნათელი წერტილი კინგსლი კომანი იყო, რომელიც მუდმივად ამწვავებდა, მაგრამ მას აკლია თამაშის საკუთარ თავზე ბოლომდე აღების უნარი. ფრანგს შეუძლია ინდივიდუალურად რამდენიმე მცველის მოტყუება, მაგრამ საბოლოო გადაწყვეტილების მიღება უჭირს. თომას მიულერმა ერთი არაორდინალური მოძრაობით ალბათ მატჩის საუკეთესო მომენტი შექმნა, მაგრამ დარჩენილი დრო ბევრი არაფერი გაუკეთებია. თომასს ფლანგზე თამაში არ მისდის, ანჩელოტი კი მას ჯიუტად ამ პოზიციაზე იყენებს.

რა შეიცვალა მინდორზე რიბერის, რობენისა და ხამესის გამოჩენის შემდეგ? არაფერი. უბრალოდ "ბაიერნის" მეტოქის საჯარიმოში ჩაწოდებების რაოდენობა გაიზარდა. "რეკორდმაისტერი" მხოლოდ ფლანგებიდან უტევდა და ალბათ ამ შეტევების 90-ზე მეტი პროცენტი უაზრო ჩაწოდებით სრულდებოდა, რომლის დროსაც "ჰოფენჰაიმის" მცველებს ბურთი მარტივად ამოქონდათ. თუ მიუნხენური გრანდი შეტევაში ასე ერთფეროვნად იმოქმედებს, შედეგის მიღწევა ძალიან გაუჭირდება. რა თქმა უნდა, ერთი მატჩის გამო პანიკა საჭირო არ არის, მაგრამ უკვე მომდევნო თამაშებში ანჩელოტიმ უნდა დაგვანახოს, რომ "ბაიერნს" მეტოქის დაცვის გასარღვევად კონკრეტული გეგმა, თამაში აქვს და მხოლოდ ჩაწოდებების იმედზე არ იქნება.

ბრწყინვალე რაფინია


გასულ სეზონში, როდესაც "ბაიერნი" სტუმრად "ჰოფენჰაიმთან" 0:1 დამარცხდა, მიუნხენური გუნდის შემადგენლობაში საუკეთესო რაფინია იყო და გუშინაც ასე გახლდათ. 31 წლის ბრაზილიელმა დაცვის მარცხენა ფრთაზე იმოქმედა, მაგრამ ჩინებულად გამოიყურებოდა და ძალიან კარგი თამაში აჩვენა. ბრაზილიელი დაცვაში საიმედოდ მოქმედებდა, შეტევაში კი გუნდს ეფექტურად ეხმარებოდა. მეორე ტაიმის დასაწყისში ორი საგოლე მომენტი "ბაიერნმა" სწორედ რაფინიას დახმარებით შექმნა. ზაფხულში მას შესაძლოა გუნდი დაეტოვა, მაგრამ ახლა კარგია, რომ რაფინია დარჩა და მისი სახით კარლო ანჩელოტის საკმაოდ კვალიფიციური და უკვე გამოცდილი შემცვლელი ჰყავს. იგი ბურთს ყველაზე მეტჯერ (107) შეეხო და ძალიან დამაჯერებლად გამოიყურებოდა.

წლების წინ რაფინიას ბევრი დასცინოდა, მაგრამ ფაქტია, რომ პეპ გვარდიოლას პერიოდიდან მოყოლებული მან სერიოზული პროგრესი განიცადა და ახლა მშვენიერი განაპირა მცველია, რომელსაც საჭიროების შემთხვევაში შეგიძლია თავისუფლად ენდო.

ხამესის დებიუტი


ზინჰაიმში მიუნხენის "ბაიერნის" კოლუმბიელი ახალწვეულის, ხამეს როდრიგესის, დებიუტი შედგა. ხამესმა მატჩის 78-ე წუთზე მიულერი შეცვალა და "რეკორდმაისტერის" მაისური ბუნდესლიგაში პირველად მოირგო. ბუნებრივია, დარჩენილ 12-15 წუთში როდრიგესმა ბევრი ვერაფერი მოასწრო, მაგრამ ის გერმანიას ნელ-ნელა მოერგება და მომდევნო თამაშებში ალბათ ძირითად შემადგენლობაშიც ვიხილავთ. ხამესის დებიუტი უკვე შედგა, ახლა კი მისგან უფრო აქტიურ და შედეგიან მოქმედებებს ველით.

თომასის მე-400!


თომას მიულერმა მიუნხენური გრანდის მაისურით თავისი მე-400 ოფიციალური მატჩი ჩაატარა! 27 წლის გერმანელმა ზინჰაიმში არც ისე კარგი მატჩი ჩაატარა, მაგრამ ეს შეხვედრა მისთვის საიუბილეო გამოდგა. 27 წლის ასაკში 400 მატჩი და 161 გოლი - ეს ფენომენალური მაჩვენებელია, მაგრამ მიულერს ახლა რთული პერიოდი უდგას. იმედი ვიქონიოთ, რომ მიულერი მოუმატებს და კარლო ანჩელოტის სისტემაში ადგილს დაიმკვიდრებს.

ალბათ ყველას ახსოვს მიულერის სადებიუტო მატჩი ბუნდესლიგაში, როდესაც ლუი ვან გაალმა ახალგაზრდა გერმანელი ყმაწვილი "სიგნალ იდუნა პარკზე" გაიყვანა და მიულერმა დორტმუნდის "ბორუსიას" ორი ლამაზი ბურთი გაუტანა. მას შემდეგ იგი "ბაიერნის" ძირითადი ფეხბურთელი და ნამდვილი სიმბოლო გახდა. 400 თამაში ფანტასტიკური მაჩვენებელია! მიულერი "ბაიერნის" ნამდვილი ლეგენდაა და რაც არ უნდა ცუდ ფორმაში იმყოფებოდეს ის, ქომაგებისგან მუდმივად მხარდაჭერას იმსახურებს. თომას, ჩვენ გვჯერა შენი!

მესამე მატჩის კვალობაზე ისედაც ბევრი ვისაუბრეთ, ახლა კი მხოლოდ იმას გეტყვით, რომ ორ დღეში "ბაიერნი" ჩემპიონთა ლიგის ჯგუფურ ეტაპს დაიწყებს და "ანდერლეხტთან" საშინაო თამაშში ეცდება რეაბილიტაციას.скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
ბუნდესლიგა მატჩის ანალიზი
მსგავსი სიახლეები
კომენტარები
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა