...

პრევიუ: ბაიერნი - პსჟ

იუპ ჰაინკესის დაბრუნების შემდეგ უკვე 1 თვე გავიდა და 72 წლის ლეგენდარულ გერმანელს ახლა სეზონის ყველაზე რთული გამოცდა ელის - "პარი სენ ჟერმენთან" თამაში, რომელიც "ბაიერნს" რეალურ ამბიციებს დაგვანახებს.

ბაიერნი - პსჟ

ჩემპიონატი: ჩემპიონთა ლიგის ჯგუფური ეტაპი, VI ტური
თარიღი: 5 დეკემბერი, 23:45 საათი
სტადიონი: "მიუნხენ არენა", მიუნხენი
მთავარი მსაჯი: ჩიუნეტ ჩაქირი (თურქეთი)
პირდაპირი ტრანსლიაცია: საზოგადოებრივი მაუწყებელი

გუნდების წინასამატჩო მდგომარეობა


მიუნხენგლადბახში მარცხის შემდეგ მიუნხენის "ბაიერნმა" შინ "ჰანოვერთან" რეაბილიტაცია მოახდინა და მეტოქე 3:1 დაამარცხა, მაგრამ გუნდის თამაში პირველ ტაიმში არადამაჯერებელი იყო. დაცვაში დაშვებული შეცდომების გარდა "რეკორდმაისტერმა" რამდენიმე რეალური საგოლე მომენტიც გააფუჭა, რაც "პსჟ-ს" წინააღმდეგ დაუშვებელია - მიუნხენელებმა სეზონის მატჩი უნდა ჩაატარონ და დაამტკიცონ, რომ ევროპაში კვლავ ერთ-ერთი საუკეთსონი არიან. პარიზში გამანადგურებელი მარცხის შემდეგ "ბაიერნის" პოზიციები შეირყა და ახლა აუცილებელი არა ჯგუფის მოგება, არამედ დაკარგული პრესტიჟის დაბრუნებაა. "ჰანოვერის" წინააღმდეგ მიუნხენურ კლუბს თვე-ნახევრიანი პაუზის შემდეგ თომას მიულერი დაუბრუნდა და 28 წლის გერმანელმა ბრწყინვალე მატჩი ჩაატარა. შაბათს იდეალურად გამოიყურებოდა კინგსლი კომანიც, რომელსაც ჯერ კიდევ აწუხებს ტკივილები და ჰაინკესი იმედოვნებს, რომ ახალგაზრდა ფრანგი მზად იქნება. ხამეს როდრიგესი კი მატჩიდან მატჩამდე უმატებს და იუპმა დაანონსა, რომ კოლუმბიელი სასტარტო შემადგენლობაში იქნება. ტიაგო ალკანტარასა და არიენ რობენის არყოფნაში "ბაიერნს" ძალიან გაუჭირდება, მაგრამ არტურო ვიდალმა აკრიფა ფანტასტიკური ფორმა, შეტევაში კი "ბაიერნს" ფრანკ რიბერიც დაუბრუნდა. 34 წლის ფრანგმა "ჰანოვერის" წინააღმდეგ რამდენიმე წუთი დაჰყო მოედანზე და მიუხედავად იმისა, რომ უკვე ასაკშია, სკამზე რიბერის ყოლა მაინც სასიამოვნოა. "ბაიერნისთვის" ახლა სეზონის პირველი ნახევრის დასკვნითი ნაწილი იწყება და იუპ ჰაინკესის გუნდი საკუთარი ქომაგების თვალწინ მაქსიმუმს გააკეთებს.


"პარი სენ ჟერმენი" გასულ უქმეებზე როგორც იქნა დამარცხდა. რაოდენ უცნაურიც არ უნდა იყოს, პირველი გუნდი, რომელმაც უნაი ემერის მფრინავი გუნდი შეაჩერა საფრანგეთის ლიგა 1-ს ახალწვეული "სტრასბურგი" გახდა - სტრასბურგელებმა დედაქალაქელები 2:1 დაამარცხეს და "პსჟ" მიუნხენში გაბრაზებული ჩავიდა. შეიძლება, ზოგისთვის ეს ძალიან რთულად მისაღები იყოს, მაგრამ ფაქტია, რომ "პსჟ-ში" ჩადებულმა დიდმა ინვესტიციებმა თავისი შედეგი გამოიღო და ახლა პარიზელებს ევროპაში უძლიერესი შეტევითი ხაზი ჰყავთ: ნეიმარი-კავანი-მბაპეს ტრიო ფენომენალურად გამოიყურება და ჩემპიონთა ლიგის ჯგუფურ ეტაპზე "პსჟ-მ" უკვე 24 ბურთი გაიტანა. იულიან დრაქსლერი, ანხელ დი მარია და ლუკას მოურა კი ხშირად სკამზე რჩებიან. მოედნის ცენტრში "პსჟ-ს" ჩინებული მარკო ვერატი და უნიჭიერესი ადრიენ რაბიო ჰყავს. პარიზელთა შედარებით სუსტი რგოლი დაცვის ხაზია, მაგრამ უნაი ემერის გუნდი გოლებსაც იშვიათად უშვებს. ცხადია, რომ ამ გუნდის შეჩერება ყველას ძალიან გაუჭირდება, მაგრამ იუპ ჰაინკესმა მატჩის წინ გონივრულად აღნიშნა, რომ ექსტრაორდინალური მოთამაშეებით დაკომპლექტებულ გუნდსაც სჭირდება ერთობა და კარგი ატმოსფერო, რითიც "პსჟ" ვერ დაიკვეხნის (ნეიმარსა და ედინსონ კავანის შორის არსებულ კონფლიქტზე დაყრდნობით). რაც შეეხება დანაკლისს, "პსჟ-ს" მხოლოდ ვეტერანი ტიაგო მოტა დააკლდება, რომელსაც დრაქსლერი ჩაანაცვლებს და "პსჟ-ს" ტაქტიკაზე 4-2-3-1 გახდება.

"პარი სენ ჟერმენი" ახლა ევროპაში ერთ-ერთი უძლიერესი გუნდია, რომელიც ფენომენალურ ფორმაშია, მაგრამ მიუნხენის "ბაიერნი" არასოდეს ნებდება, მით უმეტეს, საკუთარ მოედანზე. ასე, რომ მიუნხენელები რევანშის ასაღებად ყველაფერს გააკეთებენ.

სავარაუდო შემადგენლობები


ბაიერნს დააკლდებიან: რობენი (ბარძაყი), ტიაგო (ბარძაყი), ბერნატი (ბარძაყი), ნოიერი (ტერფი).

პსჟ-ს დააკლდება: ტიაგო მოტა (მუხლი).

საინტერესო ფაქტები

5 ტურის შემდეგ "პსჟ" 15 ქულით ჯგუფში პირველ ადგილს იკავებს, "ბაიერნი" კი 12 ქულით მეორე პოზიციაზეა. გარდა ამისა, პარიზელებს ბურთების სხვაობა +23 აქვთ, ხოლო მიუნხენელებს მხოლოდ +5, რაც იმას ნიშნავს, რომ "რეკორდმაისტერს" პარიზში მიღებული სამბურთიანი ჩამორჩენის აღმოფქვრა არ ჰყოფნის და პირველი ადგილის მოსაპოვებლად "პსჟ" მინიმუმ 4 ბურთით უნდა დაამარცხონ!

მიუნხენის "ბაიერნი" და "პარი სენ ჟერმენი" ერთმანეთს 2000 წლის შემდეგ პირველად უპირისპირდებიან. "ბაიერნი"და "პსჟ" ამ სეზონამდე ერთმანეთს სულ 6-ჯერ შეხვდნენ და ყველა მატჩი ჩემპიონთა ლიგის ჯგუფური ეტაპის ეგიდით გაიმართა.

ამ გუნდების გზები ბოლოს 2000/01 წლების სეზონში გადაიკვეთა. პარიზში ფრანგებმა 1:0 იმარჯვეს, მიუნხენში კი "ბაიერნმა" ჰასან სალიჰამიჯიჩისა (რომელიც ახლა გუნდის სპორტული დირექტორია) და პაულო სერჟიოს გოლებით 2:0 მოიგო, საბოლოოდ კი იმ სეზონში ჩემპიონთა ლიგის ტიტულიც მოიპოვა.


1997/98 წლების სეზონში გუნდებმა ასევე საშინაო გამარჯვებები გაცვალეს. მიუნხენში გერმანელებმა "პსჟ" ჯოვანი ელბერისა და კარსტენ იანკერის დუბლებით 5:1 გაანადგურეს, პარიზელებმა კი რევანში საკუთარ მოედანზე აიღეს - 3:1.


"პსჟ-სა" და "ბაიერნის" პირველი დაპირისპირებები კი 1994/95 წლების კამპანიაში გაიმართა. პარიზში ფრანგებმა ჯორჯ ვეასა და დანიელ ბრავოს ბურთებით 2:0 მოიგეს, მიუნხენში კი გამარჯვების მომტანი გოლი ისევ ჯორჯ ვეამ შეაგდო - 1:0.


გამოდის, რომ ურთიერთშეხვედრებში უპირატესობა "პარი სენ ჟერმენს" აქვს: უკვე 5 მოგება და ორი წაგება.

მიუნხენური გრანდი ფრანგულ კლუბს 2012/13 წლების სეზონის შემდეგ პირველად უმასპინძლებს. მაშინ იუპ ჰაინკესის გუნდმა საფრანგეთის მოქმედი ჩემპიონი "ლილი" მიუნხენში 6:1 გაანადგურა.

საერთ ჯამში, "ბაიერნს" საკუთარ მოედანზე ლიგა 1-ს გუნდების წინააღმდეგ ძალიან კარგი სტატისტიკა აქვს: 10 მოგება, 2 ფრე და 3 წაგება.


"რეკორდმაისტერმა" ფრანგული კლუბების წინააღმდეგ მიუნხენში ბოლო სამი მატჩი მოიგო, ხოლო მანამდე 4 მატჩიანი მოუგებელი სერია (2 ფრე, 2 მარცხი) ჰქონდა.

მიუნხენის "ბაიერნს" ჩემპიონთა ლიგის ჯგუფურ ეტაპზე ზედიზედ 11 საშინაო თამაში აქვს მოგებული, რაც საკლუბო რეკორდია. ეს სერია 2015 წლის სექტემბრიდან დაიწყო.

"რეკორდმაისტერმა" ჯგუფური ეტაპი გასულ სეზონშიც მეორე ადგილზე დაასრულა, რაც 2009/10 წლების სეზონის შემდეგ პირველად მოხდა. თუმცა 1/16 ფინალურ ეტაპზე "ბაიერნმა" ლონდონის "არსენალს" შეხვდა და მეტოქე ორი მატჩის ჯამში 10:2 გააცამტვერა.


იუპ ჰაინკესს ჩემპიონთა ლიგაზე ბრწყინვალე მაჩვენებელი აქვს - ზედიზედ 8 მოგება, რაც არცერთ გერმანელ სპეციალისტს არ გაუკეთებია.

"პარი სენ ჟერმენს" ბოლო სამი ვიზიტიდან გერმანიაში ორი მოგებული აქვს, ხოლო ერთხელ ფრედ ითამაშა.

საერთო ჯამში კი პარიზელებს სტუმრად გერმანულ კლუბებთან დაბალანსებული მაჩვენებელი აქვთ: 3 მოგება, 1 ფრე და 3 წაგება.

"პარი სენ ჟერმენს" ჩემპიონთა ლიგის ჯგუფურ ეტაპზე უკვე 24 გოლი აქვს გატანილი, რაც ტურნირის ისტორიაში საუკეთესო მაჩვენებელია. წინ კი კიდევ ერთი მატჩია.


"პსჟ-ს" შეუძლია, რომ გახდეს მხოლოდ მე-7 ფრანგული კლუბი, რომელიც ჯგუფურ ეტაპს 100%-იანი შედეგით დაასრულებს.

პარიზული კლუბის შემტევმა, ნეიმარმა, ჯგუფური ეტაპის ხუთივე ტურში გაიტანა გოლი. არცერთ მოთამაშეს არ გაუტანია ბურთი 6-დან 6 თამაშში ჯგუფურ ეტაპზე.

"პსჟ-ს" ჩემპიონთა ლიგაზე ბოლო 11 გასვლითი თამაშიდან 7 მოგებული აქვს, მათ შორის 5:0 გლაზგოში და 4:0 ბრიუსელში მიმდინარე სეზონში.


მწვრთნელების წინასამატჩო კომენტარები

იუპ ჰაინკესი: "რეალისტები უნდა ვიყოთ. თუ ბურთების სხვაობას გადავხედავთ, ნამდვილად ვერ ვიტყვით, რომ ჯგუფის პირველ ადგილზე დასრულებისთვის ვიბრძოლებთ. თუმცა უნდა დავამტკიცოთ, რომ "პსჟ-ს" დონის გუნდებთან ბრძოლა შეგვიძლია.

პარიზელებმა გასულ სეზონში ნახევარი მილიონის ინვესტიცია ჩადეს გუნდში. ჩვენ კი გვინდა, რომ საკუთარო ქომაგები გავახაროთ და მათ სასიამოვნო საღამო ვაჩუქოთ. იმედი მაქვს, მათ კარგი თამაშით გავახურებთ.

ვფიქრობ, რომ გუნდს, რომელსაც ჩემპიონთა ლიგის მოგების პრეტენზია აქვს, უმაღლესი დონის, ექსტრაორდინალური მოთამაშეები უნდა ჰყავდეს. თუმცა ამავდროულად საჭიროა, რომ ისინი ერთმანეთს კარგად უგებდნენ და ატმოსფერო იყოს კარგი. მოთამაშეები ერთმანეთს პატივს უნდა სცემდნენ და მათ შორის განხეთქილებები არ უნდა იყოს.


რა თქმა უნდა, ჯგუფის მოგება უმჯობესია, მაგრამ ბოლო წლებში შედეგები გვიჩვენებს, რომ ამ ტურნირის მოსაგებად ეს სულაც არ არის აუცილებელი.

არ ვიცი ფრანკ რიბერი ითამაშებს თუ არა. ეს იმაზე იქნება დამოკიდებული თუ როგორ იგრძნობს თავს დილით თომას მიულერი. ისიც ხანგრძლივი პაუზის შემდეგ დაბრუნდა. კინგსლი კომანსაც მცირე პრობლემები აქვს, ამიტომ ხვალ ძალიან ბევრი რამ გვაქვს გადასაწყვეტი. თუმცა კომანი ძალიან მოტივირებულია, ამიტომ მჯერა, რომ ის ხვალ ჩემთან მოვა და მეტყვის, რომ არანაირ ტკივილს არ გრძნობს.

არამგონია, რომ ბიჭები რევანშზე ფიქრობდნენ. ეს სიტყვა ფეხბურთში ძალიან არ მომწონს. ერთმანეთს უბრალოდ ორი დიდი კლუბი უპირისპირდება. ერთ მხარეს არის ისტორია და ტრადიციები, ხოლო მეორე მხარეს ახალი ძალა და ენერგიები.

ხამესი კი მიუნხენში თავს სულ უფროდაუფრო კომფორტულად გრძნობს, რაც მის თამაშზეც აისახება. ის არამხოლოდ კარგი ფეხბურთელი, არამედ სასიამოვნო ადამიანია. ის ხვალ ძირითადში დაიწყებს.

ხვალ უმაღლესი დონის ტესტი გვლოდება."

უნაი ემერი: "ორი აზრი არ არსებობს, რომ "ბაიერნს" ევროპაში უდიდესი ისტორია აქვს. "პსჟ" კი ახალი ძალა, რომელსაც ამხელა ისტორია ნამდვილად არ გააჩნია.

ხვალ ჩვენ ვიხილავთ ორ გუნდს, რომლებიც მხოლოდ გამარჯვებისთვის იბრძოლებენ და მათი მიზანი იქნება, რომ ჩემპიონთა ლიგის ფინალისკენ გზა გააგრძელონ.


"ბაიერნი" საკუთარ მოედანზე ძალიან ძლიერია. ეს დიდებული თამაში იქნება, ორი მაღალი კლასის გუნდის შესრულებით და მოედანზე საუკეთესო ფეხბურთელებით. ეს ფანებისთვის დიდი სანახაობა იქნება.

პირველ მატჩში სწრაფი გოლის გატანა მოვახერხეთ, რამაც "ბაიერნს" ჩვენზე უფრო მეტი ზეწოლის მოხდენა აიძულა.  ბურთის ფლობა კვლავ მნიშვნელოვანი იქნება, როგორც პირველ შეხვედრაში. ჩვენი სურვილია, რომ ხვალ კარგი თამაში ვაჩვენოთ და ბურთი რაც შეიძლება დიდი ხნით დავიჭიროთ. ჩვენ შეტევა გვინდა. გვინდა, რომ ფანებს ჩვენი სიდიადე დავანახოთ და კიდევ ერთხელ დავამტკიცოთ, რომ "პსჟ" დიდი კლუბია."скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
პრევიუ ჩემპიონთა ლიგა
მსგავსი სიახლეები
კომენტარები
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა