...

პსვ 1:2 ბაიერნი - მატჩის ანალიზი

გუშინ, ჩემპიონთა ლიგის ჯგუფური ეტაპის მეოთხე ტურის შეხვედრაში, მიუნხენის "ბაიერნმა" "პსვ ეინდჰოვენი" ჰოლანდიაში დაამარცხა და საკმაოდ მნიშვნელოვანი სამი ქულა მოიპოვა.

კარლო ანჩელოტის გუნდმა ყველა ტურნირზე ერთად ზედიზედ მეხუთე თამაში მოიგო და ჯგუფში პირველი ადგილის დაკავების შანსები შეინარჩუნა. ახლა კი გთავაზობთ გუშინდელი თამაშის დეტალურ ანალიზს.

მატჩის მსვლელობა
თავდაპირველად, აღსანიშნავია, რომ "პსვ-ს" მთავარმა მწვრთნელმა, ფილიპ კოკუმ, საკმაოდ დაცვითი და ფრთხილი ტაქტიკა აირჩია - 5-3-2. თუმცა, ჰოლანდიელებმა აქტიურად დაიწყეს და შეტევაში წავიდნენ, რის გამოც კინაღამ დებიუტშივე დაისაჯნენ. მატჩის მეორე წუთზე მიუნხენელებმა მშვნიერი კომბინაცია გაითამაშეს, რომელიც ალაბას ჩაწოდებით და ტომას მიულერის სახიფათო დარტყმით დასრულდა. ორ წუთში ჟერომ ბოატენგის გრძელი პასის შემდეგ რობერტ ლევანდოვსკიმ თავით ფანტასტიკური დარტყმა განახორციელა, მაგრამ "პსვ" ხარიხამ იხსნა, დამატებაზე კი პოლონელმა ააცილა. მე-14 წუთზე კი მასპინძლებმა კონტრშეტევა განახორციელეს, რომელიც გოლით დასრულდა. ცენტრში იდეალურად იმოქმედა ანდრეას გაურდადომ, რომელმაც ბურთი მარჯვენა ფრთაზე რამზელაარს გატანა. მისი ჩაწოდების შემდეგ დენი პრიოპერმა თავით გაისროლა, მაგრამ მანუელ ნოიერმა საოცარი სეივი განახორციელა. დამატებაზე კი მანუმ სანტიაგო არიასს ვეღარ აჯობა - 1:0.
ამის შემდეგ კი "პსვ-მ" უკან სერიოზულად დაიხია და მთელი გუნდით დაცვაში ჩაჯდა. "ბაიერნმა" კი ტოტალური უპირატესობა მოიპოვა და ნელ-ნელა ზეწოლას აძლიერებდა. ყველაზე აქტიური მარჯვენა ფლანგი იყო, სადაც ფილიპ ლამი და არიენ რობენი მოქმედებდნენ. მათ ხშირად ტომას მიულერიც ეხმარებოდა. "რეკორდმაისტერს" შანსები ჰქონდა და ერთ-ერთ ეპიზოდში, რობენის მიერ ჩამოწოდებული კუთხურიდან რობერტ ლევანდოვსკიმ ბურთი ძელს გაარტყა. ამას კი მოჰყვა დიდებული კომბინაცია, რომელიც რობენმა და ლამმა გაითამაშეს. კაპიტანი საჯარიმოში შეიჭრა, ჩააწოდა, კიმიხმა პასი გააკეთა და ამ დროს ბურთი გუარდადოს ხელზე მოხვდა, რაც მატჩის მთავარმა არბიტრმა, ჯანლუკა როკიმ, კარგად დაინახა და პენალტი დანიშნა. ბურთთან ლევანდოვსკი მივიდა და თერთმეტმეტრიანი გოლად აქცია - 1:1. ტაიმის ბოლომდე გერმანელებმა კიდევ ორი ლამაზი კომბინაცია გაითამაშეს. ჯერ კიმიხის პასით ლევანდოვსკიმ დაარტყა შორიდან, მაგრამ პასვირმა აუღო. შემდეგ კი რობენმა მიულერს გაუყოლა მარჯვნივ საჯარიმოში, რომელმაც ჩააწოდა და არტურო ვიდალის თავური "პსვ-ს" კიპერმა მარტივად მოიგერია. ჩილელს კარგი პოზიცია ჰქონდა, უბრალოდ დარტყმა არ გამოუვიდა. საბოლოოდ, პირველი ნახევარი ცოტა უღიმღამო იყო და ფრედ დასრულდა.

მეორე ნახევარი მიუნხენურმა კლუბმა უფრო დიდი უპირატესობით დაიწყო და "პსვ" მხოლოდ კონტრშეტევებზე ფიქრობდა. პირველი შანსი დავიდ ალაბას ჰქონდა, რომლის შორეული დარტყმა მეკარე პასვირმა კუთხურზე მოიგერია. ამას კი უკვე ასპროცენტიანი მომენტი მოჰყვა. მატს ჰუმელსმა "პსვ-ს" დაცვის ჩავარდნით ისარგებლა და საჯარიმოში მარტო დარჩენილ არტურო ვიდალს დაუგორა, რომლის დარტყმული საოცარი რეაქციით პასვირმა მოიგერა, ტომას მიულერის დამატებული კი ცარიელი კარიდან ექტორ მორენომ გამოიტანა. რამდენიმე წუთზე იმავე მორენოს "ბაიერნის" კარის დალაშქვრა შეეძლო, მაგრამ მისი თავური მიზანს ასცდა. ანჩელოტიმ თამაშში ორი სწრაფი და ტექნიკური ვინგერი: კინგსლი კომანი და დუგლას კოშტა ჩართო. ბრაზილიელი მშვენივრად შევიდა თამაშში და საგოლე კომბინაცია სწორედ მან წამოიწყო. კოშტამ ფლანგზე ალაბას ჩინებული ფარული პასი გაუკეთა, ავსტრიელმაც ჩააწოდა და ლევანდოვსკიმ ყველას დაასწრო - 2:1.
დარჩენილ დროში "ბაიერნმა" დომინირება გააგრძელა და ლევანდოვსკის ერთი შანსი კიდევ ჰქონდა. პოლონელმა საჯარიმოში ბურთი ფანტასტიკურად შეიგდო და მისი დარტყმული ხარიხამ მოიგერია. საბოლოოდ, 2:1 და "ბაიერნმა" საჭირო სამი ქულა მოიპოვა. პარალელურად მადრიდის "ატლეტიკოს" გაუმართლა და "როსტოვს" გამარჯვება ბოლო წამებზე გამოსტყუა, მაგრამ ანჩელოტის გუნდს პირველი ადგილის დაკავების შანსი ჯერ კიდევ აქვს, რაც ყველაზე მნიშვნელოვანია.

კარგი თამაში კონტრშეტევებზე
მიუხედავად იმისა, რომ "პსვ-მ" გოლი სწორედ კონტრშეტევაზე გაგვიტანა, მიუნხენურმა კლუბმა დაცვაში ფანტასტიკურად იმოქმედა. აქამდე კარლო ანჩელოტის გუნდს მეტოქის სწრაფი კონტრშეტევების შეჩერება ძალიან უჭირდა, ამჯერად კი ყველაფერი იდეალურად შესრულდა. "პსვ" მთელი მეორე ნახევარი თამაშობდა მეორე ნომრად და რამდენიმე გაქცევის შანსიც მიიღო, მაგრამ მიუნხენელებმა ძალიან ყურადღებით იმოქმედეს. მატს ჰუმელსი შეუდარებელი იყო, ჟერომ ბოატენგი კი ყველა ორთაბრძოლას იგებდა. გარდა ამისა, განაპირა მცველებიც ასწრებდნენ უკან ჩამოსვლას და მათ აქტიურად არტურო ვიდალი ეხმარებოდა, რომელმაც არანორმალური სამუშაო შეასრულა. "რეკორდმაისტერმა" თავის მეტოქეს ერთადერთი კონტრშეტევა გააკეთებინა, რომელიც დასრულდა გოლით, მაგრამ არასამართლიანი გოლით, რაზეც მოგვიანებით ვისაუბრებთ. "ბაიერნმა" ორთაბრძოლების დიდი რაოდენობა მოიგო და კონტრშეტევების დროს დიდი თავისუფალი სივრცეები მეტოქეს არ დაუტოვა. როგორც ჩანს, იტალიელმა სპეციალისტმა ამ პრობლემაზე საკმაოდ ნაყოფიერად იმუშავა. ორი კვირის წინ, მიუნხენში, "პსვ-მ" მეორე ნომრად არაერთი პრობლემა შეგვიქმნა, მაგრამ ამჯერად ჰოლანდიელებს მომენტიც არ ჰქონიათ.

ლევანგოლსკის დაბრუნება
მცირე ჩავარდნის შემდეგ, მიუნხენური კლუბის პოლონელი თავდამსხმელი კვლავ შესანიშნავ ფორმაში შევიდა და ბოლო ორ თამაშში ოთხი გოლი გაიტანა. გუშინ, "პსვ-ს" წინააღმდეგ კი, ლევანდოვსკი შეუდარებელი იყო და კიდევ ერთხელ დაამტკიცა, რომ ის მხოლოდ საჯარიმოს ფორვარდი არ არის. მეორე, გამარჯვების მომტანი გოლი, მან სწორედ ტიპიური ცენტრფორვარდის სტილში დასწრებაზე გაიტანა, მაგრამ კიდევ რამდენიმე მომენტი შექმნა, რომლის დროსაც ტექნიკური და გონებრივი შესაძლებლობები გამოავლინა. თამაშის ბოლოს მან საოცარი მოძრაობით ჩამოიტოვა საჯარიმოში მეტოქის მცველი და უბრალოდ არ გაუმართლა, რადგან ბურთი ხარიხას მოხვდა. რობერტმა ეს ულამაზესი მომენტი საკმაოდ მცირე მონაკვეთზე შექმნა. მისი კარგი თამაში და ფორმა "ბაიერნისთვის" ძალიან მნიშვნელოვანია. კარლო ანჩელოტის როტაცია, ყველაზე ნაკლებად, სწორედ პოლონელს ეხება, ამიტომ მისი დაბრუნება და ზედიზედ ორ თამაშში დუბლის გაფორმება მიუნხენური გრანდისთვის იდეალური სიახლეა.

იდეალური სიზუსტე
"ბაიერნის" პასების სტატისტიკა გუშინდელ შეხვედრაში უბრალოდ ფანტასტიკურია - 743 გადაცემიდან 93% ადრესატამდე ზუსტად მივიდა, რაც მართლაც არანორმალური შედეგია. "რეკორდმაისტერმა" შეცდომები პასების დროს და უაზრო ბურთის დაკარგვები უკვე რამდენიმე კვირაა შეწყვიტა, მაგრამ ახლა ამ თვალსაზრისით, გუნდმა განვითარებაც დაიწყო. ის, რომ გუნდში პასის კულტურა საკმაოდ მაღალ დონეზეა, ალბათ, მაინც ანჩელოტის წინამორბედის, პეპ გვარდიოლას დამსახურებაა, მაგრამ შეიძლება ითქვას, რომ სეზონის სტარტთან შედარებით, ამ ასპექტში "ბაიერნმა" სერიოზულად მოუმატა. რობენი, ლამი, მიულერი, ლევანდოვსკი ერთმანეთში ჩინებულად კომბინირებდნენ, ალონსო მშვენიერ გრძელ გადაცემებს აკეთებდა, ვიდალი და კიმიხი კი ძირითადად მოკლე პასებით იფარგლებოდნენ. "რეკორდმაისტერის" თითოეულმა მოთამაშემ პასის გაკეთება ძალიან კარგად იცის, მაგრამ ციფრები უბრალოდ ფენომენალურია და მისი უბრალოდ გატარება შეუძლებელი იქნებოდა.

ანჩელოტიმ მიზანში მოარტყა
კარლო ანჩელოტი წინა თამაშებში დაცვითი ცვლილებების გამო გავაკრიტიკეთ, მაგრამ გუშინ საღამოს იტალიელმა სპეციალისტმა შეცვლები გამოიცნო. როგორც ანჩელოტიმ თამაშის შემდეგ აღნიშნა, მან სისტემა შეცვალა და მინდორზე ორი ვინგერი შეიყვანა, რომელთაც ზონები უნდა გაენთავისუფლებინათ. ეს მართლაც ასე მოხდა და კარლომ მიზანში ზუსტად მოარტყა. კინგსლი კომანი მარჯვენა ფრთაზე აქტიურობდა და ფილიპ ლამს სივრცეებს უთავისუფლებდა. მარცხნივ კი დუგლას კოშტა შეუჩერებელი იყო და მეორე გოლის დროს მთავარი პასი სწორედ მან გააკეთა. ბრაზილიელი ძალიან სწრაფი, კრეატიული და ტექნიკური მოთამაშეა, რომელიც სწორედ ასეთ დროს უნდა გამოიყენო. მაშინ, როდესაც მეტოქე დაცვაში მჭიდროდ დგას, საჭიროა სწორედ ის რესურსი, რომელიც დუგლას კოშტას გააჩნია. "ვისენტე კალდერონზე" გამართულ შეხვედრაში იტალიელს ბრაზილიელი არ ჰყავდა, ეინდჰოვენში კი მან ეს შესაძლებლობა ხელიდან არ გაუშვა. შესაძლოა, ცოტა უცნაურადაც კი ჟღერდეს, მაგრამ შეიძლება ითქვას, დუგლას კოშტა "რეკორდმაისტერის" ყველაზე მნიშვნელოვანი მოთამაშე იყოს ასეთ შეხვედრებში. არიენ რობენისგან განსხვავებით, ის ახალგაზრდა და ენერგიულია, მიულერისგან განსხვავებით დახვეწილი ტექნიკა და დრიბლინგი აქვს, თანაც მშვენიერი დარტყმა და სწრაფი აზროვნება.

საკამათო ეპიზოდები
გუშინდელი შეხვედრის პირველ ნახევარში სამი საკამათო ეპიზოდი იყო, საიდანაც ორჯერ იტალიელმა მსაჯმა "ბაიერნი" დააზარალა. ახლა კი თითოეული ეპიზოდი დეტალურად განვიხილოთ

პირველ რიგში, განვიხილოთ "პსვ-ს" გატანილი გოლი, რომელიც არ უნდა ჩათვლილიყო და გვერდითმა მსაჯმა ძალიან უხეში შეცდომა დაუშვა. როდესაც დენი პრიოპერმა მანუელ ნოიერის კარისკენ თავით დაარტყა, ჰოლანდიელთა მარჯვენა მცველი, სანტიაგო არიასი, აშკარა თამაშგარე მდგომარეობაში იყო, მაგრამ ეს, რატომღაც, ლაინსმენმა ვერ შეამჩნია. "ბაიერნის" მოთამაშეების და არტურო ვიდალის გაცხარება სავსებით ლოგიკური იყო. ჯანლუკა როკი და მისი ბრიგადა სერიოზულად შეცდა, რამაც მიუნხენური კლუბი დააზარალა.
მეორე საკამათო ეპიზოდშიც მსაჯები "ბაიერნის" საწინააღმდეგომ შეცდნენ. არიენ რობენის კუთხურიდან ჩაწოდების შემდეგ "პსვ-ს" მექსიკელი მცველი, ექტორ მორენო, რობერტ ლევანდოვსკის აშკარად იჭერდა და ახტომის საშუალებას არ აძლევდა. საბოლოოდ, პოლონელმა მაინც დაარტყა და ბურთი ძელს მოხვდა, მაგრამ წესების დარღვევა უაცილებლად უნდა დაფიქსირებულიყო. ეს არ იყო ჩვეულებრივი ორთაბრძოლა სტანდარტულის დროს, მორენომ რობერტს დარტყმის განხორციელება არ აცალა და რამდენიმე წამის განმავლობაში ხელით მკაფიოდ იჭერდა.
დაბოლოს, საფეხბურთო ფორტუნამ "ბაიერნს" ვალი მაინც დაუბრუნდა და ჯანლუკა როკიმ მესამე შეცდომა აღარ დაუშვა. ფილიპ ლამისა და არიენ რობენის ლამაზი კომბინაციის შემდეგ, ბურთი "პსვ-ს" საჯარიმოში ანდრეს გუარდადოს ხელზე მოხვდა და ეს უკვე იტალიელ არბიტრს არ გამოეპარა. მან პენალტი სამართლიანად დანიშნა და "რეკორდმაისტერმაც" წონასწორობა აღადგინა. ანგარიშთან ერთად, სამართლიანობაც აღსდგა.

მიუნხენის "ბაიერნი" მომდევნო თამაშს საკუთარ მოედანზე "ჰოფენჰაიმის" წინააღმდეგ ჩაატარებს და იმედია, კარლო ანჩელოტის გუნდი სანაკრებო შესვენებაზე იდეალურ ფორმაში გავა.

მოამზადა დავით მაღრაძემ, სპეციალურად Bayern.ge-სთვის
скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

მსგავსი სიახლეები
კომენტარები
oto bavarieli91
oto bavarieli91 | 2 ნოემბერი 2016 13:18
კარგია ავტოორ ესეგააგრძელეეთ
Guest efenbergi 4
Guest efenbergi 4 | 2 ნოემბერი 2016 13:21
ეს ყველაფერი კარგია მაგრამ ეს ხალხი სად არის ჩაყრუვდა საიტი. ცოტა ვიაქტიუროთ ბავარიელებო.
andria
andria | 2 ნოემბერი 2016 15:36
Guest efenbergi 4 გეთანხმები როცა საიტი აქტიური არ იყო და ჩვენ ვაქტიურობდით და ეხლა პირიქით
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა