ბრიტანული პრესა ზაჰასთვის ბრძოლაში ფავორიტი ბაიერნია

ლეროი სანესა და კალუმ ჰადსონ-ოდოის ხელიდან გაშვების შემდეგ მიუნხენის "ბაიერნის" ხელმძღვანელობამ ინგლისის პრემიერ ლიგაში კიდევ ერთ გარემარბს დაუმიზნა.

ბრიტანული გამოცემა "90min.com" იტყობინება, რომ "რეკორდმაისტერი" "კრისტალ პალასის" ლიდერისა და შემტევის, ვილფრიდ ზაჰას, სატრანსფერო რბოლაში მთავარი ფავორიტია.

26 წლის აფრიკელს ლონდონის "არსენალი" და "მანჩესტერ იუნაიტედიც" უმიზნებენ, მაგრამ "ბაიერნი" ლონდონურ კლუბთან აქტიურ მოლაპარაკებებს აწარმოებს.

ბოლო ინფორმაციით, "რეკორდმაისტერი" მზად არის ზაჰას სანაცვლოდ 40 მილიონი ევრო გადაიხადოს.

გერმანული გრანდი ლეგენდარული ვინგერების, არიენ რობენისა და ფრანკ რიბერის, შემცვლელის ძიებაშია.

ვილფრიდ ზაჰამ 2018/19 წლების სეზონში სულ 36 თამაში ჩაატარა, 10 გოლი გაიტანა და 10 საგოლე გადაცემა გააკეთა.