როგორ გამოეხმაურნენ ბაიერნში ული ჰიონესის შესაძლო წასვლას

გუშინ საღამოს ავტორიტეტულმა გერმანულმა გამოცემა "Bild-მა" დაწერა, რომ ნოემბერში ული ჰიონესი პრეზიდენტობაზე კენჭს აღარ იყრის და თანამდებობას დატოვებს.

ული ჰიონესი "ბაიერნის" ცოცხალი ლეგენდა და სიმბოლოა, რომელიც 40 წელია კლუბის სამსახურში და "ბაიერნის" განვითარებაში უდიდესი წვლილი შეიტანა.

ამ ინფორმაციას საკმაოდ დიდი გამოხმაურება მოჰყვა და კომენტარები მოთამაშეებმაც გააკეთეს.

ლეონ გორეცკა: "ეს რამდენიმე ათწლეულის განმავლობაში გადამწყვეტი ფიგურა იყო. ამ თემაზე მეტს ვერაფერს ვიტყვი. დაველოდები მის პერსონალურ განცხადებას".

სვენ ულრაიხი: "ეს სირცხვილია. ული ჰიონესი კარგი კაცია. მან ააშენა "ბაიერნი", ეს მისი ცხოვრების ნაწილია. მის გარეშე "ბაიერნი" სახეს დაკარგავს. თუმცა მას აქვს უფლება, რომ უფრო მეტი დრო გაატაროს ოჯახთან ერთად. რა თქმა უნდა, მისი კონტაქტი კლუბთან მუდმივი იქნება. ვერ წარმომიდგენია, რომ ის სტადიონზე აღარ იქნება. ის ძალიან მოგვენატრება".

იოზუა კიმიხი: "ბომბის აფეთქების ხმა არ გამიგია. როდის გადაწყვიტა დანებება?".

თომას მიულერი: "ჯერჯერობით არანაირი პირველადი ინფორმაცია არ მაქვს".