მიუნხენური კლუბის ყოფილმა ცენტრალურმა მცველმა, მატს ჰუმელსმა, "ბაიერნში" გატარებული სამი წელი შეაჯამა.
"ჩემი მთავარი მიზანი ჩემპიონთა ლიგის მოგება იყო? ამ ტურნირის მოგების გარანტია არავის აქვს.
პირადად ჩემთვის გასული სამი წელი წარმატებული იყო, ჩვენი გამოსვლა კი ჩემპიონთა ლიგაზე თუ გასულ სეზონს არ ჩავთვლით ასევე არ იყო წარუმატებელი.
"ბაიერნი" იმიტომ დავტოვე, რომ ზიულესთან და ერნანდესთან კონკურენციის შემეშინდა? რა თქმა უნდა, არა. ამაზე მეტს არაფერს გიპასუხებთ", - განაცხადა 30 წლის გერმანელმა.
მატს ჰუმელსი მიუნხენური გრანდის აღზრდილია და "ბაიერნმა" მატსი 2016 წლის ზაფხულში დორტმუნდის "ბორუსიაში" გატარებული 8 წლის შემდეგ დაიბრუნა.
ჰუმელსი გუნდის დაცვის ლიდერი გახდა და სამი სეზონის განმავლობაში სულ 116 მატჩი ჩაატარა.
ამ ზაფხულს კი გამოცდილი გერმანელი დორტმუნდის "ბორუსიას" დაუბრუნდა და "ბაიერნმა" მისი ტრანსფერით 37 მილიონ ევრომდე გამოიმუშავა.