...

ბაიერნი 1:1 კიოლნი: მატჩის ანალიზი

მიუხედავად იმისა, რომ "ალიანს არენას" მოედნის საფარი გამოცვალეს და "ბაიერნის" მოთამაშეებს კარგი ფეხბურთის სათამაშოდ ისევ იდეალური პირობები შეექმნათ, კარლო ანჩელოტის გუნდმა ბუნდესლიგის ახალ სეზონში დღეს პირველი ქულები დაკარგა. თავიდანვე ცხადი იყო, რომ "კიოლნი" მარტივი მეტოქე არ ჩანდა, მაგრამ "რეკორდმაისტერმა" თითქოს მადრიდში მიღებული დარტყმა ვერ მოინელა და დღეს მორიგი საკმაოდ მძიმე შეხვედრა ჩაატარა.

უკვე ვიხილეთ შეფასებები და მთავარი მწვრთნელების კომენტრაები, ახლა კი სრული რეზიუმეს დროა. "ბაიერნმა" სანაკრებო პაუზაზე გასვლის წინ ქომაგებს განწყობა გაუფუჭა და რამდენიმე ახალი კითხვა გააჩინა. მაშ ასე, Bayern.ge დღევანდელი შეხვედრის დეტალურ ანალიზს გთავაზობთ.

მატჩის მსვლელობა
დღევანდელი შეხვედრა მიუნენელების სრული უპირატესობით დაიწყო. "ბაიერნმა" ბურთი მარტივად ჩაიგდო ხელში და კოლოსალური ტერიტორიული უპირატესობა მოიპოვა. თუმცა, "კიოლნი" საკუთარი საჯარიმოს წინ საკმაოდ ორგანიზებულად იდგა და "რეკორდმაისტერს" იდეალურად ანეიტრალებდა. საწყის წუთებში ყველაზე აქტიური ჰოლანდიელი ვინგერი, არიენ რობენი იყო, რომელიც მუდამ ამწვავებდა და მეტოქის მცველებს ავიწროვებდა, მაგრამ ხეირინად კარისკენ გასროლა ვერ მოახერხა. მარცხენა ფრთაზე სიორენსენმა ახალგაზრდა კინგსლი კომანი იდეალურად ამოკეტა, მაგრამ ფრანგის დანაკლისი ესპანელმა მცველმა, ხუან ბერნატმა, შეავსო და მარსელ რისეს ფრთა აიკლო. ბერნატმა ორი სახიფათო ჩაწოდება განახორციელა, რომელსაც პარტნიორები ვერ გამოეხმაურნენ, მაგრამ მესამე მცდელობა წარმატებით დასრულდა. ბერნატმა ერთი ლამაზი მოძრაობით რისე გაზონზე დატოვა და იდეალური ჩაწოდება განახორციელა, რომელსაც ლამაზ ნახტომში ჯოშუა კიმიხი გამოეხმაურა და ზედიზედ მეორე ტურში გამოიჩინა თავი. პირველი ნახევრის ბოლოს რობერტ ლევანდოვსკიმ ქუსლით სცადა ჰორნის კარის აღება, მაგრამ არ გამოუვიდა. საბოლოოდ, მოსაწყენი, მაგრამ შედეგიანი პირველი ტაიმი გამოვიდა.

შესვენებაზე კარლო ანჩელოტიმ ერთი იძულებითი ცვლილება განახორციელა - მოედანი არიენ რობენმა დატოვა, მიზეზი კი უცნობია. მეორე 45 წუთი "კიოლნმა" ძალიან აგრესიულად დაიწყო და "ბაიერნსაც" დაუტოვა თავისუფალი ზონები. ამის შედეგად "ბაიერნმა" ორი კარგი შანსი მიიღო. ჯერ კიმიხის ჩინებული პასის და ბერნატის ზუსტი ჩაწოდების შემდეგ ტომას მიულერმა ააცილა კარს, შემდეგ კი რობერტ ლევანდოვსკიმ გაისროლა თავით, მაგრამ არაზუსტად. რამდენიმე წუთში კი "თხების" მონდომება დაფასდა. მარჯვენა ფლანგიდან მარსელ რისემ ჩააწოდა, მატს ჰუმელსი თამაშგარეში ჩარჩა, მეორე ცენტრალურმა მცველმ, ხავი მარტინესმა, კი სტუმრების ცენტრფორვარდი, ენტონი მოდესტე, დაკარგა, რომელმაც ნოიერის კარი ახლოდან მარტივად აიღო - 1:1. დარჩენილ დროში მომენტები ორივე გუნდს ჰქონდა, მაგრამ "ბაიერნი" ძალიან ერთფეროვნად გამოიყურებოდა. მიუნხენელებმა უამრავი კუთხური მოაწოდეს, მაგრამ ხიფათი არ იქმნებოდა. თუმცა, ერთ-ერთი კუთხურის შემდეგ ტომას მიულერმა ფეხით შორეულ კუთხეში გაუშვა, მაგრამ ჰორნმა საოცარი სეივი განახორციელა. მოგვიანებით კი ხუან ბერნატის შორეული დარტყმა ძელმა აისხლიტა. მატჩის ბოლო წუთზე კი "კიოლნმა" საოცარი კონტრშეტევა გააკეთა, რომელიც სიმონ ცოლერის მცირე უზუსტობით და "ბაიერნის" გამართლებით დასრულდა. ბოლო მომენტი, კარგი საჯარიმო დარტყმა, დავიდ ალაბამ გააფუჭა და "ბაიერნიც" ფრეს დასჯერდა.

კვლავ კრეატივის ნაკლებობა
მიუნხენური კლუბის მთავარი პრობლემა კვლავ ძალიან ერთფეროვანი და არაფრისმომცემი შეტევები იყო. "ბაიერნს" კვლავ დააკლდა ეფექტურობა და კრეატივი შეტევების დამაგვირგვინებელ ფაზაში. პირველი ნახევარი არიენ რობენმა ძალიან კარგად ჩაატარა, მაგრამ თუ მის მოქმედებებს არ ჩავთვლით, ერთადერთი ნათელი წერტილი ესპანელი ხუან ბერნატი იყო და აგრეთვე ახალგაზრდა გერმანელი, ჯოშუა კიმიხი. თუმცა, შეტევების ორგანიზება არცერთ მათგანს არ ევალება. ყველაზე მეტი ამ შემთხვევაში გუნდის პორტუგალიელ ახალწვეულს, რენატო სანჩეშს, მოეთხოვება, რომელმაც კვლავ უსუსური მატჩი ჩაატარა და იდეების ნაკლებობასთან ერთად რამდენიმე უხეში შეცდომაც დაუშვა. ხაბი ალონსოს გრძელმა პასებმა ვერ გაჭრა, რადგან "კიოლნი" ხუთმცველიანი ტაქტიკით თავს იდეალურად იცავდა. კვლავ დააკლდა პასები რობერტ ლევანდოვსკის და ძირითადი აქცენტი ფლანგებზე კეთდებოდა. ცენტრიდან კი "ბაიერნს" ისევ არაფერი გამოუვიდა, ამიტომ ანჩელოტიმ ამაზე აუცილებლად უნდა იზრუნოს. "ატლეტიკოსთან" თამაშის შემდეგ დრო ძალიან ცოტა იყო, მაგრამ ახლა წინ ორკვირიანი შესვენებაა. ასე, რომ დროა პაპა კარლომ საკუთარი ძალა დაგვანახოს.

რა ხდებოდა 10-15 წუთის განმავლობაში?
მეორე ტაიმის დასაწყისში, "კიოლნის" საპასუხო გოლის შემდეგ დაახლოებით 10-15 წუთიანი ინტერვალი "ბაიერნის" დაცვამ სრულიად ჩააგდო. გაშვებული ბურთის დროს ორივე ცენტრალური მცველი შეცდა, რადგან შეუთანხმებლად იმოქმედეს. მატს ჰუმელსი თამაშგარეში ჩარჩა, ამოწეულ ხავი მარტინესს კი ენტონი მოდესტე გაექცა და ფრანგს ვეღარ დაეწია. ამას კი "კიოლნის" რამდენიმე საკმაოდ სახიფათო შეტევა მოჰყვა, რომელიც ერთხელ ხაბი ალონსომ, ერთხელ კი მსაჯმა ალამის აღმართვით შეაჩერა, როდესაც იუია ოსაკოს გოლი სამართლიანად არ ჩათვალა. თუმცა, ყველაზე საყურადღებო ის არის, რომ "რეკორდმაისტერის" დაცვის ცენტრში სრული ქაოსი იყო და სტუმრებს ძალიან დიდი თავისუფალი ზონები ჰქონდათ. ეს მართლაც საგანგაშო მონაკვეთი იყო, რომელიც ალბათ ანჩელოტის ძალიან კარგად დაამახსოვრდებოდა. როგორც ჩანს, დროა ბოატენგი და ჰუმელსი რამენაირად ერთად გავიდნენ მინდორზე.

დასკვნის სახით კი ვიტყოდი, რომ ბიჭები მეტოქეს ცოტათი არასერიოზულად მოეკიდნენ. ამის საფუძველს კი მეორე ტაიმი იძლევა, განსაკუთრებით დასაწყისი, როდესაც მოთამაშეები ძალიან მოდუნებულები იყვნენ და წარმატებაში ზედმეტად თავდაჯერებულები. "კიოლნი" კი საკმაოდ კარგი გუნდია, რომელსაც მშვენიერი, კარგად შეთამაშებული და ორგანიზებული დაცვის ხაზი ჰყავს, შეტევაში სწრაფი, სახიფათო ნახევარმცველები, წინ კი დიდებული ბომბარდირი - ენტონი მოდესტე, რომელიც ბომბარდირთა დავაში რობერტ ლევანდოვსკის დაეწია. ოქტომბერფესტის დღესასწაულზე "ბაიერნმა" გულშემატკივრებს განწყობა გაუფუჭა. ანჩელოტიმ თამაშის წინ აღნიშნა, რომ სამი ქულის მოპოვების შემთხვევაში ბიჭებს სამ ბაკალ ლუდს ან ოთხსაც კი დაალევინებდა, მაგრამ ახლა ერთი ცივი წყალი იქნება უკეთესი. შეიძლება ითქვას, რომ სანაკრებო პაუზამ გუნდს სულზე მოუსწრო, ბიჭები ცოტათი დაისვენებენ და იმედია, ოქტომბრის შუარიცხვებიდან სულ სხვა "ბაიერნს" ვიხილავთ. ეს ერთი კვირა კარლო ანჩელოტისთვის ძალიან მძიმე, მაგრამ მნიშვნელოვანია. იტალიელმა სპეციალისტმა ბოლო ორ თამაშს კარგად უნდა გადახედოს და დასკვნები ორი კვირის შემდეგ მინდორზე გადაიტანოს. იმედია, მიუნხენური გრანდი სიტუაციას გამოსწორებს და "ბაიერნის" მოთამაშეები მალე ითამაშებენ იმ ფეხბურთს, რომლის ხილვაც ქომაგებს სურთ.

მოამზადა დავით მაღრაძემ, სპეციალურად Bayern.ge-სთვის
скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

მსგავსი სიახლეები
კომენტარები
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა