...

ვერშემდგარი ლეგენდა: სებასტიან დაისლერი

საკლუბო ფეხბურთმა ორკვირიანი პაუზა აიღო, ამიტომ საფეხბურთო ციებ-ცხელება მიწყნარდა, მათ შორის გერმანიაში და მიუნხენშიც. თუმცა, იმისათვის, რომ ქომაგებმა არ მოიწყინონ, Bayern.ge ყოველდღიურად რაიმე საინტერესო სტატიას შემოგთავაზებთ, რათა ეს მშრალი პერიოდი რამინაირად გადავაგოროთ. თუმცა, ყველაფერს თავისი დადებითი მხარე აქვს.

დღეისთვის კი საკმაოდ სევდიანი, მაგრამ უაღრესად საინტერესო ისტორია უნდა გავიხსენოთ, რომელიც გერმანული ფეხბურთის ისტორიაში ერთ-ერთ უძლიერეს ტალანტს ეხება. იმის მაგივრად, რომ სებასტიან დაისლერის სახელი ახლა "ბაიერნის" ისტორიის მთავარ ფურცლებზე იყოს, მას მხოლოდ იმ შემთხვევაში იხსენებენ თუ ვინმეს სერიოზული ტრავმის გამო მომავალი და საფეხბურთო კარიერა დაენგრევა. ტრავმები ამ დიდი სპორტის შემადგენელი ნაწილია, რომელიც არა ერთ ლეგენდარულ მოთამაშეს დასდევდა მოუშორებელი სენივით, მაგრამ სება დაისლერის ისტორია ყველასაგან გამორჩეული და სამწუხაროა. მუხლის დაზიანებამ მისი საუკეთესო წლები გაანადგურა და ნათელი სხივებით მოფენილი მომავალი სულ რაღაც 27 წლის ასაკში გააქრო. თუმცა, "ბაიერნის" და გერმანული ფეხბურთის ერთგული გულშემატკივარი ამ უნიკალურ მოთამაშეს არასოდეს დაივიწყებს.

სებასტიანის კარიერა 1998 წელს დაიწყო, მაშინ როდესაც 18 წლის დაისლერი მიუნხენგლადბახის "ბორუსიას" პირველ გუნდში გადაიყვანა ფრიდელ რაუშმა. მისი სადებიუტო მატჩი, 1998 წელს შედგა. ბუნდესლიგის მესამე ტურის შეხვედრაში, "აინტრახტის“ წინააღმდეგ, რაუშმა დაისლერი მინდორზე მეორე ტაიმში გაიყვანა. ის მოისაზრებოდა სათადარიგო სკამის მოთამაშედ, მაგრამ საწყის ტურებში ზედიზედ 6 მატჩის ჩატარება მოუწია. სამწუხაროდ, ის მონაწილე გახდა იმისა თუ როგორ იქნა გაცალმტვერებული მისი გუნდი ჯერ ლევერკუზენის "ბაიერთან" 2:8 და შემდეგ ტურში "ვოლფსბურგთან" - 1:7. პირველი წრის შუაწელს კი მიიღო ტრავმა და იძულებული იქნა იანვრამდე გამოთიშულიყო ფეხბურთს. დაბრუნებისთანავე ის კვლავ ძირითადში მოხვდა და განაგრძო კარგი თამაშის ჩვენება. თუმცა, აპრილის თვეში კვლავ დაშავდა და მხოლოდ ბუნდესლიგის ბოლო 4 ტურისთვის მოასწრო დაბრუნება. სება "ბორუსიას" ვერაფრით დაეხმარა, რომელიც ბოლო ადგილზე გავიდა და გავარდა ბუნდესლიგიდან. თავად დაისლერმა კი ტრავმების გამო მხოლოდ 17 მატჩი ჩაატარა, თუმცა შეძლო 1 პატარა შედევრის განხორციელება. მან ბუნდესლიგის 21-ე ტურში „მიუნხენ 1860“-ს გაუტანა ბრწყინვალე გოლი, როდესაც საკუთარი ნახევრიდან წამოიწყო კონტრშეტევა და ფანტასტიკური სოლორეიდით დააგვირგვინა კიდეც.


დაისლერმა ამ გოლის დროს, ფაქტობრივად, 60 მეტრი დაფარა და ყველა გააოცა. გერმანიაში ახალი ვარსკვლავი დაიბადა, რომელსაც ყველა აქებდა. "მ.ბორუსიას" თავკაცმა, რაუშმა, ის უაღრესი კომპლიმენტებით შეაქო: "ჩემი აზრით, ამ საოცარ ბიჭში გაერთიანებულია სამი ფეხბურთელი: ფრიტც ვოლტერი, უვე ზეელერი და ფრანც ბეკენბაუერი". 19 წლის უნიჭიერესი ტალანტით გერმანიის ეროვნული ნაკრების მთავარი მწვრთნელი, ერიხ რიბეკიც აღფრთოვანებული იყო: "ნამდვილი ბრილიანტია. ჩვენ შეგვიძლია სრულიად მივენდოთ დაისლერს, რომელიც ტკივილის ფონზეც კი ბოლომდე იბრძვის. სწორედ ასეთი მოთამაშეები გვჭირდება".

1999 წელს კი ის ბერლინის "ჰერტამ" მიიპატიჟა, რომელიც ჩემპიონთა ლიგაზე იყო გასული. დაისლერმა დაიმკვიდრა ადგილი ბერლინური გუნდის ძირითად შემადგენლობაში, თავის საყვარელ პოზიციაზე - მარჯვენა ნახევარმცველის ადგილზე, რომელიც ხშირად ეხმარებოდა დაცვას. დაისლერმა ძალიან კარგად ჩაატარა სეზონის სტარტი. ის უცვლელი იყო გუნდში თავის პოზიციაზე და გაჭირვების დროს ცენტრალურ ნახევარმცველადაც შეეძლო თამაში, თუმცა ძალიან იშვიათად. თუმცა, დაისლერი როგორ იქნებოდა ტრავმის გარეშე, დაახლოებით ოქტომბრის მიწურულს მან მიიღო მორიგი დაზიანება და 3 თვის გამოტოვება მოუწია. საბედნიეროდ დაისლერი მომჯობინდა ლიგის მეორე ჯგუფური ეტაპისათვის. ის შევიდა ფორმაში, მაგრამ „ჰერტა“ ჩარჩა მეორე ჯგუფურ ეტაპზე და ვერ მოახერხა მეოთხედფინალში გასვლა. დაისლერმა კი სეზონი ტრავმის გარეშე ჩაამთავრა. 1999-00 წლებში სებასტიანმა ჯამში 29 შეხვედრა ჩაატარა და ორჯერ გამოიჩინა თავი. აღსანიშნავია, რომ ორივე გოლი დაისლერმა გაიტანა საჯარიმოდან, ბუნდესლიგის სტარტზე, პირველ და მეორე ტურებში. როგორც ჩანს დაისლერს გარდა ტექნიკის, სისწრაფის, კარგი პასის და უნიკალური დრიბლინგისა აღმოაჩნდა ბრწყინვალე უნარი სტანდარტულების შესრულებისა. 
ამას მოჰყვა პირველი დიდი საერთაშორისო ტურნირი და რიბეკმა 20 წლის დაისლერი 2000 წლის ევროპის ჩემპიონატზე წაიყვანა. ევროპის მოქმედმა ჩემპიონებმა 98 წლის მუნდიალი ჩააგდეს, ქვეყანაში ტალანტებისა და ახალგაზრდა მოთამაშეების სერიოზული დეფიციტი იყო, არ ჩანდა რესურსი და პოტენციალი. დაისლერი კი გამონაკლისი იყო, რომლისგანაც უკვე ევრო პირველობაზე ყველა ძალიან დიდ წარმატებას ელოდა. დაისლერზე უდიდესი იმედები მყარდებოდა, რამაც პატარა ბიჭუნაზე უარყოფითი გავლენა იქონია. "მე 19-20 წლის ვიყავი და გერმანელი ხალხი ფიქრობდა, რომ გერმანული ფეხბურთი უნდა გადამერჩინა. მარტო მე. იყო კიდევ მიხაელ ბალაკი, მაგრამ ის ოთხი წლით უფროსი გახლდათ. ვფიქრობ, ხალხმა უბრალოდ არ დამინდო", - განაცხადა მოგვიანებით დაისლერმა. სებამ ტურნირზე მარკუს ბაბელი ამოაგდო ძირითადიდან და ორი მატჩი სასტარტოში ჩაატარა, მაგრამ "ბუნდესნაკრებმა" ევრო 2000 ჩააგდო და ჯგუფში ჩარჩა. ეს სრული კატასტროფა იყო, დაისლერისთვის კი მძიმე ფსიქოლოგიური დარტყმა.

მომდევნო სეზონმა შედარებით წყნარად ჩაიარა და სებას სერიოზული ტრავმა არ მიუღია. "ჰერტამ" ბუნდესლიგა მეხუთე ადგილზე დაასრულა, დაისლერმა კი 29 შეხვედრაში ოთხი გოლის გატანა მოახერხა. მორიგი სუპერგოლი მან ლევერკუზენის "ბაიერის" კარში გაიტანა, როდესაც ძალიან მახვილი კუთხიდან ჰანს-იორგ ბურტი უშანსოდ დატოვა. ბერლინურ კლუბში მოღვაწეობისას ის ეროვნულ ნაკრებში მუდმივად ასპარეზობდა, მაგრამ ტრავმები მოსვენებას არ აძლევდა. ახალი სეზონი მისთვის კარგად დაიწყო, მაგრამ ნოემბერში მუხლის სერიოზული დაზიანება მიიღო და ხუთი თვე გამოტოვა. ეს სწორედ იმ პრობლემის დასაწყისია, რომელმაც სებას კარიერა მალე დაანგრია. 2002 წლის მაისში ოპერაცია გაიკეთა და ხანგრძლივი რეაბილიტაციის გამო მსოფლიო ჩემპიონატი გამოტოვა.

2002 წლის ზაფხულში კი მოხდა ისე, როგორც ხდება ხოლმე - გერმანიის ყველაზე გამორჩეული ტალანტი გასანვითარებლად ქვეყნის უძლიერეს კლუბში, მიუნხენის "ბაიერნში" გადავიდა. ამის გამო ის დედაქალაქში სერიოზულად გაკიცხეს, რასაც დაისლერი დღემდე ვერ პატიობს კლუბის ხელმძღვანელობას. "სიმართლე გითხრათ, ბერლინის "ჰერტა", როგორც კლუბი, ისეთივე მოუმზადებელი და მოუმწიფებელი იყო, როგორც მე. ისინი ბედნიერები იყვნენ, როდესაც ლომის ხახაში ჩამაყოფინეს თავი. ძალიან დამღალა ხალხის უაზროდ გამხიარულებამ. სულელ კლოუნად ვიქეცი. იმის მაგივრად, რომ ჰიონესს სიტაუცია აეხსნა, მან ხმა არ ამოიღო და ბერლინური რისხვა სრულიად ჩემზე წამოვიდა. ეს იყო პირველი შემთხვევა, როდესაც ფეხბურთზე წარმოდგენა შემეცვალა. დროის დაბრუნება რომ შემეძლოს, ამ ნაბიჯს არ გადავდგამდი", - აღიარა სებასტიან დაისლერმა.

დაისლერი "ბაიერნში" მუხლის სერიოზული პრობლემებით მივიდა და მთელი პირველი წრე გაუცდა. თუმცა, ბოლოსკენ დაბრუნდა და რამდენიმე თამაშიც ჩაატარა. ყველაზე მნიშვნელოვანი გამარჯვება კი ყოფილი გუნდის წინააღმდეგ ბერლინში მოიპოვა. "ბაიერნმა" დედაქალაქური კლუბი 6:3 გაანადგურა და დაისლერმა ორი საგოლე პასი გააკეთა. სეზონის ბოლოს, მან გუნდთან ერთად პირველი ტიტულები: ბუნდესლიგა და გერმანიის თასი მოიგო. თუმცა, გოლი არ გაუტანია.
2003-04 წლების სეზონი დაისლერისთვის შესანიშნავად დაიწყო. მან ბუნდესლიგის პირველ 12 ტურში 9 მატჩი ჩაატარა, აქედან 7 ძირითადში და ამ შეხვედრებში 3 გოლის გატანა მოახერხა. მას თავის პოზიციაზე სერიოზული კონკურენტები ჰყავდნენ ბასტიან შვაინშტაიგერის და ჰასან სალიჰამიჯიჩის სახით. სებასტიანმა ულამაზესი გოლი შეუგდო "ბოხუმს" მესამე ტურში, საჯარიმო დარტყმით. ეს მისი სადებიუტო გოლი იყო „ბაიერნის“ მაისურით. მეათე ტურში კი "კაიზერსლაუტერნის" წინააღმდეგ დაისლერმა კარიერაში პირველი დუბლი გააკეთა. განსაკუთრებით ლამაზი იყო პირველი, გოლი როდესაც მარჯვენა ფლანგიდან ცენტრში საოცარი სისწრაფით შევარდა და მარცხენა კუთხეში შეუგდო ტიმ ვიიზეს. საბოლოოდ ამ სეზონში დაისლერმა ისევ მიიღო ტრავმა და მხოლოდ 14 შეხვედრის ჩატარება მოუწია, სადაც 4 გოლი გაიტანა. 

ამ სეზონშიც მან მხოლოდ 11-12 მატჩი ჩაატარა და მინდორზე ბოლოსკენ დაბრუნდა. ეს ნამდვილი შოკი იყო, რადგან დაისლერმა მუხლის დაზიანება მეოთხედ მიიღო და კვლავ ხანგრძლივი პაუზის შემდეგ დაბრუნდა. ტკივილებს და უქმოობას ემატებოდა დეპრესიაც, რადგან გერმანელი მხოლოდ 23 წლის იყო და განვითარება, ფეხბურთის თამაში სწყუროდა. "არასოდეს მქონდა დრო განვითარებისთვის და ადამიანად ჩამოყალიბებისთვის. თუმცა, ული ჰიონესმა უდიდესი დახმარება გამიწია და გვერდში დამიდგა. ამისათვის მისი მადლიერი ცხოვრების ბოლომდე ვიქნები. მას ჩემი ყოველთვის სჯეროდა, მაგრამ ის პერიოდი ძალიან მძიმე იყო ჩემთვის", - აცხადებს დაისლერი.

მკითხველი ალბათ უკვე გამოიცნობდა, რომ დაისლერმა 2004 წლის ევროპის ჩემპიონატიც დაზიანების გამო გამოტოვა, ხოლო ახალ სეზონს სერიოზული შემართებით შეუდგა. "ბაიერნს" ახალი მთავარი მწვრთნელი ჰყავდა - ფელიქს მაგათი, რომელიც დაისლერს სრულიად ენდობოდა და გუნდის ერთ-ერთ ლიდერად აქცია. პირველ წრეში მცირე პრობლემები ჰქონდა, ისევ ტრავმების გამო, მაგრამ მეორე ნახევარი იდეალურად ჩაატარა და "ბაიერნის" მორიგი დუბლის გაფორმებაში დაეხმარა. ამჯერად მან 32 მატჩი ჩაატარა, 4 გოლი გაიტანა და 5 საგოლე პასი გააკეთა. 2005-06 წლების სეზონი კი კარგად დაიწყო, მაგრამ ისევ ტრავმები, ისევ მუხლი, მაგრამ დაისლერი მაინც კარგად მოქმედებდა. მან ჩემპიონთა ლიგაზე სადებიუტო გოლები გაიტანა, სეზონის ბოლოს კი "ბაიერნთან" ერთად ზედიზედ მეორე დუბლი გაიფორმა. 

თუმცა, სეზონის ბოლოს მას მუხლმა კვლავ გაახსენა თავი და 26 წლის დაისლერმა შოკი მიიღო - მას მშობლიური მსოფლიო ჩემპიონატი უნდა გამოეტოვინება, რომელსაც სულმოუთმენლად ელოდა. ეს უკვე ბოლო დარტყმა იყო, რომელმაც სება საბოლოოდ გატეხა. მომდევნო სეზონში რამდენიმე თამაშის ჩატარება მოასწრო, მაგრამ 2007 წელს საბოლოოდ დანებდა. დაისლერმა აბსოლუტურად წაშლილი სახით განაცხადა, რომ კარიერის დასრულება გადაწყვიტა. ეს ამ უნიკალური ტალანტის მუხთალი ბედისწერის საბოლოო შედეგი იყო. "ის ერთ-ერთი საუკეთესო გერმანელი ფეხბურთელია ისტორიაში. ძალიან რთულია მოძებნო მეორე ასეთივე საოცარი ვირტუოზი. თუმცა, სამწუხაროდ, ჩვენ მისთვის ბრძოლა წავაგეთ", - განაცხადა "ბაიერნის" ყოფილმა პრეზიდენტმა და უბრალოდ დიდმა ადამიანმა, ული ჰიონესმა. 134 თამაში გერმანიის ეროვნულ ჩემპიონატში, 36 ეროვნული ნაკრების მაისურით, საოცარი ტექნიკა, დრიბლინგი, სისწრაფე, დარტყმა, ძლიერი და ნამდვილი გერმანული მენტალიტეტი - ეს ყველაფერი დაისლერის მონაგარია, რომელიც დაისლერს 27 წლამდე ეხმარებოდა. მაშინ, როდესაც სება გერმანული ფეხბურთის მთავარი ვარსკვლავი იყო და მიხაელ ბალაკის წასვლის შემდეგ "ბაიერნის" ლიდერი უნდა გამხდარიყო, მას ბუცების ლურსმანზე ჩამოკიდება მოუწია. 

"ბოლოსკენ, სრულიად განადგურებული ვიყავი, გადაღლილი და ემოციებისგან დაცლილი. ვგრძნობდი, რომ ნაადრევად დავბერდი. მინდოდა, რომ რაც შეიძლება სწრაფად გავქცეულიყავი, მაგრამ ფეხებმა მიმტყუნეს", - ეს დაისლერის ბოლო სიტყვებია, რომლის შემდეგაც ორი წელი კამერის წინ აღარ გამოჩენილა. 2009 წელს კი ავტობიოგრაფიული წიგნი დაწერა, სადაც მიუნხენის "ბაიერნზე" ერთი სიტყვაც არ არის. ამის მიზეზი არც ისე მარტივია, მაგრამ სავსებით გასაგები - მას სურს, რომ ეს საშინელი პერიოდი თავისი ცხოვრებიდან სამუდამოდ გააქროს...

სებასტიან დაისლერს მართლაც ტრაგიკული ისტორია აქვს, მაგრამ რას ვიზამთ, ფეხბურთი ხომ მსოფლიოში ყველაზე დაუნდობელი სპორტია. როგორც ჩანს, დაისლერი "ბაიერნისთვის და გერმანიის ნაკრებისთვის დიდი წარმატებების მოსაპოვლებად არ დაბადებულა. თუმცა, მიუხედავად იმისა, რომ მუხლზე ერთი და იმავე ტრავმა შვიდჯერ მიიღო, მაინც ბოლომდე იბრძოლა და მაქსიმუმი გააკეთა. მის ფენომენალურ მოქმედებს კი "ბაიერნის" ქომაგები მაინც არასოდეს დაივიწყებენ. შესაძლოა დაისლერის ტალანტი მართლაც გაქრა, მაგრამ მის სახელს ვერაფერი მიჩქმალავს. დაისლერი თავისი უნიკალური შესაძლებლობებით არამხოლოდ გერმანული ფეხბურთის და "ბაიერნის", არამედ მსოფლიო ფეხბურთის ლეგენდა უნდა გამხდარიყო, მაგრამ უბრალოდ არ გაუმართლა.

მოამზადა დავით მაღრაძემ, სპეციალურად Bayern.ge-სთვის
скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
სებასტიან დაისლერი
მსგავსი სიახლეები
კომენტარები
dato_koiava
dato_koiava | 4 ოქტომბერი 2016 17:01
კარგად მახსოვს ძალიან მაგარი იყო,ძალიან ტექნიკური ერთხელაც იგივე სურათი რაც პოსტზე დევს ვნახე და ეწერა რომ დაასრულა კარიერა ძალიან სამწუხაროა
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა