...

ბაიერნი 1:0 ატლეტიკო - მატჩის ანალიზი

ჩემპიონთა ლიგის გუშინდელი საღამო მიუნხენური კლუბისათვის ძალიან სასიამოვნო და წარმატებული გამოდგა.

"ბაიერნმა", საკუთარ მოედანზე, ჯგუფის ლიდერი მადრიდის "ატლეტიკო" მიიღო და პრინციპული გამაარჯვება მოიპოვა - 1:0.

ახლა კი გთავაზობთ გუშინდელი თამაშის განხილვასა და დეტალურ ანალიზს. საბედნიეროდ, ჩვენი გუნდის თამაშში კვლავ ბევრი პოზივი შეინიშნება.

მატჩის მსვლელობა
მიუნხენურმა კლუბმა თავიდან ძალიან ენერგიულად დაიწყო და ეგრევე მეტოქის ნახევარზე დაბანაკდა. "ბაიერნი" საოცრად მოტივირებული და მონდომებული ჩანდა, მაგრამ შეტევების საწყისი ტალღები მალევე ჩაწყნარდა, რასაც "ატლეტიკოს" ორი არასასიამოვნო შეტევა მოჰყვა. მადრიდელებმა მშვენიერი კომბინაცია გაითამაშეს და ანტუან გრიზმანმა კარასკოს ბურთი საჯარიმოში შეაყოლა. ბელგიელმა ხელსაყრელი პოზიციიდან დაარტყა, მაგრამ მანუელ ნოიერმა ჩინებულად ითამაშა. მალევე მარცხენა ფლანგიდან ლუკას ერნანდესი გაიჭრა და საჯარიმოში კარასკოს ჩაუწოდა, რომელმაც თავისუფლად დაარტყა, მაგრამ ნოიერი ბურთს კვლავ ადგილზე დახვდა. "ბაიერნმა" ეს განგაში მიიღო და უფრო ყურადღებით ათამაშდა. მალევე მომენტი მიუნხენელებმაც შექმნეს. მარცხენა ფლანგზე რენატო სანჩეშმა გმირულად იბრძოლა, ბურთი მოიპოვა და საჯარიმოში დუგლას კოშტას გადააწოდა, ბრაზილიელმა მახვილი კუთხიდან დაარტყა, მაგრამ იან ობლაკი ამისათვის მზად იყო. მალევე "რეკორდმაისტერმა" საკმაოდ კარგი კომბინაცია გაითამაშა, როდესაც რობენმა ტიაგოს საჯარიმოს მისადგომებთან დაუგორა, ესპანელი კი შიგნით შეიჭრა და საბოლოოდ ეპიზოდი არტურო ვიდალის გაფუჭებული დარტყმით დასრულდა. 28-ე წუთისთვის კი ხუან ბერნატის შეტევაში მორიგ კარგ ჩართვას ძალიან სახიფათო ჯარიმა მოჰყვა. ბურთთან რობერტ ლევანდოვსკი მივიდა და ისე, როგორც "მაინცის" წინააღმდეგ, ტექნიკური დარტყმით ბურთი კარის ჩარჩოში ჩასვა - 1:0.
ამის შემდეგ მიუნხენური გრანდი ტერიტორიულ უპირატესობას დაეუფლა, ბურთს იდეალურად აკონტროლებდა, მაგრამ მეტოქის საჯარიმოსთან ძალიან უჭირდა. "ატლეტიკო", მიუხედავად ანგარიშისა, დაცვაში ღრმად და როგორც ყოველთვის, ორგანიზებულად იჯდა. შესაბამისად, საწყისი 45 წუთი 1:0 დასრულდა.

შესვენების შემდეგ კი ბევრი არაფერი შეცვლილა, უბრალოდ "როხიბლანკომ" ცოტათი ზევით აიწია, "ბაიერნს" სივრცეები გამოუჩინა და მეორე ნახევრის დასაწყისში მიუნხენელებს კარგი კონტრშეტევაც გამოუვიდათ. ტიაგომ ლევანდოვსკის გააყოლა, ლევანდოვსკიმ - სანჩეშს, რომელმაც არიენ რობენი მეკარესთან შესახვედრად გაუშვა, მაგრამ ჰოლანდიელი ცოტათი დაიბნა და მომენტი გააფუჭა. მას ხელი "ატლეტიკოს" სწრაფმა მცველებმაც შეუშალეს, მაგრამ თავად არიენს უკეთ თამაში მართებდა. რამდენიმე წუთში რობენმა ჩინებული სოლორეიდი განახორციელა და სავიჩთან ორთაბრძოლაში საჯარიმოში წაიქცა. თუმცა, მატჩის მთავარმა არბიტრმა, კლემენ ტარპინმა, თერთმეტმეტრიანი არ დანიშნა. ჩერნოგორიელი ჰოლანდიელს ხელით იჭერდა, მაგრამ მხოლოდ სამი-ოთხი წამით, ამიტომ ასპროცენტიანი წესების დარღვევა ნამდვილად არ ყოფილა. 32 წლის ჰოლანდიელი სავიჩს მალევე კიდევ ერთხელ გაექცა, საჯარიმოში ჩააწოდა და ლევანდოვსკის უბრალოდ თავური დარტყმა არ გამოუვიდა. საუკეთესო მომენტი კი ტიაგო ალკანტარას ჰქონდა. ბერნატმა ბრწყინვალე გარღვევა განახორციელა, შემდეგ ბურთი საჯარიმოში კოშტას გაატანა, რომელმაც ჩააწოდა და "ბაიერნის" მეექვსე ნომერმა სამი მეტრიდან ცარიელ კარს გადააცილა. მიზეზი? ტიაგო წინ მირბოდა და ბურთს უბრალოდ ვერ მიუდგა. მადრიდულმა კლუბმა გერმანული გრანდი ბოლო წუთებში ცოტათი ანერვიულა, მაგრამ რეალური შანსი "როხიბლანკოს" არ ჰქონია.

კარლო ანჩელოტის გუნდმა საკუთარ მოედანზე ჩემპიონთა ლიგის ზედიზედ მე-15 თამაში მოიგო და პრინციპული მნიშვნელობის გამარჯვება მოიპოვა. ჯგუფი "ბაიერნმა" მაინც მეორე ადგილზე დაასრულა, მაგრამ "ატლეტიკო" საკუთარ კედლებში მაინც არ გაახარა.

მისტერ ელეგანტურობა
გუშინ საღამოს მადრიდის "ატლეტიკოს" მხოლოდ ორი კარგი შანსი ჰქონდა, ეგეც მატჩის დასაწყისში, რაც პირველ რიგში, მატს ჰუმელსის დამსახურებაა. 27 წლის გერმანელმა ნამდვილი კლასი ჩაატარა და ყველას დაანახა თუ როგორ უნდა გამოიყურებოდეს მსოფლიო დონის ცენტრალური მცველი. ჰუმელსი საკუთარი საჯარიმოს წინ გაუვალი კედელივით იდგა და შიგნით არავის ატარებდა. "როხიბლანკოს" ყოველი გრძელი გადაცემა "ბაიერნის" მეხუთე ნომერმა ჩაჭრა, თანაც ამას უაღრესად დინჯად და ყოველგვარი აღელვების გარეშე აკეთებდა. მატსი ბურთს ისე იღებდა, როგორც ბოსი და შემდეგ თავისუფალ პარტნიორს პოულობდა. უაზროდ ბურთი მხოლოდ ერთ სიტუაციაში მოიგერია, როდესაც უბრალოდ სხვა გზა არ ჰქონდა და აბსოლუტურად სწორი გადაწყვეტილება მიიღო. ზოგჯერ, პრაგმატულობა უფრო სასარგებლოა, ვიდრე კლასის დემონსტრირება. მატსმა ანტუან გრიზმანს ფეხი არ გაანძრევინა და "ბაიერნის" საჯარიმოსკენ გაგზავნილ ყოველ ბურთზე პირველი თამაშობდა. მსოფლიო ჩემპიონმა ფენომენალური მატჩი ჩაატარა და ყველაზე მიმზიდველი მისი სრული თავდაჯერებულობა იყო. ჰუმელსი მშვიდად, დინჯად, მაგრამ უზუსტესად მოქმედებდა. მან დაამტკიცა, რომ მსოფლიოში ერთ-ერთი უძლიერესი ცენტრალური მცველი და "რეკორდმაისტერის" სკოლის ღირსეული წარმომადგენელია.

ვიდალის ფაქტორი
გუშინდელ შეხვედრაში მიუნხენურმა გრანდმა მოედნის ცენტრში შესანიშნავი თამაში აჩვენა და ეს არტურო ვიდალის ძირითადში დაბრუნებას დაემთხვა. რა თქმა უნდა, ტიაგო ალკანტარამ და რენატო სანჩეშმა ბრწყინვალედ იმოქმედეს. ესპანელმა კიდევ ერთხელ ყველას დაანახა, რომ საოცარი ტექნიკისა და თავის პატრონია, პორტუგალიელმა კი ძალიან ბევრი იბრძოლა, შავი სამუშაოც შეასრულა და გუნდს შეტევაშიც დაეხმარა. თუმცა, მთავარი მაინც ჩილელი არტურო ვიდალის ფაქტორი იყო, რომელმაც თავისი "ბულდოგისებურ" სტილში იასპარეზა. 29 წლის სახმრეთ ამერიკელი ნამდვილი მებრძოლია, მას "ბაიერნის" ქომაგებმა "Warrior" ტყუილად არ შეარქვეს. არტურომ მოედნის ცენტრში საჭირო ბალანსი შემოიტანა და "ატლეტიკოს" სწრაფი შეტევების დროს იდეალური იყო. მან "როხიბლანკოს" არაერთი რამდენიმე გამჭოლი შეტევა ჩაშალა და ვარდნებში უშეცდომოდ მოქმედებდა. გარდა ამისა, როგორც ყოველთვის, თითოეულ ეპიზოდში ბოლომდე იბრძოდა და რამდენიმეჯერ გუნდს ბურთი განწირულ სიტუაციაშიც კი დაუბრუნა. ზოგს ასეთი ხისტი მოთამაშეები არ მოსწონს, მაგრამ ვიდალი სწორედ იმ მენტალიტეტის მატარებელია, რომელიც მიუნხენს "ბაიერნს" შეესაბამება - ჩილელი ნამდვილი მებრძოლია და "რეკორდმაისტერისათვის" მინდორზე ყველაფერს დებს. მადლობა არტურო!

ლევანდოვსკი აღარ ხუმრობს
მიმდინარე სეზონში რობერტ ლევანდოვსკი საჯარიმოების დროს ბურთთან არაერთხელ მივიდა, რაც ალბათ "ბაიერნის" გულშემატკივრებში გაოცებას იწვევდა. მიუნხენურ კლუბს სტანდარტულების ბევრი კარგი შემსრულებელი ჰყავს, პოლონელი კი ამ საქმით არასოდეს დაკავებულა. თუმცა, ლევანდოვსკი საკმაოდ თანამედროვე და ტექნიკურად განსწავლული მოთამაშეა, რომელმაც ვარჯიშებზე საჯარიმოები სერიოზულად დაამუშავა და ახლა ამ ხანგრძლივი შრომის შედეგს იმკის. რობერტმა ზედიზედ ორ შეხვედრაში ულამაზესი საჯარიმო გოლი გაიტანა, თანაც თითქმის იდენტური. ისე, როგორც "მაინცის" წინააღმდეგ, გუშინ საღამოსაც ლევანდოვსკიმ დარტყმა დაახლოებით 22-25 მეტრიდან შეასრულა და მეკარისაგან შორეულ კუთხეში მარტივად ჩასვა. დავიდ ალაბას შორეული საჯარიმოები გამოსდის, ხაბი ალონსოსაც ძლიერი დარტყმა აქვს, ლევანდოვსკი კი თავისი მშვენიერი მარჯვენა ტერფით "ბაიერნის" ახალი იარაღია, რომელიც იმედია მომავალშიც გაისვრის.

პირველი დიდი გამარჯვება
კარლო ანჩელოტიმ მიმდინარე სეზონში უმაღლესი კლასის გუნდი პირველად დაამარცხა და ეს ფსიქოლოგიური თვალსაზრისით, საკმაოდ მნიშვნელოვანია. თამაშის წინ, მატს ჰუმელსმა, იდეალური განცხადება გააკეთა და აღნიშნა, რომ "ბაიერნმა" საკუთარ თავს უნდა დაუმტკიცოს თუ რა შეუძლია. "ატლეტიკო" მინდორზე ძირითადი შემადგენლობით გავიდა და მიუხედავად იმისა, რომ მატჩს არანაირი სატურნირო დატვირთვა არ ჰქონდა, "რეკორდმაისტერმა" მაინც ფასეულ წარმატებას მიაღწია. პრინციპულ და რთულ შეხვედრაში გუნდმა ორგანიზებული, სწრაფი, კომბინაციური ფეხბურთი აჩვენა, მოხიბლა გულშემატკივარი და დადო კარგი შედეგიც. ეს მნიშვნელოვანია, როგორც ქომაგების განწყობისათვის, ისე მოთამაშეების თავდაჯერებულობისათვის და ანჩელოტისთვისაც. მადრიდში და დორტმუნდში წაგებების შემდეგ, იტალიელი საკუთარ კედლებში "ატლეტიკოსთან" მორიგ მარცხს ნამდვილად ვეღარ შეეგუებოდა. ახლა კი, ული ჰიონესის დაბრუნების შემდეგ, "ბაიერნმა" სამიდან სამი თამაში მოიგო და პოზიტიურ განწყობაზე მომდევნო თამაშისთვის მზადებას დაიწყებს.

უნიკალური სერია გრძელდება
მიუნხენის "ბაიერნისთვის" საკუთარი არენა და გულშემატკივარი საკმაოდ დიდი ძალაა. არავისთვისაა საიდუმლო, რომ "რეკორდმაისტერს" ჩემპიონთა ლიგის გასვლით თამაშებში ძალიან, ძალიან ცუდი სტატისტიკა აქვს, მაგრამ სახლში ყველას და ყველაფერს ამარცხებს. 2014 წელს, მადრიდის "რეალთან" სამარცხვინო მარცხის (0:4), შემდეგ "ბაიერნმა" ევროპის ყველაზე პრესტიჟულ ტურნირზე ზედიზედ 15 საშინაო თამაში მოიგო, რაც ტურნირის აბსოლუტური რეკორდია. კიდევ უფრო შთამბეჭდავია ბურთების სხვაობა, რომელიც უკვე 53:8-ზეა. ანუ გამოდის, რომ "ბაიერნს", "ალიანს არენაზე", ჩემპიონთა ლიგის შეხვედრაში საშუალოდ 3,5 გოლი გააქვს, რაც ფენომენალური მაჩვენებელია. "რეკორდმაისტერმა" გუშინდელ შეხვედრაში ქომაგების უნიკალური მხარდაჭერა ნამდვილად იგრძნო და იმედია, ეს საოცარი საშინაო სერია მიმდინარე სეზონში არ შეწყდება.

ახლა "ბაიერნი" ამ გამარჯვებას შეირგებს და "ვოლფსბურგთან" თამაშისთვის მომზადებას შეუდგება. კარლო ანჩელოტის გუნდმა ბოლო ორი თამაში საკმაოდ მაღალ დონეზე ჩაატარა და ეცდება, რომ ეს თამასა შეინარჩუნოს. 2016 წლისთვის ჩემპიონთა ლიგა "ბაიერნმა" უკვე მოითავა და ორშაბათ დღეს დაელოდება, როდესაც მერვედფინალური ეტაპის კენჭისყრა გაიმართება.

დავით მაღრაძე, სპეციალურად Bayern.ge-სთვის
скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
მატჩის ანალიზი ჩემპიონთა ლიგა
მსგავსი სიახლეები
კომენტარები
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა