...

ჭეშმარიტი ერთგულება - კლაუს აუგენტალერი

მიუნხენის "ბაიერნს" საკმაოდ მდიდარი და დიდი ისტორია აქვს. შესაბამისად, სხვადასხვა დროს, გერმანული გრანდის ღირსებას არაერთი გამორჩეული, საკუთარი ეპოქის ერთ-ერთი უძლიერესი მოთამაშე იცავდა, რომელთაც წითელი მაისურით უნიკალური ფეხბურთ აჩვენეს, კლუბის ისტორიის მნიშვნელოვანი ფურცლები შეავსეს და წარუშლელი კვალი დატოვეს. "რეკორდმაისტერის" ნამდვილ ლეგენდებზე საუბრისას, ალბათ, უმრავლესობა, პირველ რიგში, იხსენებს ფრანც ბეკენბაუერს, კარლ-ეინც რუმენიგეს, გერდ მიულერს ან ული ჰიონესს. თუმცა, აღსანიშნავია, რომ არც ერთ მათგანს არ გაუტარებია "ბაიერნში" მთელი თავისი კარიერა განსხვავებით იმ მოთამაშისგან, რომელმაც, შესაძლოა, კაიზერ ფრანცის ნაირი სახელი ვერ დატოვა, მაგრამ საკუთარი კარიერა ბოლომდე მიუნხენურ კლუბს მიუძღვნა.

კლაუს აუგენტალერი გერმანული ფეხბურთის გამორჩეული ფიგურა და ყველა დროის ერთ-ერთი საუკეთესო მცველია, რომელიც ყოველთვის საოცრად სტაბილური და საიმედო იყო. ახლა კი ამ უნიკალური მოთამაშის შესახებ ვისაუბრებთ და შეძლებისდაგვარად გავიხსენებთ მის მიუნხენურ კარიერას, რომელიც ძალიან წარმატებული, საინტერესო და რაც მთავარია, ხანგრძლივი გამოდგა.

ყველაფერს თავიდან დავიწყებთ და დეტალურად მიმოვიხილავთ იმ მოთამაშის კარიერას, რომელიც ძალიან დიდი ხნის განმავლობაში ყველაზე დროის ყველაზე ტიტულოვანი გერმანელი ფეხბურთელი იყო.

კლაუს აუგენტალერი 7 წლის ასაკში ბავარიული "ვილზჰოფენის" აკადემიაში ჩაირიცხა და ამ პატარა კლუბში თერთმეტი წელი დაჰყო. 18 წლის ასაკში კი ის უკვე მიუნხენის "ბაიერნმა" მიიწვია, ერთ წელიწადში კი კლაუსი ძირითადი გუნდის წევრი იყო. "რეკორდმაისტერის" მთავარ გუნდში აუგენტალერი 1976 წელს ჩაირიცხა, მაგრამ მაღალი კონკურენციის გამო მოცდა მოუწია. მისი დებიუტი 1977/78 წლების სეზონში, გერმანიის ეროვნული ჩემპიონატის მე-11 ტურის შეხვედრაში, შინ დორტმუნდის "ბორუსიას" წინააღმდეგ, შედგა. მიუნხენელებმა თამაში 3:0 მოიგეს და ერთი ბურთ დებიუტანტმა, 20 წლის აუგენტალერმა გაიტანა, რომელიც მაშინ ცენტრალური ნახევარმცველის პოზიციაზე მოქმედებდა. კლაუსს პირველი შანსი გერმანელმა სპეციალისტმა, დეტმარ კრამერმა, მისცა და პირველ მატჩებში წითელი მაისურით აუგენტალერი საყრდენის როლს ასრულებდა.
თუმცა, ნოემბერში გუნდმა ოთხმატჩიანი წაგებების სერია გამოაცხო და კრამერმა საკუთარი პოსტი უნგრელ დიულა ლორანტს დაუთმო, რომელმაც ბევრი რამ შეცვალა. პირველ რიგში, ლორანტმა დაცვის ცენტრში ლეგენდარული თანდემი შექმნა და ჰანს-ჯორჯ შვარცენბეკს კლაუს აუგენტალერი შეუწყვილა. აუგემ ცენტრალური მცველის როლი იდეალურად მოირგო და სადებიუტო სეზონი ფანტასტიკურ ფორმაში ჩაამთავრა. ის ძირითადის მუდმივი წევრი გახდა მისი დუეტი შვარცენბეკთან კი ძალიან კარგად გამოიყურებოდა. თუმცა, "ბაიერნს" სხვა პრობლემები ჰქონდა, გუნდი სტაბილურად ვერ თამაშობდა და საბოლოოდ, ბუნდესლიგაში კატასტროფული მე-12 პოზიცია დაიკავა. ვერცხლის სინი კი "კიოლნმა" მოიპოვა.

მომდევნო სეზონში აუგენტალერმა მაღალი დონის თამაშის ჩვენება განაგრძო, მაგრამ "რეკორდმაისტერს" სტაბილურობა კვლავ აკლდა. ყველასათვის კარგად ცნობილმა თამაშმა კი ლორანტის ბედი შეიწირა. ბუნდესლიგის მე-16 ტურში, საკუთარ მოედანზე, მიუნხენური გრანდი დუისელდორფის "ფორტუნასთან" 1:7 განადგურდა. იმ შეხვედრაში კლაუსმა გოლი გაიტანა, მაგრამ მისმა გუნდმა სამარცხვინო მარცხი იწვნია და დიულამ საკუთარი ადგილი თანამემამულე პალ ჩერნაის დაუთმო. ამ უკანასკნელმა ნორმალურად იმუშავა, "ბაიერნმა" სეზონი მეოთხე ადგილზე დაასრულა და უეფას თასის საგზური მოიპოვა. მარცხენა მცველის პოზიციაზე აუგენტალერი პირველად სწორედ ჩერნაიმ ათამაშა.
1979/80 წლების კამპანია კი მიუნხენური გრანდისათვის ძალიან წარმატებული გამოდგა. ევროარენაზე "ბაიერნმა" ნახევარფინალამდე მიაღწია და იქ ფრანკფურტის "აინტრახტთან" დამარცხდა. სამაგიეროდ, გერმანიის ეროვნულ ჩემპიონატში დამაჯერებლად იასპარეზა და ექვსწლიანი პაუზის შემდეგ ბუნდესლიგა პირველად მოიგო. აუგენტალერმა მთელი სეზონი დიდებულად ჩაატარა და კარიერაში პირველი ტიტული მოიპოვა. ჩერნაიმ დიდებული გუნდი შექმნა, რომლის ერთ-ერთ ლიდერად აუგე ყალიბდებოდა.

1980 წლიდან კი აუგენტალერი "ბაიერნის" დაცვის ნამდვილ ლიდერად იქცა, რადგან ჰანს-ჯორჯ შვარცენბეკი უკვე ასაკში იყო, ძირითადში ადგილი დაკარგა და ერთ წელიწადში კარიერაც დაასრულა. კლაუსი კი უფრო და უფრო უმატებდა, ფანტასტიკური დარტყმის წყალობით გოლებიც გაჰქონდა და "რეკორდმაისტერის" მნიშვნელოვანი ფიგურა გახდა. მიუნხენგლადბახის "ბორუსიასთან" საშინაო შეხვედრაში აუგენტალერმა კარიერაში პირველი დუბლი გაიფორმა. პალ ჩერნაის ბრწყინვალე გუნდმა ბუნდესლიგის ტიტული შეინარჩუნა, ჩემპიონთა თასზე კი ნახევარფინალამდე მივიდა. "ბაიერნი" ტურნირის მოქმედმა ჩემპიონმა, ბობ პეისლის ლეგენდარულმა "ლივერპულმა" შეაჩერა, თანაც სტუმრად გატანილი გოლის წყალობით. ინგლისში უგოლო ფრის შემდეგ მიუნხენში მატჩი ფრედ 1:1 დასრულდა, ფინალში "ლივერპული" გავიდა და მერსესაიდელებმა ევროპის ყველაზე პრესტიჟული საკლუბო ტურნირი კვლავ მოიგეს.

ახლა ცოტათი გადავუხვიოთ და აუგენტალერის სათამაშო სტილზე ვისაუბროთ. როგორც უკვე აღვნიშნეთ, მას ძალიან კარგი მარჯვენა ჰქონდა და შორიდან საოცარ დარტყმებს ანხორციელებდა. როგორც წესი, აუგე აქცენტს ძალაზე აკეთებდა და არაერთი ლამაზი ბურთი აქვს გატანილი. კლაუსს საჯარიმოების შესრულებაც კარგად გამოსდიოდა. ამავდროულად, ფიზიკურად ძლიერი აუგენტალერი, საკმაოდ ტექნიკური მცველი იყო და კარგი პირველი პასი ჰქონდა. უფრო მარტივად რომ შეგექმნათ წარმოდგენა, აუგე ძალიან ჰგავს მატს ჰუმელსს, როგორც აღნაგობით, ისე მინდორზე საკუთარი მოქმედებებით. "ბაიერნის" მეხუთე ნომერი ძალიან დახვეწილი, თავდაჯერებული და სტაბილური იყო. უძლიერესი შორეული დარტყმით კი მეტოქის კარსაც ხშირად ემუქრებოდა.
მიუნხენურ კლუბს ვერცხლის სინის ზედიზედ მესამედ მოგება არ გამოუვიდა, მაგრამ აუგენტალერმა პროგრესი გააგრძელა და კიდევ უფრო შედეგიანი გახდა. ის "ბაიერნის" დაცვის ბურჯად იქცა და ქომაგებს ლამაზი გოლებითაც ანებივრებდა. გარდა ამისა, პალ ჩერნაიმ "რეკორდმაისტერი" ჩემპიონთა თასის ფინალში გაიყვანა. როტერდამში გერმანული გრანდი, რომლის რიგებში აუგენტალერთან ერთად, პოლ ბრაიტნერი, დიტერ ჰიონესი და კარლ-ეინც რუმენიგე ბრწყინავდნენ, ინგლისურ "ასტონ ვილას" დაუპირისპირდა და მიუხედავად უპირატესობისა, 0:1 დამარცხდა. ერთადერთი ბურთ პიტერ ვაითმა გაიტანა და "ბაიერნმა" საკმაოდ მძიმე დარტყმა გადაიტანა.

მიუნხენური კლუბი 70-იანი წლების დიდებული წარმატების შემდეგ, როდესაც "ბაიერნმა" ჩემპიონთა თასი ზედიზედ სამჯერ მოიგო, ევროპის ყველაზე პრესტიჟული ტურნირის ფინალში პირველად გავიდა და სამწუხაროდ დამარცხდა. თუმცა, ჩერნაიმ გუნდი უტიტულოდ არ დატოვა და "წითლებმა" გერმანიის თასი მაინც მოიპოვეს. თუმცა, მომდევნო კამპანიაში "რეკორდმაისტერს" ბევრი არაფერი გამოუვიდა და პალ ჩერნაი მაისის ბოლოს მოხსნეს. უტიტულო სეზონის შემდეგ გუნდს ლეგენდარული გერმანელი, უდო ლატეკი, დაუბრუნდა.

1983/84 წლების კამპანია მიუნხენურმა გრანდმა კარგად დაიწყო, აუგენტალერი კი მაღალი დონის თამაშს აგრძელებდა. 1983 წლის 5 ოქტომბერს კი, როგორც იქნა, მას ეროვნულ ნაკრებში დებიუტის შანსი მიეცა. ევროპის ჩემპიონატის საკვალიფიკაციო ეტაპზე, ავსტრიასთან საშინაო შეხვედრაში, აუგენტალერმა დასავლეთ გერმანიის ეროვნული გუნდის მაისური პირველად მოირგო და "ბუნდესთიმმა" 3:0 იმარჯვა. კლაუსმა შესარჩევის მომდევნო ორი თამაშიც, თურქეთისა (5:1) და ჩრ.ირლანდიის (0:1) წინააღმდეგ, ძირითადში დაიწყო და ბოლომდე ჩაამთავრა. "ბაიერნმა" ბუნდესლიგა მეოთხე ადგილზე დაასრულა, სამაგიეროდ, გერმანიის თასი მოიგო და ფინალში მიუნხენგლადბახის "ბორუსია" საოცრად დრამატულ ბრძოლაში დაამარცხა. პენალტების სერია 7:6 დასრულდა და ერთადერთი პენალტი "ბაიერნის" რიგებში სწორედ აუგემ გააფუჭა. თუმცა, გუნდმა ტიტული მაინც მოიგო და განწყობა აიმაღლა.
მართალია, აუგე 1984 წლის ევრო პირველობაზე საფრანგეთში ვერ გაემგზავრა, მაგრამ მორიგი წარმატებული სეზონი ჩააატარა, მორიგი ტიტული მოიპოვა და თანაც უდო ლატეკმა ის ლიბეროდ აქცია. "რეკორდმაისტერი" ხუთმცველიან ტაქტიკაზე გადავიდა, აუგენტალერი კი უკანა ხაზის მთავარი ფიგურა და მომაძრავებელი ძალა იყო. მას საამისოდ ყველაფერი ჰქონდა - ბურთის კარგი ფლობა, მშვენიერი პირველი პასი, კარგი მოედნის ხედვა და სითამამე. 1984 წელს მიუნხენური გრანდი კარლ-ეინც რუმენიგემ დატოვა და კაპიტნის სამკლაური 27 წლის აუგემ ჩაიბარა.
უდო ლატეკმა "ბაიერნს" ძველი დიდება დაუბრუნა და 1984-87 წლებში გუნდს ბუნდესლიგა ზედიზედ სამჯერ მოაგებინა. კლაუს აუგენტალერი კი გუნდის კაპიტანი და სულიერი ლიდერი იყო, რომელმაც ახალი როლი ჩინებულად მოირგო. 1985/86 წლების კამპანიაში "რეკორდმაისტერმა" გერმანიის თასიც მოიგო და დუბლი შეასრულა. აუგესთვის კი ყველაზე დასამახსოვრებელი სწორედ იმ კამპანიის ბუნდესლიგა გამოდგა, რომელიც მიუნხენურმა კლუბმა დრამატულად მოიგო.

"ყველაზე დასამახსოვრებელი ბუნდესლიგის ტიტული? ეს 1986 წელს მოხდა. მაშინ ვერცხლის სინი ბოლო ტურში მოვიპოვეთ, როდესაც მიუნხენგლადბახის "ბორუსია" 6:0 გავანადგურეთ. ჩვენმა მთავარმა კონკურენტმა, ბრემენის "ვერდერმა", კი შტუტგარტში 1:2 წააგო. მანამდე კი, ერთი კვირით ადრე, მიხაელ კუტცოპმა, ჩვენთან შეხვედრაში, პენალტი გააფუჭა და "ბაიერნს" ცოტათი გაუმართლა", - იხსენებს აუგენტალერი.
1986 წლის ზაფხულში მან პირველ დიდ საერთაშორისო ტურნირზე, მსოფლიო ჩემპიონატზეც იასპარეზა და მუნდიალზე ოთხი თამაში ჩაატარა. თუმცა, ფლეი-ოფის მთავარ მატჩებში, მეოთხედფინალიდან-ფინალამდე მონაწილეობა აღარ მიუღია. დასავლეთ გერმანიის ერვონულმა გუნდმა კი გადამწყვეტი ბრძოლა არგენტინასთან დათმო და ვერცხლის მედლებს დასჯერდა.

1987 წელს კი მიუნხენური კლუბი ჩემპიონთა თასის ფინალში კიდევ ერთხელ გავიდა და სამწუხაროდ, მორიგი მარცხი განიცადა. ნახევარფინალურ ეტაპზე უდო ლატეკის გუნდმა მადრიდის "რეალი" დაამარცხა. პირველი თამაში მიუნხენში მასპინძლებმა 4:1 იმარჯვეს და ანგარიში შორეული ზუსტი დარტყმით აუგემ გახსნა. საპასუხო შეხვედრაშ კი მადრიდელებმა 1:0 მოიგეს, კლაუსი კი მოედნიდან გააძევეს. კაპიტნის გარეშე დარჩენილმა გუნდმა კი ფინალში "პორტუსთან" 1:2 წააგო და ჩემპიონთა თასის ზედიზედ მეორე ფინალი წააგო.
"ჩემპიონთა თასი არასოდეს მომიგია. ჩვენ ფინალში ორჯერ ვიყავით და ორივეჯერ დავმარცხდით. ვფიქრობ, მაშინდელი ფინალები "ჩელსისა" და "ბაიერნის" 2012 წლის დაპირისპირებას გავდნენ, რადგან ორივე შემთხვევაში საუკეთესო გუნდი დამარცხდა", - მწუხარებით იხსენებს ლეგენდარული აუგე, რომელიც მიუნხენური გრანდის ლეგენდად იქცა. თუმცა, დასავლეთ გერმანიის ნაკრებში სამი წლის განმავლობაში აღარ უთამაშია.

1987 წელს "ბაიერნი" უდო ლატეკმა დატოვა და მისი ადგილი იუპ ჰაინკესმა დაიკავა. პირველი სეზონი რთული და უტიტულო გამოდგა, მაგრამ შემდეგ კამაპანიაში გუნდმა ბუნდესლიგის ტიტული მოიპოვა. აუგენტალერმა კი 32 წლის ასაკში კარიერაში ერთ-ერთი საუკეთესო სეზონი ჩაატარა, ბუნდესლიგაში ექვსი გოლის გატანა მოახერხა, უეფას თასზე კი კიდევ სამი გოლი გაიტანა. აუგემ ყველაზე შედეგიანი კამპანია ჩაატარა. უეფას თასზე გუნდი ნახევარფინალში დამარცხდა, სადაც "ბაიერნი" "ნაპოლიმ" გამოაგდო. აუგენტალერი დიეგო არმანდო მარადონას პირველად სწორედ მაშინ დაუპირისპირდა.
1989 წელს აუგენტალერი ფრანც ბეკენბაუერმა ეროვნულ ნაკრებში დააბრუნა, რადგან კლაუსი, მიუხედავად ასაკისა, ფანტასტიკურად გამოიყურებდა, "ბუნდესთიმს" კი გამოცდილი, მენტალურად ძლიერი და საიმედო უკანა ხაზელი სჭირდებოდა. ის ირლანდიასთან ამხანაგური თამაშისთვის დაბრუნდა და შემდეგ მსოფლიო ჩემპიონატისთვის მზადება დაიწყო. 1989/90 წლების საკლუბო სეზონი კი აუგემ კვლავ ძალიან მაღალ დონეზე ჩაატარა და კარიერაში უკანასკნელად აღმართა თავს ზემოთ ვერცხლის სინი. მცირე ჯანმრთელობის პრობლემების გამო მას რამდენიმე კვირა გაუცდა, მაგრამ ბუნდესლიგაში სულ 24 თამაში ჩაატარა, ერთ ბურთი გაიტანა და ოთხი საგოლე გადაცემა გააკეთა. ის იუპ ჰაინკესის ხელმძღვანელობით კვლავ ლიბეროს პოზიციაზე მოქმედებდა და დაცვისა და ნახევარდაცვის დამაკავშირებელი რგოლი იყო.

1990 წელს "რეკორდმაისტერმა" ბუნდესლიგა ზედიზედ მეორედ მოიგო და აუგენტალერმა ეს ტიტული კარიერაში მეშვიდედ მოიპოვა, რაც დიდი ხნის განმავლობაში საუკეთესო მაჩვენებელი იყო, იმ დროისთვის კი, აბსოლუტური რეკორდი.
1990 წლის ზაფხულში კი კლაუს აუგენტალერი დასალვეთ გერმანიის ეროვნულ გუნდს ერთი თვით დაუბრუნდა, მაგრამ ეს დაბრუნება ძალიან ბევრს ნიშნავდა. ბეკენბაუერმა იტალიის მუნდიალზე სწორედ იმ ტაქტიკით ითამაშა, რომლითაც "ბაიერნი" თამაშობდა, ამიტომ აუგემ ისევ ლიბეროს როლი მიორგო და "ბუნდესნაკრების" უმნიშვნელოვანესი მოთამაშე გახდა. მუნდიალზე კაიზერ ფრანცის გუნდში სამმა მოთამაშემ მთელი ტურნირი შეუცვლელად ჩაატარა. ისინი იყვნენ: მეკარე ბოდო იილგნერი, კაპიტანი ლოთარ მათეუსი და კლაუს აუგენტალერი. გერმანელებმა ჯგუფური ეტაპი მარტივად გადალახეს, შემდეგ კი ჰოლანდიისა და ჩეხოსლოვაკიის საკმაოდ ძლიერი ეროვნული გუნდები მინიმალური სხვაობით დაამარცხეს. ნახევარფინალში კი მსოფლიო ჩემპიონატების ისტორიაში ერთ-ერთი გამორჩეული დაპირისპირება გაიმართა. ტურინში დასავლეთ გერმანიისა და ინგლისის ნაკრებებმა ნამდვილი დრამა დადგეს, რომლის ძირითადი დროც ფრედ 1:1 დასრულდა. საქმე პენალტების სერიამდე მივიდა და "სამმა ლომმა" ბოლო ორი თერთმეტმეტრიანი გააფუჭა - 4:3, გერმანია ფინალში ზედიზედ მეორედ გავიდა და ზედიზედ მეორედ არგენტინას გადაეყარა.

ფინალური შეხვედრა, რომელშიც გერმანელებს რევანშის აღება სწყუროდათ, ძალიან დაძაბაული და თანაბარი გამოდგა. ყველაფერი კი იურგენ კლინსმანის წაქცევამ და მსაჯის მიერ დანიშნულმა პენალტმა გადაწყვიტა. ძირითადი დროის დასრულებამდე ხუთი წუთით ადრე კაპიტან ლოთარ მათეუსს მუხლები აუკანკალდა, სამაგიეროდ, ბურთთან ანდრეას ბრემე მივიდა და ზუსტი დარტყმით საკუთარ გუნდს მსოფლიო თასი მოაგებინა. დასავლეთ გერმანიის ნარკებმა 90 წუთის განმავლობაში მსოფლიო ფეხბურთის მთავარი ვარსკვლავი დიეგო მარადონა შეაჩერა და საწადელსაც ამიღწია. დიეგო არმანდოს განეიტრალებაში კი აუგენტალერმა უდიდესი წვლილი შეიტანა. თამამად შეიძლება ითქვას, რომ მათეუსმა დიეგო სწორედ აუგეს დახმარებით შეაჩერა და "ბუნდესთიმის" ამ უდიდეს წარმატებაში "ბაიერნის" 33 წლის ლეგენდამ უდიდესი წვლილი შეიტანა.
მსოფლიო ჩემპიონატზე ტრიუმფიდან ერთ წელიწადში კლაუს აუგენტალერმა, 34 წლის ასაკში, კარიერა დაასრულა და მიუნხენური გრანდი ღირსეულად დატოვა. საკუთარ ბოლო სეზონში ის "რეკორდმაისტერის" ძირითადი მოთამაშე და საიმედო დამცველი იყო. 1990/91 წლების კამპანიაში, რომელიც მისთვის უკანასკნელი გამოდგა, აუგემ 34 მატჩი ჩაატარა და ხუთი გოლის გატანა მოახერხა. მან საფეხბურთო მოღვაწეობა ისე დაასრულა, როგორც ნამდვილ ლეგენდას შეეფერება - ბოლო წუთებამდე საკუთარი გუნდის ნამდვილი კაპიტანი და ერთ-ერთი მნიშვნელოვანი ფიგურა იყო. ხოლო, როდესაც მიხვდა, რომ ნელ-ნელა იდეალურ კონდინციებს კარგავდა, გაჩერება გადაწყვიტა და გზა უფრო ახალგაზრდა მოთამაშეებს დაუთმო, რომელთაც მომდევნო ათწლეულის დასაწყისში ის გააკეთეს, რაც აუგემ ვერ მოახერხა და "ბაიერნს" ჩემპიონთა ლიგის თასი მოაგებინეს.

"ჩემი ოცნება იყო, რომ პროფესიონალი ფეხბურთელი გავმხდარიყავი. საბოლოოდ წარმატებული გახდები თუ არა ამის წინასწარ განსაზღვრა შეუძლებელია. მე დიდი ტალანტი ნამდვილად არ მქონია, მაგრამ ძალიან მონდომებული ვიყავი და საკუთარი ოცნების ასახდენად ძალები არასოდეს დამიზოგავს. მინდორზე ყოველთვის მაქსიმალურად ვიხარჯებოდი და შრომა, ვფიქრობ, დამიფასდა", - ასე უპახუსა აუგენტალერმა კითხვას თუ როგორ აიწყო ასეთი წარმატებული კარიერა.

თქვენს წინაშე იყო დიდებული კლაუს აუგენტალერი, რომელიც მიუნხენის "ბაიერნის" ღირსებას 15 წელი იცავდა, აქედან შვიდი წელიწადი (1984-91) გუნდის კაპიტანი იყო და "რეკორდმაისტერთან" ერთად დიდ წარმატებებს მიაღწია. აუგე "რეკორდმაისტერში" მისვლის პირველივე დღიდან გამორჩეული ფიგურა იყო და მთელი თავისი კარიერა მიუნხენურ გრანდს მიუძღვნა. ის მინდორზე ღირსეული ლიდერი და ნამდვილი გუნდისთავი იყო, რომელსაც ყველა პატივს სცემდა და აფასებდა, როგორც უაღრესად შრომისმოყვარე ფეხბურთელს. აუგენტალერი ფიზიკურად ძლიერი, უძლიერესი და უზუსტესი დარტყმის მქონე, ცენტრალური მცველი იყო, რომელსაც კარგი საფეხბურთო ინტელექტიც გააჩნდა. ყველაზე მთავარი კი სტაბილურობაა და ის ერთგულებაა, რომელიც მან "ბაიერნის" მიმართ გამოავლინა.

ასე, რომ თუ ვინმეს ჰგონია, რომ ისეთი დიდი ლეგენდების გვერდით, როგორებიც ზეპ მაიერი, ფრანც ბეკენბაუერი, ლოთარ მათეუსი, ული ჰიონესი, კარლ-ჰაინც რუმენიგე, გერდ მიულერი არიან, კლაუს აუგენტალერის ხსენება ცოტათი უხერხულია, ძალიან ცდებით! პირიქით, აუგემ საკუთარი მოღვაწოებით "ბაიერნის" ისტორიაში სამუდამოდ კვალი დატოვა და მისი ადგილი ისტორიის სწორედ იმ ფურცელზეა, რომელზეც "რეკორდმაისტერის" წარმატების მთავარი შემოქმედნი იმყოფებიან.

აუგე იყო, არის და იქნება ნამდვილი ბავარიელი, რომელიც საფეხბურთო კარიერის დასრულების შემდეგაც "ბაიერნის" სამსახურში იყო. ჯერ ახალგაზრდულ გუნდს წვრთნიდა (1991-92), შემდეგ მთავარი მწვრთნელის ასისტენტი იყო (1992-1997) და გარკვეული პერიოდით "რეკორდმაისტერის" მთავარი მწვრთნელის მოვალეობაც შეასრულა.


დავით მაღრაძე, სპეციალურად Bayern.ge-სთვის
скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
კლაუს აუგენტალერი ბლოგი
მსგავსი სიახლეები
კომენტარები
ZURGEN
ZURGEN | 26 იანვარი 2017 16:45
ასეთი ერთგული უნდა იყოს ფეხბურთელი თავისი გუნდის fcb
Hansi
Hansi | 27 იანვარი 2017 00:16
აუგე შტეფან როიტერმა შეცვალა ბაიერნში heart_eyes ორივე უძლიერესი ფეხბურთელი იყო.
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა