მამარდაშვილის შემცვლელად? იან ზომერის სახელი 4 კლუბს დაუკავშირეს

მოგეხსენებათ, იან ზომერის ბაიერნიდან წასვლა პრაქტიკულად გადაწყვეტილი ამბავია - ამის მიზეზი კი ის გახლავთ, რომ რეკორდმაისტერს ხანგრძლივი ტრავმის შემდეგ მანუელ ნოიერი უბრუნდება, რაც ავტომატურად იმას ნიშნავს, რომ ზომერი სასტარტო შემადგენლობაში ადგილს დაკარგავს - ეს კი 34 წლის მეკარის გეგმებში არ შედის.

ზომერი 2024 წლის ევროპის ჩემპიონატზე გამოსვლას აპირებს და საამისოდ სათამაშო პრაქტიკა სჭირდება.

როგორც გერმანული kicker წერს, იან ზომერის დამატება 4 კლუბს სურს, მათ შორისაა გიორგი მამარდაშვილის ვალენსიაც, რომელიც ქართველ მეკარეს სეზონის ბოლოს დიდი ალბათობით ფინანსური კრიზისის გამო გაყიდის, გარდა ღამურებისა, ზომერის დამატება ლესტერ სიტის, მონაკოს და ვილიარეალსაც სურთ.

ცნობისთვის, ზომერსა და ბაიერნს შორის არსებულ კონტრაქტს ვადა 2025 წელს გასდის, თუმცა მხარეებს შორის 'ჯელტმენური' შეთანხმება არსებობს, რაც ზომერს კლუბის დატოვების შესაძლებობას აძლევს, თუ ნოიერი მთავარ მეკარედ დაბრუნდება.