ყურსასმენები ფეხბურთში - ნაგელსმანის გიჟურ იდეას ბევრი მოწინააღმდეგე ყავს

მიუნხენის ბაიერნის თავკაცმა, იულიან ნაგელსმანმა ერთ-ერთ ინტერვიუში საინტერესო და მოულოდნელი განცხადება გააკეთა, სადაც ის ამერიკული ფეხბურთის ტექნოლოგიურ განვითარებაზე საუბრობს, რისი ფეხბურთში გადმოღებაც შესაძლებელია:

'ამერიკული ფეხბურთი ტექნოლოგიურად ბევრად უფრო განვითარებულია, ვიდრე ფეხბურთი. იქ მოთამაშეებს ყურსასმენები აქვთ, რათა საკუთარ მწვრთნელს მოუსმინონ.

ჩვენც გვჭირდება მსგავსი რამ - ფეხბურთმა უნდა შეწყვიტოს ტრადიციების მიღმა დამალვა და საკუთარ თავში რევოლუცია უნდა მოახდინოს', - განაცხადა ნაგელსმანმა.

გერმანელი სპეციალისტის ამ განცხადებამ, გულშემატკივართა გარკვეულ ნაწილში უკმაყოფილება გამოიწვია - მათ მიაჩნიათ, რომ ამდაგვარი გადაწყვეტილებები, ფეხბურთს იმ ხიბლს დაუკარგავს, რის გამოც ამდენ ადამიანს უყვარს.