...

ისტორიულ ტრებლამდე (2010-დღემდე)

პირველ რიგში, აღსანიშნავია, რომ 2009 წლის ნოემბერში მიუნხენურ კლუბს ახალი პრეზიდენტი ჩაუდგა სათავეში. გენერალური დირექტორის პოსტზე 30 წლიანი მუშაობის შემდეგ ფრანც ბეკენბაუერი ული ჰიონესმა შეცვალა.

თუმცა, მანამ, სანამ "ბაიერნის" პრეზიდენტის სკამს ული დაიკავებდა, გუნდი ჰოლანდიელმა სპეციალისტმა, ლუი ვან გაალმა ჩააბარა. მასთან ერთად გუნდში გერმანელი თავდამსხმელი, მარიო გომესი და მადრიდის "რეალის" ვინგერი, არიენ რობენი მივიდნენ. გარდა ამისა, ლუიმ, როგორც ჩვევია ხოლმე, ახალგაზრდული აკადემიიდან რამდენიმე ფეხბურთელი დააწინაურა, მათ შორის ჰოლგერ ბადშტუბერი და ტომას მიულერი. საბოლოოდ, მიუნხენურმა კლუბმა ძალიან მიმზიდველი, შემტევი ფეხბურთი აჩვენა, მოიგო ბუნდესლიგა და გერმანიის თასი, ტრებლამდე კი მილანის "ინტერმა" არ მიუშვა. "ბაიერნი" ჩემპიონთა ლიგის ფინალში, "სანტიაგო ბერნაბეუზე", ჟოზე მოურინიოს გუნდთან 0:2 დამარცხდა, მაგრამ ის სეზონი, ნებისმიერ შემთხვევაში, კლუბის ისტორიაში ერთ-ერთ ყველაზე წარმატებულია.

2010/11 წლების სეზონი კი "ბაიერნმა" გერმანიის სუპერთასის მოგებით დაიწყო და გელზენკირხენის "შალკე" 2:0 დაამარცხა. სამწუხაროდ, ეს ამ კამპანიის ერთადერთი ნადავლი გამოდგა. გერმანიის თასზე, ნახევარფინალურ ეტაპზე, "შალკემ" რევანში აიღო, ევროპის ყველაზე პრესტიჟულ ტურნირზე "ბაიერნი" კვლავ "ინტერმა", მაგრამ ამჯერად მერვედფინალში, დაამარცხა. ბუნდესლიგაშიც საქმეები ძალიან ცუდად წავიდა და "ბაიერნი" ჩემპიონთა ლიგის ზონის მიღმა რჩებოდა. სწორედ ამიტომ, 2011 წლის აპრილში ვან გაალი მისმა ასისტენტმა, ანდრიეს იონკერმა, შეცვალა და გუნდი მესამე ადგილზე გაიყვანა.

2011 წლის ზაფხულში კი მიუნხენური კლუბი, კარიერაში მესამედ, იუპ ჰაინკესმა ჩაიბარა. ჩემპიონთა ლიგის საკვალიფიკაციო ეტაპზე "ბაიერნმა" "ციურიხს" მარტივად, ორი მატჩის ჯამში, 3:0 მოუგო. ჯგუფურ ეტაპზე რამდენიმე ბრწყინვალე მატჩი ჩაატარა, ხოლო მიუნხენის გზაზე კი მათი მოხერხება ვერავინ შეაჩერა. "რეკორდმაისტერმა" "ბაზელი", მარსელის "ოლიმპიკი" და მადრიდის "რეალი" ჩამოიტოვა გზაში, წინ კი ლონდონის "ჩელსისთან" დაპირისპირება რჩებოდა, თანაც "ალიანს არენაზე".

"ბაიერნი" მთელი 90 წუთის განმავლობაში დომინირებდა და მატჩის მიწურულს, ტონი კროოსის ჩაწოდების შემდეგ, ტომას მიულერმა გოლიც გაიტანა. ყველამ იფიქრა, რომ მიუნხენელები გამარჯვებას ხელიდან არ გაუშვებდნენ, ზეიმი ფაქტობრივად დაწყებული იყო, როდესაც დიდიე დროგბამ თავით წონასწორობა აღადგინა. დამატებით დროში კი "ბაიერნმა" პენალტის დარტყმის უფლება მიიღო. ბურთთან არიენ რობენი მივიდა, მაგრამ მისი დარტყმული პეტერ ჩეხმა აიღო. თერთმეტმეტრიანების სერიაში კი ინგლისელებმა 4:3 იმარჯვეს და "ბაიერნს" ისტორიაში ყველაზე მძიმე დარტყმა მიაყენეს. საკუთარ მოედანზე წაგებული ფინალი, თანაც უდიდესი უპირატესობის ფონზე, "რეკორდმაისტერის" ისტორიაში უდიდესი შავი ლაქაა.

ყველაზე მძიმე კი ის იყო, რომ იუპ ჰაინკესის გუნდმა მანამდე კიდევ ორი ფინალი წააგო. ჯერ გერმანიის ჩემპიონატში, როდესაც დორტმუნდის "ბორუსიასთან" რვაქულიანი უპირატესობა გაფლანგა და "სიგნალ იდუნა პარკზე" გადამწყვეტი მატჩი წააგო - 0:1. იმ შეხვედრის ბოლო წუთზეც არიენ რობენმა პენალტი გააფუჭა. გერმანიის თასის ფინალში კი "ყვითლებმა" "წითლები" 5:2 გაანადგურეს და "ბაიერნმა" ყველგან მეორე ადგილი დაიკავა.

ეს უმძიმესი სეზონი სერიოზული ცვლილებების საწინდარი გახდა. პირველ რიგში, გუნდში ახალი სპორტული დირექტორი, ძალიან ძლიერი და ცნობილი სპეციალისტი, მატიას ზამერი გამოჩნდა. მას მოჰყვნენ კარგი მოთამაშეები: დანტე, ხერდან შაქირი, კლაუდიო პისარო, ხავი მარტინესი და მარიო მანჯუკიჩი. აგვისტოში "ბაიერნმა" გერმანიის სუპერთასი მოიგო და შინ დორტმუნდის "ბორუსია" 2:1 დაამარცხა. ბუნდესლიგაში კლუბმა არანორმალური ფეხბურთი აჩვენა, სრული დომინაცია დაამყარა და 23-ე ვერცხლის სინი უკვე 28-ე ტურისთვის გაიფორმა. საბოლოოდ, იუპ ჰაინკესის გუნდმა 91 ქულა დააგროვა, "ბორუსიას" 25 ქულით გაასწრო, 29 თამაში მოიგო და ბურთების სხვაობა +80 იყო. სწორედ ამიტომ შეაქრვეს ქომაგებმა ამ საოცარ კოლექტივს "სუპერ ბაიერნი".

ჩემპიონთა ლიგაზე კი მიუნხენელებმა ბრწყინვალე გზა გაიარეს. მერვედფინალში ინგლისის ერთ-ერთი საუკეთესო გუნდი ლონდონის "არსენალი" გამოაგდეს, მეოთხედფინალში - იტალიის ჩემპიონი ტურინის "იუვენტუსი", ხოლო ნახევარფინალში კი კატალონიის "ბარსელონა" გაანადგურეს. მიუნხენში გერმანელებმა 4:0 იმარჯვეს, ხოლო ესპანეთში - 3:0. ფინალი კი "უემბლიზე" გაიმართა, მთავარი მეტოქის - დორტმუნდის "ბორუსიას" წინააღმდეგ. ლონდონში კი არიენ რობენმა ცოდვა გამოისყიდა. მან ჯერ მარიო მანჯუკიჩს გაატანინა, ხოლო 1:1-ზე, როდესაც უკვე ბოლო წუთი მიდიოდა, გამარჯვების მომტანი გოლი გაიტანა - 2:1. "ბაიერნმა" ჩემპიონთა ლიგის ტიტული მეხუთედ მოიგო, ჰოლანდიელი კი უკვე გმირად იქცა.

იმავე რობენის გოლით "ბაიერნმა" გერმანიის თასის მეოთხედფინალში დორტმუნდის "ბორუსია" 1:0 დაამარცხა, შემდეგ "ვოლფსბურგი" 6:1 გაანადგურა და ბოლოს ტრებლიც შეასრულა. ბერლინში, იუპ ჰაინკესის გუნდმა "შტუტგარტი" 3:2 დაამარცხა და გახდა პირველი გერმანული კლუბი, რომელმაც ტრებლი გააკეთა. 2012/13 წლების სეზონი კლუბის ისტორიაში უდავოდ საუკეთესოა. იუპ ჰაინკესმა ლუი ვან გაალის დიდებულ იდეებს ფრთები შეასხა და "ბაიერნი" უნიკალურ შედეგებამდე მიიყვანა. მიუხედავად მწარე მარცხებისა და ბევრი იმედგაცრუებისა, მიუნხენური გრანდი არ გატყდა, მუშაობა ორმაგი შემართებით გააგრძელა და მიზანსაც მიაღწია. ლეგენდარულმა გერმანელმა სპეციალისტმაც სიტუაციით ისარგებლა და კარიერა დაასრულა. მისი შემცვლელის ვინაობა კი უკვე 2012 წლის დეკემბერში ვიცოდით.

2013 წლის ზაფხულში კი გენიალური ესპანელი სპეციალისტის, პეპ გვარდიოლას, ეპოქა დაიწყო, რომელმაც "ბაიერნსა" და გერმანულ ფეხბურთში სრული რევოლუცია მოახდინა. პეპმა მიუნხენურ კლუბში ახალი სტილი დანერგა და გუნდი ახალ დონეზე აიყვანა. მასთან ერთად "რეკორდმაისტერს" ესპანელი გამთამაშებელი, ტიაგო ალკანტარა და დიდებული გერმანელი ტალანტი, მარიო გიოტცე, შეუერთდნენ. სადებიუტო სეზონში პეპმა ბუნდესლიგა კვლავ დამაჯერებლად მოიგო და გერმანიის თასის ფინალში დორტმუნდის "ბორუსიაც" დაამარცხა. ვერცხლის სინის მოგება გვარდიოლას არც მომდევნო სეზონებში გაჭირვებია, მაგრამ "ბაიერნმა" ჩემპიონთა ლიგაზე ნახევარფინალური ეტაპი ვერც ერთხელ ვერ გადალახა.

პირველ ჯერზე გუნდმა სრული კრახი განიცადა და მადრიდის "რეალთან" განადგურდა. მიუნხენში "ბაიერნმა" ისტორიაში ყველაზე დიდი მარცხი განიცადა - 0:4, რაც სრული შოკი იყო ყველასათვის. მომდევნო ჯერზე კი პეპს ყოფილი გუნდი, კატალონიის "ბარსელონა" შეეჩეხა. პირველ მატჩში, რომელიც "კამპ ნოუზე" გაიმართა, "ბაიერნს" რამდენიმე ლიდერი აკლდა, მაგრამ გუნდმა მაინც ღირსეულად იბრძოლა, თავის ფილოსოფიას არ უღალატა და კარგად იასპარეზა. თუმცა, "ბარსას" ლეო მესი ჰყავს, რომელმაც ჯერ შორიდან გახსნა ანგარიში, შემდეგ ბოატენგსა და ნოიერს სასწაულები ჩაუტარა, ბოლოს კი ნეიმარს გაატანინა - 0:3. მიუნხენში "ბაიერნმა" პრესტიჟი დაიცვა და 3:2 მოიგო. ბოლოს კი ესპანელ სპეციალისტს აღარ გაუმართლა. მადრიდის "ატლეტიკომ" შინ 1:0 იმარჯვა, "ალიანს არენაზე" კი 1:2 წააგო. ტომას მიულერს ყველაფრის დასრულება პირველი ტაიმის ბოლოს შეეძლო, მაგრამ პენალტი გააფუჭა. მეორე ტაიმის დასაწყისში დაშვებული ერთადერთი შეცდომა კი გადამწყვეტი აღმოჩნდა. გვარდიოლამ სამი წლის განმავლობაში სამი ბუნდესლიგა, ორი გერმანიის თასი, უეფას სუპერთასი და კლუბთა მსოფლიო ჩემპიონატი მოიგო. თუმცა, მან "ბაიერნის" მოთამაშეები განავითარა და გუნდი ახალ დონეზე აიყვანა, როგორც ტექნიკური, ისე ტაქტიკური თვალსაზრისით.

2016 წლის ზაფხულში კი გვარდიოლა იტალიელმა სპეციალისტმა, ძალიან გამოცდილმა, ტიტულოვანმა და ჭკვიანმა, კარლო ანჩელოტიმ, ჩაიბარა.

დაბრუნება (2000-09)скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

მსგავსი სიახლეები
კომენტარები

მატჩები


სატურნირო მდგომარეობა