...

ბაიერნი 6:0 აუგსბურგი - მატჩის ანალიზი

გუშინ საღამოს მიუნხენის "ბაიერნმა" სანაკრებო პაუზის შემდეგ პირველი მატჩი ჩაატარა და აპრილის უმნიშვნელოვანესი თვე დიდებული გამარჯვებით დაიწყო.

"რეკორდმაისტერმა" საკუთარ მოედანზე "აუგსბურგს" უმასპინძლა და ქომაგებს ნამდვილი დღესასწაული აჩუქა. კარლო ანჩელოტის გუნდმა იდეალური შეხვედრა ჩაატარა, რომელიც დიდი ანგარიშით მოიგო - 6:0.

ახლა კი BAYERN.GE ტრადიციულად გთავაზობთ "ბაიერნის" თამაშის დეტალურ განხილვასა და საინტერესო ანალიზს.

მატჩის მსვლელობა

თავდაპირველად უნდა აღვნიშნოთ, რომ "ბაიერნი" მატჩს დიდი დანაკლისით შეხვდა, რადგან მანუელ ნოიერი და დუგლას კოშტა ტრავმირებულნი იყვნენ, ხავი მარტინესი და ხაბი ალონსო კი - დისკვალიფიკაცირებულნი. თუმცა ანჩელოტის დიდი არჩევანი აქვს, ამიტომ წამყვანი მოთამაშეების შეცვლა კონკრეტული მატჩისათვის არ გასჭირვებია. დაცვის ცენტრში მარტინესის ადგილი ჟერომ ბოატენგმა დაიკავა, ცენტრში კი ხაბი ალონსო ახალგაზრდა იოზუა კიმიხმა შეცვალა. გარდა ამისა, იტალიელმა სპეციალისტმა სასტარტოში ხუან ბერნატი და კინგსლი კომანი დააყენა, რითიც დავიდ ალაბასა და არიენ რობენს დასვენების საშუალება მისცა.

მიუნხენელებმა, როგორც ბოლო პერიოდში ჩვევიათ, აქტიურად დაიწყეს, ბურთზე სრული კონტროლი დააწესეს და მეტოქეს თავიდანვე აგრესიულად მიაწვნენ. საწყისი 10-15 წუთი ცოტათი ქაოტური იყო, მაგრამ მე-17 წუთიდან ნამდვილი სპექტაკლი დაიწყო. ტიაგო ალკანტარა ცენტრიდან დაიძრა, ერთი მოწინააღმდეგე ჩამოიტოვა და საჯარიმოში რობერტ ლევანდოვსკის იდეალურად ჩაუწოდა, რომელმაც ბურთი მიიღო და ცხრიანში უძლიერესი დარტყმით მარცხენა ფეხით გაუშვა - 1:0.


ამის შემდეგ "ბაიერნი" უფრო თავისუფლად, მარტივად ათამაშდა და თომას მიულერის შოუ დაიწყო. "რეკორდმაისტერის" 25-ე ნომერი ძალიან მონდომებული იყო. ის ჯერ მარვინ ჰიტცის კარს ორჯერ შორიდან დაემუქრა - პირველად ბურთი ძელს მოხვდა, შემდეგ კი ჯერ გაზონს და ბოლოს ძელსაც გაექაცუნა. ორი უიღბლობის შემდეგ მიულერს ბედმაც გაუღიმა და პირველი ტაიმის ბოლოს "ბაიერნმა" შესანიშნავი კომბინაცია გაითამაშა. ფრანკ რიბერიმ მარცხენა ფრთაზე ლევანდოვსკის კარგი გრძელი პასი გაუკეთა. პოლონელმა ბურთი მიიღო, აიხედა და საჯარიმოში მიულერს ჩაუწოდა, რომელმაც ცარიელ კარში მარტივად გაიტანა და ბუნდესლიგის მიმდინარე სეზონში თავისი მესამე ბურთი გაიტანა. "აუგსბურგმა" პირველ ტაიმში იბრძოლა, საკუთარ ნახევარზე ასე თუ ისე ნორმალურად მოქმედებდა, მაგრამ "ბაიერნის" კლასმა და მონდომებამ მაინც თავისი ქნა.

მეორე ტაიმში კი საქმე უფრო გამარტივდა, რადგან სტუმრები მორალურად განადგურდნენ და თამაშის სურვილი დაკარგეს. მიუნხენელები კი პირიქით იყვნენ - ბიჭებმა გარკვეული დროის განმავლობაში დაისვენეს და თამაშს მოწყურებულნი იყვნენ. ეს ყველაზე მეტად რიბერის ეტყობოდა, რომელმაც მეორე ნახევრის დებიუტში ლევანდოვსკის ჩინებული პასი გაუკეთა და მეკარესთან პირისპირ დატოვა. რობერტმა კი ეს შანსი გამოიყენა და დუბლი გაიფორმა. დაახლოებით 5 წუთში კი "რეკორდმაისტერმა" ულამაზესი გოლი გაიტანა. ტიაგომ საჯარიმოს მისადგომებთან მიულერს დაუგორა, რომელმაც შიგნით ლევანდოვსკის შეუყოლა, პოლონელმა კი მის უკან მდგომი ტიაგო შენიშნა და ესპანელს ქუსლით ბრწყინვალე პასი გაუკეთა, ალკანტარამ კი ვარდნაში ბურთი კარის ბადეში გაახვია - 4:0! ტიაგომ, მიულერმა და ლევიმ ეს ყველაფერი უბრალოდ დახატეს და მცირე ხელოვნების ნიმუში შექმნეს.


მოგვიანებით ანჩელოტიმ თამაშში არიენ რობენი და რენატუ სანჩეში ჩართო. გამოცდილი ჰოლანდიელი მინდორზე აქტიურად შევიდა და ეგრევე გაამწვავა. "ბაიერნი" ფეხბურთს თამაშობდა და ამით სიამოვნებას იღებდა. ტიაგოს დუბლის გაფორმების კარგი შანსი ჰქონდა, როდესაც დაახლოებით 22 მეტრიდან ძალიან კარგად დაატყა, მაგრამ ბურთი კარის წვერმა უკუაგდო. 79-ე წუთზე კი ჰეთ-თრიქი შედგა - ბოატენგის ჩაწოდების შემდეგ მიულერმა თავით დაარტყა და მას ჰიტცმა საოცარ ნახტომში აუღო, დამატებაზე კი ლევანდოვსკიმ თავით ბურთი ცარიელ კარში გაიტანა - 5:0! უკვე მომდევნო შეტევაში ბოატეგნმა მეტოქის საჯარიმოში მორიგი გრძელი გადაცემა გააკეთა, რომელსაც კვლავ მიულერი გამოეხმაურა, მაგრამ ამჯერად ბურთი ჩამოიღო, ფიზიკური ორთაბრძოლა მოიგო და მიმდინარე სეზონში თავისი პირველი დუბლი გაიფორმა. ეს თომასს მცირე ტრავმის ფასად დაუჯდა, მაგრამ 27 წლის გერმანელი თამაშიდან მხოლოდ დროებით გამოეთიშა და მინდორს მაინც დაუბრუნდა.

საბოლოოდ, 6:0 და ერთადერთი, რაზეც შესაძლოა "ბაიერნის" გულშემატკივარს გული დაწყვეტოდა, ის იყო, რომ არიენ რობენმა ვერ გაიტანა გოლი, რომელიც საოცრად მონდომებული იყო და უკანასკნელ 30 წუთში გაცილებით მეტი გააკეთა, ვიდრე მანამდე, მთელი ერთი საათის განმავლობაში, კინგსლი კომანმა.

ბოა ფორმაშია


ხავი მარტინესის არყოფნაში თავისი შანსი ჟერომ ბოატენგმა მიიღო, რომელიც მძიმე ტრავმის შემდეგ გუნდს მხოლოდ მარტის ბოლოს დაუბრუნდა და მისთვის მთელი მატჩის ჩატარება საკმაოდ მნიშვნელოვანი იყო. გამოდილმა გერმანელმა საკმაოდ კარგი შთაბეჭდილება დატოვა და დაგვანახა, რომ ფორმაშია. ჟერომმა 5 ორთაბრძოლა მოიგო, 65 პასი გააკეთა (93.8% სიზუსტე) და ბოლო ორი საგოლე შეტევა წამოიწყო. ლევანდოვსკიმ და მიულერმა გოლები სწორედ ჟერომის მიერ შექმნილი ეპიზოდების შედეგად გაიტანეს. ბოატენგმა თავის სტილში შემტევები გრძელი გამჭოლი გადაცემებით მოამარაგა და საკუთარი ძალა გაგვახსენა. დიახ, ბოამ მიმდინარე სეზონის პირველი ნახევარი სრულიად ჩააგდო, მაგრამ ის უმაღლესი კლასის ცენტრალური მცველია, უდიდესი გამოცდილებითა და თავდაჯერებულობით, ამიტომ მისი ფორმაში ყოფნა ნამდვილად საჭიროა. ბოატენგმა გუშინ სეზონის საუკეთესო მატჩი ჩაატარა და სასიხარულოა, რომ ის გუნდისათვის კვლავ საიმედოა. მარტინესის ძირითადიდან ამოგდება ძალიან რთული იქნება, მაგრამ ფაქტია, რომ "აუგსბურგთან" თამაშში ბოასა და ჰუმელსის თანდემი შედგა. მეტოქეს მთელი 90 წუთის განმავლობაში მომენტი არ ჰქონია და ზუსტად კარში მხოლოდ ორჯერ დაარტყა.

ბერნატმა და იომ შანსი გამოიყენეს, კომანმა - ვერა


როგორც უკვე აღვნიშნეთ კარლო ანჩელოტიმ გუშინ შანსი სამ ახალგაზრდას მისაც - ხუან ბერნატს, იოზუა კიმიხსა და კინგსლი კომანსა, საიდანაც პირველი ორი ძალიან კარგი იყო, 20 წლის ფრანგი კი პირიქით - ყველაზე ცუდი წითელი მაისურით.

ესპანელმა მარცხენა მცველმა მორიგი კარგი თამაში ჩაატარა და ძალიან სასარგებლო იყო. ბერნატმა ყველაზე მეტი, 25 სპრტინტერული გაქცევა განახორციელა და "ბაიერნის" შეტევით ხაზს მართლაც ნაყოფიერად ეხმარებოდა. გარდა ამისა, დაცვაში უშეცდომოდ მოქმედებდა და "ბაიერნის" კართან მისი პოზიციური ან სხვა ტიპის შეცდომის გამო არანაირი ხიფათი არ შექმნილა. ხუანმა მიმდინარე სეზონში მორიგი წარმატებული მატჩი ჩაატარა და კიდევ ერთხელ დაამტკიცა, რომ ის ალაბას შესაცვლელად ნებისმიერ მომენტში მზად არის.

ყველაზე სასიამოვნო კი "ბაიერნის" მთავარი იმედის, 22 წლის უნიჭიერესი იოზუა კიმიხის, იდეალური თამაში იყო. მაშინ, როდესაც ცენტრში ტიაგო ალკანტარა თამაშობს და ფეხბურთი მინიმუმ სალვადორე დალის ხელოვნების დონემდე აჰყავს, შეუძლებელია შეამჩნიო ის, ვინც მის გვერდით მოქმედებს. თუმცა იო "აუგსბურგის" წინააღმდეგ მინდორზე ერთ-ერთი საუკეთესო იყო და ძალიან დიდი სამუშაო შეასრულა. ის, რომ ტიაგო გუშინ ბრწყინავდა და შეტევაში ლაღად მოქმედებდა, სწორედ კიმიხის დამსახურებაა, რომელიც ესპანელს ზურგს უმაგრებდა და ცენტრში თითქმის ყველა ორთაბრძოლას იგებდა. მან ყველაზე მეტი 7 ერთი-ერთზე დუელი მოიგო, ბურთს ყველაზე მეტჯერ (130) შეეხო, ყველაზე მეტი პასი (107) გააკეთა და გადაცემების სიზუსტეც (94.3%) ყველაზე მაღალი ჰქონდა. ხაბი ალონსოს სწორედ ასეთი შემცვლელი სჭირდება, მაგრამ "ბაიერნის" ბოსები კიმიხს ფილიპ ლამის შემცვლელად მოიაზრებენ. წინა კვირაში იომ გერმანიის ნაკრებიშ მარჯვენა მცველის პოზიციაზე წარმტებით იასპარეზა, გუშინ კი საყრდენის როლში გაიბრწყინა - არჩევანი მართლაც რთული იქნება.

რაც შეეხება კომანს, რომლის გამოსყიდვაც "ბაიერნმა" თვის ბოლომდე უნდა მოასწროს, ცდილობდა, მაგრამ ბევრი არაფერი გამოსდიოდა. ახალგაზრდა ფრანგმა მხოლოდ რამდენიმე ცრუ მუძრაობით დაგვამახსოვრა თავი, მაგრამ მას გაცილებით მეტი შეუძლია. რა თქმა უნდა, ერთი მატჩის ჩაგდების გამო ტრაგედიას არავინ ქმნის, მაგრამ საქმე იმაშია, რომ კომანმა მიმდინარე სეზონში სულ დაახლოებით 3-4 ნაყოფიერი თამაში ჩაატარა, დანარჩენ შეხვედრებში კი თითქმის შეუმჩნეველი იყო.

მიულერომანია მოგვარებულია


პირველი წრის ბოლოს იმაზე ვსაუბრობდით, რომ თომას მიულერი "ბაიერნისთვის" პრობლემა იყო, რომელსაც კარლო ანჩელოტი ვერაფერს უხერხებდა და მნიშვნელოვან თამაშებში ("ლაიფციგსა" და "არსენალის" წინააღმდეგ) საერთოდ მის გარეშე თამაშობდა. 27 წლის გერმანელს რეალურად კრიზისი ჰქონდა, მაგრამ როგორც პაპა კარლო და ული ჰიონესი ამბობდნენ თომასი ფორმაში აუცილებლად ჩადგებაო, ასეც მოხდა. მიულერომანია უკვე მოგვარებულია! თომასმა ზედიზედ ორ თამაშში მოახერხა თავის წარმოჩენა, გუშინ კი მიმდინარე სეზონში თავისი პირველი დუბლი გაიფორმა. თუმცა მთავარი არა შედეგი, არამედ თამაშის ხარისხია. მიულერმა უკანასკნელი ერთი თვის განმავლობაში ძალიან მოუმატა, მინდორზე გაცილებით პროდუქტიული და სასარგებლო გახდა. ეს უკვე სულ სხვა თომას მიულერია, ეს სწორედ ის მიულერია, რომელიც ჩვენ, "ბაიერნის" გულშემატკივარს, ძალიან გვიყვარს.

ძალიან სასიხარულოა, რომ თომასი მინდორზე დაბნეულად აღარ დადის, ზუსტად იცის რასაც აკეთებს და თანაც თავის სტილში - მხიარულად, პოზიტიურად, ისე, რომ განწყობა პარტნიორებზეც გადადის. მიულერმა "აუგსბურგის" წინააღმდეგ მართლაც შთამბეჭდავი თამაში ჩაატარა, რომელიც აქამდე ამ სეზონში არ უჩვენებია. ის თითქმის ყველგან იყო და ყველა წერტილიდან ხიფათს ქმნიდა. ჩვენც სწორედ ასეთ მიულერს ვიცნობთ - არაპროგნოზირებადსა და გაუტეხავს.

ლევანგოსლკი შეუჩერებელია!


თუ ვინმეს გაინტერესებთ თუ როგორ გამოიყურება ნამდვილი გოლების მანქანა, შეგიძლიათ ეწვიოთ მიუნხენს, სადაც თქვენ სუპერ რობერტ ლევანგოლსკის იხილავთ, რომლის სასარგებლოდაც ყველაფერი მეტყველებს: სტატისტიკაც და თამაშიც. 2016/17 წლების სეზონში, საკლუბო და სანაკრებო დონეზე, 28 წლის პოლონელმა სულ 43 მატჩი ჩაატარა და 44 გოლი გაიტანა! გუშინ რობერტმა ჰეთ-თრიქი გაიფორმა და ამის გაკეთება უკვე მეხუთედ მოახერხა ("კარლ-ცაისთან" თასის შეხვედრაში, "ვერდერის", "ჰამბურგისა" და "აუგსბურგის" წინააღმდეგ ბუნდესლიგაში და პოლონეთის ნაკრების მაისურით დანიასთან თამაშში). ლევანდოვსკის აქამდე სეზონში ხუთი ჰეთ-თრიქი არასოდეს გაუფორმებია, რადგან ის აქამდე ლევანგოლსკი არ ყოფილა. პოლონელი საუცხოო ფორმაშია და მას მხოლოდ გოლები არ გააქვს.

მაგალითად, გუშინ რობერტმა ორი ასისტი გააკეთა, თანაც აქედან ერთი ტიაგო ულამაზეს სტილში, რაც იმას ადასტურებს, რომ ლევანდოვსკი უაღრესად მრავალფეროვანი და ჭკვიანი თავდამსხმელია. ანჩელოტის მთელი კარიერის განმავლობაში არაერთ ძლიერ ფორვარდთან აქვს ნამუშევარი და თამამად შეიძლება ითქვას, რომ ლევანდოვსკი მათ შორის ერთ-ერთი გამორჩეულია, რადგან ასრულებს მნიშვნელოვან ტაქტიკურ როლს, გააქვს უამრავი ბურთი და სხვებსაც ატანინებს. ის უბრალოდ ნამდვილი გერმანული მანქანაა, რომელიც შესაბამისი კლუბის ღირსებას იცავს.

ანჩელოტიმ გვარდიოლას კრიხებს მიმართა


მატჩის ბოლო წუთებში "ბაიერნი" გვარდიოლასებური ტაქტიკით მოქმედებდა ანუ კაცი-შვილი ვერ გაიგებდა თუ ვინ სად მოქმედებდა. რაფინიას მინდორზე გამოჩენის შემდეგ განლაგება ცოტათი აირია, რადგან ბრაზილიელი დაცვის მარჯვენა ფლანგზე დადგა, ფილიპ ლამმა ცენტრში აიწია, დაცვის ცენტრში კი იოზუა კიმიხმა დაიწია. რაფი, ლამი და იო ამ პოზიციებზე სწორედ პეპის დროს მოქმედებდნენ, მაგრამ კარლომ ასეთ კრიხებს მაშინ მიმართა, როდესაც ტაბლოზე მისი გუნდის სასარგებლოდ გამანდგურებელი ანგარიში იყო დაფიქსირებული. რა თქმა უნდა, ეს სერიოზულად განსახილველი ტაქტიკური თემა არ არის, მაგრამ მაინც აღსანიშნავია. მნიშვნელოვან თამაშებში იტალიელი სპეციალისტი ასეთ რამეს 10:0-ზეც კი არ გააკეთებს, მაგრამ "აუგსბურგთან" ბუნდესლიგის შეხვედრაში გიჟური ექსპერიმენტები დასაშვებია.скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
მატჩის ანალიზი ბუნდესლიგა
მსგავსი სიახლეები
კომენტარები
oto bavarieli91
oto bavarieli91 | 2 აპრილი 2017 12:30
საღოლ ავტორ კარგად მუშაობ 88bb5d07 88bb5d07 წელს ძაან კაი წინათგრძნობა მაქვს რო კარგად დავამთავრებთ სეზონს..
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა