...

ჰოფენჰაიმი 1:0 ბაიერნი - მატჩის ანალიზი

ხანგრძლივი პაუზის შემდეგ მიუნხენურმა გრანდმა წააგო და 2017 წელს პირველი მარცხი ზინჰაიმში განიცადა.

"რეკორდმაისტერს" პირველი სიმწარე იულიან ნაგელსმანის ბრწყინვალე გუნდმა, "ჰოფენჰაიმმა", აგემა. ზინჰაიმში ძალიან საინტერესო და დაძაბული მატჩი გაიმართა. ახლა კი ამ შეხვედრის ანალიზს გთავაზობთ.

მატჩის მსვლელობა

კარლო ანჩელოტიმ საკადრო პრობლემების გამო ოპტიმალური შემადგენლობა არ დააყენა. ტრავმის გამო გუნდს მანუელ ნოიერი, თომას მიულერი და დუგლას კოშტა ვერ დაეხმარნენ, ტიაგო ალკანტარამ დასვენების საშუალება მიიღო, ფილიპ ლამი და ფრანკ რიბერი კი სათადარიგო სკამზე დარჩნენ. იტალიელმა სპეციალისტმა რაფინიას, რენატუ სანჩეშსა და კინგსლი კომანს მორიგი შანსები მისცა.

"ჰოფენჰაიმმა" მატჩი ძალიან აგრესიულად დაიწყო, პირველივე წუთებიდან მაღალი პრესინგი ჩართო და საწყისი 20 წუთის განმავლობაში "რეკორდმაისტერი" უბრალოდ დაჯაბნა. უკვე მატჩის მეორე წუთზე კერემ დემირბაის კარგი გარღვევისა და პასის შემდეგ ანდრეი კრამარიჩი მეკარესთან პირისპირ დარჩა, მაგრამ სანამ გადაწყვეტილება მიიღო მას ფეხებში რაფინია ჩაუხტა და ბურთი დაფარა. ბრაზილიელმა ცენტრალური მცველები დააზღვია, რომლებიც უხეშად შეცდნენ. დაახლოებით 5 წუთში სანჩეშმა უკან არაზუსტი პასი გააკეთა და ბურთი საჯარიმოსთან კრამარიჩს ჩააბარა, რომელმაც გაისწორა და შორეულ კუთხეში დაარტყა, მაგრამ ცოტათი არ გაუმართლა. ძალიან მალე დემირბაის პასის შემდეგ ერთ-ერთზე უკვე ამირი დარჩა, რომელსაც ამჯერად სრული თავისუფლება ჰქონდა, მაგრამ "ჰოფეს" ახალგაზრდა ტალანტს ფეხით სვენ ულრაიხმა აუღო. ასეთი მძლავრი სტარტის გამო "სოფლელები" მაინც დასაჩუქრდნენ. 21-ე წუთზე დემირბაიმ საჯარიმოში ჩააწოდა და მატს ჰუმელსმა ბურთი თავით გამოიტანა, მაგრამ დამატებაზე კრამარიჩი დარჩა, რომელსაც არცერთი საყრდენი არ მეთვალყურეობდა. ხორვატმა ბურთი ჰაერიდან ჩამოიღო და უძლიერესი დარტყმით ულრაიხს შანსები არ დაუტოვა - 1:0!


ამის შემდეგ "ჰოფენჰაიმმა" ცოტათი უკან დაახია და ორგანიზებულად მოქმედება დაიწყო. "ბაიერნს" საერთოდ არაფერი გამოსდიოდა, მასპინძლებმა კი მორიგი საგოლე მომენტი შექმნეს. მარცხენა ფრთაზე ვანგერმა, ამირიმ და კრამარიჩმა ჩინებული კომბინაცია გაითამაშეს, რომლის შედეგად ხორვატი საჯარიმოსკენ დაიძრა, შიგნით დემირბაის შეუყოლა და ამ უკანასკნელის ძლიერი დარტყმული ულრაიხმა საოცარი რეაგირებით მოიგერია. გერმანელმა კიპერმა ბურთი ისე აიღო, რომ განმეორების გარეშე ამას ვერც დავინახავდით. ტაიმის მიწურულს კი "რეკორდმაისტერი" პირველი რეალური ეპიზოდი შექმნა, როდესაც მეტოქე კონტრშეტევაზე დაიჭირა. კინგსლი კომანმა ნიკოლას ზიულეს გარბენი მოუგო, საჯარიმოში შეიჭრა და ცენტრში ლევანდოვსკის ჩაუწოდა, რომელმაც ბურთს ფეხი ხეირიანად ვერ მოარტყა, ბურთ კი ხარიხას მოხვდა. საბოლოოდ, 1:0 და "ბაიერნი" მადლობელი უნდა ყოფილიყო, რომ უფრო მეტი არ გაუშვა.

მეორე ტაიმში თამაშის სურათი შეიცვალა. "ბაიერნმა" შეცდომებს უკლო, უფრო დამაჯერებელი, აქტიური და მობილური გახდა. "ჰოფენჰაიმმა" კი მეორე ნომრად თამაში აირჩია, დადგა საკუთარ ნახევარზე და კონტრშეტევებზე გააკეთა აქცენტი. პირველი ხიფათი კი რობენის პასის შემდეგ რობერტ ლევანდოვსკიმ შექმნა, რომელმაც ზიულე ერთი ლამაზი მოძრაობით ჩამოიტოვა და შორეულ კუთხეში მაღალი ბურთი გაუშვა, მაგრამ ოლივერ ბაუმანმა ნახტომში ურთულესი სეივი განახორციელა. "ბაიერნი" ზეწოლას ნელ-ნელა აძლიერებდა, შეტევებს სიმწვავეს მატებდა, მაგრამ ბოლო მომენტში ან პასი არ ვარგოდა ან დარტყმა. საპასუხოდ "ჰოფეს" ძალიან კარგი შანსი ჰქონდა, როდესაც ჰიუბნერის ჩაწოდების შემდეგ კრამარიჩს ახლოდან შეეძლო გატანა, მაგრამ კარს გადააცილა. მოგვიანებით ანჩელოტიმ თამაშში გამოცდილი ფრანკ რიბერი ჩართო, რომელიც მინდორზე აქტიურად შევიდა და ეგრევე მომენტი შექმნა. რიბერიმ რამდენიმე მოთამაშე ჩამოიტოვა, ლევანდოვსკისთან კედელი გაითამაშა და მარცხენა ფეხით დაბალ კუთხეში მოჭრა, მაგრამ ბაუმანმა მორიგი სასწაული ჩაიდინა. დარჩენილ დროში "ბაიერნს" მომენტები კიდევ ჰქონდა. იყო მატს ჰუმელსის თავური, რომელიც რუდიმ მოიგერია, აგრეთვე ხაბი ალონსოს გრძელი ჩაგდების შემდეგ შექმნილი ეპიზოდი, როდესაც ჯერ ჰუმელსმა ვერ დაარტყა ხეირიანად, შემდეგ კი - ლევანდოვსკიმ. მატჩის ბოლო წუთები ძალიან დაძაბული გამოდგა და ლევანდოვსკის 100%-იანი მომენტიც ჰქონდა, მაგრამ მისი დარტყმის შემდეგ ბურთ "ჰოფენჰაიმის" ერთ-ერთმა მცველმა დაბლოკა და ამის შემდეგ მიზანს ასცდა.

"ბაიერნმა" ყველაფერი სცადა, მაგრამ "ჰოფენჰაიმს", რომელმაც იდეალური პირველი ტაიმი ჩაატარა, გაუმართლა და გამარჯვება შეინარჩუნა. იულიან ნაგელსმანის გუნდი გახდა პირველი, რომელმაც "რეკორდმაისტერი" ნოემბრის შემდეგ დაამარცხა.

კატასტროფული პირველი ტაიმი


ზინჰაიმში მიუნხენის "ბაიერნმა" მიმდინარე სეზონში ერთ-ერთი ყველაზე სუსტი პირველი ტაიმი ჩაატარა. ჩვენ გვახსოვს გელზენკირხენის "შალკესთან" რთული საშინაო თამაში, "ფრაიბურგთან" მძიმე დაწყება გასვლაზე, მაგრამ ეს კიდევ უფრო ცუდი 45 წუთი იყო. საწყისი 10 წუთი საერთოდ სრული ფიასკო იყო, რომლის დროსაც მიუნხენელების დაცვისა და ნახევარდაცვის ცენტრი სრულიად მოშლილი იყო. "ჰოფენჰაიმმა" 10 წუთში სამი საგოლე მომენტი შექმნა ეს კი იმის ფონზე, რომ დაცვის ცენტრი ოპტიმალური ოყო - მარტინესი და ჰუმელსი. ასე, რომ მადრიდის "რეალის" ქომაგები ალბათ მოხარულნი დარჩებოდნენ იმთ, რომ "რეკორდმაისტერის" უკანა ხაზი ასე უსუსურად გამოიყურებოდა. გარდა ამისა, პირველ ტაიმში გუნდმა უამრავი შეცდომა დაუშვა, რაც ასევე დაუშვებელია. შეტევაში კი არანაირი კრეატივი არ ჩანდა, კომანს ძალიან უჭირდა, არიენ რობენი კი ცუბერმა და დემირბაიმ ერთიანი ძალებით ამოკეტეს. ზიულე ლევანდოვსკის წინააღმდეგ ჩინებულად მოქმედებდა, "ჰოფეს" ცენტრი კი ძალიან დამაჯერებელი იყო.

როგორც არიენ რობენმა აღნიშნა "ბაიერნმა" საკუთარ თავს აღარ უნდა მისცეს იმის უფლება, რომ ის განმეორდეს, რაც გუშინ საღამოს პირველი 45 წუთის განმავლობაში ხდებოდა.

მატჩის ნათელი წერტილი


რაოდენ უცნაურიც არ უნდა იყოს თუ გუშინდელი თამაშის შემდეგ ვინმეს აქვს პრეტენზია, რომ მთელი 90 წუთი სტაბილურად და კარგად ჩაატარა, პირველი ეს რაფინია უნდა იყოს. გამოცდილმა ბრაზილიელმა მართლაც შესანიშნავი თამაში ჩაატარა, დაცვაში საიმედოდ მოქმედებდა და ამავდროულად, რობენს შეტევაში ძალიან ნაყოფიერად ეხმარებოდა. გავიხსენოთ თუნდაც პირველი საგოლე მომენტი, რომელიც საკუთარი თავგანწირული ვარდნით სწორედ რაფინიამ აღმოფქვრა. გარდა ამისა, ფილიპ ლამის შემცვლელი ძალიან დამაჯერებლად მოქმედებდა და მისი ფლანგიდან "ჰოფენჰაიმს" ბევრი არაფერი შეუქმნია თუ პირველი ტაიმის ბოლოს გათამაშებულ ლამაზ კომბინაციას არ ჩავთვლით. რაფინიამ როგორც პირველი, ისე მეორე ტაიმი, ძალიან კარგად ჩაატარა და მიუხედავად იმისა, რომ მასზე მნიშვნელოვან თამაშებში იმედს არავინ დაამყარებს, სასიამოვნოა, რომ გამოცდილი ბრაზილიელი მზადყოფნაშია, მინდორზე ბოლომდე იხარჯება და ბუნდესლიგაში ლამის დასვენება თავისუფლად შეუძლია. თამამად შეიძლება ითქვას, რომ ეს რაფინიას ერთ-ერთი საუკეთესო მატჩი იყო "ბაიერნის" მაისურით, რადგან დაცვაში ასეთ დამაჯერებელ რაფინიას ხშირად ნამდვილად ვერ ნახავთ.

რადგანაც მატჩის ნათელ წერტილზე ვსაუბრობთ, მინდა, რომ ვეტერანი ხაბი ალონსოც გამოვყოთ, რომელიც ძალიან ბევრს იბრძოდა და არაერთი განწირული ბურთი შეინარჩუნა. მეორე ტაიმში 35 წლის ესპანელი საერთოდ ყველაზე ნაყოფიერი იყო, რადგან საკუთარი პასებითა და ჩაწოდებებით არაერთი ხიფათი შექმნა. მეორე ნახევარში რობენიც კარგად გამოიყურებოდა, რიბერიც კარგად შევიდა და ლევანდოვსკიმაც სცადა, მაგრამ ეს პოლონელის საღამო ნამდვილად არ იყო.

კომანი მოწოდების სიმაღლეზე კვლავ ვერ არის


"ბაიერნს" კინგსლი კომანის გამოსასყიდი ვადის დასრულებამდე სულ რაღაც 25 დღე რჩება და ისმის კითხვა - რის საფუძველზე უნდა გააკეთოს ეს კლუბმა? 20 წლის ფრანგი მიმდინარე სეზონში ძალიან ცუდად გამოიყურება და "ბაიერნის" შემადგენლობაში ყველაზე სუსტ შთაბეჭდილებას ტოვებს. კინგსლიმ ბუნდესლიგის ზედიზედ ორ ტურში მიიღო შანსი, მაგრამ "აუგსბურგთან" საერთოდ არ ჩანდა, გუნში კი მხოლოდ ეპიზოდურად გაიბრწყინებდა ხოლმე, ეგეც მაქსიმუმ ორი-სამჯერ მოხდა. გაიხსენეთ რამდენჯერ დაიხია უკან კომანმა, როდესაც შეეძლო ერთი-ერთზე წასულიყო, მცველის მოტყუება ეცადა, მაგრამ ძალიან ხშირად ასეთ ეპიზოდებში უკან გრძელ პასს აკეთებდა. ეს იმას ხომ არ ნიშნავს, რომ კომანმა თავდაჯერებულობა დაკარგა? ის გვარდიოლას დროს უფრო თამამი იყო და წინ თავაწეული მიდიოდა, ახლა კი თითქოს შებოჭილია. რა თქმა უნდა, კომანს ძალიან დიდი პოტენციალი აქვს და "ბაიერნის" ხელმძღვანელობას მისი ჩინებული სადებიუტო სეზონი არ დავიწყებია, მაგრამ მიმდინარე კამპანიიდან გამომდინარე, სპორტული თვალსაზრისით, "რეკორდმაისტერმა" კომანი არანაირად არ უნდა გამოისყიდოს! თუმცა, კიდევ ერთხელ ვიტყვი, რომ ფრანგს ძალიან დიდი ტალანტი აქვს, ამიტომ ალბათ შანსს იმსახურებს, თანაც მის სანაცვლოდ 21 მილიონია გადასახდელი, რაც თანამედროვე ფეხბურთში დიდი თანხა ნამდვილად არ არის.

ბოლოსიტყვა

ბოლოსკენ კი მინდა, რომ "ბაიერნის" გულშემატკივრებს მივმართო და იმედგაცრუებული ხალხი გავამხნევო. დიახ, მარცხი ძალიან ცუდია და არასასიამოვნო, თანაც მესამე ადგილზე მყოფ გუნდთან, მაგრამ მოდი საკითხს უფრო სიღრმისეულად, რეალურად შევხედოთ. ეს იყო მიუნხენური კლუბის პირველი მარცხი 23 ნოემბრის შემდეგ, როდესაც კარლო ანჩელოტის გუნდი როსტოვში შერცხვა. ზოგადად, დიდი მატჩების წინ, ასეთი მარცხები სასარგებლოა, რათა გუნდი მიწაზე დაეშვას, მოტივაცია აიამაღლოს და დარწმუნდეს, რომ დაუმარცხებელი არ არის. "რეკორდმაისტერი" ბოლო ერთი თვის განმავლობაში უბრალოდ დაფრინავდა და ბუნებრივია, რომ ყოველთვის ყველაფერს ვერ მოიგებ. სწორედ ამიტომ, "ბაიერნის" მარცხი ზინჰაიმში, სადაც მიმდინარე სეზონში ვერავინ იგებს(!), სავსებით კანონზომიერია და ბიჭებზე დადებითად იმოქმედებს. მაშინ, როდესაც ცივი შხაპი ახალი მიღებული გაქვს, ტანში მაინც გაციებს - როდესაც მოთამაშეები მინდორზე "ბორუსიასთან" და "რეალთან" გავლენ, "ჰოფენჰაიმთან" დაშვებული უაზრო შეცდომები ემახსოვრებათ და ყველაფერს გააკეთებენ, რათა იგივე არ განმეორდეს. ასე, რომ ამ წაგების გამო დიდად ცხვირებს ნუ ჩამოუშვებთ, ფსიქოლოგიურად ეს გუნდისთვის კარგიც არის, სატურნირო თვალსაზრისით კი "ბაიერნს" ბევრი არაფერი დაუკარგავს. თუ დღეს "ლაიფციგი" მოიგებს, ჩამორჩენას 10 ქულამდე შეამცირებს, მაგრამ "რეკორდმაისტერისთვის" ესეც საკმარისია.скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
მატჩის ანალიზი ბუნდესლიგა
მსგავსი სიახლეები
კომენტარები
Mapa T.Dig
Mapa T.Dig | 12 აპრილი 2017 17:20
He needs to catch up with the others.
Круглосуточный выгодный ремонт холодильников безвозмездно в Митино
Not enough said, but. What is the most interesting building in the world?
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა