...

რეალი 4:2 ბაიერნი - მატჩის ანალიზი

ჩემპიონთა ლიგის საპასუხო მეოთხედფინალური მატჩი იმდენად დრამატული და მრავლისმომცველი იყო, რომ ემოციებისგან დასაცლელად 48 საათიც კი არ არის საკმარისი.

თუმცა ამ თამაშიდან უკვე დაახლოებით ორი დღე გავიდა და შედარებით ცივი, ობიექტური გონებით მადრიდში გამართული შეხვედრის გაანალიზებაც შესაძლებელია.

მატჩის მსვლელობა

მიუნხენის "ბაიერნისთვის" მადრიდში სეზონის ყველაზე მნიშვნელოვანი მატჩი იმართებოდა, ამიტომ კარლო ანჩელოტიმ ყველა ლიდერი ბრძოლაში ჩართო, მიუხედავად იმისა, რომ ზოგიერთი მათგანი ახალი გამოჯანმრთელებული და შესაძლოა ბოლომდე მზად არც კი იყო. რობერტ ლევანდოვსკის შესახებ ვიცოდით, აი მატს ჰუმელსის ძირითადში ხილვა კი ნამდვილი სიურპრიზი იყო. გერმანელი სულ რაღაც რამდენიმე დღის წინ ყავარჯნებით დადიოდა, მაგრამ "სანტიაგო ბერნაბეუზე" გავიდა. "ბაიერნმა" ტრადიციული 4-3-3 ტაქტიკით იმოქმედა. ზინედინ ზიდანმა კი გარეთ ბეილის არყოფნაში მოულოდნელად სათამაშო ტაქტიკა შეცვალა, რადგან უელსელის მაგივრად ისკო დააყენა და ესპანელი მოედნის ცენტრში მოქმედებდა. ისკო თითქმის ყველგან იყო, ამიტომ შეიძლება ითქვას, რომ "სამეფო კლუბის" ტაქტიკა 4-3-1-2 იყო, რომელიც ეპიზოდურად ტრანსფორმირდებოდა.

მიუნხენურ გრანდს მადრიდში ორი გოლი ჰქონდა გასატანი, ამიტომ გერმანელებმა უპირატესობა თავიდანვე მოიპოვეს და წინ წავიდნენ, მაგრამ არა მთელი ძალებით. "ბაიერნს" კარგად ესმოდა, რომ აქტიური სტარტი საჭირო იყო, მაგრამ თავქუდმოგლეჯილი წინ წასვლაც არ იქნებოდა ჭკვიანური ნაბიჯი. "რეალი" კი ამისათვის მზად იყო და მეტოქეს ტერიტორია აშკარად დაუთმო. საწყისი 15-20 წუთი "ბაიერნი" დომინირებდა, მაგრამ მოედნის ცენტრში გუნდები უამრავ შეცდომას უშვებდნენ. იგრძნობოდა, რომ ზეწოლა საკმაოდ დიდი იყო და მოთამაშეები ძალიან, ძალიან ნერვიულობდნენ. ალონსომ, ვიდალმა, ტიაგომ, მოდრიჩმა და კროოსმა არაერთი არაზუსტი პასი გააკეთეს. საკუთარ საჯარიმოში კარვახალი და ჰუმელსიც დაიბნენ. საწყის წუთებში გუნდებმა მართლაც ძალიან ბევრი შეცდომა დაუშვეს, რაც ასეთი კლასის მოთამაშეებისთვის შეუფერებელია, მაგრამ იმ ზეწოლისა და ნერვიულობის ნიადაგზე, რომელიც აშკარად იგრძნობოდა, ეს ყველაფერი გასაგებია.

პირველი ხიფათი მიუნხენურმა კლუბმა რიბერისა და ალაბას წყალობით შექმნა. ავსტრიელმა საჯარიმოში რიბერის კარგად შეუყოლა, რომელმაც ცენტრში ჩააწოდა, სადაც ტიაგო ალკანტარა იყო თავისუფალი, მაგრამ მისი დარტყმული მარსელომ ჩინებული ვარდნით დაბლოკა. დამატებაზე კი არიენ რობენი იყო, რომელსაც რეალური შანსი ჰქონდა, მაგრამ ჰოლანდიელის დარტყმა მიზანს ოდნავ ასცდა. ამის შემდეგ კეილორ ნავასის კარს არტურო ვიდალი შორეული დარტყმით დაემუქრა, მაგრამ ჩილელმა ააცილა. "რეალი" კი გონს დაახლოებით მე-20 წუთიდან მოეგო, ბურთი დაიჭირა და სიტუაცია გაათანაბრა. მარცხენა ფლანგიდან მარსელოს ჩაწოდებას კი ხიფათიც მოჰყვა, როდესაც კარიმ ბენზემამ ალაბას პოზიცია მოუგო და თავით დაარტყა, მაგრამ არაზუსტად. "სამეფო კლუბი" ზევით ამოვიდა და თამაში გაიხსნა. გუნდები შეცდომების დაშვებას აგრძელებდნენ, რამაც სანახაობა გაზარდა. დანი კარვახალს ნოიერმა შესანიშნავი ბურთი აუღო, მაგრამ მსაჯებმა რატომღაც მეკარის სეივი ვერ დაინახეს და კუთხური არ დანიშნეს. რამდენიმე წუთში კი ესპანელებმა უკვე პირველი 100%-იანი შანსი გააფუჭეს. კარვახალის ჩაწოდების შემდეგ ბურთი მიწიდან ძლიერად ასხლტა და ნოიერმა მისი შემაგრება ვერ მოახერხა. დამატებაზე რამოსმა შორეულ კუთხეში გაუშვა, მაგრამ იქ უკვე ჟერომ ბოატენგი იდგა და "ბაიერნი" გადაარჩინა. ტაიმის ბოლოს მადრიდელებმა კიდევ ორი ძალიან საახიფათო კონტრშეტევა განახორციელეს. ჯერ მოდრიჩის პასით რონალდუ და ბენზემა ჰუმელსისა და ალაბას წინააღმდეგ დარჩნენ, მაგრამ პორტუგალიელმა კარიმს პასი ვერ გაუკეთა, საჯარიმოში შესულმა კი კარგად ვერ დაარტყა. მარსელოს სოლორეიდის შემდეგ კი იმავე კრიშტიანუმ უკვე მარცხენათი გაისროლა, მაგრამ კვლავ არაზუსტად.

პირველ ტაიმში გამოჩნდა, რომ "რეალი" შედეგზე თამაშობდა და ზიდანმა სწორი, გონივრული სტრატეგია აირჩია. "ბაიერნი" საწყისი 20 წუთ უკეთესი გუნდი იყო, შემდეგ თამაში გაიხსნა და მადრიდელებმა მომენტები შექმნეს, ხოლო ბოლო 15 წუთი ასევე გერმანელების კარნახით მიდიოდა, უბრალოდ ესპანელებმა კონტრშეტევებიც ჩართეს. საბოლოოდ, "სამეფო კლუბმა" თავის მიზანს მიაღწია, კარი მშრალად შეინახა და პირველი ტაიმი ფრედ 0:0 დასრულდა.


შესვენების შემდეგ სურათი არ შეცვლილა, მაგრამ მოთამაშეები უფრო თავდაჯერებულები იყვნენ და უაზრო შეცდომებს აღარ უშვებდნენ. მეორე ტაიმის დასაწყისში მანუ ნოიერის კარს კუთხურის შემდეგ ისკო შორიდან დაემუქრა, მაგრამ ესპანელის კარგი დარტყმა მიზანს ცოტათი ასცდა. ამის საპასუხოდ "ბაიერნმა" ძალიან სახიფათო მომენტი შექმნა. რიბერიმ საჯარიმოში ალაბას ჩინებული პასი გაუკეთა, ავსტრიელმა ცენტრში მარტოდ დატოვებული არიენ რობენი მოძებნა. ჰოლანდიელზე პასი ოდნავ უკან იქნა გაკეთებული, ამიტომ რობენი ბურთს უხერხულად მიუდგა, მაგრამ მაინც კარისკენ ჩააბზრიალა, ნავასი უკვე გაზონზე იწვა, თუმცა მადრიდული გრანდი მარსელომ იხსნა. უკვე მომდევნო შეტევაში კი მიუნხენელებმა პენალტი მოიპოვეს. რიბერი, ლევანდოვსკი და რობენი მარცხნივ ერთ ფლანგზე აღმოჩნდნენ. პოლონელმა არიენს საჯარიმოში შეუყოლა, რომელიც კაზემიროს გასცდა, ბრაზილიელი მისკენ გადაიხარა და ჰოლანდიელი წაიქცა. მატჩის მთავარმა არბიტრმა, ვიქტორ კაშაიმ, თერთმეტმეტრიანი დადო. ამჯერად ბურთთან არა არტურო ვიდალი, არამედ რობერტ ლევანდოვსკი მივიდა. პოლონელმა ჩაისუნთქა, ამოისუნთქა, ნავასის მოძრაობა შეამჩნია და პირდაპირ ცენტრში გაუშვა - 0:1! "ბაიერნმა" მეორე ტაიმის დასაწყისში შეაგდო და ნახევარი საქმე გააკეთა.


მომდევნო ეტაპზე გასასვლელად მიუნხენურ კლუბს კიდევ ერთი ბურთი სჭირდებოდა, მაგრამ "რეალი" ამან ვერ შეაშინა და მადრიდული გრანდი კვლავ მეორე ნომრად მოქმედებდა. "ბაიერნი" ბურთს დამაჯერებლად აკონტროლებდა, კარგად კომბინირებდა და ხიფათიც შექმნა. მარჯვენა ფრთაზე რობენი კარგად ამწვავებდა და ერთ-ერთ ეპიზოდში არტურო ვიდალს საჯარიმოში იდეალურად ჩაუგდო, მაგრამ ჩილელმა ძალიან კარგი შესაძლებლობა ცუდად გამოიყენა. "სამეფო კლუბმა" ითმინა, ითმინა და საბოლოოდ მიზანს მაინც მიაღწია. კაზემირომ ცენტრში იბრძოლა, ბურთი შეინარჩუნა და საჯარიმოში კრიშტიანუ რონალდუს ჩაუწოდა. ბოატენგს პორტუგალიელი გაეპარა, "რეალის" შვიდიანთან მხოლოდ ფილიპ ლამი დარჩა, რომელსაც რონალდუმ საჰაერო დუელი მარტივად მოუგო და ნოიერს შანსი არ დაუტოვა - 1:1. მიუხედავად ამისა, "ბაიერნი" არ გატყდა და ძალიან მალე მეორე ბურთიც გაიტანა. ჰუმელსის გრძელი პასის შემდეგ მიულერმა მკერდით ლევანდოვსკის დაუგდო, პასი ნაჩომ ჩაჭრა და უეცრად ბურთს სერხიო რამოსი შეეხო. ამ დროს ნავასს მოძრაობა უკვე დაწყებული ჰქონდა, ბურთი კი შორეულ კუთხეში წავიდა, რომელსაც უკვე აღარავინ იცავდა - 1:2! ეს უკვე დამატებითი დროის წინაპირობა იყო.


"ბაიერნის" კიდევ ერთი გოლი მადრიდულ კლუბს უკვე უმძიმეს მდგომარეობაში აგდებდა, მაგრამ 84-ე წუთზე არტურო ვიდალმა მარკო ასენსიოსთან ორთაბრძოლის შემდეგ მეორე გაფრთხილება მიიღო და მოედანი დატოვა. ისე, როგორც პირველ თამაშში, "ბაიერნს" კაცი გაუგდეს, წინ კი მთელი 30 წუთი იყო დარჩენილი. საბედნიეროდ, ძირითად დროში "რეალმა" გოლი ვერ გაიტანა და დამატებითი დრო დაინიშნა.

მიუხედავად იმისა, რომ "რეკორდმაისტერი" მინდორზე 10 კაცით იყო დარჩენილი, პირველი დამატებითი ტაიმი "ბაიერნმა" ძალიან აქტიურად დაიწყო და არიენ რობენი ეგრევე წინ წავიდა. ჰოლანდიელმა გზად რამდენიმე მეტოქე ჩამოიტოვა, მაგრამ საჯარიმოში შესულმა შეტევა ხეირიანად ვეღარ გააგრძელა. საწყისი 5 წუთის განმავლობაში გერმანელები მხოლოდ მეტოქის ნახევარზე იყვნენ და საოცარი მონდომება გამოავლინეს. "ბაიერნი" ხვდებოდა, რომ გატანის შემთხვევაში მეტოქეს ორი ბურთი ექნებოდა შესაგდები, მაგრამ თავად ბურთის გატანა ვერ მოახერხა. სამაგიეროდ რონალდუმ შორიდან გაისროლა და მას ნოიერმა ნახტომში კარგი ბურთი აუღო. საპასუხოდ რობენმა ძალიან სახიფათო კონტრშეტევა განახორციელა, საჯარიმოში დუგლას კოშტას დაუგორა, ბრაზილიელმა კი იმის მაგივრად, რომ კარში დაერტყა ან შორეულ ძელთან მიულერისთვის დაეგორებინა, ბურთი ყველაფერს ააცილა და საოცარი მომენტი გააფუჭა. ამას "რეალის" რამდენიმე იერიში და გვერდითი მსაჯის საბედისწერო შეცდომა მოჰყვა. 104-ე წუთზე სერხიო რამოსის ჩაწოდების შემდეგ რონალდუმ ბურთი მიიღო და მარცხენათი გაიტანა. პორტუგალიელმა დუბლი გაიფორმა, მაგრამ სერხიოს პასის მომენტში ის აშკარა ოფსაიდში იმყოფებოდა.


"ბაიერნმა", რომელმაც 10 კაცით პირველი დამატებითი ტაიმი შესანიშნავად ჩაატარა, ბოლო წუთზე გაუშვა და გუნდი მორალურად გატყდა. მეორე 15 წუთი "რეალმა" თავისუფლად დაიწყო და მარსელომ მალევე ნამდვილი შედევრი შექმნა. ბრაზილიელი ცენტრიდან დაიძრა, კიმიხს გაასწრო, შემდეგ კი ბურთი ბოატენგსა და ტიაგოს შორის შეაგდო, თვითონაც გაძვრა და მანუ ნოიერის პირისპირ აღმოჩნდა. მარსელომ აიხედა და მარჯვნივ რონალდუს დაუგორა, ხოლო "რეალის" შვიდიანმა ცარიელ კარს არ ააცილა - 3:2, ყველაფერი დასრულდა, კრიშტიანუმ კი ჰეთ-თრიქი გაიფორმა. ორ წუთში კიმიხის არაზუსტი პასის შემდეგ სოლორეიდი უკვე მარკო ასენსიომ განახორციელმა, რომელმაც ჰუმელსი დაჯაბნა და ნოიერს შორეულ დაბალ კუთხეში გაუტანა. საბოლოოდ ყველაფერი ასეც დასრულდა - 4:2, "რეალი" ნახევარფინალში გავიდა, "ბაიერნი" კი ჩემპიონთა ლიგას მეოთხედფინალურ სტადიაზე დაემშვიდობა.

ნამდვილი გმირობა!


"ბაიერნის" დაცვის ხაზმა "სანტიაგო ბერნაბეუზე" იდეალური თამაში ნამდვილად ვერ აჩვენა, მაგრამ ის რაც ჟერომ ბოატენგმა და მატს ჰუმელსმა გააკეთეს ნადმვილი გმირობა იყო, განსაკუთრებით კი ჰუმელსის საოცარი ბრძოლა. გახსოვთ ბოატენგის მატჩისშემდგომი კომენტარი? მან აღნიშნა, რომ კუნთები საშინლად ეწვის და სიარული არ შეუძლია, რაც იმას ადასტურებს, რომ მათ 120 წუთიანი უშეღავათო ბრძოლა გადაიტანეს, თანაც ისე, რომ ოპტიმალურ ფორმაში არცერთი მათგანი არ იყო. ბოატენგი "ბაიერნს" სრულფასოვნად მხოლოდ აპრილის დასაწყისში დაუბრუნდა, ჰუმელსის მოედანზე გამოჩენა კი ნამდვილი სასწაული იყო, რომლისაც ბევრს არ სჯეროდა. ჰუმელსი ორი დღის წინ ყავარჯნებით დადიოდა, მას გუნდთან ერთადაც კი არ უვარჯიშია, მაგრამ მადრიდში მაინც გავიდა და თავისი მაქსიმუმი გააკეთა.

მატს ჰუმელსმა მეორე ტაიმი ფენომენალურად ჩაატარა და რამდენიმე ძალიან მნიშვნელოვანი ვარდნა განახორციელა. ერთ-ერთ ეპიზოდში დანი კარვახალი ძალიან სწრაფ კონტრშეტევაზე წამოვიდა და ბოლო მომენტში მისი შეჩერება სწორედ "ბაიერნის" მეხუთე ნომერმა მოახერხა. გარდა ამისა, საჯარიმოში იდეალურ პოზიციაზე დარჩენილ ტონი კროოს ჰუმელსმა საოცარი ვარდნით დაუბლოკა და "რეკორდმაისტერი" უაღრესად სახიფათო დარტყმისგან იხსნა. ის საოცრად იბრძოდა და ამავდროულად მეორე გოლის დროს მიულერს იდეალური პასი გაუკეთა. ბრავო მატს! მან მართლაც ნამდვილი გმირობა ჩაიდინა, რასაც პირველი დამატებითი დროის შემდეგ მისი სახე ადასტურებს. ჰუმელსი ძალაგამოლეული გაზონზე იწვა და წყალს სვამდა. აშკარა იყო, რომ მას ტკიოდა, ტრავმა აწუხებდა, მაგრამ ასეთ მდგომარეობაშიც კი "ბაიერნისთვის" ძალიან სასარგებლო იყო.

იგივეს თქმა შეიძლება ბოატენგზეც, რომელმაც რამოსის დარტყმული ცარიელი კარიდან გამოიტანა და რამდენიმე მნიშვნელოვანი ჩაჭრა განახორციელა. ბოამ და მატსმა მართლაც ყველაფერი დადეს მინდორზე, რაც ნამდვილი გმირობის ტოლფასია! ბოლოს ჰუმელსის სიტყვებს დაგიტოვებთ: "სიმართლე გითხრათ, ჩემთვის წარმოუდგენელი იყო, რომ ამ საღამოს ვითამაშებდი. მე და ჟერომმა რაღაცნაირად მოვახერხეთ ყველაფრის გადაბიჯება. ჩვენ მძიმე ტკივილის ბარიერი გადავლახეთ და ყველაფერი გავაკეთეთ, რათა გუნდისათვის გამარჯვება მოგვეპოვებინა."

ნახვამდის ლეგენდებო


მადრიდული თამაში "ბაიერნის" კაპიტანი ფილიპ ლამისთვის და ვეტერანი საყრდენი ხაბი ალონსოსთვის ჩემპიონთა ლიგაზე უკანასკნელი გამოდგა. ისინი კარიერას ზაფხულში ასრულებენ, ამიტომ ეს უნიკალური ფოტოა - ორი ლეგენდა, საკუთარ პოზიციაზე თანამედროვეობის ორი ერთ-ერთი უძლიერესი მოთამაშე, ჩემპიონთა ლიგის უკანასკნელი ჯადოსნური საღამოს დროს...ლამზე საერთოდ სიტყვებიც კი ზედმეტია, რადგან იგი უდიდესი პროფესიონალი, ღირსეული კაპიტანი და ნამდვილი გენიოსია. 33 წლის გერმანელი გუშინ შესანიშნავად გამოიყურებოდა და არიენ რობენს შეტევაში საკმაოდ ნაყოფიერად ეხმარებოდა. ლამს არაფერი აქვს საიმისო, რომ კარიერა დაასრულოს, მაგრამ ეს უკვე გადაწყვეტილია. ჩვენი დიდი კაპიტნის კარიერისთვის ჩემპიონთა ლიგის კიდევ ერთი თასი შესაფერისი გვირგვინი იქნებოდა, მაგრამ სამწუხაროდ განგებამ ასე არ ინება. "ემოციები სეზონის ბოლოს მომაწვება, როდესაც გავიაზრებ, რომ "ბაიერნი" ფინალში არ იქნება", - ფილიპ ლამის ამ სიტყვების შემდეგ "რეკორდმაისტერის" თითოულ ქომაგს უბრალოდ გაული დაეწვება, მაგრამ ეს არაფერს ნიშნავს კაპიტანო! შენ მაინც დიდებული ფეხბურთელი ხარ, რომელსაც ჩემპიონთა ლიგის ყურებიანი თასი უკვე აქვს თავს ზემოთ აღმართული. ფილიპ ლამს "ბაიერნის" ისტორიაში ჩემპიონთა ლიგაზე ყველაზე მეტი თამაში აქვს ჩატარებული - 105.

ხაბი ალონსოს კი უფრო ეტყობა, რომ მისი დრო უკვე წავიდა. 35 წლის ესპანელი ორივე თამაშში "ბაიერნის" ცენტრის სუსტი წერტილი იყო, მაგრამ მეორე ტაიმში მაინც დიდებულად იმოქმედა. დიახ, ალონსოს სარისკო პასები ნერვებზე ძალიან მოქმედებდა, მაგრამ ეს მისი სტილია - ალონსოს უყვარს სხარტი გადაწყვეტილებების მიღება, რომლებიც ზოგჯერ მცდარი გამოდის. თუმცა ხაბიმ მიმდინარე სეზონში დაამტკიცა, რომ ნამდვილი მებრძოლია და ამ საღამოსაც მინდორზე ყველაფერი დადო. მატჩის მიწურულს კი ალონსოს მთელი "სანტიაგო ბერნაბეუ" ოვაციებით აცილებდა, რაც მის სიდიადეში ყველას დაგარწმუნებდათ. ძალიან სამწუხაროა, რომ ევროპული ფეხბურთის ორი ნამდვილი ლეგენდა კარიერას ასრულებს, "ბაიერნს" კი მათი ჩანაცვლება მოუწევს.

ბებრული კლასი


ფრანკ რიბერიმ და არიენ რობენმა მადრიდში კიდევ ერთხელ დაამტკიცეს, რომ მათ ასაკი ვერაფერს აკლებს. 34 წლის ფრანგმა და 33 წლის ჰოლანდიელმა ძალიან ბევრი იშრომეს, დაცვას ნაყოფიერად ეხმარებოდნენ, შეტევაში კი ძალიან ბევრს ვცდილობდნენ. რიბერი ძირითადად წინ სოლორეიდებით მიიწევდა, რობენი კი უფრო მრავალფეროვანი იყო და არაერთი კარგი გამჭოლი პასიც გააკეთა. ორივე მათგანი ძალიან ნაყოფიერად, აქტიურად და ღირსეულად მოქმედებდა. მიუხედავად იმისა, რომ რობერის დრო ბევრისთვის უკვე წასულია, ეს ორი ლეგენდარული ვინგერი თავის საქმეს მაინც მაღალ დონეზე აკეთებს. დიახ, შესაძლოა, მათ დაკარგეს სისწრაფე, მაგრამ კლასი, კლასი არ იცვლება! რობენისა და რიბერის ბებერ ძვლებში უნიკალური საფეხბურთო გენები ჯერ კიდევ ბრწყინავს, ამიტომ მათ კიდევ ერთი წელი აქვთ, რათა უკანასკნელი სიტყვა თქვან. რობენმა ორივე თამაში ჩინებულად ჩაატარა და მიუხედავად ასაკისა "რეალთან" 210 წუთის განმავლობაში "ბაიერნის" ერთ-ერთი საუკეთესო მოთამაშე იყო. რიბერიმ კი მადრიდში საკმაოდ კარგად იასპარეზა და გაცილებით მეტი იმუშავა, ვიდრე ახალგაზრდა, ენერგიითა და სისწრაფით აღსავსე დუგლას კოშტამ.

რიბერი და რობენი ნებისმიერ ასაკში მზად არიან, რომ "ბაიერნისთვის" თავი დადონ და საკუთარი კლასით, მოედნის ხედვით, ტექნიკით, გუნდს დიდი სარგებელი მოუტანონ. აი ასე! ჩვენი ბებერი დუეტი ჯერ კიდევ ფორმაშია!

საკამათო ეპიზოდები

ახლა კი იმ ნაწილს მივადექით, რომელიც ყველაზე დახუნძლული და რთული გასარჩევია. გუშინ საღამოს მსაჯები ყურადღების ეპიცენტრში იყვნენ. ვიქტორ კაშაიმ და მისმა ბრიგადამ ჩემპიონთა ლიგის საპასუხო მეოთხედფინალური მატჩი სრულიად ჩააგდო. ახლა კი ვეცდები, რომ თითოეული საკამათო ეპიზოდი გავარჩიო და მოდი მაქსიმალურად ზუსტი დასკვნები გამოვიტანოთ, ნუ შეძლებისდაგვარად მაინც, რადგან ეპიზოდები ძალიან, ძალიან საკამათო და სკანდალურია.

მომენტი #1 - პენალტი

პირველი საკამათო მომენტი მეორე ტაიმის დებიუტში შეიქმნა, როდესაც არიენ რობენი საჯარიმოში კაზემიროსთან ორთაბრძოლისას წაიქცა და მსაჯმა პენალტი დანიშნა. ეპიზოდი რეალურად საკამათოა, რადგან აშკარაა, რომ აქ 100%-იანი თერთმეტმეტრიანი ნამდვილად არ იყო. თუმცა იმის თქმა, რომ ვიქტორ კაშაი შეცდა და "ბაიერნს" პენალტი აჩუქა ნამდვილად არასწორია, რადგან კონტაქტი იყო.


ამ სურათზე ძალიან კარგად ჩანს, რომ კაზემირომ რობენს ფეხი დააბიჯა. 


აქვე ვიდეო, სადაც ეპიზოდი პირველ 10 წამში ისახება. რა თქმა უნდა, რობენმაც გააფორმა, მაგრამ ამაში განსაკუთრებული არაფერია, ყველა ასე მოიქცეოდა. მსაჯს ნამდვილად ჰქონდა უფლება, რომ პენალტი დაედო და ასე გადაწყვიტა. ასე, რომ იმის თქმა, რომ "ბაიერნს" პენალტი აჩუქეს არასწორია. ამ ეპიზოდში მსაჯს საბაბი ჰქონდა, რადგან კონტაქტი იყო და კაზემირო აშკარად რობენზე წავიდა და არა ბურთზე.

მომენტი #2 - ვიდალის გაძევება

როგორც კარლ-ჰაინც რუმენიგემ აღნიშნა ეს "ბაიერნისთვის" სასიკვდილო განაჩენი იყო. მატჩის 84-ე წუთზე ვიდალმა მეორე ყვითელი ბარათი მიიღო და მოედანი დატოვა. იყო თუ არა ჯარიმა? არა. ჩილელმა აშკარად ბურთზე ითამაშა - ხისტად, მაგრამ სუფთად.


როგორც ხედავთ, არტურო ვიდალი მარკო ასენსიოს შეეხო და კონტაქტი იყო, მაგრამ ეს იმას არ ნიშნავს, რომ ჩილელმა წესები დაარღვია. ზოგადად, როდესაც მოთამაშე ასეთ ვარდნას ახორციელებს, კონტაქტი გარდაუვალია, ამიტომ ამ შემთხვევაში გადამწყვეტი ბურთზე თამაშია, რაც მეორე და მესამე სურათზე მკაფიოდ ჩანს. ვიდალმა ბურთზე ითამაშა და არა მეტოქეზე, კონტაქტი კი ასეთი ვარდნების დროს ჩვეულებრივი მომენტია. შესაძლოა ბევრმა იფიქროს, რომ არტურომ ჯერ მარკოს ჩაარტყა, მაგრამ ეს არ ყოფილა ჩარტყმა! არტურო წავიდა ბურთზე და ასენსიოსთან კონტაქტი შემთხვევითი იყო.

თუმცა აქვე უნდა ვაღიაროთ, რომ ვიდალმა გაძევება "გამოიმუშავა." ჩილელმა ამ ეპიზოდამდე მინიმუმ სამჯერ თამაშის წესები დაარღვია, ერთხელ კაზემიროს წინააღმდეგ საკმაოდ უხეშადაც, მაგრამ ვიქტორ კაშაიმ დაინდო. შესაძლოა, ვიდალის ამ მომენტში გაგდება არასწორი იყო, მაგრამ მთლიანობაში არა უსამართლო, რადგან როგორც ამბობენ სამხრეთ ამერიკელმა საკუთარი ხისტი მოქმედებებით ეს წითელი ბარათი "აიკიდა."

მომენტი #3 - კაზემიროს ჯარიმები


თუ "ბაიერნის" შემადგენლობაში მეორე ყვითელი ვიდალმა გამოიმუშავა, ზუსტად იგივეს თქმა მადრიდის "რეალის" საყრდენ ნახევარმცველ კაზემიროზეც შეიძლება. ბრაზილიელმა პირველ ტაიმში "რეკორდმაისტერის" სახიფათო კონტრშეტევა ჩაშალა, მაგრამ იმ მომენტში მსაჯმა წესების დარღვევა მანამდე დააფიქსირა, ამიტომ ის ჯარიმა არ ითვლება.

თუმცა ამის შემდეგ კაზემირომ არტურო ვიდალის წინააღმდეგ ძალიან უხეშაც ითამაშა, როდესაც ბრაზილიელმა ჩილელს აშკარად გაშლილი ფეხი დააბიჯა და ასპროცენტიანი გაფრთხილება უნდა მიეღო, მაგრამ კაშაიმ იგი დაინდო. იგივე დიდალთან რომ გავავლოთ პარალელი - არტურო პირველივე უხეში წესების დარღვევის გამო დაისაჯა. ანალოგიურ სიტუაციაში კი კაზემირომ ბარათი არ მიიღო.

მისი გაფრთხილება პენალტის ეპიზოდშიც შეიძლებოდა, მაგრამ კიდევ ერთი აშკარა უხეშობა ვიდალის გაძევებამდე მოხდა, როდესაც კაზემირომ რობენს ძალიან ცუდად ჩაარტყა. იმ მომენტში მას ბარათი უკვე ჰქონდა, ამიტომ რეალურად ისიც გასაგდები იყო.

მომენტი #4 - "ბაიერნის" მეორე გოლი და "რეალის" მესამე გოლი


ეს ეპიზოდები კი ერთმანეთის მსგავსია, ამიტომაც მოდი ერთად განვიხილოთ. თავიდან კი გეტყვით, რომ პირველ სურათზე ბურთი თომას მიულერს მკერდთან აქვს და ზუსტად პასის მომენტია დაჭერილი.

ზოგადად, ფეხბურთში არსებობს წესი თუ როგორ უნდა დაფიქსირდეს თამაშგარე მდგომარეობა, როდესაც შეტევაში ორი ან მეტი მოთამაშეა, მათ წინ კი მხოლოდ მეტოქე გუნდის გოლკიპერი. ასეთ დროს რაგბის პრინციპი ირთვება და წინ პასი არ შეიძლება ანუ თამაშგარის ხაზი ბურთზე გადის. თუ პასის მომენტში ადრესატი ბურთზე წინ არის, მაშინ ეს არასწორი მდგომარეობაა.

აშკარად ჩანს, რომ ორივე შემთხვევაში წესები დაირღვა და თუ რონალდუს მესამე გოლი იყო ოფსაიდი, "ბაიერნის" მეორე ბურთის დროსაც იგივე სიტუაცია შეიქმნა. უბრალოდ ლევანდოვსკი ბურთს არ შეხებია, რაც არაფერს ცვლის, რადგან მომენტზე სერიოზული გავლენა იქონია და მეტოქე გუნდის მცველებს შეცდომა დააშვებინა. ასე, რომ ამ შემთხვევაში მსაჯმა ორივე გუნდი დაჩაგრა, მაგრამ ისიც უნდა ვაღიაროთ, რომ "რეკორდმაისტერის" მეორე ბურთი უფრო მეტად ფასობდა, ვიდრე "რეალის" მესამე გოლი.

აქვე იმასაც გეტყვით, რომ ანალოგიური სიტუაციები მარადიული განხილვის თემაა, რადგან ასეთი გოლები ბევრი გადის და თითქმის არცერთი მათგანი არ უქმდება. ანუ წესი თითქოს არსებობს, მაგრამ მას არავინ იცავს. მოკლედ ეს ეპიზოდები ძალიან, ძალიან საკამათო და ბუნდოვანია.

მომენტი #5 - რონალდუს თამაშგარე

აქ კი მემგონი არანაირი კომენტარი არ არის საჭირო - ყველაფერი ცხადზე ცხადია. ამ გოლმა კი უკვე ყველაფერი დაასრულა და "ბაიერნი" მოკლა.



ვიქტორ კაშაიმ და მისმა ბრიგადამ მართლაც ძალიან დაბალი დონის მატჩი ჩაატარა, მაგრამ როგორც ხედავთ, მსაჯები "ბაიერნის" სასარგებლოდაც შეცდნენ, ამიტომ ამ თემაზე აპელირება უბრალოდ არ ღირს. მსაჯების შეცდომებისგან დაზღვეული არავინ არის.

მოდი არიენ რობენის ნათქვამს მივყვეთ და პირველ რიგში ვეძებოთ ის, რაც შეიძლება "ბაიერნს" გაეკეთებინა უკეთ. რატომ გარისკა დაცვის ხაზმა? რატომ შექმნეს მიუნხენელებმა ხელოვნური თამაშგარე და რატომ გადააბარეს ეპიზოდის ბედი გვერდით მსაჯს? აეყვანა ბოატენგს რონალდუ, არ ამოსულიყო ზევით და ამაზე საუბარი საერთოდ არ მოგვიწევდა. რეალობა სწორედ ეს არის.

ნახევარფინალში უძლიერესი გუნდი გავიდა

ეს იყო ორი უდიდესი კლუბის დაპირისპირება, რომელშიც საბოლოოდ, უძლიერესმა გაიმარჯვა და მადრიდის "რეალმა" ნახევარფინალში გასვლა დაიმსახურა. მსაჯის შეცდომების გამო ნუ დავაკნინებთ ზინედინ ზიდანის მართლაც შესანიშნავ გუნდს, რომელსაც საოცარი განაპირა მცველები, მოედნის ცენტრი და კრიშტიანუ რონალდუ ჰყავს. გაიხსენეთ მარსელოს შედევრი და ბრაზილიელის მთლიანი ასპარეზობა "ბაიერნის" წინააღმდეგ, ის მართლაც უნაკლო იყო. მადრიდში ისკომაც უმაღლესი დონის ფეხბურთი აჩვენა და ძალიან დიდი სამუშაო შეასრულა. "სამეფო კლუბმა" შესაძლოა განგებ არ გახსნა თამაში, მაგრამ ეს აბსოლუტურად სწორი და გონივრული ტაქტიკური გათვლა იყო, რომელმაც საბოლოოდ მაინც გაამართლა. "ბლანკოსს" მსოფლიოში ერთ-ერთი უძლიერესი გუნდი ჰყავს, ამიტომ ამ დიდებულ მეტოქესთან მარცხი უნდა ვაღიაროთ და გავაგრძელოთ ცხოვრება.

შეცდომები იყო, მაგრამ იმის თქმა, რომ "რეალი" ნახევარფინალში გასვლას არ იმსახურებს, უბრალოდ მეტოქის უპატივცემულობა და არც თუ ისე ღირსეული საქციელია. ესპანელებმაც საოცარი ბრძოლა გადაიტანეს, მინდორზე ყველაფერი დადეს და "ბაიერნს" ამ უნიკალური სპექტაკლის დახმარებაში დაეხმარნენ. скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
მატჩის ანალიზი ჩემპიონთა ლიგა
მსგავსი სიახლეები
კომენტარები
admin
admin | 20 აპრილი 2017 15:35
dachi - არ ვიცი ვინ ხარ, საერთოდ წარმოდგენაც არ მაქვს, მაგრამ თუ რაიმე პრეტენზია გაქ ჩემთან ჯობია პირადად მომწერო და პროვოკაციები არ ხლართო, აყოლას არ ვაპირებ. https://www.facebook.com/dato.magradze.777 ეს არის ჩემი ფეისბუქ გვერდი და შეგიძლია დამამატო, მომწერო რაც გინდა. სამწუხაროდ არ იყავი დარეგისტრირებული და მხოლოდ ასე თუ გამოგეხმაურებოდი
dachi
dachi | 20 აპრილი 2017 15:55
ციტატა: admin
dachi - არ ვიცი ვინ ხარ, საერთოდ წარმოდგენაც არ მაქვს, მაგრამ თუ რაიმე პრეტენზია გაქ ჩემთან ჯობია პირადად მომწერო და პროვოკაციები არ ხლართო, აყოლას არ ვაპირებ. https://www.facebook.com/dato.magradze.777 ეს არის ჩემი ფეისბუქ გვერდი და შეგიძლია დამამატო, მომწერო რაც გინდა. სამწუხაროდ არ იყავი დარეგისტრირებული და მხოლოდ ასე თუ გამოგეხმაურებოდი


კომენტარი წამიშალე? რატო? წესებში ჯდებოდა, არ მოგეწონა სიმართლე?
სესხებს და ტოტალიზატორს რომ ლობირებ და აღვნიშნე ეგ გაგიხდა კომენტარის წაშლის საბაბი ? joy

არ მაქვს ფეისბუქი და არც ვაპირებ შენნაირ ანტიბაიერნელებთან საუბარს.
რისი თქმაც მინდოდა დავწერე, მაგრამ წაშალე.

კიდევ ერთხელ ვიტყვი - როგორც ფრანკ რიბერიმ დაუწერა კაშაის - ბრავო!!! ბრავო !!!

სირცხვილია ... სირცხვილი....
მიდი ჩასვი შენს აქ წარმოდგენილ ზღაპარში ლევანდოვსკის რომ გაუუქმეს 1/1-ზე გასვლა. მაგრამ არ ჩასვავ არ გაწყობს, ასე დაგავალეს.

ივერი დევდარიანი ვარ თუ არ მიცნობ გამიცანი, თბილისი პატარაა ......
admin
admin | 20 აპრილი 2017 16:18
[quote=dachi][/quote]
კომენტარი წავშალე იმიტომ, რომ შეურაცხჰყოფას აყენებ საიტს და პროვოკატორობ, რაც რა არის საერთოდ საჭირო.

ხო ნუ წერე რაც გინდა, არაფრის მტკიცებას და ახსნას აქ არ ვაპირებ უბრალოდ შემოგთავაზე ფბ-ზე კონტაქტი რომ თუ გაინტერესებს ყველაფერზე გესაუბრები დეტალურად, აბსოლუტურად ნორმალურად და არგუმენტირებულად, აქ არ ვაპირებ პოლემიკის გამართვას.

ხო ბაიერნი კიდე არვისზე ნაკლებად არ მიყვარს და აქაც იმიტომ ვარ, რომ ჩემი საქმე და ბაიერნი მიყვარს, ამიტომ მოდი არ გინდა ასე პირდაპირ დაკსნვების გამოტანა, როდესაც საერთოდ არ მიცნობ. ფეხბურთი ფეხბურთია და კიდევ ბევრი დიდი თამაში ელოდება ბაიერნს, მსაჯებიც ალბათ კიდევ ბევრჯერ შეცდებიან (იმედია ჩვენს საწინააღმდეგოდ აღარ), ბევრი ნერვიული დღეები იქნება, ამიტომ ჯობია შევეგუოთ რამენაირად ამ თამაშს არა?

მესმის იმედგაცრუება, მაგრამ არც თავის დაბრმავებაა საჭირო. ანალიზში მსაჯის ყველა საკამათო ეპიზოდი უნდა მომეყვანა, მათ შორის "რეალის" საწინააღმდეგოდაც როდესაც შეცდა. ხო ბარემ ლევანდოვსკის ეპიზდოზეც გეტყვი, რომ წესიერი სურათი არ მოიპოვება იმ ეპიზოდის და ძალიან რთულია განსაზღვრო მარსელო იყო წინ თუ ლევი. გამეროებაზე ცუდი კადრი იყო როემლამც შეილება შეცდომაში შეგიყვანოს, ამიტომ მაგ მომენტს თავი ავარიდე შეგნებულად
dachi
dachi | 20 აპრილი 2017 16:49
ციტატა: admin
მესმის იმედგაცრუება, მაგრამ არც თავის დაბრმავებაა საჭირო. ანალიზში მსაჯის ყველა საკამათო ეპიზოდი უნდა მომეყვანა, მათ შორის "რეალის" საწინააღმდეგოდაც როდესაც შეცდა. ხო ბარემ ლევანდოვსკის ეპიზდოზეც გეტყვი, რომ წესიერი სურათი არ მოიპოვება იმ ეპიზოდის და ძალიან რთულია განსაზღვრო მარსელო იყო წინ თუ ლევი. გამეროებაზე ცუდი კადრი იყო როემლამც შეილება შეცდომაში შეგიყვანოს, ამიტომ მაგ მომენტს თავი ავარიდე შეგნებულად


მეტი რა გეთქმის. joy
მშვენიერი გამეორება იყო ლევანდოვსკის მომენტში. მიულერის მომენტში თუ იჭერ კადრს და მოგეპოვება კადრი და მაგას ეძახი წესიერ სურათს - კიდევ ერთხელ "ბრავო"
21-ე საუკუნეში ძალიან რთული ყოფილა კადრის მოპოვება, დაპაუზება... თურმე ....
1-ელ თამაშშიც ცუდი გამეორება იყო საჯარიმოში კარვახალს ხელში მოხვდა თუ არა, არ ჩანდა... მაგრამ არვის არ უთქვია ცუდი გამეორება იყო და კადრი არ მოიპოვებაო, ყველა ამტკიცებდა ტყუილი პენალტი დაუდეს რეალსო joy

მე რა უნდა ამიხსნა ისედაც ნათელია ყველაფერი joy
- ნოიერს აუხსენი მე-3 გოლის მომენტში ფეხმოტეხილი რომ გარბოდა თამაშგარეში არ იმყოფებოდა რონალდუუ.
- მათს ჰუმელსს აუხსენი მტკივანი ფეხით რომ ცდილობდა თამაშგარეში მყოფი ფეხბურთელის შეჩერებას, არ იყო თამაშგარეო
- ბოატენგს აუხსენი ტკივილოთ რომ თამაშობდა ...

იმ იმედგაცრუებულ და გაწბილებულ ხალხს აუხსენი ცრემლები რომ სდიოდათ იმის მიხვედრისას, რომ ბაიერნი გაწირეს და გაყიდეს.

დიდ ფეხბურთელებს აუხსენი - რუმენიგეს, ჰიონესს, რომლებიც ამტკიცებენ რომ 2 თამაშგარე გოლი გავიდა და ლევანდოვსკის არ ჰქონდა თამაშგარე, მე დავით მაღრაძემ ასე მივიჩნიე და ასე ჩავთვალეო.

არ ვაპირებ ამ თემის გაგრძელებას... და კვლავ კამათს...
ერთი ვიცი, რომ ამ საიტზე დასვენებული იქნები ჩემი კომენტარებიდან...

Auf Wiedersehen
Guest Xecu
Guest Xecu | 20 აპრილი 2017 17:50
Dachi!

Getanxmebi kvelafershi.
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა