...

ბაიერნი 2:3 დ.ბორუსია - მატჩის ანალიზი

მატჩის მსვლელობა

კარლო ანჩელოტიმ დორტმუნდის "ბორუსიას" წინააღმდეგ ოპტიმალური თერთმეტეული დააყენა და მატჩი თავიდანვე მაღალ ტემპში დაიწყო, მაგრამ საკმაოდ ქაოტურად. პირველი ხიფათი სტუმრებმა შექმნეს, როდესაც გონსალო კასტროს გრძელი პასის შემდეგ რაფაელ გერეირომ მარცხენა ფლანგიდან საჯარიმოში ჩააწოდა. პიერ-ემერიკ ობამეიანგმა ჰუმელსსა და მარტინესს პოზიცია მოუგო, უბრალოდ ბურთს ვერ მოარტყა ფეხი ნორმალურად. ამის საპასუხოდ "ბაიერნი" წინ წავიდა და თავისი მომენტიც შექმნა. ფრანკ რიბერიმ საჯარიმოში ორი მცველი მოატყუა, მაგრამ დარტყმა სახიფათ არ გამოუვიდა. ბიურკიმ მოიგერია და ბურთი ტიაგოს მიუვიდა, რომელმაც საჯარიმოში შეგდება სცადა და არ გამოუვიდა. ეპიზოდი არტურო ვიდალის ძალიან სახიფათო დარტყმით დასრულდა, როდესაც ბურთმა კარის ძელს სანტიმეტრებში ჩაუარა. შეხვედრის მე-19 წუთზე კი ხავი მარტინესმა მიუტევებელი შეცდომა დაუშვა. ესპანელმა უკან პასი ბრმად გააკეთა და ძალიან შეცდა. ესპანელის პასი გერეირომ ჩაჭრა, რომელსაც ულრაიხმა აუღო, მაგრამ ბურთი კარისკენ წავიდა. ფილიპ ლამმა "ბაიერნის" გადარჩენა სცადა, მაგრამ დამატებაზე მარკო როისს ხელი უკვე ვეღარ შეუშალა - 0:1.


თუმცა ხავის საკუთარი შეცდომის გამოსასწორებლად 10 წუთიც კი არ დასჭირვებია. ხაბი ალონსოს ჩაწოდების შემდეგ მარტინესმა თავით დაარტყა და წონასწორობა აღადგინა. ამის შემდეგ "ბაიერნმა" უკვე ბურთი დაიჭირა, მატჩზე კონტროლი დააწესა და სერიოზული უპირატესობა მოიპოვა. დავიდ ალაბას პასის შემდეგ რობერტ ლევანდოვსკის მალევე მეორე ბურთის გატანაც შეეძლო, მაგრამ პოლონელს სვენ ბენდერმა ჩინებულ ვარდნაში აართვა და საკუთარი გუნდი იხსნა. რამდენიმე წუთში მარტინესს დუბლის გაფორმების შანსი მიეცა. ესპანელმა კვლავ კუთხურის შემდეგ დაარტყა, მაგრამ ამჯერად დორტმუნდელები ხარიხამ გადაარჩინა. თუმცა 3 წუთში უკვე მეორე ცენტრალურმა მცველმა იყოჩაღა, რომელიც კუთხურის შემდეგ შეტევაში დარჩა. ფრანკ რიბერიმ ფლანგზე გრძელი პასი მიიღო და საჯარიმოში უყურადღებოდ მიტოვებული ჰუმელსი იპოვნა. მატსს კი, როგორც ვიცით, საკმაოდ დაყენებული დარტყმა აქვს და ბიურკის მარჯვენა კუთხეში მარტივად გაუტანა - 2:1!

პირველი ტაიმის ბოლოს არტურო ვიდალის ჩინებული პასით ლევანდოვსკი ერთი-ერთზე დარჩა, მაგრამ მას ბიურკიმ აუღო და დორტმუნდის "ბორუსიას" შანსები შეუნარჩუნა. "ბაიერნი" პირველი ნახევრის ბოლოს ჩაერთო თამაშში და ცენტრალური მცველების გოლებით მოიპოვა გამარჯვება.


შესვენების შემდეგ კი "ბაიერნმა" ძალიან აგრესიულად დაიწყო და მეტოქის ნახევარზე საკმაოდ სერიოზულ პრესინგს ახორციელებდა. პირველი შანსი ლევანდოვსკიმ მიიღო, რომელიც მეკარესთან პირისპირ რჩებოდა, მაგრამ ბურთი მუხლით ზედმეტად წინ გაიგდო, რითიც "ბორუსიას" შვეიცარიელმა კიპერმა ისარგებლა და ბურთთან პირველი მივიდა. ამის შემდეგ მიუნხენელებმა სწრაფი კონტრშეტევა განახორციელეს - რიბერიმ რობენს გაატანა, რომელიც საჯარიმოში შევიდა და დაარტყა, მაგრამ ბიურკიმ აიღო. რამდენიმე წუთში უკვე "ბორუსიას" მეკარე შეცდა და ტიაგოს ბურთი საჯარიმოში ჩააბარა. ესპანელმა ლევანდოვსკის დაუგორა, რომლის წინ მთელი კარი და მხოლოდ სვენ ბენდერი იდგა, მაგრამ პოლონელმა მარცხენა არ დაარტყა, მოტრიალდა და უფრო მოსახერხებელ პოზიციაზე არიენ რობენს დაუგორა. ჰოლანდიელის დარტყმულს კი გმირულ ნახტომში ბენდერის ფეხი შესწვდა, შემდეგ კი უკვე "ბორუსია" კარის ძელმაც გადაარჩინა.


ფეხბურთში არსებობს ერთი დაუწერელი კანონი - არ გაიტან, გაგიტანენ! მატჩის 68-ე წუთზე "ბორუსიამ" კარგი შეტევა განავითარა. უსმან დემბელემ მარჯვენა ფრთაზე ლუკაშ პიშჩეკს დაუტოვა, თავად კი საჯარიმოში შეირბინა, პოლონელისგან უკან მიიღო ბურთი და ცენტრისკენ ობამეიანგს ჩაუწოდა. გაბონელთან ყველაზე ახლოს კი რატომღაც მხოლოდ ფილიპ ლამი იყო, რომელიც აფრიკელს ვეღარაფერს დააკლებდა და პიერ-ემერიკმა თავით ცარიელ კარში შეაგდო - 2:2. ამის შემდეგ რიბერიმ და რობენმა დაახლოებით ერთი წერტილიდან დაარტყეს, მაგრამ ორივემ უშედეგოდ. ხოლო 74-ე წუთზე "ბორუსიამ" მორიგი სწრაფი იერიშით "ბაიერნს" უკვე ცივი შხაპი გადაასხა. მარკო როისმა ბურთი წაიღო და თითქოს შეტევა ძალიან შეაფერხა, მაგრამ მარჯვნიდან უეცრად კვლავ გამოჩნდა უსმან დემბელე, რომელსაც ბურთ როისმა მიაწოდა, ხოლო ახალგაზრდა ფრანგმა ერთი მოძრაობით მარცხენა ფეხზე გაისწორა, მეორეთი კი ულამაზესი გოლი შეაგდო - დორტმუნდელები წინ გავიდნენ!


კარლო ანჩელოტიმ თამაშში თომას მიულერი და დუგლას კოშტა ჩართო, იყო საკამათო ეპიზოდი ხაბი ალონსოზე, იყო ძალიან კარგი შანსი, როდესაც საჯარიმოში არიენ რობენი შეიჭრა, მაგრამ ჰოლანდიელს ბიურკიმ აუღო და საბოლოოდ, "ბაიერნი" დაახლოებით ორკვირიან ინტერვალში ორ სათასო ტურნირს დაემშვიდობა.

მშვიდობით ტრებლო...მშვიდობით დუბლო...


მაშინ, როდესაც შემოდგომაზე "ბაიერნს" სერიოზული სათამაშო პრობლემები ჰქონდა და შედეგებიც გაფუჭდა, კარლო ანჩელოტი, კარლ-ჰაინც რუმენიგე და სხვები ამბობდნენ, რომ ეს ჯერ მხოლოდ დასაწყისია, მთავარი კი სეზონის ბოლოს ნაჩვენებენი შედეგი იქნებაო. ახლა კი სეზონი დასასრულს უახლოვდება, "ბაიერნმა" კი ყველაზე მნიშვნელოვან პერიოდში ხუთი თამაშიდან ვერცერთი ვერ მოიგო, ხოლო ორ კვირაში ჩემპიონთა ლიგასა და გერმანიის თასს დაემშვიდობა. საშინაო მარცხები მადრიდის "რეალთან" და დორტმუნდის "ბორუსიასთან" - ესეც შედეგები, რომელსაც ველოდით...მიუნხენური გრანდი მიმდინარე სეზონში ვერც ტრებლს და ვერც დუბლს ვეღარ გაიფორმებს. ერთადერთი ტიტული, რომელიც შესაძლოა "ბაიერნმა" მოიპოვოს, ეს ვერცხლის სინია, მაგრამ ამით "რეკორდმაისტერის" არცერთი გულშემატკივარი და მოთამაშე არ დარჩება კმაყოფილი.

დარწმუნებული ვარ, ყველა ერთხმად აღიარებს, რომ მიმდინარე სეზონი, კარლო ანჩელოტის სადებიუტო კამპანია "ბაიერნში", წარუმატებელი გამოდგა. რა თქმა უნდა, იყო უიღბლობის ფაქტორი და კიდევ სხვა გარემოებები, მაგრამ შედეგი სახეზეა! "რეკორდმაისტერი" მხოლოდ ბუნდესლიგის ტიტულის ამარა რჩება, თანაც მასაც მოგება უნდა. გუნდი უმძიმეს ფსიქოლოგიურ მდგომარეობაშია, "ლაიფციგი" კი უკვე 6 ქულით მოგვიახლოვდა. ასე, რომ იმედი ვიქონიოთ, რომ ტრებლთან და დუბლთან ერთად რამენაირად ბუნდესლიგის ტიტულიც არ გაქრეს, რაც უკვე სრული კატასტროფა იქნება.

ცენტრში ახალი ძალაა საჭირო!


დორტმუნდის "ბორუსიასთან" თამაშში კიდევ ერთხელ გამოჩნდა, რომ "ბაიერნის" ცენტრალური ზონა სრულყოფილი მაინც არ არის და პირველ რიგში სისწრაფე აკლია. უბრალოდ დააკვირდით რას აკეთებს მეორე გოლის დროს უსმან დემბელე.


ახალგაზრდა ფრანგმა "ბაიერნის" საჯარიმოში ისე შეირბინა, როგორც არაფერი და მას ამაში ხელი არავინ შეუშალა. თუმცა კარგად ჩანს, რომ დემბელეს მოძრაობას სამივე საყრდენი ხედავს, მაგრამ მისკენ არავინ დაიძრა. ამ შემთხვევაში მთავარი დამნაშავეები არტურო ვიდალი და ხაბი ალონსო არიან, რადგან ტიაგო ალკანტარა არასოდეს ყოფილა ტიპიური ჩამშლელი, ის შემოქმედებითი უნარის ცენტრია, რომლის მოვალეობაც ეს არ არის. აი ალონსო და ვიდალი კი ვალდებულნი არიან, რომ ასეთი სიტუაციები წაიკითხონ, მეტოქის შეტევები ჩაშალონ. უბრალოდ ძალიან საინტერესოა რატომ მიდის ვიდალი პიშჩეკისკან და არ მიჰყვება დემბელეს? ვიდალს სწორედ დემბელე უნდა შეეჩერებინა, ხოლო პიშჩეკზე ფრანკ რიბერი წავიდოდა, რომელიც ასევე იქვე იმყოფება. ხოლო ალონსოს მოქმედება საერთოდ არაფერში წერია. ესპანელმა ობამეიანგიც გაუშვა, ხოლო დემბელეს მთელი ბურთი და მოედანი დაუთმო.

ამ კონკრეტულ მომენტში სისწრაფე გადამწყვეტი არ ყოფილა, მაგრამ აშკარა იყო, რომ მეორე ტაიმში "ბაიერნმა" ცენტრი დაკარგა და "ბორუსია" სწრაფ კონტრშეტევებზე უპრობლემოდ მოდიოდა. ალბათ გახსოვთ, რომ პირველ ტაიმში ტიაგომ მეტოქის ორი სახიფათო შეტევა ჩაშალა, როდესაც ვიდალი და ალონსო წინ იყვნენ დარჩენილნი. ეს კი დაუშვებელია! ტიაგოს შესაძლებლობები შავი სამუშაოსთვის არ უნდა ფუჭდებოდეს! სწორედ ამიტომ, ალონსოს კარიერის დასრულება დროულია, "ბაიერნს" კი ცენტრში ახალი ძალა სჭირდება, რომელიც საყრდენის ზონას გაამაგრებს. ახლა "რეკორდმაისტერს" ისეთი ხავი მარტინესი სჭირდება, რომელმაც 2012/13 წლების სეზონი უმაღლეს დონეზე ჩაატარა და ევროპაში უძლიერესი ჩამშლელი იყო.

გარდა იმისა, რომ "რეკორდმაისტერს" ცენტრში სისწრაფე აკლია, ტიაგოს თამაშიც ფუჭდება, რომელსაც უფრო უკნიდან უწევს მოქმედება და შესაბამისად, შეტევას აკლდება. ვიდალის, ტიაგოსა და ალონსოს ტრიომ რამდენიმე სუპერ-მატჩი ჩაატარა, მაგრამ გუშინ საღამოს იდეალურად გამოჩნდა, რომ ეს ცენტრი სრულყოფილებისგან შორსაა.

უიღბლობა გამართლება არ არის!


მიუნხენურ კლუბს გუშინ საღამოს უბრალოდ ფატალურად არ გაუმართლა, მაგრამ ეს თავის გასასამართლებელი მიზეზი არ არის. დიახ, თომას ტუხელმაც აღიარა, რომ იღბალმა "ბაიერნს" ზურგი აქცია და პრაქტიკულად გაწირა, მაგრამ დორტმუნდის "ბორუსიას" ეს არანაირად არ აკნინებს! "ყვითლებმა" მიუნხენში საოცრად იბრძოლეს, მინდორზე ყველაფერი დატოვეს და მომდევნო ეტაპზე დამსახურებულად გავიდნენ. სვენ ბენდერის არანორმალური თამაში, გადარჩენები, იულიან ვაიგლის ბრძოლისუნარიანობა, უსმან დემბელეს ნიჭი და მარკო როისის დახვეწილობა პატივისცემას იმსახურებს. თანაც, რა "ბორუსიას" ბრალია თუ "ბაიერნმა" 2:1-ზე ოთხი ათასპროცენტიანი საგოლე მომენტი გააფუჭა. მახსენდება ფრანც ბეკენბაუერის დიდებული სიტყვები 2012 წლის ჩემპიონთა ლიგის ფინალის შემდეგ, როდესაც ყველა "ბაიერნის" ფატალურ უიღბლობაზე საუბრობდა. "კაიზერ ფრანცმა" მაშინ სწორედ ის აღნიშნა, რომ "ბაიერნის" გაფუჭებული შესაძლებლობები მეტოქის გამარჯვებას არ აკნინებს. ასე იყო ამ საღამოსაც. თუმცა ის ფაქტი, რომ მატჩის ბოლო 20-25 წუთი "ბაიერნი" ძალიან გადაიღალა უკვე უიღბლობის ბრალი ნამდვილად არ იყო.

საკამათო ეპიზოდები

არ ვიცი რატომ, მაგრამ "ბაიერნს" ფეხბურთის ღმერთები (თუ არსებობენ) აშკარად გაუწყრნენ. მადრიდის "რეალთან" და "მაინცთან" თამაშის მსგავსად გერმანიის თასის ნახევარფინალშიც რამდენიმე საკამათო ეპიზოდი იყო, საიდანაც ჩვენ ორ აშკარა შეცდომას გამოვყოფთ, რომელმაც შედეგზე გავლენა იქონია.



ეს პირველი ეპიზოდი, როდესაც მატჩის მთავარმა არბიტრმა, მანუელ გრეფემ, დორტმუნდის "ბორუსიას" კარში 100%-იანი პენალტი არ დანიშნა. ტიაგოს შეგდების შემდეგ ბურთი იულიან ვაიგლს გაშლილ ხელზე მოხვდა - არანაირი კითხვები! ეს არის თერთმეტმეტრიანი. მსაჯები მხოლოდ მაშინ იკავებენ თავს, როდესაც ხელი ბუნებრივ მდგომარეობაში სხეულთან ახლოს არის, ამ შემთხვევაში კი ვაიგლს ხელი 90 გრადუსით ჰქონდა გაშლილი.



ესეც მორიგი საკამათო ეპიზოდი, რომლის შედეგადაც ხაბი ალონსომ ყვითელი ბარათი სიმულაციისათვის მიიღო. პირველ რიგში, არანაირ სიმულაციას არ ჰქონია ადგილი, რადგან ესპანელს არაფერი გაუფორმებია და წაქცევის შემდეგაც ბურთზე იბრძოდა. რაც შეეხება მომენტს, როგორც ხედავთ, კონტაქტი არის და თანაც არც თუ უმნიშვნელო. უსმან დემბელემ ალონსოს მუხლი აშკარად მიარტყა და ეს ალბათ უფრო პენალტია, ვიდრე სუფთად თამაში. ამ დროს კი ანგარიში 2:3 იყო.

ესეც გარკვეულწილად უიღბლობის ფაქტორია, რადგან რატომღაც უკვე 1 კვირაზე მეტია მსოფლიოს ყველა წერტილში მსაჯები "ბაიერნის" საწინააღმდეგოდ ცდებიან.

ანჩელოტი ჰიტცფელდისა და ჰაინკესის კვალდაკვალ


"ბაიერნის" ზოგიერთი გაბრაზებული გულშემატკივარი კარლო ანჩელოტის წასვლას ითხოვს, მაგრამ რა თქმა უნდა, იტალიელი დარჩება და მომდევნო სეზონში ჩემპიონთა ლიგის მოგებას კიდევ ერთხელ შეეცდება. 57 წლის იტალიელს ბევრი "რეკორდმაისტერის" ლეგენდარულ ყოფილ თავკაცებს, ოტმარ ჰიტცფელდსა და იუპ ჰაინკესს ადარებს. ამ სამ გამოცდილ სპეციალისტს მართლაც ბევრი საერთო აქვთ, ხოლო ახლა კიდევ ერთი დაემატა - ძალიან მტკივნეული დასაწყისი მიუნხენურ გრანდთან ერთად.

1998 წელს ჰიტცფელდმა მიუნხენური კლუბი პირველად ჩაიბარა, ბუნდესლიგა მოაგებინა და ჩემპიონთა ლიგისა და გერმანიის თასის ფინალში გაიყვანა. საბოლოო შედეგი? ბრემენის "ვერდერთან" დრამატულ ბრძოლაში, პენალტების სერიაში, წაგებული თასის ფინალი და "მანჩესტერ იუნაიტედთან" 3 წუთში დაკარგული ჩემპიონთა ლიგის თასი. მომდევნო სეზონში "გენერალმა" დუბლი დადო, 2001 წელს კი მილანში ბარსელონაში დაკარგული ჩემპიონთა ლიგის თასიც დაიბრუნდა.

2011 წელს კი "ბაიერნი" იუპ ჰაინკესმა ჩაიბარა და სამივე ტურნირზე დრამატულ ბრძოლაში მეორე ადგილი დაიკავა. ბუნდესლიგაში "რეკორდმაისტერმა" 8 ქულიანი უპირატესობა გაანიავა და დორტმუნდის "ბორუსიას" ვერცხლის სინი ზედიზედ მეორედ მოაგებინა, გერმანიის თასის ფინალში იმავეე "ბორუსიასთან" განადგურდა (2:5), ხოლო ჩემპიონთა ლიგის ფინალი საკუთარ მოედანზე ლონდონის "ჩელსისთან" წააგო (ამ მატჩის გახსენებაც კი არ მინდა). მომდევნო სეზონში კი გუნდმა, რომელმაც ერთი წლის წინ ყველაფერი წააგო, უკვე ყველაფერი მოიგო და ჰაინკესი ტრებლით წავიდა.

როგორც ხედავთ, ამჟამინდელი იმედგაცრუება ახლოსაც კი ვერ მივა იმ ტკივილთან, რომელიც ჰიტცფელდმა და ჰაინკესმა თავიანთი პირველი სეზონის ბოლოს გადაიტანეს. გასაგებია, რომ მათ "ბაიერნი" ყველა ტურნირზე ფინალამდე მიიყვანეს, მაგრამ მაინც - ანჩელოტი მათ კვალს დაადგა და ვინ იცის, იქნებ უკვე მომდევნო სეზონში "რეკორდმაისტერის" გმირიც კი გახდეს.

ძალიან სამწუხაროა, რომ მიუნხენის "ბაიერნი" მიმდინარე სეზონში მხოლოდ ბუნდესლიგას დასჯერდება, მაგრამ გული არ გაიტეხოთ მეგობრებო, ეს ფეხბურთია, სადაც ყოველთვის ყველაფერს ვერ მოიგებ. კარლო ანჩელოტისათვის ეს ემოციურად ძალიან, ძალიან რთული სეზონი გამოვიდა, მაგრამ მას წინ კიდევ ორი წელიწადი აქვს. ახლა კი ისღა დაგვრჩენია, რომ ჩვენი გუნდის დარჩენილი 4 მატჩით დავტკბეთ და ბუნდესლიგაში ზედიზედ მეხუთე გამარჯვება ვიზეიმოთ. скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
გერმანიის თასი
მსგავსი სიახლეები
კომენტარები
torai baraia
torai baraia | 27 აპრილი 2017 15:01
ვა ვა რა თამაში

მაგარი თამაში იყო
DaniselSow
DaniselSow | 15 მაი 2017 08:42
КОРОЧЕ, ВСЁ ПОНЯТНО

---

моя жена и дочка шлюхи рассказы или инцест рассказ заказ

----------
порно расказы обмен телами или община порно истории
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა