...

ხამეს როდრიგესი - გზა მიუნხენამდე

უკვე 1 კვირაა სრულიად საფეხბურთო სამყარო ერთ ტრანსფერზე საუბრობს - ხამესის როდრიგესის მიუნხენის "ბაიერნში" იჯარით გადასვლაზე.

26 წლის კოლუმბიელი შემტევი ნახევარმცველი ნამდვილი ვარსკვლავია, რომელიც საფეხბურთო მოედანზე ბოლო ორ წელიწადში ჩაქრა, მაგრამ ახლა ეცდება, რომ "ბაიერნის" წითელი მაისურით კვლავ გაიბრწყინოს.

ამ სტატიაში კი თქვენ გაიცნობთ სულ სხვა ხამესს, გაიგებთ მის ისტორიას და გზას, რომელიც კუკუტადან პორტუმდე, მონტე კარლომდე, მადრიდამდე და ბოლოს მიუნხენამდე გაიარა. მისი თავგადასავალი საკმაოდ მრავალფეროვანი და ამავდროულად ძალიან საინტერესოა, რადგან ის არ გახლავთ ტიპიური სამხრეთამერიკელი ბიჭი, რომელიც სულ კარგ ხასიათზეა, ბავშვობიდან ქუჩაში დარბოდა ბურთით და ამავდროულად სიზარმაცეც ახასიათებს. მისი ისტორია რადიკალურად განსხვავებულია.

"ყოჩაღ ბიჭებო, კარგად იმუშავეთ, ხვალამდე", - მიმართა პატარა მოთამაშეებს გუნდის მთავარმა მწვრთნელმა. მოვლენები 2004 წელს ელ დორადოზე ვითარდებოდა, სადაც ადგილობრივი კოლუმბიური კლუბი "ენვიგადოს" აკადემია მდებარეობდა. მაშინ, როდესაც მოთამაშეები გასახდელში სწრაფად მიდიოდნენ, რათა შუადღის მცხუნვარე მზეს გაქცეოდნენ, ერთი ბიჭუნა მინდორზე დარჩა, სრულიად მარტო. თუმცა ეს არც არავის გაკვირვებია.

პატარა, 13 წლის, ხამესი იმდენად მორცხვი იყო, რომ თანაგუნდელებს მისი ხმა გაგონილიც კი არ ჰქონდათ. ხოლო ისინი, რომელთაც როდრიგესის იშვიათი ლაპარაკი ჰქონდათ გაგონილი, ამბობდნენ, რომ ბავშვი საკმაოდ მორცხვად და მერყევად საუბრობდა. თუმცა ხამესს კომუნიკაციის სხვა საშუალება ჰქონდა - ფეხი. მასზე ყველა ლაპარაკობდა, ყველას აინტერესებდა თუ რატომ რჩებოდა ეს ბავშვი ვარჯიშების შემდეგ მოედანზე, როდესაც მისი თანაგუნდელები სახლისკენ მიდიოდნენ.

დაახლოებით ნახევარ საათში გუნდის მთავარი მწვრთნელიც წავიდა, მხოლოდ ხამესი დარჩა, რომელიც ცარიელ კარში ურტყამდა. მას შემდეგ გავა ათი წელი და 2014 წლის მსოფლიო ჩემპიონატზე, ფეხბურთის მეორე სამშობლოდ აღიარებულ ბრაზილიაში, ეს ბიჭუნა კოლუმბიის ნაკრების შემადგენლობაში გაიბრწყინებს, 6 გოლს გაიტანს და მუნდიალის საუკეთესო ბომბარდირი გახდება. ახლა კი 26 წლის ხამეს როდრიგესი კარიერაში ახალ ეტაპს იწყებს და ეს ეტაპი მიუნხენურ კლუბს უკავშირდება.


დაივიწყეთ კონკიას ზღაპრები - ხამესის ისტორია არ არის ისეთი, როგორიც ყველა სამხრეთ ამერიკელი ტალანტის, რომლებიც ბავშვობაში ქაღალდისგან დამზადებული ბურთებით თამაშობდნენ, ფეხბურთის თამაშის გამო სკოლას აცდენდნენ და დიდ გაჭირვებაში იზრდებოდნენ. ყველა სამხრეთ ამერიკელი ფეხბურთელი ძალიან ნიჭიერი და ტექნიკურია, მაგრამ მათ უმრავლესობას სიზარმაცის სენი აქვს. ისინი მაშინ ადუნებენ ყურადღებას, როდესაც კარიერის პიკში არიან და ფეხბურთის გამო ბევრს არაფერს თმობენ. აი ხამესის შემთხვევაში კი ყველაფერი განსხვავებულია. ის ყველაზე "არასამხრეთამერიკელი" ტიპის სამხრეთ ამერიკელია.

როდრიგესის ბავშვობა საკმაოდ მრავალფეროვანი და საინტერესო იყო, არჩევანიც ბევრი ჰქონდა, მაგრამ საბოლოოდ ფეხბურთმა გაიტაცა. "ფეხბურთი ყოველთვის მომწონდა, მაგრამ ამ სპორტზე მამინაცვალმა შემიყვანა. მან "ტოლიმას" აკადემიაში მიმიყვანა, როდესაც 5 წლის ვიყავი და აქედან დაიწყო ყველაფერი", - იხსენებს ხამესი კარიერის დასაწყისს. პირველი ბუცებიც, შავ-თეთრ ფერებში გამოწყობილი ადიდასის ბუცები, მამინაცვალმა ხუან კარლოს რესტრეპომ აჩუქა. თავის დროზე ხუან კარლოსიც ფეხბურთელი იყო, მაგრამ საბოლოოდ ინჟინერიის გამო კარიერა დაასრულა.

"ხამესს არასოდეს უნდოდა რომ ფეხბურთელი გამოსულიყო, მაგრამ ის დაბადების დღიდან ფეხბურთელი იყო", - განაცხადა დედამისმა, მარია დე პილარ რუბიომ. მშობლების გავლენას მის კარიერაზე ხამესის პირველი პროფესიონალური მწვრთნელიც აღნიშნავს. "ხამესი მშობლების სამაგალითო გავლენის ნათელი პროდუქტია. არასოდეს მინახავს ამ ასაკის ბავშვი დღეში ორჯერ წუწუნის გარეშე ვარჯიშობდეს. დისციპლინა, რომელიც მას გააჩნდა, ფუნდამენტალური გამოდგა", - იხსენებს უგო კასტანო.


ხამესი მართლაც საოცარი დისციპლინით გამოირჩეოდა, ამიტომაც ნებისმიერი მწვრთნელისთვის საოცნებო შეგირდი იყო, რომელიც ძალიან ბევრს მუშაობდა, როგორც ტექნიკურ, ისე ტაქტიკურ მხარეზე და ამავდროულად, ინდივიდუალურად სპორტულ დარბაზშიც დადიოდა. მისი მიზანი იყო, რომ მუდმივად საუკეთესო ფორმაში ყოფილიყო, რათა დიდების წინააღმდეგაც ღირსეულად ეთამაშა. "ყოველთვის ვამბობდი, რომ ფეხბურთელები არანორმალურები უნდა იყვნენ. როდესაც ნორმალური ხალხი გარეთ გადის და შინ გვიან ბრუნდება, ფეხბურთელმა კარგად უნდა იკვებოს, ლოგინში ადრე დაწვეს და ადრე ადგეს. თუმცა არასოდეს მიფიქრია, რომ ეს მსხვერპლის გაღებაა", - აღნიშნა ხამესმა ინტერვიუში 2007 წელს.

სწორედ ამიტომ იქცა ხამეს როდრიგესი უბრალოდ ნიჭიერი და შრომისმოყვარე ბიჭუნასგან მსოფლიო დონის ვარსკვლავად. ის ყოველ გუნდში წინსვლასა და გაზრდაზე ფიქრობდა. მისი კუმირი არა რომელიმე დიდი ფეხბურთელი, თუნდაც ლეგენდარული კოლუმბიელი კარლოს ვალდერამა ან ფაუსტინო ასპრილია, არამედ მულტფილმის პერსონაჟი ოლივერ ჰატონი იყო. ჰატონი გულწრფელი, მამაცი და არაბუნებრივი შესაძლებლობებით დაჯილდოვებული ტიპი იყო. ხამესიც ბავშვობიდან მეოცნებე გახლდათ.


ხამეს როდრიგესი კუკუტაში, ვენესუელას საზღვართან არსებულ ქალაქში, დაიბადა, როდესა მამამისი უილსონ ხამეს როდრიგესი ქალაქის საუკეთესო კლუბ "დეპორტივოში" თამაშობდა. თუმცა უილსონმა სახლი მაშინ დატოვა, როდესაც ხამესი მხოლოდ 3 წლის იყო და პატარა როდრიგესს სამ სხვადასხვა ქალაქში გადასვლა ძალიან ადრეულ ასაკში მოუწია.

ყველა ადამიანის ისტორია, რომელიც კოლუმბიაში 90-იანი წლებში გაიზარდა, მოცულია სისხლიანი ბრძოლებით, ქუჩის ხულიგნობებით და მკვლელობებით, რომელიც პაბლო ესკობარის ხანაში ყოველდღიური ცხოვრების ნაწილი იყო. ხამესის ბიძა არლი როდრიგესი 19 წლის პერსპექტიული ნახევარმცველი იყო, რომელიც მედელინის "ინდეპენდიენტეს" ღირსებას იცავდა და 1995 წელს მოკლეს. არლი და მისი მეგობარი საავადმყოფოში რამდენიმე ჭრილობით მიიყვანეს მას შემდეგ, რაც ქურდებმა მათი მოტოციკლის მოპარვა სცადეს. ისინი მარტივად არ დანებდნენ, მაგრამ ჩხუბის დროს დაზიანებები მიიღეს. როდესაც მათ ჰოსპიტალი დატოვეს, ქურდები ჩასაფრებულები იყვნენ. ანდრეას ესკობარის ცნობილი მკვლელობიდან (ის კოლუმბიელი ცენტრალური მცველი იყო, რომელმაც 1994 წლის მსოფლიო ჩემპიონატზე საკუთარ კარში გაიტანა გოლი, სამშობლოში დაბრუნებული კი ერთ-ერთ ბართან მოკლეს.) 1 წელიწადსა და 1 კვირაში არლის ექვსჯერ ესროლეს და მეგობართან ერთად მოკლეს. "ჯერ ანდრესი, ახლა არლი. არავინ იცის ვინ იქნება შემდეგი", - აღნიშნა არლის თანაგუნდელმა და მომავალში ინგლისური "ასტონ ვილას" თავდამსხმელმა, ხუან პაბლო ანხელმა.

იმ დროისთვის ხამესი მედელინის სისხლიანი ამბებიდან შორს, იბაგიში, ცხოვრობდა და "ტოლიმენსეს" აკადემიის უფროს წევრებს ეთამაშებოდა. "ხამესს კარგი ფეხი ჰქონდა და ინტელიგენტური ცენტრლაური მოთამაშე იყო. ჯერ ადგილობრივ ტურნირებზე გამოვდიოდით, შემდეგ კი მთელი ქვეყნის შემოვლა დავიწყეთ და მისი სახელიც უფრო და უფრო ცნობილი გახდა", - განაცხადა ახალგაზრდული გუნდის თავკაცმა, ალვარო გუზმანმა.

მისი ყოფილი თანაგუნდელი, დიეგო ნორონა, იხსენებს ხამესის პირველ დღეებს, როდესაც იგი ზედაასაკობრივ გუნდში გადავიდა. "ჯარიმა იყო, რომელსაც ჩვეულებისამებრ, მე ვასრულებდი ხოლმე. თუმცა ხამესმა ბურთი ისეთი რწმენით აიღო, რომ დარტყმის უფლება მივეცი. ყოველგვარი სიტყვის გარეშე, მან ბურთი ცოცხალ კედელს შემოატარა და დიდებული გოლი გაიტანა. ვარჯიშებზე, როგორც წესი, ცოცხალ კედელს ზემოთ ვცდილობდით ბურთის გადატარებას, მაგრამ არასოდეს გვიცდია კედლისთვის ბურთის შემოტარება. სწრაფად მივხვდით, რომ ეს ბიჭი განსაკუთრებული იყო!"

ხამესი მხოლოდ ამით არ იყო განსხვავებული, ის ძალიან ძალიან მორცხვი გახლდათ, რაც შეუმჩნეველი არავის დარჩენია. "ის კარგი მომსმენი იყო, მაგრამ ამავდროულად ვღელავდით იმის გამო, რომ არანაირ ემოციას არ გამოხატავდა. ჩვენ მასზე ფსიქოლოგების დახმარებით ვიმუშავეთ, რადგან ხამესი ძალიან პასიური იყო", - იხსენებს "ტოლიმენსეს" აკადემიის კიდევ ერთი მწვრთნელი.

მედელინში ხამესმა "პონიფუტბოლის თასი" - კოლუმბიის ახალგაზრდული ტურნირი - მოიგო და მაშინ უკვე ცხადი გახდა, რომ ის ნამდვილი ვარსკვლავი გახდებოდა. 11 წლის ნახევარმცველმა 9 თამაშში 13 გოლის გატანა მოახერხა, აქედან ორი ფინალურ შეხვედრაში საჯარიმო დარტყმით შეაგდო. ფინალის 5 000 მაყურებელს შორის "ენვიგადოს" მფლობელი გუსტავო ადოლფო უპეგუი ლოპესიც იყო, რომელიც პაბლო ესკობარის კარგი მეგობარი გახლდათ. "ეს ბიჭი უნდა ვიყიდოთ", - მოკლედ თქვა ლოპესმა თამაშის შემდეგ.

მაშინ "ენვიგადოში" გადასვლა დიდი ნაბიჯი იყო, მაგრამ ამ კლუბს რეალური საფეხბურთო პირობები არ გააჩნდა. "არანაირი ბალახი, მხოლოდ ქვიშა და მტვერი, რომელიც იმ პერიოდში ჩვენს გარშემო დიდი რაოდენობით ტრიალებდა", - იხსენებს კლუბის გენერალური დირექტორი, ედგარ რამირესი. ამიტომაც, როდესაც არგენტინული კლუბები მოადგნენ კარს, ხამესის დედამ წინადადების განხილვა დაიწყო. განსაკუთრებით კი უპეგუი ლოპესის მკვლელობის შემდეგ, რომელიც ხამესზე პერსონალურად ზრუნავდა. "ბოკა ხუნიორსი" ძალიან ახლოს იყო მის შეძენასთან, მაგრამ "ბანფილდმა" არგენტინული ფეხბურთის გრანდს დაასწრო და 250 ათასი ევრო გადაიხადა.


იმ დროისთვის "ბანფილდი" მისთვის იდეალური ვარიანტი იყო, რადგან ამ კლუბში მას ყველანაირი პირობა ექნებოდა, რათა განვითარებულიყო და კარგ პირობებში ემუშავა. თუმცა პირველი წელი (2008) მარტივი არ ყოფილა. პირველი გუნდიდან რეზერვისტებში გადავიდა, სადაც "ბანფილდის" მეორე გუნდის დამრიგებელი, წარსულში ლეგენდარული არგენტინელი ფეხბურთელი, ხორხე ბურუჩაგა, მას სახელითაც კი არ მიმართავდა. ხორხე როდრიგესს უბრალოდ "კოლუმბიელს" ეძახდა. ალბათ დამეთანხმებით, რომ ეს არავისთვის იქნებოდა სასიამოვნო. ამასთან ერთად, 16 წლის ხამესს სახლიდან მოშორებით მარტო ცხოვრება უჭირდა და ნელ-ნელა გრძნობდა, რომ თითქოს შეცდომა დაუშვა. ამ ყველაფერთან ერთად როდრიგესს ისიც აწუხებდა, რომ მას ყველაფერს ეძახდნენ, გარდა ხამესისა. იგი არგენტინაში ჯეიმსი იყო, ხესე იყო, რაც არ მოსწონდა. დაბალი ტემპერატურაც არაკომფორტული გარემოება იყო, ვინაიდან იგი მედელინის ტროპიკულ ჰავას იყო მიჩვეული.

თუმცა, მიუხედავად სირთულეებისა, არგენტინაში ჩაწერილ პირველ ინტერვიუში საკმაოდ პრაგმატულად ისაუბრა: "ეს იდეალური ლიგაა იმისათვის, რომ გაიზარდო როგორც ფეხბურთელი და ევროპაში გადახვიდე, რაც ჩემი ოცნებაა. მიყვარს ფეხბურთის ყურება და ტელევიზორში იმდენ მატჩს ვუყურებ, რამდენსაც ვნახულობ." იმ დროისთვის მას უკვე გატანილი ჰქონდა დაახლოებით ისეთი გოლი, როგორიც 2014 წლის მსოფლიო ჩემპიონატზე ურუგვაის ნაკრებს მერვედფინალში გაუტანა.

ხამესი არა კლუბის საერთო საცხოვრებელში, არამედ ცალკე ბინაში ცხოვრობდა პალერმოში. ის ბაზაზე საზოგადოებრივი ტრანსპორტით დადიოდა. თუმცა უკან წამოსასველი ფული ყოველთვის არ ჰქონდა და ზოგჯერ კლუბის ხელმძღვანელობას თხოვდა თანხას ავტობუსისთვის. დროთა განმავლობაში, არგენტინაში ავტობუსისთვის ფულის შოვნა ძალიან გართულდა, რადგან ხურდების დეფიციტი შეიქმნა და ხამესი ხშირად ხელცარიელი რჩებოდა. დრო იყო, რომ მას საკუთარი ავტომობილი ჰყოლოდა. "ბიძაჩემმა ძველ ქარხანაში წამიყვანა და თავისი "გოლფი" მომცა - ის ჩემი პირველი ავტომობილი იყო, რომელიც გავატარე", - იხსენებს როდრიგესი. თუმცა ეს კოლუმბიაში ხდებოდა. ბანფილდში მან საკუთარი ხელფასით "პეჟო" შეიძინა.


ბანფილდში ახალი ჩასული ხამესი თავს ძალიან ცუდად გრძნობდა. ჯერ მოსამზადებელი ეტაპიც არ იყო დასრულებული, ის კი სახლში ხშირად რეკავდა, წასვლა სურდა. "ვეცდები, რომ მას დღეში მინიმუმ 2 წუთი მაინც ველაპარაკო, რადგან საქალაქთაშორისო ზარები ძალიან ძვირია. უბრალოდ მინდა შევახსენო, რომ ადრე დაიძინოს, სახლში სისუფთავე დაიცვას, ვარჯიშზე ადრე მივიდეს და არ დაავიწყდეს, რომ უფალი მას ყოველთვის ლოცავს", - ასე ამხნევებდა ხამესს დედა. როდესაც "ბანფილდის" მთავარი მწრთნელი ხულიო ფალკიონი გახდა, ვარჯიშები გაძლიერდა. ხამესი გრძნობდა, რომ თითქოს ვეღარ გაძლებდა. ის უფრო ნელი გახდა, უჭირდა ახალი ტემპისათვის ფეხის აწყობა. თუმცა მისი ტალანტი ძალიან დიდი იყო და ფალკიონის არ უნდოდა ასეთი ბიჭის დაკარგვა.

სწორედ ფალკიონი იყო პირველი, რომელმაც ხამესის დედას არგენტინაში ჩამოსვლა და მასთან ერთად ცხოვრება თხოვა, რადგან კარგად ამჩნევდა, რომ პილარ რუბიოს თავის ვაჟზე ძალიან დიდი გავლენა ჰქონდა. საბოლოოდ, ხამესისთვის ყველაფერი კარგად წავიდა და მისი მდგომარეობა გაუმჯობესდა. 17 წლის ასაკში ის გახდა ყველაზე ახალგაზრდა მოთამაშე, რომელსაც არგენტინის ჩემპიონატში უთამაშია და მოგვიანებით ყველაზე ახალგაზრდა, რომელსაც გოლი გაუტანია. 2009 წელს კი ხამესი "ბანფილდს" ისტორიაში პირველი და ჯერჯერობით უკანასკნელი ჩემპიონობის მოპოვებაში დაეხმარა - 38 შეხვედრაში 8 ბურთის გატანა მოახერხა.

"სამუდამოდ ფალკიონის მადლობელი ვიქნები. არგენტინაში საკუთარი სხეული განვავითარე, ვისწავლე მისი უკეთ გამოყენება და ვისწავლე თუ როგორ ვითამაშო გუნდზე დაცვაშიც, არამხოლოდ შეტევაში", - მოგვიანებით აღნიშნა მადლიერმა კოლუმბიელმა. "ბანფილდში" ის ყველას უყვარდა, ხამესს კი საკუთარი სიყვარული უკვე ნაპოვნი ჰყავდა. მისი შეყვარებული კოლუმბიის ეროვნული ნაკრების გოლკიპერის, დავიდ ოსპინას, და დანიელა ოსპინა იყო, რომელიც 2011 წელს ცოლად შეირთო. მოგვიანებით კი მათ ქალიშვილი სალომე შეეძინათ.


შემდეგ კი ყველაფერი ძალიან სწრაფად განვითარდა. ხამესი თანაგუნდელებთან ერთად ავტობუსით მარ დე პლატს ტოვებდა, როდესაც ფალკიონიმ გადმოსვლა და დალაპარაკება თხოვა. ის კლუბის წარმომადგენელს გაესაუბრა და შემდეგ სიგარეტს მოუკიდა. ძალიან მალე "ბანფილდმა" ოფიციალურად გამოაქვეყნა, რომ ხამესი გაიყიდა. ხამესს ყველამ მიულოცა, ხოლო გახარებულმა როდრიგესმა ბარგი მალე ჩაალაგა და ეზეიზას აეროპორტისკენ გაემართა. იგი "პორტუმ" 5 მილიონ ევროდ შეიძინა.

პორტუგალიაში, ზედიზედ სამჯერ ეროვნული ჩემპიონატის მოგებასთან, ევროპის ლიგის თასის მოპოვებასთან და სახელის მოხვეჭასთან ერთად, ხამესმა კომპიუტერული ინჟინერიაც შეისწავლა ისევე, როგორც მისმა მამინაცვალმა. ამავდროულად ხამესმა კოლუმბიის 21 წლამდელთა ნაკრებთან ერთად ტულონში ტურნირი მოიგო და მოაგვიანებით მსოფლიო ჩემპიონატის შესარჩევი ეტაპის მატჩებისთვის მთავარ ნაკრებშიც მიიღო მიწვევა. "პორტუში" გატარებული 3 ფანტასტიკური სეზონის შემდეგ "მონაკომ" ხამესი და მისი თანაგუნდელი რადამელ ფალკაო დაიმატა. როდრიგესის სანაცვლოდ ფრანგებმა 38 მილიონი ევრო გადაიხადეს.

მონტე კარლოში მან მორიგი წარმატებული სეზონი ჩაატარა, შემდეგ კი იყო 2014 წლის მუნდიალი, რომელიც ხამეს როდრიგესმა ფენომენალურად ჩაატარა.


ბრაზილიაში როდრიგესმა საოცარი ფეხბურთი ითამაშა, 6 გოლი გაიტანა, კოლუმბიას მეოთხედფინალში გასვლაში დაეხმარა და ტურნირის საუკეთესო ბომბარდირი გახდა. ის სატრანსფერო ბაზარზე ყველაზე მოთხოვნადი ფეხბურთელი გახდა და ზაფხულში 22 წლის კოლუმბიელი შემტევი მადრიდის "რეალმა" დაახლოებით 80 მილიონ ევროდ დაიმატა.


მაშინ ხამესი ძალიან ბედნიერი იყო და პირველი სეზონიც ჩინებულად ჩაატარა. თუმცა პრობლემები მას შემდეგ დაიწყო, რაც მთავარი მწვრთნელის პოსტი კარლო ანჩელოტიმ დატოვა. ჩვენი მკითხველი მიხვდებოდა, რომ ხამესისთვის ძალიან მნიშვნელოვანია მწვრთნელის ნდობა და მოფრთხილება. რაფაელ ბენიტესმა, შემდეგ კი ზინედინ ზიდანმა, როდრიგესს სათანადო ყურადღება არ მიაქციეს და კოლუმბიელი "სამეფო კლუბში" ჩაიკარგა. ლეგენდარული ფრანგის მოსვლის შემდეგ "რეალმა" ჩემპიონთა ლიგის ტიტული ზედიზედ ორჯერ მოიგო, მაგრამ ხამესი სათადარიგო მოთამაშე გახდა. მაშინაც კი, როდესაც ზიდანი 4-4-2 სქემაზე გადავიდა, ცენტრში რომბით, გამთამაშებლის პოზიციაზე არა ხამესი, არამედ ისკო გაამწესა. ისკომ შემდეგ ფანტასტიკურად იასპარეზა და როდრიგესი აღარავის ახსოვდა. ამ ყველაფრის შედეგად ხამესმა "რეალის" დატოვება გადაწყვიტა.

ახლა კი როდრიგესი დაუბრუნდა იმ სპეციალისტს, რომლისთვისაც არაფრის დამტკიცება არ მოუწევს. კარლომ ხამესის შესაძლებლობები ძალიან კარგად იცის და მისი სჯერა. მიუნხენის "ბაიერნი" კი დიდი ოჯახია, რომელიც ცუდად არავის ღებულობს. კეთილი იყოს შენი ფეხი "ალიანს არენაზე" ხამეს! შრომისმოყვარეობა და ტალანტი ერთდროულად ძალიან დიდი განძია, რომელიც ამ ბიჭს აქვს. ახლა კი იმედი ვიქონიოთ, რომ ხამესი სწორედ "ბაიერნში" აჩვენებს თავის საუკეთესო ფეხბურთს.

დავით მაღრაძე, სპეციალურად BAYERN.GE-სთვის
скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
ხამეს როდრიგესი ბლოგი
მსგავსი სიახლეები
კომენტარები
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა