"ბაიერნს" "არმინიასთან" მატჩამდე სერიოზული პრობლემები აქვს

გერმანიის ბუნდესლიგის 21-ე ტურში მიუნხენის "ბაიერნი" საკუთარ კედლებში ბიელფილდის "არმინიას" მიიღებს.

"რეკორდმაისტერი" მომდევნო მატჩს სერიოზული დანაკლისით ხვდება. ჰანს ფლიკს განკარგულებაში ერთბაშად რამდენიმე ძირითადი შემადგენლობის ფეხბურთელი არ ეყოლება.

გუნდის ტრავმირებულთა სიაში არიან სერჟ გნაბრი, ალექს ნუბელი და ლეონ გორეცკა. ამ უკანასკნელმა კორონავირუსის გადატანის შემდეგ განაახლა ვარჯიში, მაგრამ მცირე ტკივილების გამო ის ხვალ გუნდს არ ეყოლება. რაც შეეხება გნაბრის, მან დაზიანება საკლუბო მუნდიალზე მიიღო და უცნობია როდის დაუბრუნდება გუნდს.

კიდევ ერთი დიდი დანაკლისი თომას მიულერის არყოფნაა. მოგეხსენებათ, დოჰაში ყოფნის ფეხბურთელს კოვიდი დაუდასტურდა, რის გამოც ამჟამად ის თვითიზოლაციაშია და სავარაუდოდ, თვის ბოლომდე არ უნდა ველოდოთ მის დაბრუნებას.

რაც შეეხება ჟერომ ბოატენგსა და ხავი მარტინესს. გერმანელი პირადი მიზეზებით ტოვებს "არმინასთან" მატჩს, ვეტერანმა ესპანელმა კი სულ მცირე ხნის წინ განაახლა ვარჯიში და ის ჯერ სათამაშო კონდინციებში არ იმყოფება.