...

პრევიუ: იტალია - გერმანია

დღეს, 15 ნოემბერს, ევროპაში რამდენიმე საინტერესო ამხანაგური პაექრობა გაიმართება. მათ შორის ყველაზე გამორჩეული მატჩი კი "ჯუზეპე მეაცაზე" შედგება, სადაც ერთმანეთს იტალიისა და გერმანიის ეროვნული გუნდები დაუპირისპირდებიან.

იტალია - გერმანია
ჩემპიონატი: ამხანაგური მატჩი
თარიღი: 23:45 საათი, 15 ნოემბერი
სტადიონი: "ჯუზეპე მეაცა", მილანი
მთავარი მსაჯი: სოარეშ დიასი (პორტუგალია)
პირდაპირი ტრანსლიაცია: -

გუნდების წინასამატჩო მდგომარეობა
ჯამპიერო ვენტურამ იტალიის ნაკრებში მარცხით დაიწყო, როდესაც "სკუადრა აძურა" შინ საფრანგეთის ეროვნულ გუნდთან 1:3 დამარცხდა. თუმცა, ამას წარმატებული სერია და მსოფლიო ჩემპიონატის საკვალიფიკაციო ეტაპის პირველ ოთხ ტურში მოპოვებული ათი ქულა მოჰყვა. გამოცდილ იტალიელ სპეციალისტს, ანტონიო კონტეს შემდეგ, ბევრი არაფერი შეუცვლია. სქემა იგივეა, სათამაშო სტილი იგივეა, უბრალოდ ვენტურა ახალგაზრდებს უფრო მეტ შანსს აძლევს და გუნდის ძირითადი ბირთვიც შეიცვალა. ახლა იტალიის ნაკრების რიგებში საუკეთესო ფორმაში "ტორინოს" ახალგაზრდა თავდამსხმელი ანდრეა ბელოტი, "ლაციოს" შემტევი ჩირო იმობილე და ანტონიო კანდრევა იმყოფებიან. რამდენიმე დღის წინ "სკუადრა აძურა" სტუმრად ლიხტენშტეინს დაუპირისპირდა და ძალიან მარტივად, 4:0 იმარჯვა, თანაც ოთხივე გოლი პირველ ნახევარში გაიტანა. აუტსაიდერის წინააღმდეგ იტალიელებმა ოთხი მცველით ითამაშეს, მაგრამ დღეს, ძალიან დიდი ალბათობით, ისევ ხუთმცველიან ტაქტიკას დაუბრუნდებიან. ვენტურას მთავარი პრობლემა ანტონიო კანდრევას მცირე დაზიანებაა, რომლის გამოც მილანის "ინტერის" შემტევის თამაში დღევანდელ შეხვედრაში ეჭვის ქვეშ დადგა. როგორც ჯამპიერომ აღნიშნა, ის სერიოზული როტაციის განხორციელებას არ აპირებს, რადგან თამაში მნიშვნელოვანია. შესაბამისად, იტალია მინდორზე საუკეთესო შემადგენლობით გავა და ეცდება, რომ კარგი განწყობა შეინარჩუნოს.

გერმანიის ეროვნული ნაკრები კი ფენომენალურ ფორმაშია და ევროპის ჩემპიონატის შემდეგ გოლსაც კი არ უშვებს. თუმცა, აღსანიშნავია ისიც, რომ იოახიმ ლიოვის გუნდისთვის ეს პირველი სერიოზული გამოცდა იქნება. მსოფლიო ჩემპიონატის შესარჩევ ციკლში "ბუნდესნაკრებმა" მოსაგები თამაშები მოიგო, ახლა კი ევროპის ერთ-ერთ უძლიერეს გუნდს დაუპირისპირდება. ლიოვის კოლექტივმა ბოლო ოფიციალურ მატჩში გაივარჯიშა და სტუმრად აუტსაიდერი სან მარინო 8:0 გაანადგურა. იოახიმმა ორი დებიუტანტი: 19 წლის მარჯვენა მცველი ბენჟამინ ჰენრიხსი და 21 წლის შემტევი ნახევარმცველი სერჟ გნაბრი ათამაშა. ამ უკანასკნელმა დიდებულად იასპარეზა და ჰეთ-თრიქის გაფორმება მოახერხა. სავარაუდოდ, გნაბრი იტალიასთანაც ძირითად შემადგენლობაში იქნება. საინტერესოა როგორი სქემით ითამაშებს "ბუნდესთიმი", რადგან არ არის გამორიცხული, რომ ლიოვმა სამი ცენტრალური მცველით იმოქმედოს. მან ეს ტაქტიკა, იტალიელების წინააღმდეგ, უკვე გამოიყენა და ევროპის ჩემპიონატის წინ დიდებული გამარჯვებაც მოიპოვა (მიუნხენში 4:1). მიუხედავად იმისა, რომ "სკუადრა აძურა" გერმანელებისთვის პრინციპული მეტოქეა, მატჩი მაინც ამხანაგურია და მოსალოდნელია გარკვეული ექსპერიმენტები. თავად ლიოვმა უკვე დაადასტურა, რომ ძირითადში "ვოლფსბურგის" უნივერსალური ნახევარმცველი იანიკ გერჰარდტი ითამაშებს, რომელიც დაცვის მარცხენა ფლანგზე იონას ექტორს შეცვლის. გარდა ამისა, მოსალოდნელია სასტარტოში დორტმუნდის "ბორუსიას" უნიჭიერესი ჩამშლელი ნახევარმცველის, იულიან ვაიგლის, ხილვა, რომელიც საკმაოდ კარგ ფორმაშია და ნაკრებში თავის შანსს უკვე დიდი ხანია ელის. "ბუნდესთიმის" შემადგენლობა შესუსტებულია, რადგან გუნდს მანუელ ნოიერი და ჟერომ ბოატენგი ვერ ეხმარებიან, მაგრამ იოახიმ ლიოვს მაინც საკმაოდ დიდი ფუფუნება აქვს, რადგან გერმანიას საოცარი თაობა ჰყავს და კონკურენცია ეროვნულ გუნდში საკმაოდ მაღალია. მილანში "ბუნდესნაკრები" გამარჯვების მოპოვებას და იტალიელების კიდევ ერთხელ გამწარებას ეცდება.

იტალიისა და გერმანიის ეროვნული ნაკრებების დაპირისპირება ნამდვილი კლასიკაა, რომლის ისტორიაც ბოლო პერიოდში შემოტრიალდა. თუ აქამდე "სკუადრა აძურა" დომინირებდა, ბოლო წლებში უპირატესობა "ბუნდესნაკრებმა" მოიპოვა და დღეს სტატისტიკის გამყარებას ეცდება.

სავარაუდო შემადგენლობები
იტალია: ბუფონი - კანდრევა, დარმიანი, ბონუჩი, ასტორი, დე შილიო - პაროლო, დე როსი, ვერატი - ბელოტი, იმობილე.

გერმანია: ლენო - კიმიხი, ჰიოვედესი, მუსტაფი, ჰუმელსი, გერჰარდტი - ვაიგლი, გორეცკა - მიულერი, გომესი, გნაბრი.

საინტერესო ფაქტები
  • იტალიისა და გერმანიის ეროვნული გუნდების ურთიერთშეხვედრების სტატისტიკა 21 მატჩს ითვლის, საიდანაც 11 "სკუადრა აძურამ" მოიგო, ექვსი "ბუნდესნაკრებმა" და ოთხი ფრედ დასრულდა.

  • ამ 21 თამაშიდან კი 17 ამხანაგური პაექრობა იყო. უპირატესობა აქაც იტალიელებს აქვთ: 9მ, 3ფ და 5წ.

  • გერმანიის ეროვნულ ნაკრებს იტალიაში 1929 წლის შემდეგ აღარ მოუგია (1ფ, 5წ).

  • 2016 წელს ეს ამ გუნდების მესამე დაპირისპირება იქნება და გერმანიის ნაკრები ეცდება, რომ კვლავ გამარჯვება მოიპოვოს.

  • 29 მარტს, მიუნხენის "ალიანს არენაზე", "ბუნდესთიმმა" იტალიის ნაკრები, ამხანაგურად, 4:1 გაანადგურა და რამდენიმე თვეში უკვე ევროპის ჩემპიონატის მეოთხედფინალურ ეტაპზე დაამარცხა. ბორდოში მატჩი ფრედ 1:1 დასრულდა, პენალტების სერიაში კი იოახიმ ლიოვის გუნდმა 6:5 იმარჯვა. ეს გერმანიის პირველი ოფიციალური წარმატება იყო იტალიის ნაკრების წინააღმდეგ.

  • იტალიის ნაკრებს ამხანაგურ თამაშებში ძალიან უჭირს. "სკუადრა აძურამ" ბოლო რვა საკონტროლო მატჩიდან მხოლოდ ორი მოიგო (2ფ, 4წ).

  • ამ მხრივ, სახარბიელოდ საქმე არც გერმანელებს აქვთ. იოახიმ ლიოვის გუნდმა ბოლო რვა ამხანაგური თამაშიდან მხოლოდ სამი მოიგო და ოთხი წააგო.

  • გერმანიის ეროვნული ნაკრები უკვე 450 წუთია გოლს არ უშვებს.

მწვრთნელების წინასამატჩო კომენტარები
​​​​ჯამპიერო ვენტურა: ​"ამხანაგური თამაშისთვის გაცილებით იოლი მეტოქე უფრო სასურველი იქნებოდა, მაგრამ ახლა იტალიის ნაკრები ეცდება, რომ პლანეტის ყველაზე ორგანიზებულ გუნდზე იძიოს შური.

კარგად მესმის, რომ შედეგზე ბევრი რამ იქნება დამოკიდებული. ჩემი დებიუტი საფრანგეთის ნაკრებთან შედგა და თამაშის შემდეგ, ყველა სწორედ ანგარიშზე ამახვილებდა ყურადღებას.

ჩემს მიერ გამოძახებული თითოეული მოთამაშე იმსახურებს ეროვნული ნაკრების ღირსების დაცვას. შესაძლოა, მცირე როტაციას მივმართო, მაგრამ სერიოზული ცვლილებების განხორციელებას არ ვაპირებ.

წინ საკმაოდ სერიოზული ტესტი გველის, რომელიც კარგად უნდა ჩავაბაროთ."

იოახიმ ლიოვი: ​"იტალია ტაქტიკურად უნიკალური გუნდია. ჩვენი მთავარი მიზანი კი მეტოქის თავიდანვე ზეწოლის ქვეშ მოქცევაა. დარწმუნებული ვარ, რომ ეს უფრო შემტევი მატჩი იქნება, ვიდრე ევროპის ჩემპიონატის მეოთხედფინალში.

მარიო გომესი ჩვენთვის ძალიან ფასეული ფეხბურთელია და ძირითადში იქნება. როგორც უკვე დავაანონსე, ბერნდ ლენო ძირითადში დაიწყებს. დაცვის ცენტრში ბენედიკტ ჰიოვედესი და მატს ჰუმელსი იმოქმედებენ. დაცვის მარცხენა ფრთაზე კი იონას ექტორს იანიკ გერჰარდტი შეცვლის.

საბოლოო თერთმეტეულსა და ფორმაციაზე კი ბოლო ვარჯიშის შემდეგ ვიფიქრებ. სანაკრებო პაუზის შემდეგ კი თავის კლუბს ზედმეტად გადაღლილი არც ერთი მოთამაშე არ დაუბრუნდება. ეს მიუნხენის "ბაიერნსა" და დორტმუნდის "ბორუსიასაც" ეხებათ."​​​​​​скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
გერმანიის ნაკრები პრევიუ
მსგავსი სიახლეები
კომენტარები
heineken
heineken | 15 ნოემბერი 2016 14:55
იმედია ამხანაგურის მიუხედავათ დღეს დავადებთ
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა