ჰოლანდი და ბაიერნი საბოლოოდ გამოირიცხა? ოლივერ კანის კომენტარი

მიუნხენის ბაიერნის გენერალურმა დირექტორმა, ოლივერ კანმა დაადასტურა, რომ კლუბი ერლინგ ჰოლანდის მიმართ აქტიურ ინტერესს იჩენდა, თუმცა ისიც აღნიშნა, რომ ნორვეგიელ ფეხბურთელში მოთხოვნილი თანხის გადახდა მიუნხენურ გუნდს ამ ეტაპზე არ შეუძლია:

"ჰოლანდზე ხშირად საუბრობენ... მატიას ზამერმა ძალიან კარგადი ისაუბრა ამ თემაზე, როდესაც აღნიშნა, რომ ეს თანხები ცოტათი თავბრუდამხვევია.

მსგავსი თანხები ძალიან, ძალიან შორს არის ჩვენი წარმოსახვისგან. ასეთ თავდამსხმელს ინტერესის მხრივ რომ გავყოლოდით, კარგად ვერ ვიმუშავებდით.

ცხადია, ჰოლანდი ახალგაზრდა და ამავდროულად ბრწყინვალე თავდამსხმელია, მომავლისთვის ნამდვილად საინტერესო ფეხბურთელი, თუმცა ეს ფინანსური ასპექტები ჩვენს წარმოდგენას სცილდება", - განაცხადა კანმა.

ცნობისთვის, მიმდინარე სეზონში ჰოლანდმა დორტმუნდის მაისურით ყველა ტურნირზე ჯამში 26 მატჩი ჩაატარა, სადაც თავის გამოჩენა 25 გოლითა და 7 საგოლე გადაცემით მოახერხა.