...

პირველი წრის შეჯამება - როგორ მუშაობს ანჩელოტის სისტემა?

ყველას კარგად მოგეხსენებათ, რომ გერმანული ფეხბურთი ხანგრძლივ შესვენებაზე გავიდა, მიუნხენის "ბაიერნის" მოთამაშეები კი საშობაო არდადაგებზე იმყოფებიან. შესაბამისად, ყოველდღიური მასალები თანდათან მცირდება და ნაკლებად საინტერესოა. სწორედ ამიტომ, ჩვენ ყველანაირად ვეცდებით, რომ მომხმარებელს მოწყენის საშუალება არ მივცეთ და ვრცელი, საინტერესო მასალებით მოვამარაგოთ.

"რეკორდმაისტერმა" 2016/17 წლების სეზონის ნახევარი უკვე გაიარა და მიუხედავად იმისა, რომ მთავარი ნაწილი ჯერ კიდევ წინ არის, გასულ თვეებსაც ერთგვარი შეჯამება სჭირდება. "ბაიერნმა" ბუნდესლიგის პირველი წრე თითქმის ჩაამთავრა (სრული პირველი წრე 20 იანვარს დასრულდება, როდესაც მე-17 ტურის მატჩება გაიმართება) და ჩვენც ნელ-ნელა კიდევ ერთხელ გადავავლოთ თვალი იმას, რაც პირველ ნახევარში მოხდა და შევაჯამოთ "ბაიერნის" მიმდინარე კამპანიის პირველი ნახევარი.

პირველ რიგში კი, რა თქმა უნდა, დონ კარლოზე უნდა ვისაუბროთ, რომელმაც "ბაიერნი" 2016 წლის ზაფხულში პეპ გვარდიოლასგან ჩაიბარა და მთავარი კითხვები სწორედ მის ირგვლივ ტრიალებდა. 57 წლის იტალიელი გერმანულ ფეხბურთს პირველად ეწვია და ყველას აინტერესებდა როგორ მოერგებოდა ბუნდესლიგას პაპა კარლოს პრაგმატული, სტრატეგიული და შედეგზე ორიენტირებული ფეხბურთი.

ბუნებრივია, რომ შეჯამებას სწორედ კარლო ანჩელოტის მუშაობის მიმოხილვით ვიწყებთ, რომელიც ძალიან საინტერესოდ და ცოტათი ნერვიულად მიმდინარეობდა.

უფრო მეტი თავისუფლება და პრაგმატიზმი
კარლო ანჩელოტის პირველივე ვარჯიშებიდან და ამხანაგური მატჩებიდან ნათელი გახდა, რომ ეს პეპ გვარდიოლა არ არის. იტალიელმა თავიდანვე განაცხადა, რომ ის ბევრს არაფერს შეცვლიდა, მაგრამ მისი ხედვები და მიდგომა ესპანელი სპეციალისტისგან განსხვავებულია. პაპა კარლოს უყვარს ფეხბურთელებთან ხშირი ურთიერთობა, მეგობრული საუბარი და მათთვის მინდორზე თავისუფლების მიცემა. ამ თემაზე უკვე ისედაც ძალიან ბევრი ვისაუბრეთ. აგვისტოში, ამხანაგურ ტურნირებზე, კარგად გამოჩნდა, რომ "ბაიერნი" უფრო პრაგმატულ და მრავალფეროვან ფეხბურთს ითამაშებდა, ვიდრე ბოლო წლებში. აქამდე გუნდი მხოლოდ ბურთის ფლობასა და კომბინაციებზე ფიქრობდა, ახლა კი უფრო მეტად ორგანიზებული, დაცვითი და მრავალფუნქციურია. მიუნხენური გრანდი გაცილებით აქტიურად და უკეთ იყენებს ფლანგებს, მოქმედებს კონტრშეტევებზე, გააქვს გოლები შორიდან და აგრეთვე სტანდარტებიდან. ამ მხრივ ანჩელოტიმ გვარდიოლას ნამდვილად აჯობა, მაგრამ ეს მოსალოდნელი იყო.

ყველაზე თვალშისაცემი კი ის არის, რომ ანჩელოტის მიერ მინიჭებული თავისუფლების წყალობით, "ბაიერნში" რამდენიმე მოთამაშე სერიოზულად გაიხსნა. პირველ რიგში, ეს ხავი მარტინესსა და ტიაგო ალკანტარას ეხებათ. მარტინესს ანჩელოტიც დაცვის ცენტრში იყენებს, მაგრამ ხავიერმა მიმდინარე სეზონი ფენომენალურად დაიწყო. მაშინ, როდესაც ზაფხულში ყველა ჰუმელსი-ბოატენგის საოცნებო თანდემზე საუბრობდა, პირველ თვეებში ორივე მარტინესის დამაჯერებელმა და ზუსტმა თამაშმა დაჩრდილა. ტიაგო კი კარლოს სისტემის საკვანძო ფიგურა გახდა და ალკანტარა გაცილებით უფრო ლაღი და ნაყოფიერია, ვიდრე ბოლო წლებში. იგივე ითქმის ხაბი ალონსოზეც, რომელმაც უკვე სამი ბურთის გატანა მოახერხა. ხუან ბერნატიც იდეალურად ათამაშდა და ყოველ ჯერზე, როდესაც შანსი მიეცა, თავი საკმაოდ მაღალ დონეზე წარმოაჩინა. შეიძლება ითქვას, რომ დავიდ ალაბას ღირსეული შემცვლელი ჰყავს. საპირისპიროდ იმის თქმა შეიძლება, რომ "ბაიერნში" რამდენიმე მოთამაშე ცოტათი ჩაიკარგა, მაგრამ ეს ბუნებრივი პროცესია და ამიტომ უფრო შთამბეჭდავი იმ ფეხბურთელების გახსნაა, რომლებიც გვარდიოლას დროს თავს იდეალურად ვერ გრძნობდნენ.

კარლო ანჩელოტის ამ პრაგმატულობამ და თავისუფლებამ უფრო მეტი დადებითი შედეგი გამოიღო, ვიდრე უარყოფითი. თანაც, იტალიელი ჯერ კიდევ მუშაობის პროცესშია და გერმანული გრანდის შესაძლებლობებს უფრო უკეთ და უკეთ ეცნობა.

დიდებული სტარტი
კარლო ანჩელოტიმ მიუნხენური გრანდის ისტორიაში საუკეთესო სტარტი აიღო და "ბაიერნის" გულშემატკივრების გული თავიდანვე მოიგო. თავდაპირველად უნდა აღვნიშნოთ, რომ 57 წლის სპეციალისტმა პირველივე ოფიციალურ შეხვედრაში ტიტული მოიპოვა. "რეკორდმაისტერმა" დორტმუნდში მთავარი მოწინააღმდეგე "ბორუსია" 2:0 დაამარცხა და გერმანიის სუპერთასის მფლობელი გახდა. ამას მოჰყვა "კარლ-ცეისის" განადგურება გერმანიის თასზე (5:0) და ბუნდესლიგაში დიდებული დასაწყისი - ბრემენის "ვერდერთან" შინ 6:0. სეზონის სტარტზე "ბაიერნმა" რვიდან რვა თამაში მოიგო, 27 გოლი გაიტანა და მხოლოდ ერთი გაუშვა. რა თქმა უნდა, თამაში ასეთი იდეალური ნამდვილად არ ყოფილა, რადგან "შალკეს", "ინგოლშტადტისა" და "ჰამბურგის" წინააღმდეგ გუნდს სერიოზული პრობლემები შეექმნა, მაგრამ შედეგი მართლაც შთამბეჭდავი იყო. ეს კი იმაზე მეტყველებს, რომ ანჩელოტიმ იცის როგორ მიაღწიოს დადებით შედეგს თუნდაც მხოლოდ ნორმალური თამაშის პირობებში, როდესაც გუნდი ჯერ კიდევ ახალი იდეებისა და ტაქტიკის დამუშავების პროცესშია. სეზონის სტარტზე გამოჩნდა, რომ კარლოს გუნდები კლასის ხარჯზე გამარჯვებას მშვენივრად ახერხებენ, რაც ყოველთვის მნიშვნელოვანი და ფასეული დეტალია.

მძიმე პერიოდი და სწორი დასკვნები
ამ დიდებული სტარტის შემდეგ "ბაიერნს" სერიოზული პრობლემები შეექმნა. გუნდმა ბუნდესლიგაში რამდენიმეჯერ უაზროდ დაკარგა ქულები, რაც კონცენტრაციის დაკარგვისა და მოდუნების ბრალია. გარდა ამისა, "რეკორდმაისტერმა" წააგო მადრიდის "ატლეტიკოსთან" და დაახლოებით ორ თვეში დორტმუნდის "ბორუსიასთან". თანაც ამ ორ ძალიან მნიშვნელოვან თამაშში "ბაიერნს" ერთი და იგივე პრობლემები ჰქონდა - კრეატივის ნაკლებობა, ბევრი უზუსტობა და არადამაჯერებლობა. ამ პერიოდმა კარლოს თავდაპირველ ეფექტს სერიოზული ჩრდილი მიაყენა და გამოჩნდა, რომ ანჩელოტის გუნდს შეტევაში აქვს პრობლემები, მომენტების შექმნისა და რეალიზაციის მხრივ. ამის საპასუხოდ კი იტალიელი სპეციალისტი ვერაფერს ახერხებდა, რასაც კრიტიკის მძლავრი ტალღები მოჰყვა. ანჩელოტის პრესის გარდა "ბაიერნის" გულშემატკივარიც დაუპირისპირდა, მაგრამ რეალურად ყველა კარგად ხვდებოდა, რომ ეს უმოქმედობა უბრალოდ დროის საკითხი იყო.

მართლაც, კარლო ანჩელოტიმ, დროთა განმავლობაში, სიტუაცია გამოსწორა, ახალი ტაქტიკური განლაგება შეიმუშავა და "ბაიერნს" თითქოს ახალი სისხლი გადაუსხა. პირველი წრის ბოლო თამაშებში მიუნხენელები არანორმალურ სისწრაფეებზე თამაშობდნენ, იდეალურად კომბინირებდნენ და მომენტებსაც დიდი რაოდენობით ქმნიდნენ. როგორც ჩანს, იტალიელმა გუნდი სერიოზულად დამუხტა, მოთამაშეებს დიდი მოტივაცია ჩაუნერგა და მათაც სერიოზული მიდგომა გამოავლინეს. "დარმშტადტთან" შეხვედრა ცოტათი ამოვარდნილი იყო ტემპიდან, მაგრამ იქ გუნდი დუგლას კოშტას ოსტატობამ იხსნა და კლასის ძალა კიდევ ერთხელ გამოჩნდა. "ატლეტიკოსთან" საშინაო შეხვედრაში და "ლაიფციგთან" საშობაო ფინალში "რეკორდმაისტერმა" იდეალურთან მიახლოვებული თამაში აჩვენა, დაცვაში უშეცდომოდ იმოქმედა, შეტევაში კი - ნაყოფიერად. კარლომ მძიმე პერიოდიდან სწორი დასკვნები გამოიტანა და შედეგიც მიიღო. "ბაიერნმა" საგრძნობლად მოუკლო შეცდომების თვალსაზრისით, გახდა უფრო დამაჯერებელი და რაც მთავარია, უფრო მოტივირებული. ის განწყობა, რომლითაც გუნდი "ლაიფციგთან" შეხვედრაში გავიდა, სწორედ ამაზე მიუთთებს. ანჩელოტი საქმეს სერიოზულად მიუდგა და ყველაფერი კარგად დაასრულა. ბოლო ექვს თამაშში "ბაიერნმა" მხოლოდ გამარჯვებები მოიპოვა, 15 გოლი გაიტანა და მხოლოდ ორი გაუშვა.

ტაქტიკა
პეპ გვარდიოლას მსგავსად, მუდმივი როტაცია კარლო ანჩელოტისაც უყვარს, მაგრამ ტაქტიკური თვალსაზრისით იტალიელი უფრო სტაბილური და პრაგმატულია. ესპანელი სპეციალისტი მუდმივად ახალი სქემების ძიებაში იყო, ანჩელოტიმ კი პირველ წრეში მხოლოდ ორი განლაგება გამოიყენა: 4-3-3 და ბოლოსკენ უკვე 4-2-3-1. ახლა თითოეულ მათგანს დეტალურად განვიხილავთ და დავინახავთ იმ განსხვავებასაც, რომელიც ამ სქემებს შორის არსებობს.

ძირითადი ტაქტიკა, რომელსაც კარლო ანჩელოტი სეზონის პირველ ნახევარში იყენებდა 4-3-3 იყო. ამ დროს ძალიან ბევრი რამ არის დამოკიდებული ფლანგებზე, რომლებიც ძალიან სწრაფად და დინამიურად უნდა მოქმედებდნენ. აი ისე, როგორც დუგლას კოშტა და არიენ რობენი "ლაიფციგთან" შეხვედრაში. აგრეთვე, მნიშვნელოვან როლს ასრულებს ცენტრალური თავდამსხმელი, რობერტ ლევანდოვსკი, რომელიც მუდმივად მოძრაობს და ხან ერთ, ხან მეორე ფლანგზე აღმოჩნდება ხოლმე. ამ გადაადგილებებით პოლონელი თავისუფალ ზონებს ათავისუფლებს, რომლებიც ვინგერებმა უნდა გამოიყენონ და საჯარიმოში სწრაფად შევარდნენ. რაც შეეხება ნახევარდაცვის ხაზს, ამ დროს ცენტრი მაქსიმალურად მჭიდრო და სანდო ხდება. მაგალითად ავიღოთ ტიაგო-ალონსო-ვიდალის ტრიო. ხაბი ტიპიური ჩამშლელის როლს ასრულებს და კონტრშეტევების დროს ცენტრალური მცველის პოზიციაზე იხევს, ტიაგო ალკანტარა კი შემოქმედებითი ტიპის ცენტრია, რომელიც ზევით იწევს და შეტევით ხაზს აქტიურად ეხმარება. რაც შეეხება არტურო ვიდალს, ის ცენტრს ბალანსს მატებს, იბრძვის თითოეული ბურთისათვის და ამავდროულად ანაწილებს კიდეც მას. ასეთ დროს გადამწყვეტ როლს სწორედ ვიდალი ასრულებს, რომელიც საკუთარ თავზე როგორც შავ, ისე თეთრ სამუშაოს იღებს და არის ნამდვილი მებრძოლი. დაცვაში კი ყველაფერი ცხადია და ყველა კლასიკურად მოქმედებს ისე, როგორც იტალიურ ფილოსოფიას შეეფერება. თუმცა, განაპირა მცველები 4-3-3 ტაქტიკაში უფრო თამამად გრძნობენ თავს და შეტევაშიც ხშირად მიდიან, რადგან ამ შემთხვევაში უკან ერთ-ერთი საყრდენი დაიწევს და უკანა ხაზში დიდი ნაპრალი არ გაჩნდება.

რაც შეეხება 4-2-3-1 განლაგებას, რომლის დროსაც "ბაიერნმა" შეტავაში დიდებული თამაში აჩვენა, ფლანგებს კვლავ დიდი როლი აქვს, მაგრამ წინა პლანზე გამოდის გამთამაშებელი, რომელიც ტომას მიულერია. 27 წლის გერმანელი მოედანს მშვენივრად ხედავს, ბურთს კარგად ანაწილებს და ხიფათს თავადაც ქმნის. თუმცა, მთავარი დატვირთვა უკვე ფლანგის შემტევებზე მოდის, რომლებიც ვალდებულნი არიან უკან დაიხიონ, დაეხმარნონ მცველებს და ამავდროულად, შეტევაში ძალიან მობილურად იმოქმედონ. ასეთ დროს ხშირია ფლანგების გაცვლა, მიულერის მარჯვნივ გადაწევა, ლევანდოვსკის კი მარცხნივ. როგორც წესი, პოლონელი უფრო დიდ დროს ატარებს საჯარიმოში, რადგან მის საქმეს უკვე მიულერი ასრულებს ე.წ. "ცრუ ცხრიანი", რომელიც მის უკან მოქმედებს. ცენტრი შედარებით შესუსტებულია, მაგრამ ამ სქემას ტიაგო-ვიდალის დუეტი იდეალურად ერგება. ალკანტარა შემოქმედებით სამუშაოს შეასრულებს, ვიდალი კი - შავ სამუშაოს. დაცვის ცენტრი კვლავ კლასიკურად მოქმედებს, განაპირა მცველები კი უფრო მეტად დაცვაზე არიან ორიენტირებულნი, რადგან დაზღვევა შედარებით სუსტია. ასეთ შემთხვევაში, როგორც წესი, წინ ერთ-ერთი განაპირა მცველი მიდის, რომელსაც ზევიდან ერთ-ერთი საყრდენი აზღვევს, ხოლო ცენტრში ადგილს მეორე განაპირა მცველი იკავებს და რთული გამოსაცნობი არ არის თუ ვის შეუძლია ამის იდეალურად გაკეთება. ფილიპ ლამი მოედნის ცენტრში ანჩელოტიმაც არა ერთხელ გამოიყენა, თანაც გერმანელი უკვე 33 წლის არის და შეტევიდან უკან დროულად დაბრუნებას ყოველთვის ვეღარ ასწრებს.

4-2-3-1 სქემამ იდეალურად იმუშავა და ანჩელოტი ამ ტაქტიკაზე სავარაუდოდ სერიოზულ იმედებს ამყარებს. თუმცა, 4-3-3 აქტიური ფლანგებისა და ტიაგოს კარგი თამაშის შემთხვევაში ასევე ძალიან მომხიბვლელია. ასე, რომ იტალიელს ორი სქემა აქვს შემუშავებული და ვნახოთ რომელზე გააკეთებს აქცენტს სეზონის ყველაზე მნიშვნელოვან თამაშებში. ჯერ ცალსახად უპირატესობის მინიჭება ნამდვილად რთულია.

მოულოდნელი პრობლემა
ალბათ ვერავინ წარმოიდგენდა, რომ ტომას მიულერი ოდესმე გუნდის პრობლემა იქნებოდა, მაგრამ ახლა ეს ასეა. კარლო ანჩელოტიმ გერმანელის ფლანგის მოთამაშედ გადაქცევა გადაწყვიტა და ეს ექსპერიმენტი კრახით დასრულდა. მიულერმა ბუნდესლიგაში ვერცერთი გოლი ვერ გაიტანა მანამ, სანამ თავის საყვარელ ათიანის პოზიციას არ დაუბრუნდა. გადაეწყო თუ არა "ბაიერნი" 4-2-3-1 განლაგებაზე, ტომასი მაშინვე ათამაშდა და ბრწყინვალე მატჩები ჩაატარა. თუმცა, როგორც ანჩელოტიმ აღნიშნა, ის არა ინდივიდუალურად მოთამაშეებზე, არამედ მთელს გუნდზე მუშაობს და ამიტომ მიულერის გამო 4-3-3 ტაქტიკას ვერ დაივიწყებს. აქედან გამომდინარე, არ არის გამორიცხული, რომ მიულერი "რეკორდმაისტერის" ძირითადი და წამყვანი მოთამაშე აღარ იყოს, რაც გულშემატკივრებისათვის ძალიან მძიმე გადასატანი იქნება. თუმცა, როგორც უკვე აღვნიშნეთ, ტომასი ათიანის პოზიციაზე თავს ისე გრძნობს, როგორც თევზი წყალში, ამიტომ ჯერ ყველაფერი გადაწყვეტილი არ არის.

თუმცა, უკვე ფაქტია, რომ ტომას მიულერი ანჩელოტის მთავარი თავისტკივილია და იტალიელისთვის არცერთ მოთამაშეს არ შეუქმნია იმდენი პრობლემა, რამდენიც მიულერმა შეუქმნა. აშკარაა, რომ ტომასი ფლანგზე არ ვარგა, საბოლოო არჩევანს კი თავად პაპა კარლო გააკეთებს.

საბოლოო ჯამში კი შეიძლება ითქვას, რომ მიუნხენის "ბაიერნი" სწორედ ისე გამოიყურება, როგორც კარლო ანჩელოტისგან იყო მოსალოდნელი. გუნდს პირველ წრეში სერიოზული პრობლემები ჰქონდა, იყო ნერვიული მომენტებიც, მაგრამ იტალიელმა საკუთარი კლასი და გამოცდილება ბოლოს მაინც გამოავლინა. ყველაზე მთავარი კი ის არის, რომ მისი გუნდებისათვის ეს ჩვეულებრივი მომენტია. ანჩელოტიმ იდეალურად იცის თუ როდის უნდა მიიყვანოს გუნდი ფორმის პიკში. როგორც წესი, პაპა კარლოს გუნდები სეზონის ყველაზე მნიშვნელოვანი ნაწილისათვის სრულ მზადყოფნაში იყვნენ ხოლმე და იმედია, "ბაიერნი" გამონაკლისი არ იქნება.

საკუთარი პრაგმატული ხედვითა და ტაქტიკური სტაბილურობით ის იუპ ჰაინკესს წააგავს, ამიტომ ანჩელოტის მიმართ "ბაიერნის" გულშემატკივრები საკმაოდ სიმპათიურად არიან განწყობილნი. პირველი წრის დასრულებამ კიდე დაგვანახა, რომ იტალიელი მართლაც მსოფლიოში ერთ-ერთი უძლიერესი სპეციალისტია, რომელმაც საკუთარი საქმე იდეალურად იცის. ასე, რომ დაველოდოთ სეზონის მეორე ნახევარს და ანჩელოტის მუშაობის გაგრძელებას. ჩვენ კი 2016/17 წლების სეზონის პირველი ნახევრის შეჯამება მხოლოდ ახლა დავიწყეთ და გაგრძელებას უახლოეს დღეებში შემოგთავაზებთ.

დავით მაღრაძე, სპეციალურად Bayern.ge-სთვის
скачать dle 11.1смотреть фильмы бесплатно

ფეხბურთის ანგარიშები იხილეთ აქ - LIVESCORE

ასევე იხილეთ თემაზე:
კარლო ანჩელოტი ბლოგი
მსგავსი სიახლეები
კომენტარები
Hansi
Hansi | 28 დეკემბერი 2016 13:30
რას არ გაიგებს კაცი joy joy მიულერი რომ პრობლემა გახდება ეს მწვრთნელის დიდი დამსახურების გამო უნდა მოხდეს.
პრობლემა კი არა მარგალიტი ყავთ გუნდში ტომასას სახით, უბრალოდ ჭკვიანმა იცის თუ როგორ გამოიყენოს და უტვინომ არა. scream
კომენტარის დამატება
ქართული კლავიატურის ჩართვა/გამორთვა ბეჭდვის დროს კლავიშით "~"
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent1488bb5d07biggrindeu
    drinkse05a53f56fcde85da04e41c18eb4b398fan_deutschefcbfcbayernfcbflagge2germanyy
    lolthumbsantatooooralonso1alonso2lewymuller1
    muller2neuerribery1ribery2robben1robben2vidal1
კოდის განახლება

მატჩები


სატურნირო მდგომარეობა