მიუნხენის "ბაიერნის" მთავარმა მწვრთნელმა, ნიკო კოვაჩმა, კლუბის ხელმძღვანელობას მომდევნო სეზონისთვის სერბი სუპერ-ტალანტის დამატება თხოვა.
გერმანული გამოცემა "SportBild" იტყობინება, რომ კოვაჩი "რეკორდმაისტერის" მესვეურებს ფრანკფურტის "აინტრახტის" ახალგაზრდა შემტევ ლუკა იოვიჩზე ესაუბრა და მისი შეძენა მოითხოვა.
21 წლის ლუკა იოვიჩს ნიკო კოვაჩი "აინტრახტიდან" იცნობს. 2017 წლის ზაფხულში ლუკა გერმანულ კლუბში სწორედ კოვაჩმა მიიწვია და ნდობა გამოუცხადა.
მიმდინარე სეზონში კი იოვიჩმა სერიოზული პროგრესი განიცადა და ამ ეტაპზე ბუნდესლიგის საუკეთესო ბომბარდირია - 14 გოლი 20 თამაშში, ხოლო ყველა ტურნირზე ერთად - 28 თამაშში 19 ბურთი.
ლუკა იოვიჩს კატალონიის "ბარსელონაც" აკვირდება. 21 წლის სერბი ტალანტის სატრანსფერო ღირებულება 50 მილიონ ევროს შეადგენს.