გერმანიის ნაკრების თვითმფრინავმა ავარიული დაშვება განახორციელა - რა მოხდა სინამდვილეში?

მოგეხსენებათ, მიმდინარეობდა სანაკრებო პაუზა მსოფლიო ჩემპიონატის შესარჩევი ეტაპისათვის. გერმანიამ ბოლო მატჩი ისლანდიის წინააღმდეგ, რეიკიავიკში ჩაატარა.

როგორც ირკვევა, გერმანელების თვითმფრინავი, რომელსაც გეზი რეიკიავიკიდან ფრანკფურტისკენ ჰქონდა, ავარიულად შოტლანდიის დედაქალაქ ედინბურგში დაეშვა.

თვითმფრინავი ისლანდიიდან პრობლემების გარეშე აფრინდა, თუმცა, შოტლანდიის ქალაქ არბროთის თავზე ავარიული სიგნალი გამოსცა. შედეგად, პილოტი იძულებული გახდა ედინბურგში ავარიული დაშვების უფლება ეთხოვა.

გერმანიის საფეხბურთო კავშირმა უკვე გაავრცელა ინფორმაცია, რომ ეროვნული გუნდის ფეხბურთელები და სამწვრთნელო შტაბის წარმომადგენლები უსაფრთხოდ არიან და თავს კარგად გრძნობენ.