ნაგელსმანი სანეს იცავს: მწვრთნელმა ფანების საქციელს უსამართლო უწოდა

გერმანიის ნაკრების მთავარმა მწვრთნელმა, იულიან ნაგელსმანმა, გულშემატკივრების მხრიდან ლეროი სანეს მიმართ გამოხატულ აგრესიას უსამართლო უწოდა.

ინციდენტი მატჩის მიმდინარეობისას მოხდა, როდესაც მოედანზე შეცვლაზე შემოსულ სანეს ტრიბუნებიდან სტვენითა და უკმაყოფილო შეძახილებით შეხვდნენ. ნაგელსმანი ამ ფაქტმა აშკარად გაანაწყენა და მატჩისშემდგომ ინტერვიუში ფეხბურთელი საჯაროდ დაიცვა.

მწვრთნელის თქმით, გაუგებარია, რატომ უსტვენენ ფეხბურთელს მანამ, სანამ ის ბურთს პირველად შეეხება. ნაგელსმანმა ხაზი გაუსვა, რომ მსგავსი დამოკიდებულება მოთამაშეზე ფსიქოლოგიურად ცუდად მოქმედებს და გუნდურ სულისკვეთებას აზიანებს.

მიუხედავად იმისა, რომ სანეს ბოლო დროს სტაბილურობა აკლია, ნაგელსმანი მიიჩნევს, რომ საკუთარი ქვეყნის ქომაგებისგან ის მეტ მხარდაჭერას იმსახურებს, განსაკუთრებით მაშინ, როცა საქმე ნაკრების ინტერესებს ეხება.