საიდუმლო ბანერები და წითელი ტრიბუნები - რას ამზადებენ ბაიერნის ფანები?

დღეს მიუნხენში მხოლოდ ფეხბურთი არ იქნება, ეს იქნება ნამდვილი სანახაობა ტრიბუნებზე. ბაიერნის ფან-კლუბებმა მატჩისთვის განსაკუთრებული მზადება დაასრულეს.

ბაიერნის გულშემატკივრებმა მოამზადეს მასშტაბური ტიფო, რომელიც გუნდების მოედანზე გამოსვლისას გამოჩნდება. მისი შინაარსი მკაცრად გასაიდუმლოებულია - ფანებს სურთ, რომ ეს სიურპრიზი იყოს ყველასთვის, მათ შორის თავად ფეხბურთელებისთვისაც.

ფან-გაერთიანება Club No. 12 მოუწოდებს სტადიონზე მისულ ყველა გულშემატკივარს, რომ კლუბის თხოვნის შესაბამისად, ყველას ეცვას წითელი. მიზანია, სტადიონი ერთიან, მძლავრ წითელ ფერში აბობოქრდეს.

მხარდაჭერა მატჩის სასტვენამდე ბევრად ადრე დაიწყება. ფანები გეგმავენ, რომ თამაშის დაწყებამდე 45 წუთით ადრე სტადიონზე ნამდვილი ხმაური მოაწყონ, რათა რეალის ფეხბურთელებმა ფსიქოლოგიური წნეხი მოედანზე გამოსვლისთანავე იგრძნონ.