კიმიხი: "არ დაგავიწყდეთ - რეალს ორივე მატჩი მოვუგეთ!"

რეალთან მატჩის შემდეგ კიმიხმა გუნდის თამაში და ის სირთულეები შეაფასა, რაც ბაიერნმა გამარჯვების გზაზე გადალახა. მისი თქმით, მიუხედავად ხარვეზებისა, შედეგი სავსებით დამსახურებულია.
კიმიხმა აღნიშნა, რომ პირველი ტაიმი საკმაოდ ქაოსური გამოდგა:

„ვიცოდით, რომ ორივე გუნდს შეეძლო ერთმანეთისთვის ტკივილის მიყენება - ჩვენ მაღალი პრესინგით, რეალს კი სწრაფი გარდამავალი შეტევებით. ცუდად დავიწყეთ, გოლი ჯარიმიდან და კონტრშეტევიდან გავუშვით. პირველი ტაიმი ძალიან დაძაბული და ქაოსური იყო. მეორე ნახევარში დავწყნარდით, მეტი კონტროლი მოვიპოვეთ და საბოლოოდ მოგებაც შევძელით.“

მიუხედავად იმისა, რომ კიმიხი კრიტიკულია თამაშის ხარისხის მიმართ, ის შედეგით ამაყობს:

„ეს არ იყო ჩვენი საუკეთესო პერფორმანსი, მაგრამ გამარჯვებას ვიღებთ. არ უნდა დაგვავიწყდეს, რომ ისეთ გუნდს, როგორიც რეალია, ორივე თამაში მოვუგეთ!“