კეინი: "მეტი გოლის გატანა და თამაშის უფრო ადრე დასრულება შეგვეძლო"

ჰარი კეინმა ლევერკუზენთან მოპოვებული გამარჯვება და ფინალში გასვლა შეაფასა.

ინგლისელი ფორვარდი გუნდის გამოსვლით კმაყოფილია და მიიჩნევს, რომ გამარჯვება დამსახურებული იყო: „თავიდან ბოლომდე უმაღლესი დონის თამაში ვაჩვენეთ. მეტოქეს პრესინგს ვეთამაშებოდით და ბურთს მაღლა ვიგებდით. მეტი გოლის გატანა და თამაშის ბედის უფრო ადრე გადაწყვეტაც შეგვეძლო. მთლიანობაში, მათ ბევრი მომენტი არ ჰქონიათ და ეს მოგება დავიმსახურეთ.“

კეინმა აღნიშნა, რომ თასზე წარმატება გუნდისთვის პრიორიტეტი თავიდანვე იყო: „ჯერ კიდევ სეზონის დასაწყისში ვთქვით, რომ გერმანიის თასის მოგება ჩვენი მიზანი იყო. ბიჭები მეუბნებოდნენ, რომ ბერლინში თამაში საოცარი გამოცდილებაა. ძალიან ბედნიერი ვარ, რომ იქ მოვხვდით.“