მწვანე შუქი ანთებულია - ვინ ხდება ზაფხულის პირველი მთავარი შენაძენი?

მიუნხენის ბაიერნი ზაფხულის სატრანსფერო ფანჯრისთვის მზადებას ააქტიურებს და მათი მთავარი სამიზნე ატალანტას 25 წლის შემტევი, შარლ დე კეტელარეა.

კლუბის ინტერესი იმდენად კონკრეტულია, რომ ფეხბურთელმა პოტენციურ ტრანსფერზე მწვანე შუქი უკვე აანთო. პერსონალური კონტრაქტის დეტალები პრობლემას არ წარმოადგენს - ბელგიელს ალიანც არენაზე თამაში ძალიან სურს და პირობებზე წინასწარ თანხმობა უკვე განაცხადა.

ბაიერნის ხელმძღვანელობა დე კეტელარეს პროფილს ზაფხულის პრიორიტეტად მიიჩნევს. კლუბს განსაკუთრებით ხიბლავს მისი შემტევი მრავალფეროვნება, ტექნიკური მონაცემები და ხაზებს შორის თამაშის უნარი, რაც ვენსან კომპანის ტაქტიკას იდეალურად მოერგება.

ახლა ჯერი კლუბებზეა: ბაიერნი და ატალანტა მოლაპარაკებების მაგიდასთან უახლოეს კვირებში დასხდებიან, რათა სატრანსფერო ფასზე შეთანხმდნენ. მიუნხენელები მზად არიან, ბელგიელი ტალანტის სანაცვლოდ სოლიდური თანხა გადაიხადონ.