ალაბას და მიულერს საოცარ რეკორდამდე ერთი ტიტული აშორებთ

მოგეხსენებათ, ბუნდესლიგის 2019/20 წლების სეზონის ჩემპიონის ტიტული "ბაიერნმა" ვადაზე ადრე მოიპოვა და მოთამაშეებმაც კიდევ ერთი ოქროს მედალი შემატეს საკუთარ მუზეუმებს.

აღსანიშნავია, რომ ამ ჩემპიონობის წყალობით გუნდის გამოცდილი მოთამაშეები, დავიდ ალაბა და თომას მიულერი ახალი, საოცარი რეკორდის ზღვარზე არიან.

კერძოდ, ორივე ზემოხსენებულ ფეხბურთელს უკვე ბუნდესლიგის 9 ჩემპიონის ტიტული დაუგროვდათ, რითაც გადაასწრეს ბასტიან შვაინშტაიგერსა და ფილიპ ლამს და ფრანკ რიბერის დაწევა მოახერხეს.

შესაბამისად, იმ შემთხვევაში, თუ "ბაიერნი" მომავალ სეზონშიც აღმართავს თასს, მაშინ მიულერი და ალაბა უკან მოიტოვებენ ფრანგ ლეგენდას და ბუნდესლიგის ახალი რეკორდსმენები გახდებიან.