"ბაიერნის" ულტიმატუმი კიმიხს - რა მოხდება ზამთრის შესვენებაზე?

ზამთრის შესვენება მიუნხენის "ბაიერნისთვის" უმნიშვნელოვანესი პერიოდი იქნება, რადგან კლუბის ხელმძღვანელები გეგმავენ, რამდენიმე საკვანძო მოთამაშის გრძელვადიანი მომავალი გაარკვიონ. მაქს ებერლი და კრისტოფ ფროინდი მოლაპარაკებებს გამართავენ იმ ფეხბურთელებთან, რომლებსაც კონტრაქტის დასრულებამდე ექვს თვეზე ნაკლები დარჩათ.

გამონაკლისია ჯამალ მუსიალა, რადგან გერმანელ თავდამსხმელს მოქმედი კონტრაქტის ამოწურვამდე 18 თვე დარჩა. თუმცა "ბაიერნი" მზად არის, ახალი კონტრაქტით დააჯილდოვოს ის.

მუსიალას გარდა, "ბაიერნი" ზამთრის შესვენების დროს იოზუა კიმიხის კონტრაქტის გაგრძელებას უმთავრეს პრიორიტეტად მიიჩნევს. გერმანელი ნახევარმცველი ამ სეზონში "ბაიერნის" ერთ-ერთი ყველაზე სტაბილური მოთამაშეა. მას ჯერ არ გამოუტოვებია არცერთი წუთი ბუნდესლიგაში მიმდინარე სეზონის განმავლობაში.

გასულ სეზონში "ბაიერნსა" და კიმიხს შორის ურთიერთობა დაძაბული იყო. 29 წლის ფეხბურთელმა კლუბის მხარდაჭერის ნაკლებობაზე ისაუბრა, ხოლო "ბაიერნი" მზად იყო ზაფხულში მისი გაყიდვისთვის. "პსჟ" კიმიხის ტრანსფერთან დაკავშირებით დაინტერესებული იყო.

ბოლო ექვსი თვის განმავლობაში ვითარება გაუმჯობესდა. "ბაიერნი" კიმიხს გრძელვადიან პერსპექტივაში ლიდერთა ჯგუფის ნაწილად განიხილავს. კლუბის ზოგიერთი წარმომადგენელი მას პირველ გუნდში კაპიტნის მომავალ კანდიდატადაც მიიჩნევს. თუმცა, "ბაიერნს" ჯერ არ მიუღწევია შეთანხმება კონტრაქტის გაგრძელებაზე.

Sky Sports-ის ინფორმაციით, "ბაიერნმა" კიმიხს სთხოვა, იანვარში საბოლოო გადაწყვეტილება მიეღო. კლუბს არ სურს, რომ გერმანელმა ნახევარმცველმა კიდევ რამდენიმე თვე დაყოვნოს თავისი გრძელვადიანი მომავლის საკითხზე.